ཧྥ་རན་སིར་སྤྱི་འཐུས་ཤིག་དང་ལས་འགུལ་བ་ ༦ བཀག་ཉར།

བོད་པ་དང་བོད་དོན་རྒྱབ་སྐྱོར་ཚོགས་པ་ཁག་གིས་ཧྥ་རན་སིའི་གྲོང་ཁྱེར་ཁཱན་ནང་སྲིད་འཛིན་ཧུའུ་ཅིན་ཐའོ་ལ་སྤེལ་བཞིན་པའི་ངོ་རྒོལ་ལས་འགུལ་ཁག་མུ་མཐུན་བཞིན་ཡོད་པ་དང་། དེ་རིང་གི་ལས་འགུལ་ཁྲོད་བོད་མི་མང་སྤྱི་འཐུས་གཅིག་གཙོས་པའི་ལས་འགུལ་བ་ ༦ ཉེན་རྟོག་པས་འཛིན་བཟུང་བཀག་ཉར་བྱས་ཡོད་འདུག

 དེ་རིང་སྔ་དྲོའི་ཆུ་ཚོད་ ༡༡ དང་ཕྱེད་ཀའི་སྟེང་། རྒྱལ་སྤྱིའི་བོད་དོན་ལས་འགུལ་འབྲེལ་མཐུད་ཁང་དང་། བོད་རང་བཙན་སློབ་ཕྲུག་ཚོགས་ཆུང་། དེ་བཞིན་ཡུ་རོབ་བོད་ཀྱི་གཞོན་ནུ་ཚོགས་པ་བཅས་ཀྱིས་གོ་སྒྲིག་འོག་ཧྥ་རན་སིའི་གྲོང་ཁྱེར་ཁཱན་ནང་ངོ་རྒོལ་ལས་འགུལ་སྤེལ་མགོ་བཙུགས་ཡོད་འདུག་ལ། ལས་འགུལ་མགོ་འཛུགས་སྐབས་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་དང་། ཧྥ་རན་སིའི་བསྟན་རྣམ། དབྱིན་ལན་གྱི་པདྨ་ཡུ་ཀོ སུད་སིའི་མིག་དམར་བཅས་བོད་རིགས་གཞོན་སྐྱེས་ཁག་ཅིག་གིས་གསར་འགོད་གསལ་བསྒྲགས་ཤིག་སྤེལ་བ་དང་བསྟུན། ཁོ་ཚོའི་མཉམ་དུ་ཡོད་པའི་ལས་འགུལ་བ་ཁག་ཅིག་སྲང་ལམ་དུ་ཉལ་ནས་ངོ་རྒོལ་སྐད་འབོད་བྱས་སྐབས། ཉེན་རྟོག་པས་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་གཙོས་པའི་ངོ་རྒོལ་བ་བདུན་འཛིན་བཟུང་དང་དུས་ཡུན་ཆུ་ཚོད་གསུམ་ཙམ་རིང་བཀག་ཉར་བྱས་ཡོད་འདུག

