མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

གཞན་དོན་ཆེད་རང་ལུས་དང་རང་སྲོག་དོར་བ་ནི་འཚེ་བའི་ལས་མ་ཡིན།

བོད་ཀྱི་དུས་བབ།
༢༠༡༡/༡༠/༢༢
Share on FacebookShare on TwitterShare on EmailShare on Whatsapp

ཤཱཀྱའི་བུ་ནས།

 

༄༅།། རྔ་པ་ཀིརྟི་དགོན་པའི་དགེ་འདུན་པས་གཙོས་མདོ་སྟོད་སྨད་ཁུལ་གྱི་བོད་མི་གཞོན་སྐྱེས་རྣམས་ཀྱིས་བོད་མི་ས་ཡ་དྲུག་གི་རང་དབང་བདེ་སྐྱིད་ཀྱི་ཆེད་རང་ལུས་མེར་བསྲེགས་ཏེ་རང་སྲོག་འདོར་བཞིན་པ་འདི། རྒྱ་ནག་གཞུང་གིས་ནང་པའི་ལྟ་སྤྱོད་ལ་འགལ་ཚུལ་དང་དྲག་ལས་ཡིན་ཚུལ་དྲིལ་བསྒྲགས་བྱེད་བཞིན་པ་ནི་ནང་ཆོས་ཀྱི་གོ་རྟོགས་མེད་པ་དང་ཆབ་སྲིད་དགོས་དབང་གིས་འཁྱོག་བཤད་བྱས་པའི་རྫུན་གཏམ་ཞིག་ཡིན། གཞན་དོན་ཆེད་རང་ལུས་དང་རང་སྲོག་དོར་བ་ནི། ནང་པའི་ལྟ་སྤྱོད་དང་མི་འགལ་ཞིང༌། དྲག་སྤྱོད་ཕར་ཞོག་འཚེ་བའི་ལས་ཙམ་ཡང་མ་ཡིན་པ་ནི་ནང་པའི་གཞུང་ཆེན་མོ་རྣམས་དང་འཚེ་མེད་ཞི་བའི་ལམ་སྟོན་པ་རྣམས་ཀྱི་གསུང་ནས་ར་སྤྲོད་གསལ་པོ་བྱེད་ཐུབ།

 

དང་པོ། ཆོས་ཀྱི་དོན་དུ་རང་གི་ལུས་སྲོག་གཏོང་འོས་པ་དང་བཏང་བའི་དཔེ་མཚོན་སྐོར།

༡          མངོན་རྟོགས་རྒྱན་ལས། ཆོས་ཀྱི་དོན་དུ་སྲོག་གཏོང་བ།། ཞེས་གསུངས་ཤིང༌། དེའི་དོན་ནི། གཅིག་ཏུ་གཞོལ་བ་ཉིད་ཀྱིས་རྣམ་པ་ཐམས་ཅད་མཁྱེན་པ་ཉིད་ལ་སོགས་པའི་ཆོས་ཀྱི་དོན་དུ་སྲོག་གཏོང་བ་ཞེས་བྱ་བ་བཞི་ནི་ལམ་གྱི་རྣམ་པ་ཡིན་ཏེ། ཞེས་གསུངས། (འགྲེལ་པ་དོན་གསལ་ལས།)

༢          བླ་མ་ལྔ་བཅུ་པ་ལས། རང་གི་དམ་ཚིག་སློབ་དཔོན་ནི།།སྦྱིན་མིན་བུ་དང་ཆུང་མ་དང༌།།རང་སྲོག་གིས་རྟག་བསྟེན་བྱ་ན།།ལོངས་སྤྱོད་གཡོ་བས་སྨོས་ཅི་དགོས།། ཞེས་གསུངས་ཤིང༌། དེའི་དོན་ནི། རང་གི་དམ་ཚིག་གི་སློབ་དཔོན་ནི་སྦྱིན་མིན་ཏེ་སྦྱིན་པར་དཀའ་བའི་བུ་དང་ཆུང་མ་དང་རང་གི་སྲོག་ཡོན་དུ་ཕུལ་བས་ཀྱང་མཉེས་པར་བྱ་དགོས་ན་ཕྱིའི་ལོངས་སྤྱོད་གཡོ་བ་སྟེ་མི་རྟག་པའི་ཟང་ཟིང་གི་རྫས་ཀྱིས་མཉེས་པར་བྱ་བ་སྨོས་ཅི་དགོས། ཞེས་གསུངས། (རྗེ་ཙོང་ཁ་པ་ཆེན་པོས་མཛད་པའི་བླ་མ་ལྔ་བཅུ་པའི་རྣམ་བཤད་ལས།)

༣           བརྟེན་ནས་འབྱུང་བའི་དེ་ཉིད་གསལ་མཛད་པ།།ཐུབ་པའི་ལུགས་བཟང་སྐྱེ་བ་ཐམས་ཅད་དུ།།ལུས་དང་སྲོག་ཀྱང་བཏང་ནས་འཛིན་པ་ལ།།སྐད་ཅིག་ཙམ་ཡང་ལྷོད་པར་མ་གྱུར་ཅིག། ཅེས་གསུངས།(རྗེ་ཙོང་ཁ་པ་ཆེན་པོའི་གསུང་རྟེན་འབྲེལ་བསྟོད་པ་ལས།)

༤         སྲོག་ལ་བབས་ཀྱང་སྐྱབས་འགྲོ་མི་གཏོང་བ་ཞིག་དགོས་ཏེ། སྔོན་རྒྱ་གར་དུ་ནང་པའི་དགེ་བསྙེན་ཞིག་མུ་སྟེགས་པ་རྣམས་ཀྱིས་བཟུང་ནས་ཁྱོད་དཀོན་མཆོག་གསུམ་ལ་སྐྱབས་འགྲོ་བྱེད་པ་གཏོང་ན་མི་གསོད། དེ་མི་གཏོང་ན་ཁྱོད་གསོད་པ་ཡིན་ཟེར་བ་ལ། ངས་ཚིག་ཙམ་དུ་ནི་དཀོན་མཆོག་གི་སྐྱབས་འགྲོ་གཏོང༌། སྙིང་ཐག་པ་ནས་མི་གཏོང་ཟེར་བས་དགེ་བསྙེན་མུ་སྟེགས་པ་རྣམས་ཀྱིས་བསད་པ་ཡིན་ཏེ། དེ་ལྟ་བུ་ཞིག་ཅིས་ཀྱང་དགོས། ཞེས་གསུངས།(རྫ་དཔལ་སྤྲུལ་གྱི་གསུང་ཀུན་བཟང་བླ་མའི་ཞལ་ལུང་ལས། )

