དུས་རབས་ཀྱི་འགྱུར་འགྲོས་མྱུར་ཞིང་། རིགས་དངོས་ཐོན་རྫས་ཀྱི་ཡར་ཐོན་ཆེ་བའི་དུས་རབས་ཉེར་གཅིག་པའི་ནང་འདི་ལ། བྱ་དངོས་ཆེས་མི་ཉུང་བ་ཞིག་ལ་འགྱུར་བ་བླ་ལྷག་འཕེལ་བ་དང་དུས་བསྟུན། ཁ་སང་དེ་རིང་ཕྱི་རྒྱལ་ཡུལ་གྲུ་ཆེས་མི་ཉུང་བ་ཞིག་ན། གཉེན་སྒྲིག་གི་ལས་ལ་ཡང་འགྱུར་བ་སོང་ནས། མཚན་མཐུན་གཉེན་སྒྲིག་དར་བའི་ཕྱི་རྒྱལ་ཡུལ་གྲུ་ཆེས་མི་ཉུང་བ་ཞིག་ཆགས་ཡོད་ལ། རྒྱལ་ཁབ་རེ་ཟུང་གིས་མཚུན་མཐུན་བཟའ་སྒྲིག་ལ་ཁྲིམས་ཐོག་ནས་ངེས་ལེན་བྱས་པའི་རྒྱུད་རིམ་ཡང་བྱུང་ཡོད་པ་རེད། མིའི་འདོད་སྲེད་ཀྱི་བྱེད་ཐབས་ལ་མཐའ་མེད་པ་དང་། འདོད་པའི་བདེ་བ་འཚོལ་ལུགས་ཀྱང་གཏན་ནས་མི་འདྲ་བའི་གནམ་འོག་འདིའི་འཚོ་བའི་ནང་དུ། དེང་དུས་སུ་མཚན་མཐུན་གཉེན་སྒྲིག་བྱེད་མཁན་མང་ནས་མང་དུ་འགྲོ་བཞིན་ཡོད་པ་རེད།
དེ་དང་འགྲོགས་ནས་དེ་དག་ལ་བསམ་ཤེས་བྱེད་མཁན་ཡང་ཆེས་མི་ཉུང་བ་ཞིག་བྱུང་གི་ཡོད་ལ། འདོད་པའི་བདེ་བ་ལ་དགའ་གུས་ཡི་རུང་བྱེད་ལུགས་གསར་བ་ཞིག་ཀྱང་། རིགས་གསར་ལ་དགའ་ཞིང་། གང་བདེ་ལ་འཁྲིག་སྲེད་ལ་གོམས་པ་དག་གིས་དགའ་བའི་ཡུལ་དུ་གྱུར་ནས་ཡོད་ལ། དེ་དག་གི་སྐོར་ལ་བསམ་བློ་ཞིབ་མོ་ཞིག་གཏོང་བ་དང་ལོ་རྒྱུས་རང་བཞིན་ལྡན་པའི་ཞིབ་འཇུག་ཞིབ་མོ་ཞིག་མ་བྱས་ཚེ། དངོས་ནས་ང་ལྟ་བུ་ཞིག་གི་བཤད་མི་ཤེས་མོད། དེ་རིང་ངས་འདི་ནས་མཚན་མཐུན་བཟའ་སྒྲིག་བྱེད་མཁན་ཆེས་མི་ཉུང་བ་ཞིག་གིས་དེང་སང་རིགས་རྒྱུད་ཉོ་བ་དང་རིགས་རྒྱུད་ཞལ་འདེབས་སློང་བའི་འགོ་ཞིག་བཙུགས་ཡོད་པ་དང་བཙུགས་ནས་ལེགས་འགྲུབ་བྱུང་ཡོད་པ་དེ་ཡིན།
