སྤྱིར་འགྲོ་བ་མིའི་རང་བྱུང་གི་སེམས་པའི་ཆགས་སྟངས་དང་ཆུང་ནས་གཤིས་ལ་འཇགས་པའི་གོམ་གཤིས། ཁོར་ཡུག་དང་གྲོགས་ཉེ་དུ་ཡིས་བྱིན་པའི་མངར་སྐྱུར་འདྲེས་མའི་ཚོར་བ་བཅས་ལ་བརྟེན་ནས། མཚན་མཐུན་བཟའ་ཚང་འདི་བྱུང་བར་འདོད་ཀྱི་ཡོད་ལ། དངོས་ནས་བཤད་ན། མཚན་མཐུན་གཉེན་སྒྲིག་བྱེད་པའི་གོམ་གཤིས་དར་ནས་ཡུན་རིང་སོང་མེད་ཀྱང་། མཚན་མཐུན་མཉམ་འདུག་བྱེད་པའི་སྲོལ་དེ་ནི་སྔ་མོ་ནས་ཡོད་རབས་འདུག དེ་ནི་གཅིག་ནས་ཆོས་རྒྱུད་ཁ་ཤས་ལ་ཁག་བཞག་ནས་བྱུང་བར་བཤད་མཁན་ཡོད་ལ། དེ་ལྟར་མི་འདོད་པར་སྐྱེ་ནས་སྐྱེ་བ་སྐྱེ་བར་དགའ་བ་དང་། བུད་མེད་བུད་མེད་ལ་དགའ་བའི་སེམས་གཤིས་ཡོད་པར་ངེས་འཛིན་བྱེད་མཁན་ཡང་ཡོད་པ་རེད།
གང་ལྟར། དེ་རིང་གླེང་གཞི་དངོས་ནི། མཚན་མཐུན་གཉེན་སྒྲིག་བྱེད་མཁན་གྱི་བུད་མེད་ཀྱི་སྐོར་ནས་གོང་གི་ལེའུ་ཚན་དང་བོར་མདོར་བསྡུས་ཤིག་བཤད་ཟིན་པ་དེ་ཡིས་འཐུས་པར་བྱེད། ད་འདི་ནས་གང་གླེང་བར་བྱ་བ་ནི། མཚན་མཐུན་གཉེན་སྒྲིག་བྱེད་མཁན་གྱི་སྐྱེ་བ་དག་གི་སྐོར་ནས་རེད། དེ་ཡང་མཚན་མཐུན་གཉེན་སྒྲིག་བྱེད་མཁན་གྱི་སྐྱེ་བ་དག་གི་ཁྲོད་དུ་ཡང་རིགས་རྒྱུད་འཁུར་བ་དང་རིགས་རྒྱུད་བསྐྱེད་སྲུང་བྱེད་མཁན་བྱུང་ཡོད་ལ། ཉེ་བའི་ལོ་འགའི་སྔོན་དུ་ཨ་རི་ནས་སྐྱེ་བ་ཞིག་གིས་རང་གི་གྲོད་པའི་ནང་དུ་རིགས་རྒྱུད་ཅིག་བླུགས་ནས་བདེ་ལེགས་ངང་སྐྱེ་ཡོད་ལ། ད་ལྟ་དེ་རིང་ཡང་ང་རང་བསྡོད་སའི་རྒྱལ་ཁབ་འདིའི་ནང་དུ་ཡང་། སྐྱེ་བ་ཞིག་གི་རང་གི་གྲོད་ཁོག་ནང་དུ་ཕྲུ་གུ་ཞིག་འཁུར་ནས་སྐྱེ་གྲབས་ཡོད། གནས་ཚུལ་རྒྱུས་ལོན་བྱས་པ་ལས་ཤེས་པ་ཡིན་ན། སྐྱེ་བ་དེ་ནི་ཆོས་ལུགས་པའི་ཁྱིམ་རྒྱུད་ཅིག་ནས་བྱུང་བའི་མི་ཞིག་རེད་འདུག་ལ། རྒྱལ་ཁབ་འདིའི་མི་རིགས་ཀྱི་ལོ་རྒྱུས་སྟེང་ནས་སྐྱེ་བ་ཞིག་གི་ལུས་ལ་ཕྲུ་གུ་འཁུར་བ་ཁོ་རང་དང་བོ་དེ་ཆགས་ཡོད་པར་བཤད་ཀྱི་འདུག མི་རིང་བར་ཟླ་ངོ་གཅིག་གི་རྗེས་སུ་ཕྲུ་གུ་བདེ་ལེགས་ངང་སྐྱེ་ཐུབ་པར་བཤད་ཀྱི་ཡོད།
དོན་དངོས་སུ་སྐྱེ་བ་ཕོ་ཡི་ལུས་ལ་བུད་མེད་ཀྱི་ཚོར་བ་ཞུགས་ནས་ཡོད་པའི་བཤད་ཚུལ་ཡོད་ལ། འདི་ནི་དངོས་སུ་སྐྱེ་བ་ཞིག་གི་ལུས་ལ་བུད་མེད་ཅིག་གི་རྣམ་ཤེས་ངོ་མ་ཞིག་ཞུགས་པ་མ་རེད་ཟེར་ནས་བཤད་ཁག་ན་ཡང་། གནམ་འོག་འདི་ནས་སྐྱེ་བ་དང་བུད་མེད་གཉིས་ལས་སྐྱེ་བ་ནས་ལས་ཀྱི་ཐག་གིས་བཅད་པ་དང་། སྔོན་བསགས་ལས་དབང་ལ་ཁས་ལེན་བྱེད་པའི་བོད་མི་དང་ནང་བའི་རྗེས་མཇུག་པ་ཞིག་ལ་མཚོན་ནས་བཤད་ན། སྐྱེ་བ་སྔ་ཕྱི་ལ་འགྱུར་བ་མིག་གིས་རིག་ས་ནས་གཏོང་བའི་དེང་རབས་ཚན་རིག་གི་བྱེད་ཐབས་གསར་བ་འདི་དག་ལ་འགྲེལ་བཤད་ཇི་ལྟར་བརྒྱབས་ན་འོས་པ་ཞིག་ཆགས་འདུག་སྙམ་ན། དངོས་ནས་བསམ་གཞིགས་བྱེད་པ་གཅིག་བུས་མི་འགྲིག་པར། དངོས་སུ་མི་འདི་ཡི་རིགས་ཀྱི་ལོ་རྒྱུས་ཡིག་ཐོག་དུ་བླངས་ནས་དགེ་སྐྱོན་ཞིབ་ཚགས་པོ་རེ་བྱེད་ཐུབ་ན་བསམ་བྱུང་།
ད་ལྟའི་བར་དུ་བོད་མིའི་ཁྲོད་དུ་མཚན་མཐུན་གཉེན་སྒྲིག་བྱེད་མཁན་ནི་དངོས་སུ་རིག་རྒྱུ་ཕར་ཞོག་གོ་རྒྱུ་ཡང་མེད་པར་ད་ལྟའི་བར་དུ་སོང་བ་རེད། ཡིན་ཡང་། ལོ་སྔོན་མའི་ནང་དུ་ཨ་རིའི་ཡུལ་དུ་གནས་བསྡོད་བྱེད་པའི་བོད་ཀྱི་སྐྱེ་བ་ཞིག་གིས་ཨ་རིའི་ཕོ་གསར་ཞིག་དང་མཚན་མཐུན་གཉེན་སྒྲིག་བྱས་པ་རེད། བོད་ཀྱི་མི་རིགས་ཁྲོད་དུ་མཚན་མཐུན་གཉེན་སྒྲིག་འདི་དར་སྲིད་དམ། གལ་སྲིད། དར་བ་ཡིན་ན་འཚམ་པོ་འདུག་གམ། མཚན་མཐུན་གཉེན་སྒྲིག་བྱེད་མཁན་དག་གིས་རིགས་རྒྱུད་ལ་འགན་འཁུར་གྱི་ཡོད་དམ། རིགས་རྒྱུད་ལ་བསམ་མཁན་གྱི་མཚན་གཉེན་སྒྲིག་མཁན་ཅི་ཙམ་ཡོད་དམ། དངོས་ནས་བཤད་ན། མཚན་མཐུན་གཉེན་སྒྲིག་འདིས་སྤྱི་ཚོགས་ཀྱི་དགེ་སྐྱོན་གང་ཞིག་གི་གོ་གནས་ཤུགས་ཆེ་བ་བཟུང་ཡོད་དམ།
གང་ལྟར། མཐའ་དོན་དུ་ངས་བསམ་ན། བོད་དུ་དར་སྲིད་པའི་མཚན་མཐུན་གཉེན་སྒྲིག་པའི་ལུགས་སྲོལ་འདི་དང་འགྲོགས་ནས་རིགས་རྒྱུད་བཙོང་བ་དང་སྤྲོད་མཁན་ཡང་ཡོང་སྲིད་པ་རེད། དེ་ཡིན་དུས་བོད་རང་ལ་ཡང་སྔ་མོ་ནས་ཕྲུ་གུ་སྐྱེ་མི་ཐུབ་པའི་ཉེ་འབྲེལ་ལ་བུ་སྐལ་ཟེར་ནས་བྱིས་པ་སྤྲོད་སྲོལ་ཡོད་པ་ལས། རིགས་རྒྱུད་བཙོང་བ་དང་སྤྲོད་པའི་སྲོལ་འདི་བྱུང་མེད་དུས། ཕྱིས་སུ་དེ་ལྟར་བྱུང་བ་ཡིན་ན། བོད་མིའི་སྤྱི་ཚོགས་ཁྲོད་དུ་དགེ་མཚན་གང་བྱུང་གི་རེད་དམ།