༥ བཅོམ་ལྡན་འདས་སྔོན་རྒྱལ་བུ་སེམས་ཅན་ཆེན་པོའི་སྐྱེ་བ་བཞེས་པའི་སྐབས་སུ་སྟག་མོ་ལ་ལུས་བྱིན་པའི་ཚུལ། བདག་(རྒྱལ་བུ)ཡུན་རིང་པོ་ནས་འཁོར་བ་ན་འཁོར་ཞིང་ལུས་དང་སྲོག་གྲངས་མེད་པ་ཞིག་ཆུད་གསན་ཏེ། བར་འགའ་ནི་འདོད་ཆགས་ཀྱི་ཕྱིར། བར་འགའ་ནི་ཞེ་སྡང་གི་ཕྱིར། བར་འགའ་ནི་གཏི་མུག་གི་ཕྱིར་ལུས་བཏང་སྟེ། ཆོས་ཀྱི་ཕྱིར་བསོད་ནམས་ཀྱི་ཞིང་དང་ལན་འགའ་ཡང་མ་ཕྲད་པའི་ལུས་འདི་ཅི་རུང་སྙམ་བསམ་པ་ཐག་བཅད་ནས། ཞེས་དང༌། སྟག་མོའི་ཚང་གང་ན་འདུག་པར་མྱུར་དུ་སོང་ནས་སྟག་མོའི་དྲུང་དུ་ཉལ་བ་དང༌། སྟག་མོ་ཁ་འཐམས་ནས་ཟ་མ་ནུས་སོ། དེའི་ཚེ་རྒྱལ་བུས་ཤིང་གི་ཚལ་པ་རྣོན་པོས་ལུས་ལ་ཁྲག་ཕྱུང་ནས་སྟག་མོ་ལ་ལྡག་ཏུ་བཅུག་པ་དང༌། ཁ་ཡང་ཕྱེ་ནས་ལུས་ཀྱི་ཤ་མ་ལུས་པར་ཟོས་སོ།། ཞེས་གསུངས། (མདོ་མཛངས་བླུན་ལས།)

༦         བཅོམ་ལྡན་འདས་སྔོན་རྒྱལ་པོ་བྱམས་པའི་སྟོབས་ཀྱི་སྐྱེ་བ་བཞེས་པའི་སྐབས་གནོད་སྦྱིན་རྣམས་ལ་རང་གི་ལུས་ཀྱི་ཁྲག་བྱིན་པའི་ཚུལ།  ་་་དེའི་ཚེ་གནོད་སྦྱིན་ལྔ་ཞིག་རྒྱལ་པོའི་(རྒྱལ་པོ་བྱམས་པའི་སྟོབས)དྲུང་དུ་འོངས་ནས་འདི་སྐད་ཅེས་སྨྲས་སོ། བདག་ཅག་གི་ཟས་ནི་མིའི་མདངས་དང་ཁྲག་ལ་ལྟོས་ཏེ་ལུས་དང་སྲོག་འཚོ་བ་ལས། རྒྱལ་པོས་བཀར་བཏགས་ཏེ་ཐམས་ཅད་དགེ་བ་བཅུ་ལ་གནས་པས་བདག་ཅག་ཟས་དང་སྐོམ་མ་རྙེད་དེ། ཉམ་ཐག་ནས་སྲོག་ལ་བབ་བོ། རྒྱལ་པོ་ཆེན་པོ། བདག་ཅག་ལ་ཡང་ཐུགས་མི་བརྩེའམ་ཞེས་གསོལ་ནས་རྒྱལ་པོས་ཀྱང་དེ་དག་ལ་སྙིང་བརྩེ་བའི་ཕྱིར་ལུས་ཀྱི་ཡན་ལག་ལྔ་ལས་རྩ་ལྔ་བཅད་ནས་གནོད་སྦྱིན་རྣམས་སོ་སོ་ནས་སྣོད་བཟེད་དེ་ཁྲག་ལས་ངོམས་པར་འཐུང་དུ་བཅུག་གོ། ཞེས་གསུངས། (མདོ་མཛངས་བླུན་ལས།)

༧         བཅོམ་ལྡན་འདས་མྱ་ངན་ལས་འདས་པའི་རྗེས་སུ། ཡུལ་ཨནྟ་ཞེས་པའི་ཡུལ་དུ་ཚུལ་ཁྲིམས་རྣམ་པར་དག་པ་སྲུང་བའི་དགེ་ཚུལ་ཞིག་གི་མདུན་དུ་བུ་མོ་ཞིག་གིས་བསླུ་བའི་རྣམ་པ་མང་པོ་བྱས་པའི་ཚེ་ན། དགེ་ཚུལ་དེས། བདག་ནི་སངས་ རྒྱས་དང༌། ཆོས་དང༌། དགེ་འདུན་སྤོང་བ་མ་ལགས། མཁན་པོ་དང་སློབ་དཔོན་སྤོང་བ་མ་ལགས། ཚུལ་ཁྲིམས་སྤོང་བ་མ་ལགས་ཀྱི། ཚུལ་ཁྲིམས་སྲུང་བའི་སླད་དུ་ལུས་འདི་སྤོང་ངོ༌། བདག་གར་སྐྱེས་ཀྱང་སངས་རྒྱས་ཀྱི་བསྟན་པ་ལ་རབ་ཏུ་འབྱུང་བ་དང༌། ཚངས་པ་མཚུངས་པར་སྤྱོད་པ་རྣམ་པར་དག་པ་དང༌། ཟག་པ་ཟད་པ་དང༌། འབྲས་བུ་གྲུབ་པར་གྱུར་ཅིག་ཅེས་སྨོན་ལམ་བཏབ་ནས་རང་གི་མགུལ་བ་བཅད་དེ་ཚེ་འཕོས་སོ། ཁྲག་གིས་ས་གཡོག་ནས་ལུས་ཀྱང་ཁྲག་གིས་དམར་པོར་གྱུར་ཏོ།། ཞེས་གསུངས། (མདོ་མཛངས་བླུན་ལས།)