ང་རང་བསྡོད་སའི་རྒྱལ་ཁབ་འདི་ལ་མཚན་མཐུན་གཉེན་སྒྲིག་བྱེད་མཁན་ཆེས་མི་ཉུང་བ་ཞིག་ཡོད་ལ། ང་རང་གི་མཛའ་མོའི་ངོ་ཤེས་མ་ཞིག་གི་རྒན་པོའི་ངོ་ཤེས་བུད་མེད་གཉིས་ཀྱང་། མཚན་མཐུན་གཉེན་སྒྲིག་བྱས་ཡོད་ལ། ང་རང་ཡང་ཁོ་མོ་གཉིས་ལ་ཐེངས་ཁ་ཤས་ཤིག་ལ་འཕྲད་མྱོང་ཡོད། ཕར་བལྟས་ཚོད་ཀྱིས་བུད་མེད་དེ་འདྲའི་ཉམ་ཆུང་དང་གཟུགས་སྐྱེ་གཟུགས་མཛེས་པའི་བུད་མེད་དེ་གཉིས་ཀྱིས་མཚན་མཐུན་གཉེན་སྒྲིག་གི་ལས་ཤིག་འདེམས་དོན་དངོས་ནས་བློ་ཡུལ་དུ་གཤོང་མ་སོང་ཡང་། མིག་གིས་མཐོང་བ་དང་མཉམ་དུ་འཛོམ་ཐེངས་རེར། དངོས་ནས་འཇིག་རྟེན་གྱི་སྐྱེ་བ་ཕོ་མོའི་ལུས་ལ་བརྩི་བཀུར་མ་བྱས་པའི་ལམ་ཕྲན་འདི་ལ་ཡིད་འགྱོད་ཆེན་པོ་སྐྱེ་མྱོང་ཡོད་ཀྱང་། ཁོ་མོ་གཉིས་གཉེན་སྒྲིག་བྱས་ཡོད་ལ། ཁོ་མོ་གཉིས་ཀྱིས་རིགས་རྒྱུད་ཅིག་སློང་ནས་བུད་མེད་གཅིག་གིས་ཕྲུ་གུ་གཉིས་སྐྱེ་བ་རེད། ཕྲུ་གུ་གཉིས་ཀ་བུ་ཡིན་ལ། བུ་ཆུང་དེ་གཉིས་ཀྱང་ཁོ་གཉིས་ཀྱི་སྙིང་ནོར་ལྟ་བུ་ཆགས་ནས་ཡོད།
རིགས་རྒྱུད་སློང་བ་ཟེར་བ་ནི། སྐྱེ་བ་ཕོ་ཞིག་གི་ཁུ་བ་སློང་བ་དེ་ཡིན། ཁུ་བ་དེ་ཡང་སུའི་སྤྲོད་ཀྱི་ཡོད་མེད་གཏན་ནས་ཤེས་ཆོག་གི་མེད་ལ། ཁུ་བ་དེ་སློང་ཡུལ་ནི་སྨན་ཁང་རྒྱུད་ནས་ཡོང་གི་ཡོད། སྐབས་རེར་ཁུ་བ་སྤྲོད་མཁན་དང་ཁུ་བ་སློང་མཁན་གྱི་མི་གཉིས་མོས་མཐུན་བྱུང་ན། ཕན་ཚུན་ལ་འབྲེལ་བ་ཡོད་མཁན་རེ་ཟུང་ཡང་བྱུང་གི་ཡོད་པ་རེད་འདུག རིགས་རྒྱུད་བཙོང་མཁན་ཡང་དེ་མཚུངས་བཞིན་བྱུང་གི་ཡོད་པ་རེད། རིགས་རྒྱུད་ཉོ་བ་དང་སློང་མཁན་ལ་རིགས་མི་འདྲ་བ་ཁག་ཁ་ཤས་ཤིག་འདུག ཁ་ཤས་ནི་སྐྱེ་བ་ལ་ཁུ་བའི་ཚ་དྲོད་ཉམས་ནས་བུད་མེད་ཀྱིས་བྱིས་པ་སྐྱེད་བསྲུང་མ་ཐུབ་པར་བརྟེན། བུད་མེད་ལ་རན་པའི་ཁུ་བའི་དྲོད་ཚད་ཅིག་གཞན་ནས་ཉོ་བ་དང་སློང་བ་སོགས་རེད། ཁ་ཤས་ཤིག་ལེགས་འགྲུབ་བྱུང་ནས་བྱིས་པ་རེ་ཟུང་སྐྱེ་བ་ཡང་ཡོད་ལ། ཁ་ཤས་ཤིག་ལ་གཏན་ནས་ལམ་འགྲོ་བྱུང་གི་མི་འདུག
