བོད་ནས་གསར་དུ་འབྱོར་མཁན་བྱམས་པ་ཐོགས་མེད་ལགས་བརྒྱུད་གནས་ཚུལ་རྒྱུས་ལོན་བྱས་པ་ལྟར་ན། ཁོང་གི་ཕ་ཡུལ་ཡུན་ནན་ས་ཁུལ་ཁག་གི་བོད་རིགས་རྣམས་སོ་སོའི་སྐད་དང་ཡི་གེ རིག་གཞུང་དང་མི་རིགས་ཀྱི་ལྟ་བ་བརླག་འགྲོ་བཞིན་ཡོད་པ་མ་ཟད། གྲྭ་བ་ཚོའི་ཁྲོད་དུ་ཆང་དང་ཐ་མག་འཐེན་མཁན་ཡང་མང་རབ་བཤད།
ཟླ་འདིའི་ཕྱི་ཚེས་ ༣ ཉིན་འདི་གའི་གསར་འགོད་པ་བཞུགས་སྒར་ངྷ་རམ་ས་ལའི་ཉེ་འདབས་སུ་ཡོད་པའི་དབུས་སྣེ་ལེན་ཁང་དུ་བསྐྱོད་དེ། ཕ་ཡུལ་ཡུ་ནན་བདེ་ཆེན་ནས་ཡིན་པ་རང་ལོ་ ༢༠ སོན་པའི་གྲྭ་བྱམས་པ་ཐོགས་མེད་ལགས་ལ་ཕ་ཡུལ་གྱི་གནད་དོན་སྐོར་ཞིག་གི་ཐད་རྒྱུས་ལོན་བྱས་པར། ཁོང་རང་ལོ་ ༧ ལ་སོན་སྐབས་བུ་བསྟན་དགོན་དུ་ཆོས་ཞུགས་བྱས་པ་དང་། སྐབས་དེར་དགོན་པ་ཆུང་ཆུང་དེའི་ནང་གྲྭ་བ་ ༢༠ ཙམ་ཞིག་ཡོད་ཅིང་། ད་ཆར་གྲྭ་བ་ ༡༥ ཙམ་ལས་མེད་པ་དང་། གྲྭ་བ་ཇེ་ཉུང་དུ་ཕྱིན་པའི་གནས་སྟངས་དེ་བུ་བསྟན་དགོན་གཅིག་པུ་མིན་པར་ཕ་ཡུལ་ཡུན་ནན་ཕྱོགས་ཀྱི་དགོན་པ་སྤྱིའི་གནས་སྟངས་ཞིག་ཡིན་འདུག དེའི་རྒྱུ་རྐྱེན་ནི། རྒྱ་ནག་གི་སྲིད་ཇུས་འོག་བཟའ་ཚང་རེར་བྱིས་པ་གཉིས་ལས་སྐྱེ་མི་ཆོག་སྟབས། ཕ་ཤུལ་རྒྱུན་འཛིན་དང་ནང་མིར་ལྟ་རྟོག་བྱེད་མཁན་ཕུལ་པའི་དགོན་པར་གྲྭ་བ་བྱེད་དུ་འཇུག་རྒྱུའི་བྱིས་པ་དཀོན་པོ་ཆགས་ཡོད་པས་ཡིན་འདུག
བུ་བསྟན་དགོན་ལ་མཚོན་ན། ཞབས་རིམ་ཙམ་ལས་གཞུང་ཆེན་དང་མཚན་ཉིད་རིགས་མེད་པ་དང་། དེ་བཞིན་སྲོང་བཙན་གླིང་དགོན་པ་དང་དོན་གྲུབ་གླིང་དགོན་པ་རེ་གཉིས་ནི་ཡུལ་དེའི་དགོན་པ་ཆེ་ཤོས་ཡིན་ཡང་། གཙོ་བོ་ཞབས་བརྟན་རིགས་ལས་སྔགས་ཆོས་དང་མཚན་ཉིད་འཆད་ཁྲིད་རིགས་ས་ཆ་མ་སྟོང་ཙམ་རེ་ཡིན་འདུག