༨          བྱང་ཆུབ་སེམས་དཔའ་རྟག་ཏུ་ངུས་བྱང་ཆུབ་སེམས་དཔའ་ཆོས་འཕགས་ལས་ཆོས་ཉན་པའི་ཕྱིར་དུ་རང་གི་ལུས་བཙོང་བར་འདོད་པའི་སྐབས་ལྷའི་དབང་པོ་བརྒྱ་བྱིན་གྱིས་ཉམས་སད་པའི་ཆེད་བྲམ་ཟེའི་ཁྱེའུ་ཞིག་ཏུ་སྤྲུལ་ནས་ལུས་ཉོས་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཚམ་ཚོམ་མེད་པར་རང་གི་ལུས་ཀྱི་བརླ་གཡས་པའི་ཤ་བཏོགས་ནས་མཚོན་རྣོན་པོས་ལུས་ཕུག་སྟེ། ཁྲག་ཟག་ཅིང་རུས་པ་གཅོག་ཏུ་རྩིག་པའི་དྲུང་དུ་ཕྱིན་ཏོ། ཞེས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་འཕགས་ཀྱིས་ཆོས་གསུང་བའི་ས་ཕྱོགས་སུ་བྱི་དོར་གྱིས་ཆག་ཆག་གདབ་པར་འདོད་ཀྱང་བདུད་ཀྱིས་ཆུ་ཐམས་ཅད་མི་སྣང་བར་བྱས་པས། བྱང་ཆུབ་སེམས་དཔའ་རྟག་ཏུ་ངུས། བདག་གི་ལུས་ཕུག་ལ་ཁྲག་གིས་ས་ཕྱོགས་འདིར་ཆག་ཆག་གདབ་བོ་སྙམ་ནས་མཚོན་རྣོན་པོས་རང་གི་ལུས་ཕུག་དྲལ་ཏེ་ཁྲག་གིས་ས་ཕྱོགས་དེའི་ཁོར་ཡུག་ཏུ་ཆག་ཆག་བཏབ་བོ། ཚོང་དཔོན་གྱི་བུ་མོ་ལ་སོགས་པ་ལྔ་བརྒྱ་པོ་དེ་དག་གིས་ཀྱང༌། མཚོན་རྣོན་པོས་རང་རང་གི་ལུས་ལས་ཕྱུང་བའི་ཁྲག་གིས་ས་ཕྱོགས་དེར་ཆག་ཆག་བཏབ་བོ།། ཞེས་གསུངས། (རྗེ་ཙོང་ཁ་པ་ཆེན་པོའི་གསུང་འཕགས་པ་རྟག་ངུའི་རྟོགས་བརྗོད་ལས།)

༩          དེ་ཡང་སྔོན་བདག་ཅག་གི་སྟོན་པ་དེད་དཔོན་སྙིང་རྗེ་ཆེན་པོར་སྐུ་སྐྱེ་བ་བཞེས་སྐབས་ཚོང་པ་ལྔ་བརྒྱ་དང་བཅས་རྒྱ་མཚོར་ཕྱིན་པའི་ལམ་དུ་མི་ནག་མདུང་ཐུང་ཅན་བྱ་བའི་ཆོམ་རྐུན་གདུག་པ་ཅན་ཞིག་ཚོང་པ་ལྔ་བརྒྱ་གསོད་དུ་བྱུང་བས། ཁོང་གི་ཐུགས་དགོངས་ལ་ཚོང་པ་ལྔ་བརྒྱ་པོ་འདི་དག་ཕྱིར་མི་ལྡོག་པའི་བྱང་ཆུབ་སེམས་དཔའ་ཤ་སྟག་ཡིན་པས་འདི་ཐམས་ཅད་མི་གཅིག་གིས་བསད་ན་དེ་བསྐལ་པ་དཔག་ཏུ་མེད་པའི་བར་དམྱལ་བར་གནས་དགོས་པར་འགྱུར་བས་སྙིང་རེ་རྗེ། དེ་བས་ངས་འདི་བསད་ན་འདི་དམྱལ་བར་མི་འགྲོ་བར་འདུག་པས་ང་རང་དམྱལ་བར་སོང་ཡང་ཐབས་མེད་སྙམ་དུ་བློ་སྟོབས་ཆེན་པོས་དགོངས་ནས་ཆོམ་རྐུན་དེ་བསད་པས་བསྐལ་པ་བདུན་ཁྲིའི་ཚོགས་རྫོགས་པ་ཡིན། དེ་ཡང་ལྟར་སྣང་ལ་མི་དགེ་བ་ཡིན་ཏེ་ཁོང་བྱང་ཆུབ་སེམས་དཔའ་ཞིག་གིས་དངོས་སུ་མི་ཞིག་བསད་པ་ཡིན། དོན་དུ་དགེ་བ་ཡིན་ཏེ་ཁོང་ལ་རང་འདོད་ཀྱི་འཁྲིས་མེད་ཅིང་འཕྲལ་དུ་ཚོང་པ་ལྔ་བརྒྱའི་སྲོག་བསྐྱབས་པ་དང༌། ཕུགས་སུ་མི་ནག་མདུང་ཐུང་ཅན་དམྱལ་བའི་སྡུག་བསྔལ་ལས་བསྐྱབས་པས་དགེ་བ་རླབས་པོ་ཆེར་གྱུར་པ་ཡིན། ཞཻས་གསུངས།(རྫ་དཔལ་སྤྲུལ་གྱི་ཀུན་བཟང་བླ་མའི་ཞལ་ལུང་ལས།)

