རྒྱུད་སྨད་གྲྭ་ཚང་གི་ཆོས་བརྡ་གསལ་བསྒྲགས།

༄། །དད་དམ་མཆོག་ཏུ་དགེ་ཞིང་དོན་གཉེར་གྱི་འདུན་པ་བརྟས་པའི་ཆོས་ཞུ་བ་སེར་སྐྱ་ཡོངས་ཀྱི་སྙན་ལམ་དུ་ཞུ་དོན།འདི་ག་དཔལ་ལྡན་སྨད་རྒྱུད་གྲྭ་ཚང་གིས་རིང་མོ་ཉིད་ནས་ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་བ་བཏབ་པ་བཞིན། འདི་ལོ་ཕྱི་ཟླ་ ༡༢ ཚེས་ ༠༤ དགེ་བར་ཧུན་སུར་རབ་རྒྱས་གླིང་གཞིས་སྒར་སྨད་རྒྱུད་གྲྭ་ཚང་དུ་ཞབས་སོར་བཀྲ་ཤིས་ཀྱི་རེ་ཁ་བཀོད་དེ་གསུང་ཆོས་སོགས་མཛད་འཕྲིན་ཁག་བཀྲིན་བསྐྱང་རྒྱུའི་ཞལ་བཞེས་གསུང་གི་བདུད་རྩི་སྤྱི་བོར་ཕེབས་ཡོད། དེ་ཡང་འདི་སྔོན་གྱི་མཛད་འཆར་བྱས་ན་ཕྱི་ཟླ་༡༢ ཚེས་ ༠༥དགེ་བར་ཞབས་སོར་འཁོད་དེ་མཛད་འཕྲིན་ཁག་བསྐྱངས་རྗེས་དེ་ཚེས་༡༡ཉིན་ཕྱིར་ཕེབས་བསྐྱང་རྒྱུའི་མཛད་འཆར་རགས་རིམ་བཀོད་སྒྲིག་མཛད་དོན་བཞིན་གནས་ཚུལ་གང་འཚམས་ཁྱབ་བརྡལ་ཕྱིན་ཡོད་མོད། གལ་ཆེའི་མཛད་བྲེལ་གཞན་གྱི་དབང་གིས་ཕྲན་བུའི་མཛད་རིམ་ལ་འགྱུར་བ་བྱུང་སྟེ།
    ཕྱི་ཟླ་ ༡༢ ཚེས་ ༠༤ དགེ་བར་འདི་ག་ཧུན་སུར་སྨད་རྒྱུད་གྲྭ་ཚང་དུ་ཞབས་ཀྱི་པདྨོ་མངོན་པར་བཀོད་ནས་ས་གཞི་དགེ་མཚན་དུ་བྱས་ཤིང་།ཚེས་ ༠༥ དང་ ༠༦ལ་གཤམ་གསལ་གྱི་བཀའ་ཆོས་བཀྲིན་བསྩལ་རྒྱུ་དང་། ཚེས་ ༠༧གྱི་སྔ་དྲོར་གྲྭ་ཚང་དང་རབ་གླིང་འགོ་མང་སེར་སྐྱ་སྤྱི་ནས་ཇི་ལྟར་གསོལ་བ་བཏབ་པ་བཞིན་བསྟན་འགྲོའི་མགོན་དུ་སྐུ་ཚེ་ཞབས་པད་བརྟན་པའི་བརྟན་བཞུགས་འབུལ་བཞེས་བསྐྱངས་ཤིང་། ཉིན་རྒྱབ་བཀའ་ཆོས་འཕྲོ་ནས་བསྩལ་རྒྱུ་དང་། དེའི་ཕྱི་དྲོར་མགོན་པོ་གང་གིས་དེ་སྔོན་ནས་བཀའ་སློབ་ལམ་སྟོན་སྤྱི་ཕེབས་དགོངས་དོན་བཞིན། དཔལ་ལྡན་སྨད་རྒྱུད་གྲྭ་ཚང་དུ་གསར་སྐྲུན་ལེགས་པར་ཟིན་པའི་གངས་ཅན་རིག་གནས་སློབ་གྲྭ་དབུ་འབྱེད་དང་རབ་གནས་བྱིན་འབེབས་ཀྱི་རྟེན་འབྲེལ་མཛད་སྒོ་མདོར་བསྡུས་གནང་རྒྱུ། ཚེས་ ༠༨ ཉིན་ཕྱིར་ཕེབས་བསྐྱང་རྒྱུ་བཅས་ཡིན་པ་དཔལ་ལྡན་ལྷོ་སྤྱིི་བརྒྱུད་ནས། བཀའ་གསུང་འཆི་མེད་བདུད་རྩིའི་སྦྲང་ཆར་བདག་ཅག་རེ་བའི་ཚ་གདུང་གཞིལ་བའི་གསོས་སུ་སྤྱི་བོར་བསྩལ་སྨིན་བྱུང་སོང་བ་དང། བཀའ་ཆོས་ནི་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རྫོགས་རིམ་སྐོར་གྱི་གཞུང་སྟེ།རིམ་ལྡ། ཞེས་སུ་གྲགས་པ་དེའི་འགྲེལ་པ་པཎ་ཆེན་བློ་བཟང་ཆོས་རྒྱན་གྱིས་མཛད་པའི་རིམ་པ་ལྔའི་རྣམ་པར་བཤད་པ་ཟུང་འཇུག་ནོར་བུའི་བང་མཛོད་ཅེས་བྱ་བའི་གཞུང་འདིའི་བཀའ་ཁྲིད་བསྩལ་རྒྱུ་ཡིན་པ་མ་ཟད། བཀའ་ཆོས་འདིའི་ཕྱག་དཔེ་ཡང་། གྲྭ་ཚང་ནས་པར་སྐྲུན་ཞུ་བཞིན་པས་སྐབས་འཚམས་འདུས་ཚོགས་སུ་འགྲེམས་འབུལ་ཞུ་ཆོག་པ་བཅས་ཀྱི་ཆོས་བརྡ་གསལ་བསྒྲགས་སུ།