གཞུང་ཆེན་ཁག་དང་མཚན་ཉིད་རིགས་ལ་སློབ་སྦྱོང་བྱ་འདོད་ཀྱང་དགེ་རྒན་རག་དཀའ་པ་དང་། རྒྱ་གར་ནས་ཕྱིར་ཕེབས་པའི་དགེ་བཤེས་དེ་འདྲ་ཡོད་ཀྱང་དགོན་པའི་ནང་འཆད་ཁྲིད་བྱེད་མི་ཆོག་པ་མ་ཟད། དགོན་པར་འགྲོ་དགོས་བྱུང་ཚེ་སྐྱ་ཆས་གྱོན་ཏེ་གསང་བའི་ངང་འགྲོ་འོང་བྱ་དགོས་ཡོད་འདུག གྲྭ་བྱམས་པ་ལགས་ཀྱིས། “རྒྱ་གཞུང་ས་གནས་དཔོན་རིགས་ཚོས། གྲྭ་བ་ཚོ་བདེ་ཆེན་ནང་བསྟན་སློབ་གླིང་དུ་ཞུགས་ཏེ་སློབ་སྦྱོང་བྱ་རྒྱུར་སྐུལ་མ་གཏོང་གི་རེད། དེར་སུམ་རྟགས་སྙན་ངག་དང་མཚན་ཉིད་རིགས་པ་སོགས་ཡག་པོ་ཡོད་རབས་བཤད་ཀྱང་། སློབ་གླིང་དེར་ཞུགས་སྐབས་ཆབ་སྲིད་དང་རྒྱལ་གཅེས་ཆོས་གཅེས་ཀྱི་སློབ་གསོ་ཤུགས་ཆེ་བ་དང་དགེ་རྒན་ཕལ་ཆེ་བ་མི་སྐྱ་རེད” ཅེས་བརྗོད་བྱུང་།
ད་ལྟ་བོད་ཀྱི་ས་ཁུལ་གཞན་དང་བསྡུར་ན། ཡུན་ནན་ས་ཁུལ་གྱི་བོད་རིགས་ཁྲོད་བོད་ཀྱི་སྐད་ཡིག་དང་རིགས་གཞུང་མི་ཤེས་མཁན་མང་པ། གྲྭ་བ་ཞིག་ལ་མཚོན་ན་འདུལ་ཁྲིམས་སྲུང་སྟངས་སོགས་ཉམས་ཏེ། རྒྱ་ཡིག་རྒྱ་སྐད་དང་རྒྱ་གཤིས་ལ་འགྱུར་བཞིན་པ་ཙམ་མ་ཟད། ཐ་མག་དང་ཆག་རག་སོགས་ཚུལ་མིན་གྱི་བྱ་སྤྱོད་འཛིན་པའི་གྲྭ་བ་མང་པོ་ཡོད་འདུག དེའི་རྒྱུ་རྐྱེན་ནི་གཅིག་ནས་ཡུན་ནན་ས་ཁུལ་དུ་རྒྱ་རིགས་སློབ་གྲྭ་ལས་བོད་ཀྱི་སྐད་ཡིག་རིག་གནས་སློབ་སའི་ཁོར་ཡུག་མེད་པ་དང་། གཉིས་ནས་རྒྱ་མི་མང་དྲགས་པ། དེ་བཞིན་དགོན་པའི་ཉེ་འཁོར་དང་ཁྲོམ་གཞུང་གང་སར་རྒྱའི་ཟ་ཁང་ཆང་ཁང་དང་། གློག་བརྙན་ཁང་མང་སྟབས། གྲྭ་བ་ཚོ་ཉིན་ལྟར་འཁྱམ་ཉུལ་གྱིས་རྒྱ་རིགས་ཀྱིས་ཁེངས་པའི་སྤྱི་ཚོགས་ཁྲོད་སྐྱེལ་བཞིན་པ་བཅས་ལ་བརྟེན་ནས་བོད་རང་གི་གཤིས་ལུགས་ཤོར་ཏེ་རྒྱ་སྐད་བཤད་མཁན་དང་རྒྱའི་ཆ་ལུགས་འཛིན་པའི་མི་རབས་ཤིག་ཆགས་བཞིན་ཡོད་ཅིང་། ཟ་ཁང་ཚོང་ཁང་ཞིག་ཏུ་སྐྱོད་སྐབས་རྒྱ་སྐད་རྒྱ་ཡིག་བེད་སྤྱོད་མ་བྱས་ཚེ་ཟ་མ་ཡང་རག་དཀའ་པ་དང་ཅ་དངོས་ཉོ་མི་ཐུབ་པའི་གནས་སྟངས་ཆགས་ཡོད་འདུག