༡༠        མདོར་ན་ཡང་དག་པར་རྫོགས་པའི་སངས་རྒྱས་ཀྱིས་སློབ་པའི་དུས་སུ་ཆོས་ཚིགས་བཅད་རེའི་ཕྱིར་དུ་སྐུ་ལུས་ལ་མར་མེ་སྟོང་བཙུགས་པ། ལྕགས་གཟེར་སྟོང་བཏབ་པ་སོགས་དམ་པ་གོང་མ་རྣམས་ཀྱིས་ཆོས་ཀྱི་ཕྱིར་དུ་དཀའ་སྤྱད་དཔག་མེད་མཛད། ཅེས་གསུངས། (ཀིརྟི་བློ་བཟང་འཕྲིན་ལས་ཀྱི་གསུང་ལམ་རིམ་ལས།)

 

གཉིས་པ། དགེ་ཚུལ་སློང་གིས་རང་སྲོག་བཅད་པས་སྲོག་བཅད་པའི་ཕམ་པ་དང་ཕམ་འདྲའི་ཉེས་བྱས་སུ་མི་འགྱུར་བའི་སྐོར།

༡          ལྟུང་བའི་ངོ་བོ་ནི། བཅས་པའི་རྟེན་ཅན་དགེ་སློང་གིས་མི་གཞན་གསོད་སེམས་ཀྱིས་རང་ངམ་བསྐོས་པས་གསོད་པའི་སྦྱོར་བ་བྱས་པ་དེའི་རྐྱེན་གྱིས་ཤི་བ་ལས་གྱུར་པའི་ལྟུང་བ་དངོས་གཞིའོ། ཞེས་དང༌། གཞིའི་ཡན་ལག་ལ་གཉིས་ཏེ། མིའམ་མིར་ཆགས་པ་ཡིན་པ་དང༌། རྒྱུད་ཀྱི་སྒོ་ནས་གཞན་ཡིན་པ་སྟེ། མིར་གྱུར་པའོ་ཞེས་པ་དང༌། འོད་ལྡན་རྩ་འགྲེལ་ལས་མི་གཞན་ཡིན་ལ་ཞེས་བཤད་པས་སོ། སེལ་བ་མི་མ་ཡིན་བསད་ན་སྦོམ་པོ་དང་དུད་འགྲོ་བསད་ན་ལྟུང་བྱེད་དང༌། བདག་ཉིད་གསོད་ན་སྦོམ་པོའོ་ཞེས་གསུངས་སོ།། (འདུལ་བ་མཚོ་ཊིཀ་ལས།)

 

གསུམ་པ། སྤྱིར་རང་སྲོག་བཅད་པས་སྲོག་གཅོད་ཀྱི་ལས་དངོས་གཞིར་མི་འགྱུར་བའི་སྐོར།

༡          མཛོད་རྩ་བར། སྲོག་གཅོད་པ་ནི་བསམ་བཞིན་དུ།།མ་ནོར་བར་ནི་གཞན་བསད་པའོ།། ཞེས་གསུངས། དེའི་དོན་ནི། བསམ་བཞིན་དུ་ཞེས་པས་མ་བསམས་པར་ཤི་བ་ལ་ཉེས་པ་མེད་པར་བསྟན། མ་ནོར་བར་ཞེས་པས་ལྷ་སྦྱིན་ལྟ་བུ་གསོད་པའི་སྦྱོར་བ་བྱས་ནས། གཞན་མཆོད་སྦྱིན་དང་ནོར་ནས་མཆོད་སྦྱིན་བསད་ཀྱང་ལས་ལམ་གྱི་དངོས་གཞི་མི་འབྱུང་བར་བསྟན། གཞན་ཞེས་པས་རང་བསད་པ་ལ་ལས་ལམ་གྱི་དངོས་གཞི་མི་འབྱུང་བར་བསྟན་ཏོ།། ཞེས་གསུངས། རྗེ་དགེ་འདུན་གྲུབ་ཀྱི་མཛོད་འགྲེལ་ལས།

༢          དེ་ལ་སྲོག་གཅོད་ཀྱི་གཞི་ནི། སྲོག་དང་ལྡན་པའི་སེམས་ཅན་ཏེ། དེ་ཡང་གསོད་པ་པོ་རང་ཉིད་གསོད་ན་སྦྱོར་བའི་སྡིག་པ་ཡོད་ཀྱི། མཐར་ཐུག་མེད་པ་ལ་དགོངས་ནས་རྣལ་འབྱོར་སྤྱོད་པའི་ས་ལས་སྲོག་ཆགས་ཕ་རོལ་པོ་ཞེས་གསུངས་སོ། ཞེས་གསུངས། (བྱང་ཆུབ་ལམ་རིམ་ཆེན་མོ་ལས།)

༣          ནོར་བར་བསད་པ་དང་བདག་བསད་པས་ནི་སྲོག་གཅོད་པའི་སྦྱོར་བ་ཙམ་དུ་འགྱུར་གྱི་དངོས་སུ་ནི་མི་འགྱུར་ཏེ། དང་པོ་ལ་བསམས་པའི་དོན་མ་རྫོགས་པའི་ཕྱིར་དང༌། གཉིས་པ་ལ་རྫོགས་པ་ན་ལུས་གཞན་སྐྱེས་པའི་ཕྱིར། ཞེས་གསུངས། (མཆིམས་མཛོད་ལས། )

 

བཞི་པ། འཚེ་བ་མེད་པའི་ལས་འགུལ་ནང་རང་སྲོག་འདོར་བའི་ལས་འགུལ་སྤེལ་ཆོག་པའི་སྐོར།

༡          དེབ་འདིས་(རྒྱ་གར་རང་དབང་ཞེས་པའི་དེབ།)ཁོང་ཁྲོའི་ཆོས་ཀྱི་ཚབ་ཏུ་བརྩེ་བའི་ཆོས་སྟོན་པ་དང༌། འཚེ་བའི་ཚབ་ཏུ་རང་ཉིད་བློས་བཏང་བྱ་དགོས་པ་དེ་འཇོག ཅེས་གསུངས། (གན་དྷིའི་གསུང་རྒྱ་གར་རང་དབང་ལས།)

༢          ཁྱེད་རང་གང་དུ་མ་རབས་ཀྱི་ལས་ཀ་བྱེད་པ་དེར་འབྱོར་ཏེ་མདུན་གྱི་སྲོག་བླང་རྒྱུའི་ཚབ་ཏུ་རང་སྲོག་གཏོང་དགོས་པ་ཡིན། ཞེས་གསུངས། (གན་དྷིའི་གསུང་རྒྱ་གར་རང་དབང་ལས།)

