དགེ་འདུན་རབ་གསལ།
མེ་ལྕེ་ཞིག་མཆེད། མེ་ལྕེའི་ཚ་ཚད་ནི་ཧ་ཅང་ཚད་མཐོ་པོ་ཞིག་རེད། ཐབ་ན་འབར་བཞིན་པའི་མེ་དེའི་ཚ་ཚད་ལས་ཀྱང་བརྒལ་འདུག མེ་ཚ་བོ་དེའི་དཀྱིལ་དེ་སྣུམ་གྱིས་ཁེངས། སྣུམ་དེ་དཔའ་བོའམ་དཔའ་མོ་ཞིག་གི་སྐུ་ལུས་ལ་སིམ། དེས་དྲངས་པའི་མེ་ལྕེ་དེ་དག་ནི་ཡོམ་ཡོམ་གྱིས་མཆེད། ལྷོག་ལྷོག་ཏུ་མཆེད། བ་སྤུ་ཞིག་མེས་ཚིག་པའི་ན་ཟུག་ཀྱང་བཟོད་དཀའ་བ་རེད། འོན་ཀྱང་མེ་ལྕེས་ལག་པ་འཚིག མེ་ལྕེས་རྐང་པ་ཚིག མེ་ལྕེས་རྣ་བ་དང་མིག་འབྲས་ཀྱང་འཚིག དབང་པོ་རེ་རེ་འཚིག་སྐབས་མེ་ལྕེས་སྤྲད་པའི་ན་ཟུག་ནི་བཟོད་དཀའ་བ་ཞིག་རེད། ཡན་ལག་རེ་རེ་ནས་འཚིག་སྐབས་མེ་ལྕེས་མཆེད་པའི་ན་ཟུག་ནི་བཟོད་དཀའ་བ་ཞིག་རེད། མིའི་གཤིས་ཀའི་ཐོག་ནས་ངུ་ངག་འདོན་པ་ནི་ ཨ་ཚ་ཚ་ ཞེས་པ་དེ་ཡིན། འོན་ཀྱང་དཔའ་བོ་དང་དཔའ་མོ་ཚོའི་ངུ་ངག་ནི། “བོད་རང་དབང་རང་བཙན་གཙང་མ་ཡིན།” “༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག” ཅེས་སོགས་རེད། འདི་ནི་སྤུན་ཟླ་བཅུ་གྲངས་ཤིག་མེས་འཚིག་པ་མ་རེད། འདི་མི་རིགས་ཤིག་མེས་འཚིག་པ་རེད། དེའི་རྐྱེན་གྱིས་ བོད་དང་ཕྱི་རོལ་གྱི་འཇིག་རྟེན་གང་ཡིན་ལ་གནས་བཅས་པའི་བོད་མི་ཡོད་དོ་ཅོག་གི་སེམས་འདི་མེ་ལྕེ་ལ་མཆེད། དཔའ་མོ་དང་དཔའ་བོས་མྱངས་པའི་ན་ཟུག་དེ་སྒོམ། མིག་མཐའ་མཆི་མས་གཡོགས། མཆི་མ་དེ་ཡང་ས་སྣུམ་ཞིག་དང་མཚུངས། མེ་ལྕེ་དྲག་ཏུ་མཆེད་པའི་རྒྱུར་གྱུར། འདི་ནི་ད་ལྟའི་བོད་ཀྱི་སེམས་ཁམས་རེད།