གྲྭ་བ་ཚོའི་དཀའ་ངལ་སྐོར་ནས། བུ་བསྟན་དགོན་ནི་དགོན་པ་ཆུང་ཆུང་ཡིན་པས་ཁར། རི་སྒང་ཁུག་ཀྱོག་ཅིག་ཏུ་ཡོད་སྟབས་རླངས་འཁོར་ལམ་ཁ་མེད་པས། ༧གོང་ས་མཆོག་གི་སྐུ་པར་སོགས་ལ་དེ་ཙམ་དམ་དྲག་མེད་ཀྱང་། དགོན་པའི་ཕྱི་རོལ་དུ་འགྲོ་སྐབས་རྫོང་ཐོག་སོགས་སུ་སོ་སོའི་རྩ་བའི་བླ་མ་༧གོང་ས་མཆོག་གི་སྐུ་པར་སྐེ་ལ་འདོག་པ་དང་འཁྱེར་པ་སོགས་བྱེད་ཆོག་པ་དང་། དེ་བཞིན་གྲྭ་བ་ཚོ་རྒྱ་གར་དུ་༧གོང་ས་མཆོག་ལ་མཇལ་རྒྱུ་དང་སློབ་སྦྱོང་བྱ་ཕྱིར་འགྲོ་འདོད་ཆེན་པོ་ཡོད་ཀྱང་། གཅིག་ནས་ཐོངས་མཆན་རག་གི་མེད་པ་དང་། གཉིས་ནས་འབྲོ་དགོས་བསམ་ཀྱང་འབར་ཁམས་བརྒྱུད་དགོས་སྟབས་ས་ཁུལ་དེ་དག་དམག་མིས་དམ་པོ་སྲུང་ཡོད་པ། གལ་སྲིད་བྲོས་ཐར་པའི་དབང་དུ་བཏང་ཡང་དགོན་པའི་གྲྭ་བ་ཞིག་མེད་པ་ཤེས་ཚེ་དགོན་པ་དང་ནང་མིར་འདྲི་གཅོད་བྱེད་ཀྱི་ཡོད་པ་དང་། རྒྱ་གར་ལ་བྲོས་པ་ཤེས་རྟོགས་བྱུང་ཚེ་ཕ་མ་ནང་མི་ཚོ་བཙོན་ལ་འཇུག་པ་དང་ཉེས་ཆད་གཏོང་གི་ཡོད་པ། ལྷག་པར་དུ་རྒྱ་ནག་གི་སྲིད་ཇུས་འོག་སློབ་སྦྱོང་གང་འདྲ་ཞིག་སྤྲོད་ཀྱི་ཡོད་ཀྱང་། རྒྱལ་གཅེས་སློབ་གསོའི་ཁྱབ་ཁོངས་ལས་བརྒལ་ཐུབ་ཀྱི་མེད་ཚུལ་སོགས་བརྗོད་བྱུང་། གནད་དོན་འདི་དང་འབྲེལ་ཏེ་གྲྭ་བྱམས་པ་ལགས་ཀྱིས་ “མི་རིགས་གང་འདྲ་ཞིག་ཡིན་ཀྱང་སོ་སོའི་རིགས་གཞུང་དང་སྐད་ཡིག མི་རིགས་ཀྱི་ལྟ་བ་མི་ཤེས་མཁན་ཞིག་ཆགས་ཡོང་དུས། མི་རིགས་ཟེར་པ་ཞིག་ངོས་འཛིན་བྱེད་ས་མེད་པར་གྱུར་པ་རེད།”ཟེར།