༣          སྐྱེ་བོ་གཞན་བློས་བཏང་བ་ལས་རང་ཉིད་བློས་བཏང་བ་དེ་བཟང་བ་ཡིན། (གན་དྷིའི་གསུང་རྒྱ་གར་རང་དབང་ལས།)

༤         ཇི་སྲིད་གཉའ་གནོན་པ་དེ་བཏུལ་མ་ཐུབ་པ་དེ་སྲིད་སྡུག་རང་འཁུར་དང་སྲོག་ཐོག་ཉེས་ཆད་ཚུན་ཆད་འཁུར་རྒྱུའི་གྲ་སྒྲིག་དགོས། ཞེས་གསུངས།(བདག་ཉིད་ཆེན་པོ་གན་དྷིའི་གསུང་རྩོམ་གཅེས་བཏུས་ལས།)

༥          འཚེ་མེད་ཀྱི་དངོས་ཡོད་ཀྱི་གོ་དོན་ནི། ཁྱེད་ཀྱིས་སུ་ཞིག་གི་ཡིད་སྡུག་བསྔལ་བར་མི་བྱེད་པ་དང༌། ཁྱེད་ལ་རང་གི་དགྲ་བོར་བརྩི་བ་དེའི་ཐོག་ཏུའང་གུ་ཡངས་མིན་པའི་བསམ་ཚུལ་གང་ཡང་ཡིད་ལ་མ་བཞག་པ་དེ་ཡིན། ཞེས་གསུངས། (བདག་ཉིད་ཆེན་པོ་གན་དྷིའི་གསུང་རྩོམ་གཅེས་བཏུས་ལས།)

༦         འཚེ་བ་མེད་པའི་ལྟ་གྲུབ་འདིས་གང་བཤད་ཀྱི་ཡོད་ཅེ་ན། མི་ཞིག་གིས་དེ་འདྲ་བའི་ཚུལ་མིན་གྱི་སྤྱོད་པ་བྱེད་ན། རང་ཉིད་དེ་ཡི་ལག་ཏུ་རྩིས་སྤྲད་དེ་རང་གི་ལྟོས་བཅས་རྣམས་ཀྱི་ཆེ་མཐོང་སྲུང་སྐྱོབ་བྱ་དགོས་པ་དེ་རེད། དེའི་ཆེད་དུ་ལག་འཛིངས་ལས་ཧ་ཅང་ལྷག་པའི་ལུས་སྟོབས་དང་སྙིང་སྟོབས་དགོས་མཁོ་ཡོད། ཅེས་གསུངས། (བདག་ཉིད་ཆེན་པོ་གན་དྷིའི་གསུང་རྩོམ་གཅེས་བཏུས་ལས།)

༧ ཐབས་ལམ་འདི་བདེན་པའི་ཨུ་ཚུགསཉམས་ལེན་བྱེད་མཁན་རྣམས་ཀྱིས་གཞན་གྱི་མགོ་བོ་བཅོམ་མ་དགོས་པར་རང་ཉིད་ཀྱི་མགོ་བོ་ཁོ་ན་བཅོམ་དུ་འཇུག་དགོས། རང་ཉིད་ཀྱིས་མནར་གཅོད་ཆ་ཚང་བཟོད་བཞིན་དུ་འཆི་རྒྱུར་གྲ་སྒྲིག་བྱས་ཏེ་བསྡད་དགོས་པ་ཡིན། ཞེས་གསུངས། (བདག་ཉིད་ཆེན་པོ་གན་དྷིའི་གསུང་རྩོམ་གཅེས་བཏུས་ལས།)

༨          གན་དྷིས། ང་ཚོའི་རང་དབང་མ་སོན་སྔོན་ལ་ཁྲག་གི་རྒྱ་མཚོ་རྒྱུགས་སྲིད། འོན་ཀྱང་ཁྲག་དེ་དག་ང་ཚོ་རང་ཉིད་ཀྱི་ཁྲག་ཡིན་དགོས། ཞེས་གསུངས། (འཚེ་མེད་ཞི་བའི་ལྟ་གྲུབ་སྦྱོང་བརྡར་ལྟེ་གནས་ཁང་གི་ཆེད་དེབ་ལས།)

 ༩         གན་དྷིས། ཨ་ཧིམ་ས་ཞེས་པ་འཚེ་བ་སྤངས་པའི་བརྡ་དོན་ནི་སྲོག་གཅོད་མི་བྱེད་པ་དེ་ཡིན་རུང༌། དེ་ལས་ལྷག་པའི་བརྡ་དོན་ནི་སྐྱེས་བུ་སུ་ལའང་བརྙས་བཅོས་མི་བྱེད་པ་དང༌། རང་གི་དགྲ་ལའང་ངན་སེམས་དང་གནོད་སེམས་གང་ཡང་མ་བསྐྱེད་པ་ལ་ཟེར། ཞེས་གསུངས། (འཚེ་མེད་ཞི་བའི་ལྟ་གྲུབ་སྦྱོང་བརྡར་ལྟེ་གནས་ཁང་གི་ཆེད་དེབ་ལས།)

༡༠ མར་ཏིན་ལུ་ཐར་ཀིང་གིས། འཚེ་བ་མེད་པ་ནི་བློ་ཁོག་མེད་པའམ་སྡར་མའི་ཐབས་ལམ་ཞིག་མ་ཡིན། དེ་ལས་ལྡོག་སྟེ་གཞན་གྱིས་རང་ལ་རྡུང་སྐབས་ཕར་ལན་མི་སློག་པའི་བློ་སྟོབས་དང༌། དཔའ་མཛངས་དགོས་ཀྱི་ཡོད། ཅེས་གསུངས། (འཚེ་མེད་ཞི་བའི་ལྟ་གྲུབ་སྦྱོང་བརྡར་ལྟེ་གནས་ཁང་གི་ཆེད་དེབ་ལས།)

 

ལྔ་པ། ཀུན་སློང་སྙིང་རྗེ་དང་ལྡན་ཚེ་དྲག་ལས་ཀྱང་བྱེད་རུང་བའི་སྐོར།

༡ དྲག་ལས་དང་དྲག་ལས་མིན་པའི་རིགས་མང་པོ་ཡོད་ཀྱང་ཕྱིའི་སྣང་ཚུལ་གཅིག་པུས་དབྱེ་བ་འབྱེད་ཐུབ་པར་དཀའ། གལ་ཏེ་གང་ཞིག་གི་ཀུན་སློང་མ་རུངས་པ་ཡིན་ན་ཕྱིའི་སྣང་ཚུལ་འཇམ་པོ་དང་ཡག་པོ་ཡོད་ན་ཡང་དོན་དག་ངོ་མའི་ཆ་ལ་དྲག་ལས་རང་ཡིན། དེ་ལས་ལྡོག་སྟེ་གལ་ཏེ་གང་ཞིག་གི་ཀུན་སློང་དེ་བསམ་པ་རྣམ་དག་ཡིན་ན་རེ་ཞིག་སྤྱོད་ལམ་རྩུབ་པོ་ཡོད་ན་ཡང་གཞི་རྐང་འཚེ་བ་མེད་པའི་ཉམས་ལེན་བྱེད་ཀྱི་ཡོད། ངའི་བསམ་པར་སྙིང་རྗེ་དང་ལྡན་ན་གནད་དོན་གང་ཞིག་རང་དོན་མིན་པར་གཞན་གྱི་ཁེ་ཕན་གྱི་ཆེད་དུ་ཡིན་ན་དྲག་ལས་བྱེད་རུང་བ་ཡིན། ཞེས་གསུངས། (ྋགོང་ས་མཆོག་གི་བཀའ་རྩོམ་ཀུན་ཁྱབ་སེམས་ཁུར་དང་འཛམ་གླིང་ཞི་བདེ་ལས།)

༢ ཆོས་ལུགས་ཁག་ཚང་མས་འཚེ་བ་མེད་པ་གཙོ་བོར་འཛིན་གྱི་ཡོད། འཛམ་གླིང་ཞི་བདེ་ཡི་མིང་ཁྱེར་ཏེ་དམག་དཔུང་འབོར་ཆེན་ཕུང་གསོག་བྱེད་པ་ཡོང་གི་ཡོད། འཚེ་བ་མེད་པ་ཡོང་ཐབས་སུ་དམག་དཔུང་བསྡུ་སྐོང་བྱེད་པ་ཧ་ཅང་དཀོན། དེར་བརྟེན། ཞི་བདེ་དང་འཚེ་བ་མེད་པ་གཉིས་ཀྱི་དོན་དག་འདྲ་པོ་ཡིན་ཡང༌། མཚམས་རེར་འཚེ་བ་མེད་པ་ཞི་བདེ་ལས་ནུས་སྟོབས་ཆེ་བ་ཆགས་ཀྱི་ཡོད། ནང་སེམས་ཀྱི་ཐོག་ནས་བྱམས་པ་དང་བརྩེ་བ། སྙིང་རྗེ་སོགས་ཀྱི་ཀུན་སློང་དང་ལྡན་པ། གཞན་གྱི་བདེ་དོན་ལ་སེམས་ཁུར་དང་ཐོབ་ཐང་ལ་བརྩི་བཀུར་ཡོད་པའི་ཐོག་ནས། གཞན་ལ་ཉེས་རྡུང་ལྟ་བུ་ཏོག་ཙམ་བྱུང་ཡང་འཚེ་བའི་ལས་སུ་འགྲོ་གི་མ་རེད། གཞན་ལ་མགོ་སྐོར་དང་བསླུ་བྲིད། ཕ་རོལ་པོ་རྩ་བརླག་གཏོང་འདོད་ཀྱི་ཀུན་སློང་ངན་པ་ཞིག་བཅངས་ཏེ། ཁ་མཁས་ཚིག་སྙན། གདོང་ལ་འཛུམ་མདངས་ལྡན་པ་བྱས་ཏེ། ཕྱིའི་ལུས་ངག་གི་རྣམ་འགྱུར་ལ་འཚེ་བ་མེད་པ་ལྟ་བུར་མཐོང་ཡང༌། གཞན་ལ་བསླུ་བྲིད་དང་གནོད་སེམས་ཀྱི་ཀུན་སློང་དང་འགྲོགས་ཡོད་སྟབས་འཚེ་བའི་ལས་ཆགས་ཀྱི་ཡོད། སྤྱིར་བཏང་འཚེ་བ་མེད་པ་ཟེར་བ་དེ་ཚིག་ཙམ་ལ་བལྟ་རྒྱུ་མ་ཡིན་པར་ནང་སེམས་ཀྱི་ཀུན་སློང་གཙང་མིན་ལ་རག་ལས་ཡོད། ཅེས་གསུངས། (ྋགོང་ས་མཆོག་ནས་ཕྱི་ལོ་ ༢༠༠༩།༠༤།༠༥ ཉིན་རྒྱ་གར་ཆོས་ལུགས་རིས་མེད་ཀྱི་ཞི་བདེ་ལྷན་ཚོགས་ཐེངས་ ༢ ཐོག་བསྩལ་པའི་བཀའ་སློབ་ལས།)

            དེ་ལྟར་ན་བོད་བསྟན་པ་ཆབ་སྲིད་དང༌། བོད་མི་ས་ཡ་དྲུག་གི་རང་དབང་བདེ་སྐྱིད་ཀྱི་ཆེད་དུ་རང་སྲོག་བློས་གཏོང་གིས་རང་ལུས་མེར་སྲེག་པ་ནི་བསྟན་དོན་དང་གཞན་དོན་གྱི་ཆེད་དུ་རང་གི་ལུས་སྲོག་ཡལ་བར་འདོར་བའི་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་མཛད་པ་དང་རྗེས་སུ་མཐུན་པའི་སྤྱོད་པ་རླབས་པོ་ཆེ་ཞིག་ཡིན་ལ། སྤྱིར་རང་སྲོག་བཅད་པས་སྲོག་གཅོད་ཀྱི་ལས་དངོས་གཞིར་མི་འགྱུར་བ་དམ་ཆོས་འདུལ་བའི་དགོངས་དོན་ཡིན་པས། ཆོས་སྲིད་གང་གི་ཆ་ནས་ཀྱང་བསྔགས་བརྗོད་དང་རྗེས་སུ་ཡི་རང་ཞུ་བའི་གནས་ཡིན་ནོ།།