དཔའ་བོ་དང་དཔའ་མོ་བཅུ་པོ་འདིའི་སྐུ་ལུས་མེ་ལ་སྒྲོན་པའི་གནས་ཚུལ་འདི་ བོད་མ་ཡིན་པའི་ས་ཆ་གཞན་ཞིག་ཏུ་བྱུང་ཡོད་ན། འཛམ་གླིང་གི་གཟིགས་ཚུལ་གང་འདྲ་ཡོད་དམ། གནས་ཚུལ་འདི་ ནིའུ་ཡོག་དང་ཇུ་རེ་སི་ལིམ་ལྟ་བུར་བྱུང་ཡོད་ན་གང་འདྲ་ཡིན་ནམ། རྟོག་པ་མཐའ་བཟུང་གི་དྲི་བ་འདི་དག་གིས་ང་ཚོའི་སེམས་ཁོང་དུ་ཆུད་པར་བྱེད། དཔའ་བོ་དང་དཔའ་མོ་དེ་ཚོའི་ཆེད་དུ་ཨོམ་མ་ཎི་པད་མེ་ཧུམ།
དེ་འདྲའི་སེམས་ཁམས་ཤིག་གིས་མནར་བཞིན་པའི་སྐབས་སུ་གངས་ཅན་སྐྱིད་གཤོངས་སུ་ཤར་ཕྱོགས་ཁུག་རྟ་ལ་འབྲེལ་བའི་གླེང་སློང་ཞིག་བྱུང་འདུག དྲ་བ་དག་ན་འདི་བསྙད་པའི་གླེང་སློང་ཆེས་མང་བོ་ཞིག་འབྱུང་བཞིན་འདུག སྐད་ཆ་ཚིག་གསུམ་བཤད་འདོད་ཀྱང་མིད་པ་བརྣངས་ནས་རེ་ཞིག་འགག་པར་འགྱུར། བློ་བཟང་སེང་གེ་ལགས། ༢༠༠༨ ནས་བོད་དུ་གསར་བརྗེའི་ལས་འགུལ་ལངས་ཏེ་ད་བར་ཇེ་ཆེ་ལས་ཇེ་ཆུང་དུ་མ་གྱུར་བའི་དུས་ཚོད་དེའི་རིང་ལ། ང་ཚོ་བཙན་བྱོལ་བ་ཚོས་བསྒྲུབས་པ་ནི་བློ་བཟང་སེང་གེ་ལགས་རེད། བློ་བཟང་སེང་གེའི་འོས་འདེམས་ཀྱིས་བཙན་བྱོལ་བའི་ཁ་དང་སེམས། ལུས་པོ་བཅས་བཟུང་བ་རེད། བློ་བཟང་སེང་གེ་ཁྲི་འདོན་སྐབས་སྡེ་སྲིད་གསར་པ་རྩིས་ལེན་རྩིས་སྤྲོད་ཀྱི་མཛད་རིམ་སྣ་ཚོགས་ཤིག་བྱུང་བ་དང་། དེ་འབྲེལ་གྱི་སྟོན་མོ་ཡང་ཆེ་དགུ་འཛོམས་ཐོག་ནས་བྱས་པ་རེད། ད་ནི་སྟོན་མོའི་དུས་ཚོད་མཇུག་རྫོགས་སོང་། ལས་ཀའི་དུས་ཚོད་ལ་སླེབས་པ་རེད།
ལས་ཀའི་དུས་ཚོད་ལ་སླེབས་སྐབས། དོན་དག་རྣམས་བཤད་དགོས་པ་རེད་ལ། དོན་དག་རྣམས་སྒྲུབ་དགོས་པ་རེད། བཤད་དགོས་རྒྱུའི་དོན་དག་གཅིག་ནི་ཤར་ཕྱོགས་ཁུག་རྟའི་གནས་ཚུལ་ལ་སྦྲེལ་ནས་བཤད་ཆོག་པ་འདུག