ཁོང་གིས་མུ་མཐུད་དུ་བརྗོད་དོན་ “དེང་སང་ཡུན་ནན་ནས་ཡིན་པའི་གྲྭ་བ་མང་པོའི་ནང་ཐ་མག་དང་ཆང་རག་སོགས་ཚུལ་མིན་གྱི་བྱ་སྤྱོད་ཡོད་མཁན་མང་པོ་ཡོད་པ་དེ་ཕྱོགས་གཅིག་ནས་ཁོང་ཚོར་ཁག་མི་འདུག གཅིག་ནས་སློབ་སྦྱོང་མ་རག་པ་དང་། གཉིས་ནས་བཀའ་སློབ་ལམ་སྟོན་གནང་མཁན་བླ་མ་དགེ་བཤེས་ཚད་ལྡན་མེད་པ། གསུམ་ནས་མིག་དཔེ་ཡར་བལྟ་བྱ་ས་མེད་སྟབས། རྩ་བ་བཞི་སོགས་གྲྭ་བཙུན་གྱི་འདུལ་ཁྲིམས་ཚུལ་བཞིན་སྲུང་མཁན་དཀོན་པོ་ཆགས་པ་རེད།”ཟེར་ལ། ཕྱི་ལོགས་སུ་སྐྱབས་རྗེ་ཟམ་གདོང་རིན་པོ་ཆེ་དང་། ཤར་པ་ཆོས་རྗེ་རིན་པོ་ཆེ་སོགས་ཡུན་ནན་ས་ཁུལ་གྱི་བླ་སྤྲུལ་དགེ་བཤེས་མཁས་པ་མང་པོ་ཡོད་པས། ཁོང་ཚོས་ཕ་ཡུལ་ཡུན་ནན་ཕྱོགས་ཀྱི་མི་མང་ཚོར་དམིགས་ཏེ་བཀའ་སློབ་ལམ་སྟོན་རེ་གནང་དགོས་པ་དང་། སློབ་སྦྱོང་ཐོག་སྐུལ་འདེད། ཆང་རག་དང་ཚུལ་མིན་གྱི་བྱ་སྤྱོད་མི་འཛིན་པར་བོད་རིགས་རྣམ་དག་དང་གྲྭ་བཙན་གཙང་ཞིག་ཡོང་ཐུབ་པར་ལམ་སྟོན་གནང་དགོས་པའི་འབོད་སྐུལ་ཞུས་སོང་།
གསར་འགོད་པ། བནྡེ་སྐྱབས།
གནས་ཚུལ་དེ་ཡུན་ནན་གཅིག་པུ་མ་རེད། ཆེས་སྙིགས་མ་ལྔ་འདོ་འདིར། བསྟན་པ་རིམ་གྱི་འཇིག་ཏེ་ད་ལྟའི་ཚུལ་ཁྲིམས་ཀྱི་ལེའུ་བར་ཐུག། སྐབས་འདི་ནས་རྟགས་ཙམ་འཛིན་པའི་ལེའུ་ལ་ཐུག་ལ་ཉེ། བཙུན་པ་མི་ཉུང་བ་ཞིག་སྤྱོད་པ་ཇེ་རྩིང་དུ་འགྲོ་བ་མ་ཚད། སློབ་གཉེར་ཡང་མཐུས་ཤོར་འགྲོ་གི་འདུག། སྐྱེ་བོ་ཕལ་པ་ཚོས་སྐྱབས་འགྲོ་ཙམ་ཡང་མ་ཤེས་ཁར་ཆོས་ལ་དོ་ནང་དང་། བསླབ་ལྡན་དགེ་འདུན་པར་དད་པ་ཆུང་དུ་འགྲོ་ཏེ། དགེ་འདུན་པ་རྣམས་ལ་དམའ་འབེབ་དང་མཚན་སྨད་གྱི་སྐུར་འདེབས་སྣ་ཚོགས་བྱེད་ཀྱི་འདུག། ད་ལྟ་རང་བྱུང་གི་བདེ་ཇེ་དཀོན་འགྱུར་བཞིན་ཡོད། མ་འོང་པར་དགེ་འདུན་གྱི་བདེ་ཉིན