 

 

འབྲེལ་ཡོད་གསར་འགྱུར།

Mobile App

བཙན་འོག་གི་གྲོས་མཐུན་དོན་ཚན་ ༡༧ ནུས་མེད་ཆགས་པ་རྒྱལ་སྤྱིའི་ཐོག་ཁ་གསལ་བཟོ་དགོས།

༢༠༢༥/༠༥/༢༣
དབྱིན་ཇིའི་རྒྱལ་ཁབ་སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐད་ལངས་ཕྱོགས་གསལ་བོ་བཟོས་འདུག བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༥།༢༣
Mobile App

སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

༢༠༢༥/༠༥/༢༣
ཧཱ་ཝར་ཌི་གཙུག་ལག་སློབ་གཉེར་ཁང་། དྲ་ལམ་གྱི་པར།
Mobile App

ཧཱ་ཝར་ཌི་གཙུག་ལག་སློབ་གྲྭར་རྒྱལ་སྤྱིའི་སློབ་མ་བཀག་སྡོམ་གནང་འཆར་ཡོད་འདུག

༢༠༢༥/༠༥/༢༣
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར། ༢༠༢༢།༦།༤
Mobile App

དཀོན་མཆོག་མིག་དམར་ལགས་བསྐྱར་དུ་དྷ་ས་ས་གནས་མགོ་འཛིན་དུ་འདེམས་ཐོན་བྱུང་།

༢༠༢༥/༠༥/༢༣
བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

རྒྱ་གར་གྱི་གནས་མཇལ་བ་ ༧༥༠ གངས་རིན་པོ་ཆེར་གནས་མཇལ་དུ་གཏང་རྒྱུ་ཡིན་འདུག 

༢༠༢༥/༠༥/༢༢
༸གོང་ས་མཆོག གསར་འགྱུར།

ཡེ་ཤུ་ཆོས་དཔོན་ཕོབ་ལེའོ་མཆོག་ལ་༧གོང་ས་མཆོག་དང་ལྷན་དུ་མགྱོགས་མྱུར་མཇལ་འཕྲད་གནང་བའི་འབོད་སྐུལ་ཞུས།

༢༠༢༥/༠༥/༢༢

མཆན། 8

  1. བཙན་བྱོལ་བ་ says:
    ལོ་ 14 སྔོན།

    ཤཱཀྱ་བུ་ཁྱོད་ཀྱི་རིན་བྲལ་གྱི་ལུང་ཁུངས་འདི་དག་གིས་བཀའ་ཟུར་ཟམ་གདོང་བླ་མ་དང་ཐུབ་བསྟན་ལུང་རིགས་ལ་སློབ་གསོ་ཡག་པོ་ཞིག་ཐེབས་ཡོད་པ་ཚོར།

    Reply
  2. བོན་རྒྱ་བསྟན་འཛིན་རབ་རྒྱས། says:
    ལོ་ 14 སྔོན།

    ཤཱཀྱའི་བུ་རྒོད་ཀྱིས་གནད་ས་ཟིན་པའི་ལུང་མང་དུ་བསྒྲུགས་པར་ཐུགས་རྗེ་ཆེ་ཞུ། འདི་ནི་འུ་ཚང་གིས་ཆོས་མི་ཤེས་ལ་ཆོས་བཤད་བྱེད་པར་དགའ་མཁན་ཚོའི་མགོ་ཐོག་ལ་བརྡབས་ཡོད་ཀི།
    འུ་ཚང་གི་ཆབ་སྲིད་པ་ཐེབས་ཆག་ཚོའི་ཕུ་ཟིག་ཆོད་ཡོད་མདོག་གིས་ནང་བའི་དགེ་འདུན་པ་ཞིག་གིས་རང་སྲོག་གཏོང་བ་དེ་མི་རུང་བ་ཞིག་དང་གཞན་སྲོག་བཅད་པ་ལས་ཀྱང་སྡུག་པར་བརྩིས་ཡོད་ནའང་ཞེས་གཏམ་བཤད་མང་དུ་གོ་རྒྱུ་འདུག་པས་དེ་དག་གིས་ཁྱི་ཁ་ཁུངས་མེད་ལུགས་མེད་དུ་མི་གཡུག་པར་ཕན་གི་སྙམ་སོང་།

    གང་ལྟར་ཐུགས་རྗེ་ཆེ།

    Reply
  3. མྱི་ནག་ཚང་། says:
    ལོ་ 14 སྔོན།

    ཁྱེད་ཀྱིས་དཀའ་ལས་འོ་ཙི་སྐྱོན་འདུག་པས། ཐུགས་རྗེ་ཆེ་ཞུ། ཡིན་ཡང་། ངའི་བསམ་ཚུལ་ལ་ཐད་ཀ་དང་ཤུགས་རྐྱེན་ཅི་ཡང་བྱུང་མ་སོང་བས་རྗེས་མ་སླར་ཡང་མཇལ་ཡོང་། བགྲོ་གླེང་ལ་ཞུགས་དུས་ཐུགས་སྐྱེད་ཡངས་ཙམ་གནང་བའི་རེ་བ་ཡོད།

    གླིང་རི་རྒྱལ་གྱིས།

    Reply
  4. ལྷོ་ཕྱོགས་ཉི་ཟླ། says:
    ལོ་ 14 སྔོན།

    སྤྱིར་རང་ལུས་མེར་བསྲེགས་པ་འདི་འཚེ་བ་ཡིན་མིན་དོགས་པ་དཔྱད་ལུང་བྱས་ན་བཟང་ཀྱང་སྐབས་བབ་འདི་ལ་འདི་འདྲའི་དོགས་པ་རྣམ་དོགས་སློང་སའི་ཡུལ་ཞིག་ཏུ་ངོས་འཛིན་མ་བྱས་ཧ་ཅང་བཟང་ཆ་ཆེ་བས་ཤེས་ཡོན་པ་ཞིག་ཡིན་ན་བསམ་བློ་རྒྱ་ཆེ་རུ་བཏང་ནས་མདུན་རྒྱབ་ཚང་མ་ལ་བལྟ་རྒྱུ་འདི་ཞེ་དྲག་གི་གནད་འགག་ཆེན་པོ་རེད་བསམ།