གནད་དོན་གཞན་ཞིག་ནི། མཚན་མཐུན་གཉེན་སྒྲིག་བྱེད་མཁན་གྱི་ཁྲོད་ནས་བུད་མེད་མཚན་མཐུན་གཉེན་སྒྲིག་པའི་རིགས་ཀྱི་བྱིས་པ་གསོ་སྐྱོང་བྱེད་མཁན་ཡོད་པ་ལས། སྐྱེ་བ་མཚན་མཐུན་གཉེན་སྒྲིག་ཁྲོད་དུ་དེ་ལྟར་བྱུང་ཐུབ་ཀྱི་མེད་པ་ནི། སྐྱེ་བ་ལ་བུ་སྣོད་མེད་པའི་ལོས་ཡིན་ལ། གཅིག་བྱས་ན་སྐྱེ་བ་དང་བུད་མེད་གཉིས་ཀྱི་ལུས་ཀྱི་ཆ་ཤས་ནས་བུད་མེད་ཟེར་བ་འདི་ནི་བྱིས་པ་གསོ་སྐྱོང་བྱེད་པར་ཧ་ཅང་དགའ་བོ་ཡོད་པ་ཡིན་དུས། བུད་མེད་མཚན་མཐུན་གཉེན་སྒྲིག་བྱས་ཀྱང་། བྱིས་པ་གསོ་སྐྱོང་བྱེད་པའི་ལས་དེ་གཉེར་བར་མཚན་མཐུན་གཉེན་སྒྲིག་བུད་མེད་དེ་གཉིས་ལ་འདོད་མོས་གཅིག་གྱུར་དུ་ཡོང་གི་ཡོད་པ་འདྲ། དེས་ན་སྐྱེ་བ་མཚན་མཐུན་གཉེན་སྒྲིག་པ་དེ་དག་གིས་འདོད་སྲེད་ཁོ་ན་ལས་གཞན་ཞིག་འདོད་ཀྱི་མེད་དམ། དེ་ཡང་རིགས་རྒྱུད་མ་འདོད་པ་དང་རིགས་རྒྱུད་ལ་འགན་འཁུར་འདོད་མེད་པར་མཚན་མཐུན་གཉེན་སྒྲིག་གི་ལམ་ཁ་འདི་འདེམས་པ་ཡིན་ནམ། གང་ལྟར། རིགས་རྒྱུད་སློང་བ་དང་རིགས་རྒྱུད་བཙོང་བའི་མཇུག་འབྲས་འདི་ལ་བསམ་བློ་ཐེངས་མང་བོ་ཞིག་ལ་བཏང་ནས། ང་རང་དངོས་ནས་མཚན་མཐུན་གཉེན་སྒྲིག་མཁན་གྱི་བུད་མེད་དེ་དག་གི་བྱིས་པ་འཚར་ལོངས་བྱུང་དེ་འོང་དུས། ཕྲུ་གུ་དེ་དག་ལ་འགྲོ་བ་མི་སྤྱིར་བཏང་གི་སེམས་གཤིས་ཀྱི་སྐྱེ་བ་ཕོ་མོའི་ལུས་ཁམས་ཀྱི་འཁོར་སྤྱོད་དེ་དག་ཇི་ལྟར་ངོ་སྤྲོད་བྱེད་ཀྱི་ཡོད་དམ་སྙམ་ན་སེམས་པ་སྐྱོ་ནི་ཞིག་རེད།
བཀླགས་ཟིན།
བཀླགས་ཡིན་སོ་སྐྱེས་རྣམས་གསར་བ་ལ་དགའ་བ་ཆོས་ཉིད་དུ་གྲུབ་ཡོད་ས་རེད།