་མོ་སྐར་མ་བཞིན་འགྱུར་ཉེན་འདུག། དུས་ངན་རྩོད་ལྡན་གྱི་དུས་འདིར་ཞག་གཅིག་ལ་ཚུལ་ཁྲིམས་སྣ་རེ་སྲུང་མཁན་ཡོད་ན་རྗེས་སུ་ཡི་རང་མ་གཏོགས་མཚན་སྨྲད་ཞུ་འོས་མ་མཆིས་ཏེ། མདོ་ལས། ངའི་སློ་མ་ཇི་ལྟར་སྡུག་ཀྱང་རུང་སྐྱེ་བོ་ཕལ་བ་རྒྱ་ཡི་དོ་ཟླ་མེད། ཞེས་གསུངས་སོ། ངས་བྱམས་པ་ཐོགས་མེད་ཁོང་ལ་ཞུས་པ་མིན། ཁོང་གིས་གསུངས་སྟངས་ལ་བསྟས་ན། ཁོང་གིས་ཕ་ཡུལ་ལ་ཤ་ཚ་དང་། བསྟན་པ་ཉམ་གུད་འགྲོ་བ་ལ་བློས་མ་བཟོད་པ་ཡིན་གྱི་རེད།
མི་ཤེས། མི་ཤེས། འདི་ལ་ནང་འགལ་གང་མང་འདུག དཔེར་ན་གྲྭ་བ་ལ་ཆང་རག་འཐུང་འདོད་དང་། ཚུལ་མིན་བྱེད་འདོད་ཡོད་ཀྱང་མི་སྐྱ་ས་ནས་སློབ་སྦྱོང་བྱེད་འདོད་མེད་པ་ནང་འགལ་མ་རེད་དམ།
དེ་བཞིན་རྒྱ་གར་ནས་ཡོང་བའི་དགེ་བཤེས་རྣམས་དགོན་པར་འགྲོ་སྐབས་སྐྱ་ཆས་གྱོན་ནས་འགྲོ་བ་ཙམ་ལས་ལམ་སྟོན་ཙམ་ཡང་གནང་ནུས་མེད་པ་ཆགས་ན། ཕྱི་ལོགས་ནས་སྐྱབས་རྗེ་ཟམ་གདོང་རིན་པོ་ཆེ་དང་། ཤར་པ་ཆོས་རྗེ་སོགས་ཀྱི་ལམ་སྟོན་དགོས་ཟེར་བ་འདི་ཡང་ནང་འགལ་མ་རེད་དམ།
གང་ལྟར་ཟམ་གདོང་རིན་པོ་ཆེས་ཀྱང་རང་གི་ཕ་ཡུལ་ལ་ལམ་སྟོན་ཙམ་ཡང་གནང་ཐུབ་གི་མེད་པ་དེ་ཡང་ཨེ་བདེན་ནམ།
ཧཧཧཧ བྱམས་པ་ཐོགས་མེད་ལགས། གལ་སྲིད་ཡུན་ནན་མི་དམངས་གི་རང་ཉིད་བོད་རིགས་ཡིན་བསམ་པ་ཞིག་ཡོད་ན་བོད་ཀྱི་རྩ་དོན་དང་རིགས་གཞུང་ཐད་བསམ་བློ་བཏངནསའཐབ་བརྩོད་བྱེད་དགོས། དཔེར་ན་ཉེ་དུས་ཨ་མདོ་ཡུལ་གྱི་མི་དམངས་བཞིན་རང་ཉིད་ཀྱི་རིགས་གཞུང་དང་ལ་རྒྱའི་ཆེད་དུ་ལངས་དགོས་པ་ལས། རང་ཉིད་ཀྱི་མི་དམངས་དངགྲ་པ་རྣམས་ཀྱ་ིཆང་རག་དང་ཐ་མག་འཐེན་གི་འདུག་ཞེས་སྐྱོན་འཛུགས་བྱེད་བསྡད་ན་ཁྱེད་རྣམས་ཀྱི་བྱ་གང་ཡང་བསྒྲུབ་མི་ཐུབ་པའི་བརྟག་མཚན་རེད། དེ་ལས་བསམ་བློ་རྒྱ་ཆེ་ཙམ་བཏང་ནས་རང་ཡུལ་གྱི་མི་དམངས་རྣམས་ནས་རང་ཡུལ་སྐྱོབ་ཐབ་བྱེད་དགོས། བཙན་བྱོལ་བསྒྲིགས་འཛུགས་གི་ཁྱེད་རྣམས་ལ་རོགས་རམ་ནི་ཉིན་མོའི་སྐར་མ་རང་རེད། མ་གཞི་ནས་བདེ་ཆེན་ནང་བསྟན་སློབ་གླིང་གི་དགེ་རྒན་མི་སྐྱ་ཡིན་པར་ཅི་ཡོད་དམ། ཁྱེད་གི་བསམ་པར་ནང་ཆོས་མཁས་པ་ཚང་མ་གྲྭ་པ་ཡིན་དགོས་བསམ། དེ་ལས་ཡོན་ཏན་ཡག་ཙམ་སྦྱང་ན་ལེགས།།།།།། བཀྲ་ཤིས་བདེ་ལེགས། སླད་མ་འོང་པར་ཁྱེད་བཙན་བྱོལ་ཡུལ་དུ་ཆང་རག་མི་འཐུང་བ་དང་ཐ་མག་མི་འཐེན་པ་ ནང་ཆོས་མཁས་པ་ཡོང་བའི་སྨོན་འདུན་བཞུ་།།།།
ཟམ་གདོང་རིན་པོ་ཆེ་ཕྱིར་ཕ་ཡུལ་ལ་སོང་ནས་དག་ཐེར་ཡག་པོ་གནང་རྒྱུ་གལ་ཆེན་པོ་རེད་བསམ། ཡ་ཁོ་རེ།
སྐྱབས་རྗེ་ཟམ་གདོང་རིན་པོ་ཆེའི་བཀའ་སློབ་དེ་ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་
སྒྲོམ་གཞི་འོག་སྡོད་འདོད་ཡོད། ཀྲུང་ཧ་མི་དམངས་སྤྱི་མཐུན་རྒྱལ་ཁབ་ལ་ངོ་རྒོལ་དང་མཚན་སྨད་
མ་ཞུ་གསུང་པ་དེ་རེད། ཁོང་གི་ཕྱག་ལས་དང་དམིགས་ཡུལ་ནས་བོད་སྤྱི་པའི་ཐོག་ལས་ཀ་བྱས་འདོད་
མེད་ལ་བྱེད་མ་མྱོང། ང་རང་གི་རྩ་བའི་བླ་མའི་བཀའ་བསྒྲུབས་པ་རང་ཡིན་གསུང་པ་དེ་རེད། ཁྱེད་ཚོ་
ཡུལ་ནན་མི་མང་ལ་ཕན་ཐོག་འདྲ་ཡོད་ན། བཀའ་སློབ་དེ་འདྲ་གནང་ཡོང་གི་རེད།་་་་་་་ཧཧཧཧཧཧཧ
ཡིག་རིགས་གང་ཞིག་སྦྱང་དགོས་ནི. འཇིག་རྟེན་འཚོ་ཚིས་སྟབས་བདེར་སྐྱེལ་བའི་ཐབས་ལམ་ཉག་གཅིག་པོ་དེའོ.
དེའི་ཕྱིར་བོད་ཡིག་གི་སྤྱོད་སྒོ་ཕྱོགས་ཀུན་ནས་དོག་པོར་གྱུར་ཏུ་བཅུག་པའོ. ད་དུང་ང་ཚོས་བོད་ཡིག་རང་གིས་མ་སྦྱང་བར་སོགས་ཟེར་བ་ནི་ རྒྱ་གཞུང་ལ་ཡར་ཞུགས་ཙམ་ལས་ཅི
མ་གཞི་ནས་མི་སུ་ཞིག་གིས་སྦྱང་བའི་ཡིག་རིགས་དག་ལས་.
