ཁ་བ་སྐམ་པོ།
བརྗེད་དཀའ་བའི་ཉིས་སྟོང་བཅུ་གཅིག་ལོ་འདི་ནི་ང་ཚོ་བོད་མི་སྤྱི་བོ་གནམ་བསྟན་ཡོངས་ཀྱིས་ཨམ་གཙིགས་སྡོམ་གྱིན་པའི་ལོ་ཞིག་ཡིན་སོང་ལ། ལྷག་པར་བོད་ནང་གི་རྒྱལ་གཅེས་བ་ཚོས་རང་ལུས་མཆོད་མེ་རུ་ཕུལ་དང་འབུལ་བཞིན་པ་དང་། ད་དུང་འབུལ་འགྱུར་ཡིན་པ་གསལ་བོ་གསལ་རྐྱང་རང་རེད། འདི་ནི་བོད་མི་ཚོ་ཧ་ཅང་སྡུག་ཐུག་སོང་བ་དང་ཐབས་མེད་སོང་བ་ཡིན་ཏེ། རྒྱ་ནག་གི་བཙན་དབང་འོག་བཟོད་བསྲན་བྲལ་བས་འཚེ་མེད་མཐར་ཐུག་པའི་ལས་འགུལ་འདི་བརྩམ་དང་རྩོམ་གྱིན་པ་རེད། འདི་ནི་བསྐལ་བ་ལྔ་བཅུ་ང་དགུ་ལོར་བོད་ས་ཡོངས་རྫོགས་རྒྱ་ནག་གིས་བཙན་བཟུང་བྱས་ནས་རིམ་པའི་སྙིང་དང་འདྲ་བའི་བླ་ཆེན་དང་སྐྱེས་ཆེན་ཚོ་དངོས་ཤུགས་བརྒྱུད་གསུམ་ནས་གསོད་གཏུབ་འཛིན་གསུམ་བྱས་ནས་ང་ཚོར་བཞག་བའི་སོས་མེད་ཀྱི་རྨ་ཁ་ཞིག་ཡིན་སོང་བ་དེ་རེད།
ཉེ་ལམ་གྱི་ཆ་ནས་བཤད་ན་བརྒྱད་ཅུའི་ནང་བོད་པ་ཚོར་ཨ་ཡོད་ནང་གི་དེ་ཡོད་ཁོག་པའི་སྙིང་ལྟ་བུ་༸པཎ་ཆེན་རིན་པོ་ཆེ་བཀྲོངས་སོང་བར་སྨྲ་ལ། དེ་ནས་བཟུང་ཁྲི་གུང་ཐང་བསྟན་པའི་དབང་ཕྱུག་དང་༸མཁན་ཆེན་འཇིགས་མེད་ཕུན་ཚོགས་སོགས་མི་རིགས་འདིའི་བླ་རྐང་བསྐྲུན་མཁན་ཚོ་ཚར་གཅོད་ཀྱི་ལས་ཀ་ལག་ཏུ་བསྟར་ཡོད་པར་མ་ཟད། རང་ཅག་གི་ཤི་གསོན་གཉིས་ཀྱིས་ཡོད་ཚད་གཏོད་ས་༸རྒྱལ་དབང་ཡིད་བཞིན་ནོར་བུ་མཆོག་ལ་གཞི་མེད་ཉེས་འཛུགས་དང་མཚན་སྨད་བློ་ཡིད་ལས་འདས་བ་བྱས་དང་བྱེད་བཞིན་པ་འདི་དང་། བོད་མི་རིགས་འདིས་ཆེས་གོང་བཀུར་ཞུ་ཡུལ་ས་སྐྱ་བདག་ཁྲི་དང་རྒྱལ་བ་ཀརྨ་པ་ཀིརྟི་རིན་པོ་ཆེ་ཤིང་བཟའ་རིན་པོ་ཆེ་སོགས་བླ་སྤྲུལ་མཁས་ཆེན་རྣམས་རང་ཡུལ་དུ་ལོག་པའི་ལམ་ཁ་མི་སྟེར་བ། དེ་ལྟར་གཞོན་སྐྱེས་ཚོའི་སྤོ་བོ་དང་རྨོ་མོ་རྣམས་མཆི་ཁར་ཡང་༸རྒྱལ་བ་རིན་པོ་ཆེར་གསོལ་བ་འདེབས་བཞིན་མིག་ཆུ་འཐོར་བཞིན་གཟིམས་འགྲོ་བ་འདི་སུས་ཀྱང་བཟོད་དུ་མེད་པ་ཞིག་ལོས་ཡིན།