འདིའི་སྐོར་བསྟན་རྣམ་ལགས་སུ་ཁ་པར་བརྒྱུད་བཀའ་འདྲི་ཞུས་སྐབས། ཁོང་གིས “ སྤྱིར་བཏང་ཁ་སང་ནས་ང་ཚོས་ལས་འགུལ་སྤེལ་མགོ་བཙུགས་ཡོད་པ་རེད། ཁ་སང་བོད་རང་བཙན་སློབ་ཕྲུག་ཚོགས་པ་དང་། ཡུ་རོབ་བོད་ཀྱི་གཞོན་ནུའི་ཚོགས་པའི་མི་བཞི་ཡིས་སྲིད་འཛིན་ཧུའུ་ཅིན་ཐའོ་འདིར་འབྱོར་སྐབས་དང་བསྟུན་ནས་བོད་ཀྱི་རྒྱལ་དར་དང་། འབོད་ཚིག་འཁོད་པའི་འཕྲེད་དར་འཁྱེར་ནས་གྲོང་ཁྱེར་མེ་འཁོར་འབབ་ཚིགས་ཀྱི་ཐོག་ཁང་ཡང་སྟེང་ནས་མར་དཔྱངས་ནས་ང་རྒོལ་ལས་འགུལ་སྤེལ་བ་རེད། ད་དུང་སང་ཉིན་ཡང་མུ་མཐུད་ནས་ལས་འགུལ་སྤེལ་འཆར་ཡོད་པ་རེད ” ཅེས་དང་།  “ དེ་རིང་གི་གསར་འགོད་གསལ་བསྒྲགས་ནང་། གཙོ་བོ་རྒྱ་ནག་གིས་བོད་ཐོག་བཟུང་བའི་དྲག་རྩུབ་ཀྱི་སྲིད་ཇུས་མཚམས་འཇོག་དགོས་པ་དང་། དེ་རིང་འདིར་འཛོམས་པའི་སྟོབས་ཆེན་རྒྱལ་ཁབ་ཉི་ཤུའི་དབུ་ཁྲིད་ཚོས་བསམ་བཞེས་གནང་སྟེ། རྒྱ་ནག་སྲིད་འཛིན་ཧུའུ་ཅིན་ཐའོ་དང་མཉམ་དུ་གླེང་སློང་དགོས་པའི་འབོད་སྐུལ་ཞུས་ཡོད། ད་ལྟའི་བོད་ནང་གི་ཛ་དྲག་གནས་སྟངས་དང་། བོད་ནང་གི་བོད་མིའི་བདེ་སྡུག་མཚོན་ཆེད་ང་ཚོ་ལམ་ཁའི་ནང་ཉལ་ནས་ངོ་རྒོལ་སྐོད་འབོད་བྱས་པ་ཡིན ” ཞེས་དེ་རིང་གི་ལས་འགུལ་སྐོར་ངོ་སྤྲོད་གནང་སོང་།

ཁོང་གིས་མུ་མཐུད་ནས་ “ སྤྱིར་བཏང་ང་ཚོར་གྲོང་ཁྱེར་ནེ་སི་ནང་མ་གཏོགས་ཁཱན་ནང་ལ་ངོ་རྒོལ་སྤེལ་རྒྱུའི་ཆོག་མཆན་ཐོབ་ཡོད་པ་མ་རེད། དེའི་སྒང་ལ་དམ་དྲག་ཧ་ལས་པའི་ཤུགས་ཆེན་པོ་འདུག གོ་ཐོས་ལ་ཁཱན་གྲོང་ཁྱེར་ཆུང་ཆུང་འདིའི་ནང་ད་ཐེངས་ཉེན་རྟོག་པ་དང་སྲུང་སྐྱོབ་དམག་མི་ཁྲི་ཉིས་ལྷག་ཡོད་ཚུལ་འདུག ལམ་ཁ་ཆེ་ཆུང་གང་ཡིན་ཡང་ཐར་རྒྱུ་ཁག་པོ་རེད། ཆུ་ཚོད་སྐར་མ་རེ་རེ་བཞིན་ཐད་འཕུར་གནམ་གྲུའི་བསྐོར་བ་བྱེད་ཀྱི་འདུག ཡིན་ནའང་། ང་ཚོས་ཐབས་ཤེས་དང་འབད་བརྩོན་འདྲ་མིན་བྱས་ཏེ་ཚོགས་ཆེན་ཚོགས་སའི་ཉེ་སར་བསླེབས་ཐུབ་པ་རེད། ཚོགས་རར་ཉེ་སའི་སྲང་ལམ་ཆུང་ཆུང་ཞིག་གི་ནང་གསར་འགོད་གསལ་བསྒྲགས་དང་ངོ་རྒོལ་སྐད་འབོད་བྱས་པ་ཡིན། ཉེན་རྟོག་པ་རིམ་པ་བཞིན་འབྱོར་ནས་ང་ཚོ་མི་བདུན་འཛིན་བཟུང་དང་། གཞན་དེ་ཚོར་ངོ་རྒོལ་མཚམས་འཇོག་བཅུག་ནས་ཕྱིར་ཕུད་བཏང་སོང་། ང་ཚོ་མི་བདུན་པོ་ཆུ་ཚོད་གསུམ་རིང་བཀག་ཉར་དང་འདྲི་བརྩད་བྱས་རྗེས་ཀློད་གྲོལ་བཏང་སོང”  ཞེས་ཁོ་ཚོ་འཛིན་བཟུང་བཀག་ཉར་གྱི་བརྒྱུད་རིམ་གསལ་བཤད་དང་འབྲེལ། གྲོང་ཁྱེར་ཁཱན་ནང་ཉེན་རྟོག་པའི་དམ་དྲག་ཤུགས་ཆེན་ཡོད་ནའང་། ལས་འགུལ་སྤེལ་སྐབས་དང་འཛིན་བཟུང་བྱེད་སྐབས་གྲོང་ཁྱེར་མི་མང་གིས་༼ ཡག་པོ་འདུག༽ ༼ ང་ཚོ་བོད་པའི་རྒྱབ་རྩར་ལངས་ཡོད། ༽ཅེས་སྐད་ཤུགས་ཆེན་པོ་བརྒྱབ་སྟེ་རྒྱབ་སྐྱོར་གྱི་རྣམ་པ་བསྟན་ཡོད་ཚུལ་གསུངས་བྱུང་།