    Reply
  5. lobsang says:
    ལོ་ 14 སྔོན།

    ཟིན་བྲིས་བྲི་ན་འདི་འདྲ་ཞིག་འབྲི་དགོས་པ་ལས་ལུང་དང་རིགས་པའི་སྒྲུབ་བྱེད་སོགས་གང་ཡང་མེད་པར་ཁ་ལ་ཡོང་ཚོད་ཞིག་བྲིས་བསྡད་ན་དགོས་པ་མི་འདུག་དེང་སང་སྤྱི་ཚོགས་ནང་ཁ་ཤས་ཤིོག་ཞིག་གིས་སོ་སོའི་མིང་གྲགས་ལ་རེ་ནས་གཞན་ཐམས་ཅད་ཀྱིས་མ་བཤད་པ་ཞིག་བཤད་ཁུལ་བྱེད་ཀྱིན་ཡོད་པ་རེད།

    Reply
  6. lobsang says:
    ལོ་ 14 སྔོན།

    ཤཀྱའི་བུ་ལགས། ཁྱེད་རང་གིས་དངོས་གནས་ལུང་དང་རིགས་པའི་ལམ་ནས་འཚེ་བ་མ་ཡིན་པའི་སྐོར་ཡག་པོ་ཞིག་བྲིས་འདུག་ཐུགས་རྗེ་ཆེ་ལགས།

    Reply
  7. རང་དབང་རྒྱལ། says:
    ལོ་ 14 སྔོན།

    རྒྱ་གཞུང་དང་དེས་བཀོལ་གྱིན་པའི་གཏིང་ནག་གི་སྲིད་བྱུས་ངན་པ་དེས། བོད་མི་རིགས་ཀྱི་དཀའ་ངལ་གཙོ་བོ་བཟོས་དང་བཟོ་བཞིན་པ་ནི། བརྟེན་སའི་ཁོར་ཡུག་དང་རྟེན་གྱི་བསམ་བློ། དེ་སྐྱེད་སྲིང་བྱེད་སྤྱད་ཀྱི་རིག་གནས་རྣམས་རྩ་གཏོར་དུ་གཏོང་གིན་པ་འདི་རེད། དེའི་ནང་ནས་ནས་ནང་ཆོས་ཀྱི་རིག་གནས་དེ་བོད་མི་ཁྱོན་ཡོངས་ཀྱི་བསམ་པའི་ཟས་བཅུད་དུ་གྱུར་ཡོད། འདི་ནི། རྒྱུན་འཛིན་དང་གོམས་པར་འབྲེལ་བ་ ཆེན་པོར་ཡོད་རྒྱུ་རེད་ལ། དེའི་ཁྱད་ཆོས་ཀྱིས་བོད་མིའི་མངོན་འདོད་དེ་བསྒྲུབ་ཀྱིན་པའི་མ་ཡིན་ནམ། གང་ལྟར། དེ་འདྲའི་རྩ་ཆེ་ཞིང་གལ་གནད་ཆེན་པོ་ཅན་གྱི་རིག་གནས་རྣམས་ཀྱི་ཐོབ་ཐང་དང་སྲུང་སྐྱོབ་ཀྱི་ཆེད་དུ། རང་ལུས་མེར་བསྲེགས་བཏང་བ་ནི། གཞི་རྩའི་ནང་ཆོས་རིག་གནས་ཀྱི་བློས་བཏང་དང་བྱང་ཆུབ་སེམས་དཔའི་སྤྱོད་པར་འབྲེལ་བ་དམ་ཟབ་ཡོད་པ་རེད། ད་རུང་ཁ་གསལ་ཏུ་བཏང་ན། ནང་ཆོས་རིག་གནས་འདི་གཞན་དོན་ཁོ་ནར་སྙོབ་མཁན་གྱི་རིག་གཞུང་ཞིག་ཡིན་དུས། ད་ལྟ་དང་མ་འོངས་པའི་སྤྱི་ཚོགས་ལ་མེད་ཐབས་བྲལ་བའི་བསམ་ཟས་ཤིག་ཡིན་པས་ན། དེའི་ཆེད་དུ་བློས་བཏང་གིས་སྲུང་སྐྱོབ་བྱས་པ་ནི། ལུགས་དང་ཆོས་གང་ལ་འང་མི་འགལ་བས་སོ།།

    Reply
  8. ངས་པོའི་ལྷ་སྲས། says:
    ལོ་ 14 སྔོན།

    ཤཀྱཱའི་བུ་ལགས་ཐུགས་རྗེ་ཆེ། ཁྱེད་ཀྱི་གཞུང་ལུགས་མར་ཁུ་ལྟ་བུ་དེ་དག་ལ་ཁུངས་གཏུགས་ཏེ་དཔྱད་རྩོམ་ལེགས་པོ་ཞིག་བྲིས་འདུག་ཐུགས་རྗེ་ཆེ་ཞེས་ཡང་བསྐྱར་ཞུ་གི་ཡིན།
    དཔྱད་རྩོམ་དེ་ནི་འཆར་སྣང་རིང་ལུགས་པ་ཚོའི་ཁ་ལ་རྡོ་རྗེའི་ཕུར་བ་ལྟ་བུར་འགྱུར་འདུག རང་གིས་བོད་མི་རིགས་ཀྱི་མིང་ཐོག་ནས་སྒེར་དོན་གཉེར་ཏེ་༸གོང་ས་མཆོག་གིས་གཞུང་ཚབ་ལ་དགོངས་དག་ཞུ་འཇུག་པ་དེ་བརྗེད། བོད་ཀྱི་བསྟན་སྲིད་ཀྱི་དོན་དུ་རང་སྲོག་བློས་དབང་པའི་དཔའ་བོ་དག་གི་རླབས་ཆེན་གྱི་མཛད་སྤྱོད་ལ་འཚེ་བ་རེད་བརྗོད་ཕོད་པ་དེ་ངོ་ཚ་ཡ་མཚན་ཆེ་་་་་་་་་་་་་་་་་་་་་་་།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese