༄༅། །རྒྱལ་གཅེས་རིགས་ཞེན་གྱིས་ཕྱུག་པའི་བོད་ཆོལ་གསུམ་རྒྱ་ཆེའི་མི་མང་སེར་སྐྱ་ལྷན་རྒྱས་མཆོག་ལ།
གངས་ཅན་ཆོལ་གསུམ་ཆིག་སྒྲིལ་ཚོགས་པའི་ཚོགས་ཆེན་ཐེངས་བརྒྱད་པ་བོད་རྒྱལ་ལོ ༢༡༣༨ རབ་བྱུང་ ༡༧ ལྕགས་ཡོས་བོད་ཟླ ༨ ཚེས ༡༦ དང ༡༧ ཕྱི་ལོ ༢༠༡༡ ཟླ ༡༠ ཚེས ༡༢ དང ༡༣ བཅས་ཉིན་གཉིས་རིང་བཞུགས་སྒར་རྡ་ས་མེགྷན་ཆིག་སྒྲིལ་ཚོགས་ཁང་དུ་གཟབ་རྒྱས་ངང་འཚོགས་ཏེ།དབུས་རྒྱུན་ལས་གསར་རྙིང་འཕོ་འགྱུར་གྱིས་རྒྱུན་ལས་གསར་པ་མི་གྲངས་བཅུ་གཅིག་མང་མོས་འོས་འདེམས་བྱུང་བ།ཚོགས་གཙོ་མདོ་སྨད་བསྟན་པའི་དངོས་གྲུབ།ཚོགས་གཞོན་དབུས་གཙང་མངའ་རིས་བསྟན་འཛིན་གྲགས་པ། དྲུང་ཆེ་དབུས་གཙང་སྐྱིད་གྲོང་སྨན་པ་བསོད་ནམས་ཕུན་ཚོགས། དངུལ་གཉེར་དབུས་གཙང་དིང་རི་སྐལ་བཟང་བདེ་སྐྱིད། རྩིས་པ་དབུས་གཙང་ཚོང་གསར་སྒྲོལ་མ་དབྱངས་སྐྱིད། དབུས་རྒྱུན་མདོ་སྟོད་ཆབ་མདོ་ཆོས་གྲགས། མདོ་སྨད་བསོད་ནམས་མགོན་པོ། མདོ་སྟོད་བྲག་གཡབ་བསྟན་འཛིན་སྙན་གྲགས། དབུས་གཙང་མངའ་རིས་དབྱངས་ཅན། མདོ་སྨད་སྐུ་འབུམ་བློ་བཟང་ཚེ་རིང་། དབུས་གཙང་ཕག་རི་པ་སངས་མཆོག་པ་བཅས་ནས་ཕྱི་ལོ༢༠༡༡ ཟླ ༡༡ ཚེས ༡ ཉིན་གསར་རྙིང་རྩིས་སྤྲོད་རྩིས་ལེན་བྱས་ཏེ་ལས་འཁུར་ནང་དངོས་སུ་ཞུགས་ཟིན་པས།རྒྱུན་ལས་ཡོངས་ནས་རང་རེའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གཙོས་ཆོལ་གསུམ་སེར་སྐྱ་མང་ཚོགས་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་སྦྲགས་འབོད་སྐུལ་ཞུ་རྒྱུར།
དེང་སྐབས་རང་རེའི་གངས་ཅན་པའི་རྩ་དོན་ཛ་དྲག་གི་འགྱུར་འགྲོས་ཅི་ཆེའི་དུས་འདིར་བོད་ཆོལ་ཁ་གསུམ་གྱི་ཁྱོན་ལ་རང་དབང་བདེ་སྐྱིད་ཀྱི་ཉི་མ་འཆར་བ་བྱ་རྒྱུ་འདི་ང་ཚོ་ཐུན་མོང་གི་ལས་འགན་ཡིན་པས་དེ་དོན་ང་ཚོ་ཚང་མས་མཐུན་ལམ་རྡོག་རྩ་གཅིག་བསྒྲིལ་སྔར་བཞིན་གནང་གལ་ཆེ་བ་ཞུ་རྒྱུ་དང་། མ་འོངས་པར་ཚོགས་པ་འདིས་གངས་ཅན་བོད་ཀྱི་རྩ་དོན་ཆེད་ལས་འགུལ་ཆེ་ཕྲ་ཆུང་གསུམ་གང་སྤེལ་སྐབས་ཚོགས་སྐྱིད་ཁག་དང་སེར་སྐྱ་མི་མང་ཡོངས་ནས་རྒྱབ་སྐྱོར་གང་ཐུབ་གནང་སྐྱོང་ཡོང་བ་ཞུ་རྒྱུ་བཅས།
རྡ་ས་གངས་ཅན་ཆོལ་གསུམ་ཆིག་སྒྲིལ་ཚོགས་པའི་དབུས་རྒྱུན་ལས་ཁང་ནས།