དམངས་གཙོ་དང་སྒྲིག་གཞི་ཟེར་བ་འདི་ཁ་བྲལ་ཐབས་ཡོད་མ་རེད། རང་དབང་ལ་ས་མཚམས་ཤིག་འཇོག་པ་ནི་སྒྲིག་གཞི་རེད། སྒྲིག་གཞི་ལ་བརྟེན་ནས་ལས་ཀ་ཐོབ་པའམ་ལས་ཀ་ཤོར་བ་ནི་རྒྱུ་མཚན་ལྡན་ལྡན་པ་ཞིག་རེད། གནད་དོན་འདི་ལ་རྩོད་པ་ཡོད་མ་རེད། ད་རྩོད་པ་དེ་གང་ན་འདུག་ཅེ་ན། བློ་བཟང་སེང་གེས་དབང་ཆ་སྤྱོད་སྟངས་དེ་ན་འདུག བློ་བཟང་སེང་གེ་ལ་མི་མང་གི་བསམ་ཚུལ་མགོ་གནོན་བྱེད་སླད་ཅི་ཡང་བྱེད་ལ་ཅི་ཡང་བཤད་པའི་གཤིས་ཀ་ཞིག་མངོན་པ་དེ་རེད། གཤིས་ཀ་འདིས་མི་མང་པོའི་ཡི་ག་འགག་བཅུག་པ་རེད།
གཤིས་ཀ་འདི་གླེང་སྐབས་སྔོན་གྱི་ལོ་རྒྱུས་འགའ་རེ་ལ་ཡང་དགོངས་པ་བཞེས་དགོས་པ་རེད། ད་བར་བོད་སྐད་དུ་གླེང་སློང་དེ་ཙམ་མ་བྱུང་བ་ནི། བློ་བཟང་སེང་གེས་འོས་འགྲན་སྐབས་བཤད་པའི་ཚིག་དེ་དག་རེད། གཅིག་ནི་ཁོང་ཧར་ཝ་ཌི་སློབ་གྲྭ་ཆེན་མོའི་དགེ་རྒན་ཡིན་རབས་བཤད་པ་དེ་རེད། འོན་ཀྱང་ཁོས་བཤད་མེད་པ་ནི། ཧར་ཝ་ཌི་སློབ་གྲྭ་ཆེན་མོར་རང་ཉིད་ལ་ཞིབ་འཇུག་པའི་མིང་གནས་བྱུང་བ་དེ་ནི་འཕྲལ་སེལ་ཙམ་ཡིན་པ་དང་། དེ་ནི་ལོ་རེ་བཞིན་སྙན་ཞུ་ཕུལ་ཏེ་ཞུ་དགོས་པ་མ་ཟད། དེ་ནི་ཤར་ཕྱོགས་ཁུག་རྟའི་ལས་ཀ་དང་བསྡུར་ཆོག་པའི་ཆོད་གན་ལྟ་བུ་ཞིག་ཡིན་པ་རེད། འདི་ནི་ཁོང་གིས་བཤད་མེད་པ་དེ་རེད། ཡང་བློ་བཟང་སེང་གེས་བཤད་པ་ནི་ ཁོང་ལ་སློབ་གྲྭ་ཆེན་མོས་དགོངས་པ་སྤྲད་དེ་བཀའ་ཁྲིའི་ཕྱག་ལས་གནང་ཐུབ་པ་བྱུང་སྐོར་དེ་རེད། འོན་ཀྱང་ཁོང་གིས་མ་བཤད་པ་ནི། དབྱིན་སྐད་དུ་ཡོད་པའི་བོད་ཀྱི་ཆབ་སྲིད་བསྐྱར་ཞིབ་ཀྱིས་འདི་དག་ལ་ཞིབ་འཇུག་བྱས་ཤིང་མཐའ་ན། ཁོང་དང་སློབ་གྲྭ་ཆེན་མོའི་ལས་ཀའི་བར་ན་ཐེ་ཝན་གྱི་ཚོགས་པ་ཞིག་ཡོད་པའི་ལོ་རྒྱུས་ཀྱང་བྱུང་ཡོད་པ་དེ་རེད། ད་དུང་ཁོང་གི་སྒེར་གཞིས་ཁྱིམ་གྱི་གནས་བབ་སོགས་ལ་