དེ་ལྟར་ཡིན་ན་ཡང་རྒྱ་ནག་གིས་ནམ་ཞར་དུ་བོད་ཡར་རྒྱས་བཏང་ཡོད་རབས་རྐྱང་རྐྱང་བསྒྲགས་ནས་གཞན་དང་གཞན་ལ་མགོ་གཡོགས་ཐབས་བྱ་གི་འདུག་མོད། སེམས་པའི་འཇིངས་སུ་སོས་མེད་ཀྱི་རྨ་ཁར་ཁྲག་འཛག་བཞིན་པའི་སྐབས་འདིར་དེ་དག་ལ་མགོ་འཁོར་མཁན་ནི་སྒོར་དགའ་རེ་གཉིས་ལས་སུ་ཡོང་ཨང་། རྒྱ་ནག་གིས་རྡུང་གསོད་འཛིན་བཟུང་བྱེད་བཞིན་པའི་མེ་མཆོད་ལས་འགུལ་འདི་ནི་མུ་མཐུད་ནས་འགྲོ་རྒྱུ་ཡིན་པར་མ་ཟད། ངོ་བོ་འདི་ད་སྐབས་ཀྱི་མཆོད་མེ་མ་འོངས་བའི་འགད་རྫས་སུ་འགྱུར་རྒྱུ་དང་། ད་སྐབས་ཀྱི་འཚེ་མེད་མ་འོངས་བའི་འཚེ་བ་རུ་འགྱུར་རྒྱུའང་འཕེལ་རིམ་ཞིག་རེད། འཕེལ་རིམ་འདི་ནི་རྒྱ་ནག་རང་གི་དེད་བཞག་པའི་ལམ་ཁ་ཉག་གཅིག་ཡིན་པ་མ་ཟད་བཙན་གྱིས་དེད་པའི་ལམ་ཁ་ཞིག་ཡང་རེད་དོ།།
ལར་རྒྱ་ནག་གིས་༸གོང་ས་མཆོག་ལ་སྐྱོན་མེད་ཉེས་འཛུགས་ཇི་ལྟར་བྱས་ན་མེ་ལྕེ་འདིའི་བོངས་ཚད་ཇེ་ཆེར་འགྲོ་བའང་ཆོས་ཉིད་ཅིག་རེད། བོད་ནང་གི་རིགས་ཞེན་ལྡན་པའི་མི་རབས་གསར་བ་འདི་དག་འགད་རྫས་ཀྱི་ལམ་ཁ་འདི་ལ་གོམ་པ་སྤོས་ཉིན་ནས་འཚེ་བ་ཡིན་མིན་ཁ་ཡ་མི་བྱེད་ལ། བོད་རང་བཙན་གྱི་རྒྱུ་ལམ་ཡང་འདི་ནས་རྙེད་འགྲོ་བ་ཞིག་རེད། སྐབས་འདིར་བོད་མདོ་དབུས་ཁམས་གསུམ་ནས་རྒྱ་ནག་རང་ལུགས་པ་དང་བོད་པ་རིགས་ཞེན་པས་བར་དམར་གསོད་ཀྱི་མེ་ལྕེ་དགུང་དུ་འཕྱུར་ཞིང་རྒྱ་ནག་གི་པེ་ཅིན་དང་ཧྲང་ཧེ་སོགས་ནས་ཀྱང་འགད་རྫས་ཀྱི་དྲི་མ་འཕུར་བའི་དུས་སུ་ཐོན་ངེས་རེད། སྐབས་དེར་རྒྱ་ནག་པ་ཚོར་ཡང་ནོངས་འགྱོད་ཀྱི་ཁུར་བོ་ཞིག་འཁུར་འཇུག་གི་རེད། འདི་ནི་རྒྱ་ནག་གི་ང་ཚོར་ཕྱིན་པའི་འདེམ་ཁ་རེད་ལ། ཁོང་ཚོར་སྤྲད་པའི་གྱོང་གུད་ཞིག་ཀྱང་རེད། དུས་སྐབས་དེར་རྒྱ་ནག་གཞུང་འཛིན་པས་༸ཏཱ་ལའི་བླ་མར་ཞི་འདུམ་གྱི་གཅོམ་ཚིག་སྨྲ་རུང་ཞི་འདུམ་གྱི་དབང་ཚད་དེ་༸ཏཱ་ལའི་བླ་མའི་བཞེས་ཀྱི་མ་རེད་ལ། ཡང་གཅིག