གཞན་ཁ་སང་ཧྥ་རན་སིའི་རྒྱལ་སར་ཕ་རི་སིར་ངོ་རྒོལ་སྐད་འབོད་བྱེད་སྐབས། བོད་རིགས་གཞོན་སྐྱེས་བུ་མོ་ཏྰ་ར་སྒྲོལ་མ་ལྷ་མོ་དང་། ཀ་མེ་ཡ། བུ་ཡོན་ཏན། བསྟན་འཛིན་ཟླ་བཟང་། བཀྲ་ཤིས་བསམ་འཕེལ། བསྟན་པ་དར་རྒྱས་བཅས་ཀྱིས་དང་བླང་ཐོག ཕ་རི་སིའི་དྲན་རྟེན་སྒོ་ཆེན་( Charles du gaule )སྟེང་བོད་ཀྱི་རྒྱལ་དར་དང་།  ༼ སྲིད་འཛིན་སར་ཁོ་རྫེ། བོད་སྐྱོབས་རོགས། ༽སོགས་འཁོད་པའི་འཕྲེད་དར་རིང་བོ་ཞིག་དཔྱངས་ཡོད་པ་དང་། འཕྲེད་དར་དེའི་རིང་ཐུང་ལ་མེ་ཊེར་ ༣༠ ལྷག་ཡོད་འདུག ལས་འགུལ་སྤེལ་རྗེས་ཁོ་ཚོ་ཡང་ཉེན་རྟོག་པས་འཛིན་བཟུང་དང་དུས་ཡུན་ཆུ་ཚོད་གཉིས་ཙམ་ལ་བཀག་ཉར་འདྲི་བརྩད་བྱས་ཡོད་འདུག

སང་ཉིན་གྱི་ལས་འགུལ་སྤེལ་ས་ནི་གྲོང་ཁྱེར་ནེ་སི་ནང་ཡིན་ཞིང་། སྔ་དྲོ་ཆུ་ཚོད་ ༩ ནས་མགོ་འཛུགས་ཀྱི་ཉིན་གང་བོར་ངོ་རྒོལ་སྐད་འབོད་དང་། གཏམ་བརྗོད་ཁྲབ་སྟོན་སོགས་བྱ་འཆར་ཡོད་པ་མ་ཟད། ཁ་སང་ལྟར་འདུ་འཛོམས་ཆེ་སའི་གྲོང་ཁྱེར་ནེ་སིའི་གནའ་བོའི་ལྷ་ཁང་རྙིང་བ་ཞིག་གི་ཡང་སྟེང་ནས་བོད་དོན་བརྗོད་ཚིག་འཁོད་པའི་ཕྲད་དར་དཔྱང་འཆར་ཡོད་འདུག

ས་གནས་གསར་འགོད་པ། ཟླ་བ་ཚེ་རིང་།