འབྲེལ་བ་ཡོད་པའི་གནས་ཚུལ་སྐོར་ཞིག་ལ། གསལ་བཤད་བྱེད་རྒྱུ་ཞིག་ད་དུང་ལྷག་ཡོད་པ་རེད། དེ་ནི་བློ་བཟང་སེང་གེ་ལ་རང་གི་ལོ་རྒྱུས་བོད་མིར་འཆད་སྐབས་འདམས་གསེས་བྱེད་པ་དེ་རེད། དེས་ན། བློ་བཟང་སེང་གེར་ཡོད་པའི་གཤིས་ཀ་སྐོར་ཞིག་ང་ཚོས་ད་དུང་ཤེས་མེད་ལ། དེའི་ཆེད་དུ་ད་དུང་ང་ཚོ་མུ་མཐུད་ནས་སྒུག་རྒྱུ་རེད། འོན་ཀྱང་གཤིས་ཀ་དེའི་ཟུར་གཅིག་ནི་ཤར་ཕྱོགས་ཁུག་རྟའི་གནས་ཚུལ་དེ་ཡིན་པ་ནི་གོར་མ་ཆག
སེང་གེས་སྡེར་བགྲད་བྱས་པའི་རྨ་ཁ་ལ་སྨན་བཅོས་ད་དུང་བྱས་མེད་པའི་སྐབས་འདིར། ང་ཚོ་སེང་གེ་ལ་བལྟ་བཞིན་ཡོད་ལ། སེང་གེའི་གཡུ་རལ་དང་། སེང་གེའི་སྡེར་མོ་དེ་ཡང་རྒྱ་ནག་གིས་བཟོས་པའི་འགྱིག་གཟུགས་ལྟ་བུ་ཞིག་མིན་ཅིང་། སེང་གེ་ངོ་མའི་གཡུ་རལ་དང་སྡེར་མོ་ཞིག་ཡིན་པ་ཤེས་རྒྱུ་ལའང་ང་ཚོ་སྒུག་བཞིན་ཡོད་པ་རེད།
ཤ་དང་རུས་པའི་འབྲེལ་ཐག་དམ་པོར་བཅིངས་པའི་བོད་རིགས་སྤུན་ཟླའི་བུ་སྤུན་ཚོ།
ང་ཚོས་ཟློས་གར་ཞིག་འཁྲབ་འདོད་ན། ང་ཚོས་གླུ་ཞིག་ལེན་འདོད་ན། ང་ཚོས་སྙན་དབྱངས་ཀྱི་འགྱུར་ཁུག་ཞིག་མ་འོངས་པའི་བོད་དང་། མ་འོངས་པའི་བོད་རིགས། མ་འོངས་པའི་གངས་ཅན་སྐྱ་དར་གྱིས་གསར་སྐྲུན་ཞིག་བཅས་བྱ་འདོད་ན་ང་ཚོས་ཇི་ལྟར་བྱེད་དགོས་སམ།
ངས་བསམ་ན་མ་མཐར་ཡང་ང་ཚོས་འཛམ་གླིང་གི་གར་སྟེང་ཐོག་འཛེགས་ཏེ་བོད་ཀྱི་གླུ་གར་འཁྲབ་སྟོན་ཞིག་བཤམས་འདོད་ན་ང་ཚོས་ཐོག་མར་བྱེད་དགོས་པ་སྟེ། ཕྱི་རུ་ཞབས་བྲོ་རྒྱག་པར། །ནང་དུ་དོག་གྲ་བསྒྲིག་དགོས། ཟེར་བའི་དཔེ་དེ་ནི་གནའ་བོའི་མེས་པོ་དམ་པ་དགོངས་པའི་གཏིང་དཔོག་པར་དཀའ་བའི་བཙན་པོ་སྲོང་བཙན་སྒང་པོའི་རེ་བ་དང་ཞལ་གདམས་གཅིག་རེད།
ཛ་དྲག་གི་གནས་སྟངས་འདིར་ངེད་ཀྱི་རྩོམ་ཡིག་དང་བཀའ་ཁྲིའི་ཐག་གཅོད་གླེང་ཕྱོགས་ལ་ཁྱེད་རྣམ་པས་དགོངས་འཆར་གནང་བ་འདི་རིན་ཐང་ཆེ་ལ། ངེད་ཀྱི་མི་ཚེའི་ལོ་རྒྱུས་དེབ་ཐེར་ཁྲོད་འགོད་འོས་པ་ཞིག་དང་། འགོད་རྒྱུའི་ལས་འཆར་གྱིས་ཕྱོགས་སྡོམས་ཀྱིས་དེབ་གཟུགས་བཟོ་འགོད་ཅིག་ཀྱང་བར་གསེང་ནས་བྱེད་མུས་ཡིན་སྟབས། ངས་བསམ་ཚུལ་ཁ་ཤས་ཤིག་མི་བརྗོད་ཐབས་མེད་ཆགས་སོང་།
༡ ཉིན་གླའི་ལས་བྱེད་ཟླ་བ་ ༡༡ རེའི་མཚམས་སུ་བསྐོ་བཞག་བྱེད་སྲོལ་ཡོད་པ་ལྟར། འབྲེལ་ཡོད་ཚོགས་གཙོས་རྒྱབ་གཉེར་ཤུགས་ཆེན་ཐེངས་ ༢ བཀའ་དྲུང་བརྒྱུད་བཀའ་ཤག་ལ་སྙན་གསེང་ཞུས་ཀྱང་། བཀའ་ཁྲི་མཆོག་གིས་དགོངས་བཞེས་གནང་ཐབས་མེད་རྐྱེན་རྩོམ་ཡིག་དེ་ག་རང་ཡིན་པ་ཡིག་ཐོག་ཏུ་གསལ་བ་ལྟར། རྩོམ་ཡིག་དེར་བླང་དོར་སྒྲིག་གཞིས་དམ་བསྒྲགས་གནང་བའང་གསལ་བོ་ཡིན་སྟབས། བླང་དོར་སྒྲིག་གཞིའི་ཁྲིམས་ཀྱིས་མ་ཁྱབ་པའི་གནས་སྟངས་ཤིག་དེའི་ཁོངས་བཙན་སྦྱར་བྱས་པ་དང་། བཀའ་ཤག་སྔོན་མའི་སྐབས་ཀྱི་ལམ་ལུགས་དེའང་མ་མཐུན་པ་བཅས་ཀྱིས་ཐག་གཅོད་གནང་ཕྱོགས་ཀྱི་དགོས་དམིགས་དོགས་གཞིར་གྱུར་བ་ནི་གནས་སྟངས་གཅིག་རེད།
༢ དཔྱད་གླེང་བ་རྣམས་ཀྱིས་ཕྱོགས་གཉིས་ཀྱི་དོན་དངོས་ཡིག་ཐོག་ཏུ་ཡོད་པ་དཔང་པོར་བཞག་ནས་འཛིན་སྐྱོང་དང་ཁྲིམས་སྒྲིག་གི་འབྲུ་དོན་དང་ཁྱབ་ཚད་ལ་དཔྱད་པ་བྱེད་ཐུབ་པ་ཡིན་ན། དཔྱད་གླེང་པས་སྙིང་དོན་འཇུ་ཐུབ་པ་དངོས་ཡོད་གནས་ཚུལ་རང་རེད། དེ་ལྟར་དཔྱད་གླེང་གནང་རྒྱུ་ནི་རང་རང་སྒེར་གྱི་ཤེས་བྱའི་ནང་ཁོག་དང་འབྲེལ་བ་ཡོད་པར་ངེད་ནས་ངོས་འཛིན་བྱེད་ཀྱི་ཡོད།