་བཤད་ན་མ་འོངས་བའི་འགད་རྫས་ཁྲོད་ཀྱི་མི་རབས་གསར་བ་ཚོར་བོད་རང་བཙན་མ་གཏོགས་དགོས་རྒྱུ་མ་རེད་། དུས་རབས་ཉེར་གཅིག་པའི་ནང་ཡང་ལམ་ཁ་འདི་འདྲ་ཞིག་ལ་འཁྲིད་མཁན་ནི་རྒྱ་ནག་གཞུང་འཛིན་པ་ཚོ་ལས་གང་ཡང་ཡོད་པ་མ་རེད་ཞེས་དབྱེ་ཞིབ་པ་ཚོས་སྨྲ་སྤོབས།
ཀྱག་ཀྱོག་གི་ལམ་ཁ་འདི་ནི་༧རྒྱལ་བ་རིན་པོ་ཆེས་རྒྱ་ནག་ལ་ཞུ་བ་ཇི་ལྟར་ཕུལ་ཡང་མ་ཉན་པའི་འབྲས་བུ་ཞིག་དང་། ཞི་བ་ལ་གཞོལ་བའི་མྱི་རིགས་ཞིག་ལ་ཚད་ལས་བརྒལ་བའི་ཐུབ་ཚོད་ཀྱི་འབྲས་བུ་ཞིག་ཀྱང་རེད། ད་དུང་ཡང་དམར་ཕྱོགས་པས་བོད་མི་དང་གྲངས་ཉུང་མི་རིགས་ལ་བསམ་ཤེས་གང་ཡང་མ་བྱས་ན་ཡུ་གུར་དང་སོག་པོ་སོགས་ཀྱིས་ཀྱང་ཐབས་ཟད་ཀྱི་ལས་འགུལ་འདི་རྩོམ་གྱི་ཡིན་པ་སྨྲ་མི་དགོས་ལ། རྒྱ་ནག་ནང་ལོག་གྱི་དམངས་གཙོ་དོན་གཉེར་བྱེད་མཁན་རྣམས་ཀྱིས་ཀྱང་མི་དམངས་ཀྱི་རང་དབང་དང་དམངས་གཙོའི་ཆེད་ཡོད་ཚད་འབུལ་ཀི་རེད། འདི་ནི་རྒྱ་ནག་གི་མགོ་སྟེང་སློག་པའིི་བཞུར་ལམ་ཞིག་ཏུ་སྨྲ་གཏིབ་བོ།།
འདི་ནི་རྒྱ་ནག་གིས་འཛམ་གླིང་བ་ཀུན་གྱི་གཙུག་ཏུ་བཀུར་བའི་༸ཏཱ་ལའི་བླ་མར་མཐོང་ཆུང་དང་ཉེས་མེད་སྐྱོན་འཛུགས་བྱས་པའི་རྣམ་སྨིན་དང་། བོད་པའི་མཚོན་གྲངས་ཉུང་མི་རིགས་ཁག་ལ་གཉའ་གནོན་བྱས་པའི་འཇུག་འབྲས་ཤིག་ཏུ་འཁུམས་ཆོག སྐབས་དེར་བོད་ལ་རང་སྐྱོང་ཞིག་ཚུར་ཞི་བའི་ངང་ཕུལ་ཡང་ལེན་གི་མ་རེད། མ་ཟད་རྒྱ་ནག་ལག་ཏུ་ཤོར་བའི་ཁྲང་ཨན་ཚུན་ཆད་ཕྱིར་སྤྲོད་དགོས་བའི་བསྒྲགས་གཏམ་སྤེལ་སྲིད།
རྒྱ་ནག་གིས་གདུག་བཙུབ་གཉལ་གནོན་ལ་བོད་མི་ཚོས་བཟོད་སེམས་དེ་མཐའ་ཅན་དུ་འགྱུར་རྒྱུ་ཡིན་པ་གདོན་མི་ཟ་འཚེ་བའི་ལམ་ལ་མི་འདོད་བཞིན་དུའགྲོ་དགོས་པ་ཆགས་རྒྱུ་རེད་སྐབས། དེར་དྲག་སྤྱོད་པའི་མི་བྱང་བོིད་མི་མགོ་ལ་གཡོག་རུང་ད་ལྟ་ལས་སྡུག་ཆགས་འགྲོ་བ་གང་ཡང་ཡོད་ནི་མ་རེད། ་འཛམ་གླིང་མི་མང་གིས་བོད་པ་འུ་ཐུག་ཐབས་ཟད་ནས་ལམ་ཁ་འདིར་མི་འདོད་བཞིན་རྒྱ་ནག་དམར་ཕྱོགས་ཚོགས་པས་གདམ་པ་ལ་ཁག་མི་འདུག་སྙམ་པ་ཡོད་རེད་འཇིག་རྟེན་འདིའི་སྟེང་རྒྱ་ནག་གིས་བོད་པར་ཐུབ་ཚོད་བླང་སྟིང་འདི་འདྲ་མིག་མཐོང་ལས་རྣ་ཐོས་ཀྱང་ཡོད་མི་སྲིད་པ་ལྟ་བུ་ཡིན།སྤྱིར་སྟིང་༸གོང་ས་མཆོག་གིས་ལམ་སྟོན་གནང་བ་ལྟར་འཚེ་མེད་ཀྱི་ཐབས་ལས་འདི་ཕྱོགས་གཉིས་ལ་སྡབ་སིག་མི་དགོས་པར་གྲོས་མོལ་བྱས་ནས་གནད་དོན་ཐག་གཅོད་ཐུབ་ན་དེའི་དགེ་མཚན་ཆེ་བ་རེད་འོན་ཀྱང་རྒྱ་ནག་གིས་སྲིད་ཆུས་ལ་འགྱུར་བ་གཏོང་རྒྱུ་ཕར་ཞོགས་ད་དུང་སྡུག་རུ་གཏོང་གིན་ཡོད་ཙང་
བོད་པའི་ཁ་དཔེར་རམ་། ཡང་ན་གཤིས་རྒྱུད་ལ་འཇགས་པའི་སྐད་ཆ་སྟེ།
ལས་རྒྱུ་འབྲས་འཁོར། ཞེས་པ་བཞིན། ནམ་ཞིག་དགྱ་ནག་ལ་ཉི་མ་འདི་འཆར་ཡོང་པ་ཏན་ཏན་ཡིན།
རེད་ཡ། རྒྱའི་གཙོ་འཛིན་མོ་ཀྲུའུ་ཞིས་ཀྱང་གང་ན་གཉའ་གནོན་གྱི་བུད་ཤིང་ཡོད་ན་དེ་རུ་ཡར་ལངས་ཀྱི་མེ་དཔུང་ཡོད་ཅེས་ལབ་མྱོང་བ་དེར་ད་ལྟའི་ཧུའུ་ཅིན་ཐོ་སོགས་ཀྱིས་ཀྱང་དྲན་གསོ་ཞིག་བྱེད་འོས།
སྐུ་ཞབས་མེ་ལྕེ་ལགས། ཀྱེད་ཀྱིས་༢༠༠༨་ལོའི་བོད་མིའི་ཞི་བའི་ངོ་རྒོལ་ལམ་སྒེར་ལངས་ཆེན་མོར་ལས་འཕྲོས་པའི་གཏམ། <<ས་འབར་རྡོ་འབར>>ཞེས་པ་ལེའུ་བདུན་གྱི་བདག་ཉིད་ཅན་དེ་བརྩམས་གྲུབ་ནས་ད་གཟོད<<ལྐོག་ཉན་རླུང་འཚུབ>>ཀྱི་གློག་བརྙན་གསོན་པོ་འདི་བྱུང་བ་མིན་ནམ། གལ་ཏེ་ཁྱེད་ཀྱི་དེབ་དེའི་མ་ཡིག་འདིར་སྐྱབས་བཅོལ་ལ་ཕེབས་ཐུབ་ན་ཅི་མ་རུང།
མི་ཚང་མ་དང་ལྷག་པར་རྩོམ་པ་པོ་དག་གི་རང་དབང་དང་ཐོབ་ཐང་ལ་གཉའ་གནོན་བྱེད་པ་འདིས། དོན་ལ་མི་དམངས་དགྲ་རུ་སློང་བའི་སྐུལ་འདེད་ལས་ཅི་ཡང་མིན། དེས་ན་དེ་རིང་གི”ལྐོག་ཉན་རླུང་འཚུབ”དམར་གཞུང་ལགས། ཁྱེད་ཀྱིས་མུ་མཐུད་འདི་ལྟར་གནང་རོགས། ང་ཚོའི་འཁོན་སེམས་སླར་གསོ་དང་ཆིག་སྒྲིལ་ཤུགས་ཆེར་གཏོང་རྒྱུ་སོགས་<མི་ཉིད་ཀྱི་རྒྱུ་འབྲས་བློ་མིག>འབྱེད་པར་ཕན་རླབས་ཧ་ཅང་ཆེ།