བོད་ནང་རང་ལུས་མེར་བསྲེགས་གཏོང་བཞིན་པ་དག་ལ་གདུང་སེམས་མཉམ་སྐྱེད་ཆེད་བྷེལ་རྗེམ་གྱི་རྒྱལ་ས་སྤར་སིལ་དུ་ཉིན་ལྔའི་རིང་གི་ཟས་བཅད་ངོ་རྒོལ་མགོ་འཛུགས་གནང་འདུག
ཁ་སང་ཕྱི་ཚེས་ ༣ ཉིན་གྱི་ཞོགས་པའི་ཆུ་ཚོད་ ༩ བའི་ཐོག་བྷེལ་རྗེམ་བོད་རིགས་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་། བྷེལ་རྗེམ་ས་གནས་གཞོན་ནུ། ས་གནས་ཆུ་བཞི་སྒང་དྲུག བོད་ཀྱི་གྲོགས་པོ་ཚོགས་པ་བཅས་ཚོགས་པ་ལྔ་ཐུན་མོང་གིས་གོ་སྒྲིག་འོག རྒྱལ་ས་སྦར་སིལ་དུ་ཡུ་རོབ་གྲོས་ཚོགས་ཚོགས་བཞིན་པའི་སྐབས་དང་བསྟུན་ཏེ་ཟས་བཅད་ངོ་རྒོལ་གྱི་ལས་འགུལ་ཞིག་མགོ་འཛུགས་གནང་ཡོད་འདུག
ལས་འགུལ་གྱི་ཉིན་དང་པོར་ས་གནས་བོད་མི་ ༢༡ ཙམ་མཉམ་ཞུགས་བྱས་ཡོད་འདུག་ལ། ལས་འགུལ་འདི་དང་འབྲེལ་ཏེ་ཚོགས་པ་ལྔས་ཡུ་རོབ་མཉམ་འབྲེལ་འཛིན་སྐྱོང་ལ་བོད་དོན་སྙན་ཞུ་ཞིག་ཀྱང་འབུལ་འཆར་ཡོད་འདུག སྙན་ཞུ་དེའི་ནང་། ཉེ་བའི་ཟླ་འགའི་ནང་བོད་ཀྱི་རྒྱལ་གཅེས་དཔའ་བོ་དཔའ་མོ་ ༡༠ ལྷག་གིས་བོད་མི་རིགས་ཀྱི་རང་དབང་ཆེད་རང་ལུས་མེར་བསྲེགས་བཏང་ཡོད་པ་དང་། དེ་དག་ལས་རྒྱལ་གཅེས་དཔའ་བོ་དཔའ་མོ་ ༦ འདས་གྲོངས་སོང་བ། གཞན་ ༤ རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་ཡོད་སྟབས། ཡུ་རོབ་མཉམ་འབྲེལ་རྒྱལ་ཁབ་ཁག་གིས་གཙོས་རྒྱལ་སྤྱིའི་རྒྱལ་ཁབ་ཁག་གིས་བོད་ནང་གི་འགྲོ་བ་མིའི་ཐོབ་ཐང་ཐོག་ལྟ་རྟོགས་དང༌། བོད་དོན་བདེན་པའི་འཐབ་རྩོད་ལ་རྒྱབ་སྐྱོར་ཡོང་བའི་འབོད་སྐུལ་ཤུགས་ཆེན་ཞུ་དགོས་པའི་འབོད་སྐུལ་གནང་ཡོད་འདུག
ཐེངས་འདིའི་ཟས་བཅད་ངོ་རྒོལ་གྱི་ལས་འགུལ་དེ་ཁ་སང་ཕྱི་ཚེས་ ༣ ནས་མགོ་འཛུགས་ཀྱིས་ཕྱི་ཚེས་ ༩ བར་ཡུ་རོབ་གྲོས་ཚོགས་མདུན་ཐང་དུ་གནང་གི་ཡོད་པ་དང་། ཉིན་མཐའ་མའི་དགོང་དྲོའི་ཆུ་ཚོད་ ༤ ནས་ ༦ པའི་བར་སྐད་འབོད་ཁྲོམ་སྐོར་ཞིག་ཀྱང་གནང་འཆར་ཡོད་འདུག
གནས་ཚུལ་མཁོ་གཏོང་བ་བྱམས་པ་རྒྱལ་མཚན།
རྗེས་སུ་ཡི་རངས་ཞུ། རྒྱ་ནག་གིས་གདུག་རྩུབ་ཀྱི་རྣམ་ཇེ་ཆེར་སྤེལ་བ་དང་ང་ཚོས་ཀྱང་ལས་འགུལ་གྱི་ཁོར་ཡུག་ཇེ་ཆེར་གཏོང་རྒྱུ་ནི་གལ་ཆེན་ཞིག་རེད།
དངོས་གནས་ད་ནི་རི་ཁ་བ་ཅན་འཛམ་གླིང་ལ་ཆས་པའི་ཁ་སང་དེ་རིང་ནི་བསམ་ཤེས་ན་མཛེས་སྡུག་གི་ཉིན་མོ་བླ་ན་མེད་པ་རྐྱང་རེད།
ན་ནང་ལས་ཀྱང་ད་ལོ། ཁ་སང་ལས་ཀྱང་དེ་རིང་། མི་རིགས་འཐབ་རྩོད་ཀྱི་ལས་འགུལ་དག་གི་ངོ་བོ་དང་རྣམ་པ་སོགས་ཕྱོགས་གང་ཐད་ནས་བལྟས་ཀྱང་འཛམ་གླིང་མིག་གིས་མཐོང་བའི་ལས་འགུལ་ཞིག་གི་ངོ་བོར་གྱུར་འགྱུར་བཞིན་ཡོད་པས། སྙིང་ནས་གུས་འདུད་བླ་མེད་ཞུ།