༣ བཀུར་འོས་སྤྱི་ཟུར་ཆབ་བྲག་ལྷ་མོ་སྐྱབས་སོགས་ཀྱིས་ཕྲན་ལ་རྒྱབ་སྐྱོར་གནང་བ་ནི། རྩོམ་གྱི་ནང་དོན་དང་སྒྲིག་གཞིའི་ཁྱབ་ཚད་ལས་མ་བརྒལ་བ། གཞུང་གི་འཛིན་སྐྱོང་འགྲོ་སྟངས་མཁྱེན་པའི་གནས་བབ་ཐོག་བྱུང་བ་ཡིན་པར་ངེད་ནས་ངོས་འཛིན་ཞུ་བཞིན་ཡོད་པ་ལས། ཚོར་སྣང་དང་ཧམ་བརྗོད་ཉག་ཅིག་བྱ་མིན་སོ་སོའི་འདོད་པ་རེད།
༤ རྩོམ་ཡིག་གི་བརྗོད་གཞི་དང་འབྲེལ་ནས། ཡང་ན་བཀའ་ཁྲིའི་ལས་འཆར་དག་གི་གནས་བབ་རྒྱལ་སྤྱི་དང་བོད་ཀྱི་ཤེས་ལྡན་པ་ཚོས་ད་བར་ངོས་འཛིན་གང་བྱུང་ཡོད་མེད་ཕྲན་གྱི་དཔྱད་གཏམ་དེའི་རྒྱ་ལས་བརྒལ་ཡོད་མེད། ཡང་ན་དོགས་འདྲི་དང་བགྲོ་གླེང་། དེ་ལས་ཀྱང་རྦད་དེ་དགག་གཞག་གིས་དབང་རྟུལ་ལབ་བརྡོལ་གྱི་གྲས་སུ་འདོགས་ཐུབ་ན་ངས་དེ་ལ་སྙིང་ནས་དགའ་བསུ་ཞུ་རྒྱུ་ཡིན་ལ། དེ་བཞིན་སེང་གེའི་བཀའ་ཤག་གི་མདུན་ལམ་ཐད་ཕྱོགས་གང་ཞིག་ནས་ཅི་ལྟར་བགྲོ་གླེང་གནང་ཡང་། ངེད་ནས་ཡི་ག་ན་གཅིག་ཕར་ཞོག ཚེག་གཅིག་ཀྱང་རང་དགར་མི་འཇོག་པར་ཁྱེད་ཚོར་དུས་ཚོད་བཏང་ནས་ལན་འདེབས་ངེས་ཡིན།
༥ ངའི་རྩོམ་ཡིག་གི་ནང་དོན་མ་རྟོགས་པར་འོལ་ཚོད་ཀྱི་ལས་འབའ་ཞིག་བསྟེན་མཁན་དག་ལའང་ཤེས་འདོད་ཀྱི་དྲི་བ་གང་ཞིག་ཡོད་ཀྱང་། ཚ་འདྲི་གནོང་དང་ལན་མེད་ཚེ་ཁྱེད་ཅག་གི་ཞབས་ཕྲན་གྱི་སྤྱི་བོའི་གཙུག་ལ་ལན་ངེས་ཡིན།
༦ དེ་ཙམ་མ་གཏོགས་བོད་ནང་གི་ཛ་དྲག་གི་གནས་སྟངས་ཐད་ལས་དོན་སྣེ་མང་ཡོང་བཞིན་པས། གོང་བཀོད་དག་དང་མཐུན་པའི་བགྲོ་གླེང་བ་སླེབས་ན་མ་གཏོགས། ཡ་ལན་བྱེད་ཁོམ་མི་འདུག་པས་དགོངས་འགལ་མེད་པ་ཞུ།