སྟེ་བའི་ཡིག་རིགས་ནི་རང་གི་འཇིག་རྟེན་འཚོ་འཚིས་ཐད་ནས་འགན་ལེན་ཐུབ་པའི་ཡི་གེ་གོང་ན་མེད་པ་དེ་ཡིན་དགོས་ཤིང. ཐ་ཀུན་བཅུམ་སྟེ་ཁྱབ་རྒྱ་འམ་བཀོད་སྤྱོད་ཆུང་དུ་བཏངས་ཏེ. ཡིག་རིགས་གཉིས་པ་ཆགས་སྡད་པ་མ་ཤེས་པ་འམ. བརྗོད་མི་ཕོད་ན་གཏམ་བཤད་པའི་དབང་ཆེད་དོ
བྱམས་པར་ཐུགས་རྗེ་ཆེ. བསམ་དོན་འགྲུབ་པར་སྨོན
ཨ་ལ་ལ་འདི་ཡུན་ནན་སྐྱབས་མགོན་ཟེར་བ་ཞིག་གི་སྤྲུལ་སྐུར་ངོས་འཛིན་བྱས་པ་ཡིན། བློ་བདེ་བོ་བྱས་ནས་ཕེབས་ཤོགས། ལེགས་སྦྱར་སྐད་ཀྱི་རམ་མདའ་འདྲ་ཡོང་ན་ཀར་ན་ཊ་ཀའི་སྐད་ཀྱིས་གདོང་ལེན་བྱེད་ཆོག་ག
གྲྭ་བྱམས་པ་ལགས་ཀྱི་དངོས ཡོད་གནས་ཚུལ་མང་པོ་ཞིག་དང་བོད་ཀྱི་གནས་སྟངས་སྐྱོ་པོ་ཡིན་པའི་སྐོར་གསུངས་པ་ལ་ཐུགས་རྗེ་ཆེ་ཞུ། ཡིན་ན་ཡང་བོད་ཡིག་དང་བོད་སྐད་སོ་སོའི་མ་སྦྱང་པར་རྒྱ་གཞུང་གི་གོ་སྐབས་སྤྲད་མ་སོང་ཟེར་ནས་སྡད་ན་སོ་སོའི་མི་རིགས་ཀྱི་འགན་ཁྲི་མ་མཁུར་བ་རང་རེད།
གསར་འགྱུར་གནད་བསྡུས་ལྟ་བུའི་སྐད་ཆ་འདི་དག་གི་ནང་དུ་ད་ལྟའི་བོད་ནང་གི་གནས་བབ་ཀྱི་ཟུར་ངོས་ཤིག་མེ་ལོང་བཞིན་གསལ་བོར་བསྟན་འདུག་ཀྱང་། ལས་དབང་དེ་ལྟ་བུ་བཅོས་བསྒྱུར་གཏོང་བ་ལ་བླ་མ་དང་རྗེ་བོ་ཞིག་གིས་བཀའ་ལུང་མེད་པར་ལམ་ཞིག་རྙེད་དཀའ་བ་དེ་ཅུང་ཕངས་སེམས་ཀྱི་རིགས་ཤིག་འདོད།
ཡུ་ནན་གྱི་གྲྭ་བས་བོད་སྐད་མི་ཤེས་པའི་ཐོག་ལ་ཟམ་གདོང་རིན་པོ་ཆེ་ནས་ལེགས་སྦྱར་སྐད་ཅིག་བསྐྱོན་ཚར་དུས་གྲྭ་བ་ཚོའི་ཀླད་པའི་ནང་ལ་ཐོག་བརྒྱབས་པ་བཞིན་ཚ་ཚ་འུར་འུར་ཆགས་ནས། ད་ཀླད་པ་དེ་ཕན་ཐོགས་ཅི་ཡང་མེད་པ་ཞིག་ཏུ་ཆགས་ཉེན་ཡོད་འགྲོ། སྐུ་རྩེད་ཞུས་པ་ཡིན།