གཞན་ཡང་སྐུ་ཉིད་ལ་བཀའ་དྲི་ཞུ་རྒྱུར་ཉིན་གཉིས་ཙམ་གོང་ལ་ཕ་ཨ་རེི་བ་དང་མ་ཨཱི་ཀྲ་ལི་ནས་ཡིན་པའི་ཨཱི་ཀྲ་ལིའི་གྱོན་གོས་དཔེ་སྟོན་པ་བུད་མེད་གཅིག་གིས་ཧྒ་ཏ་ཧྥི་དང་ཁོ་པའི་ཁྱིམ་རྒྱུད་རྣམས་སྤྱིར་བཏང་གི་མི་ཀྱུས་ལས་ཞན་པ་མེད་ལུགས་དང་ཧྥ་རན་སི་སོགས་པའི་ནུབ་ཕྱོགས་རྒྱལ་ཁབ་ཀྱིས་ལཱི་ཕི་ཡ་ལ་དྲག་གནོན་བྱས་པ་དེ་མི་འགྲིགས་ལུགས་གསར་འགོད་བཅར་འདྲི་དང་ལེན་བྱེད་སྐབས་བཤད་པ་རེད། དེའི་དབང་གིས་ཨཱི་ཀྲ་ལིའི་ནང་ཡོད་པའི་ཁོ་མོའི་གྱོན་ཆས་དཔེ་སྟོན་ལས་གཉེར་ཁང་གྲགས་ཅན་དེས་ཁོ་མོ་མཐུན་གཉེར་དེ་ནས་སྤུད་པ་རེད། བུད་མེད་དེ་ནི་གཞན་སུའང་མིན་པར་གྷ་ཏ་ཧྥི་ཡི་བུ་ཡི་དགའ་རོགས་དེ་རེད། ཁོ་མོས་ཁོ་གཉིས་ཀྱི་བརྩེ་དུང་སྐོར་ལའང་མདོར་ཙམ་བརྗོད་ཡོད། གཅིག་བྱས་ན་ཁྱེད་རང་གིས་གསར་འགྱུར་དེ་བཀླགས་ཡོད་ཤས་ཆེ། གོང་ཞུས་གནད་དོན་དེའི་ཐད་ཁྱེད་རང་ལ་དགོངས་ཚུལ་ག་རེ་ཡོད་དམ།་
རབ་གསལ་ལགས། ཁྱེད་རང་གིས་རྩོམ་འདིའི་ནང་ནས་ངས་མཐོང་བ་ནི་ཁྱེད་རང་གིས་ཕྱོགས་གཅིག་ཁོ་ན་ལས་ཕྱོགས་གཞན་ལ་མི་བལྟ་བའི་གཤིས་ཀ་དེ་རེད། ཁྱེད་རང་གིས་གོང་དུ་བོད་ནང་གི་དཔའ་བོ་ཚོའི་མཛད་ལ་འཇུས་ཏེ་མཐར་གཏུགས་ཀྱི་བབ་ས་དེ་བཀའ་ཁྲིའི་ཞན་ཆ་འཚོལ་རྒྱུ་དེ་རེད། ཞན་ཆ་འཚོལ་སྟངས་དེ་ཡང་་་་བློ་བཟང་སེང་གེས་དབང་ཆ་སྤྱོད་སྟངས་དེ་ན་འདུག་་ཅེས་པ་དེ་རེད། སྐད་ཆེ་དེའི་བབ་ས་དེ་ཤར་ཁུག་གི་གནད་དོན་ཁོ་ན་ལས་གཞན་གང་ཡང་མིན། ཁྱེད་རང་གིས་གཟིགས་པ་དེ་བློ་སེང་ཙམ་ལས་ཤར་ཁུག་གི་མི་གཤིས་ཐད་གང་ཡང་གསུངས་མི་འདུག དེ་གཅིག་ཡིན། གཉིས་པ་དེ་ཤར་ཁུག་གི་བཤད་པ་རྣམས་བདེན་མིན་སུ་ཞིག་གིས་ཀྱང་ཤེས་ངེས་མིན། གང་ཡིན་ཟེར་ན་དེ་ནི་ཕྱོགས་རྐྱང་པ་གཅིག་གིས་སྐད་ཆ་ལས་བདེན་རྫུན་བརྡར་ཤ་བཅད་པའི་མཆོད་བསྡོམས་མིན།