ཆུང་དུས་ཀྱི་རྒྱུད་རིམ་ནས། བོད་ལ་བལྟས་པ།

ཆུང་དུས་སུ་སློབ་ཆུང་འགྲིམ་ལ་ཉེ་བའི་སྐབས་དེ་འདྲ་ཞིག་ལ། རང་ཉིད་ནི་ལོ་ན་ཆུང་བའི་བྱིས་པ་ཞིག་ལས། བོད་སྐད་དང་བོད་ཡིག་ཟེར་བ་ནི་རང་གི་ཤ་གསེང་རུས་གསེང་དུ་འཐིམ་དགོས་པ་ཞིག་ཡིན་པར་གཏན་ནས་ཤེས་ཀྱི་མེད་ཀྱང་། དྲིན་ཕ་མའི་ཆུང་ནས་ཚུར་ལ་བཤད་པའི་སྐད་ནི་བོད་ཀྱི་སྐད་ཡིན་དུས། བོད་སྐད་ནི་སུ་ལ་ཡང་སློང་མི་དགོས་པར་ཤ་དང་རུས་པའི་གསེང་དུ་འཐིན་ཚར་འདུག ད་གཟོད་རང་ཉིད་སློབ་ཆུང་ཞིག་གི་མདུན་དུ་དྲིན་ཆེན་ཕ་མ་གཉིས་ཀྱིས་རེ་བཞག་ཞིག་གིས་སྐུལ་ནས་སོང་། འོན་ཀྱང་། དེ་དུས་སློབ་ཆུང་དེ་ཡི་ནང་དུ་རང་ཉིད་ལ་ཡིག་རིགས་གང་ཞིག་གི་སྒུག་ནས་བསྡད་ཡོད་མེད་གཏན་ནས་ཚོད་དཔག་བྱེད་ཀྱི་མེད་ལ། སློབ་གྲྭ་ནི་ཡི་གེ་སྤྱོང་ས་ཞིག་ལས་གཞན་གང་ལ་ཡང་བསམ་བློ་གཏོང་ག་ལ་ཤེས། ཤེས་པའི་ཚད་ཅིག་གང་ནས་ཡིན། བྱིས་པ་ཆུང་ཆུང་ཞིག་ལ་དཔེ་ཁུག་རྒྱབ་དུ་བཞག་མ་ཐག སློབ་ཆུང་ཟེར་བའི་ནང་དུ་རང་དང་འདྲ་བ་ཆེས་མི་ཉུང་བ་ཞིག་ཡོད་པ་ལས། དེ་ཁུལ་ན་མི་རིགས་ཟེར་བའི་ཕྱོགས་ཞེན་བྱེད་དགོས་ས་ཞིག་དང་། རང་ཉིད་བོད་མི་ཡིན་པའི་འདུ་ཤེས་ཟབ་དུ་གཏོང་དགོས་པ་སོགས་ཀྱི་འཐེན་ཕྱོགས་ཤིག་ཡོད་པ་གཏན་ནས་ཤེས་ཀྱི་མེད།

སློབ་ཆུང་ནི་ཡིག་རིགས་ཤིག་གི་དབྱངས་རྟ་སློབ་ས་ཡིན་ལ། སློབ་ཆུང་དེ་རུ་བོད་ཡིག་དང་རྒྱའི་སྐད་ཡིག་གཉིས་མཉམ་དུ་སྤྱོང་དགོས་ཀྱི་འདུག ཨ་མའི་མངལ་ནས་ལྷུང་བ་ནས་རྣ་ལམ་དུ་བྱང་གོམ་དུ་གྱུར་བ་ནི་བོད་སྐད་ཡིན་དུས། ཡིག་རིགས་དེ་གཉིས་ལས་བོད་ཡིག་ལ་དུངས་པའི་སློབ་མ་ཆུང་ཆུང་ཞིག་ལས། རྒྱ་ཡིག་སྤྱོང་བར་མདུན་པ་ཡོད་པའི་སློབ་མ་ཆུང་ཆུང་ཞིག་དུ་གྱུར་མ་ཐུབ་པ་དེ་ཡང་། ནང་དུ་ལོག་ནས་ཡོང་དུས་ཕ་མ་ཚོས་བཤད་པའི་སྐད་ཆ་ནི་བོད་སྐད་ཡིན་ལ། གྲོང་སྡེ་དང་ཉེ་འཁྲིས་ཀྱི་མི་དག་ཡང་བོད་སྐད་བཤད་མཁན་རྐྱང་རྐྱང་ཡིན་པས་ལོས་ཡིན། དེ་ལྟར་འདུ་ཤེས་ཤིག་དང་ཁོར་ཡུག་ཞིག་གིས་རང་ཉིད་ནི་བོད་ཡིག་ལ་དུངས་པའི་བྱིས་པ་ཞིག་དུ་གྱུར་ནས། བོད་ཡིག་གི་སྤྱངས་འབྲས་བཟང་བ་ནས་བོད་ཡིག་གི་ཁ་ཟས་ཟ་བའི་བོད་ཀྱི་མི་རིགས་ཀྱི་སོན་རྩ་ཞིག་ལ་གྱུར་བའི་འགོ་བཙུགས་སོང་། དེ་དུས་ཀྱི་རང་ཉིད་ཀྱི་སློབ་གྲོགས་མང་ཤོས་ཀྱང་བོད་མི་ཡིན་ལ། དགེ་རྒན་ཡང་བོད་མི་ཤ་སྟག་ཡིན།

ཕྱིས་སུ་འཚར་ལོངས་ཀྱི་རྒྱུད་རིམ་ནས་ངས་ཕྱིར་མིག་ཞིག་བལྟས་དུས། ང་རང་འགྲིམ་སའི་ཁོར་ཡུག་དེ་དག་གི་ཕ་མ་ནི། རང་ཉིད་ཀྱི་ལོ་ཚད་མཉམ་པའི་ཆུང་དུས་ཀྱི་སློབ་གྲོགས་དེ་དག་རེད་ཟེར་གྱི་འདུག དེ་དག་ནི་ཡར་ཐོན་གྱི་ལམ་དུ་བྱིན་པ་རེད་ཟེར། ཁོང་ཚོ་ཡང་བོད་མི་ཡིན་ལ། ཁོང་ཚོས་སློབ་ཆུང་ནས་སློབ་འབྲིང་། དེ་ནས་ལས་བྱེད་བཅས་ཀྱི་ལམ་ཁར་ཞུགས། ལམ་ཁ་དེ་ནས་ཕ་མ་ཆགས། བྱིས་པ་ཁ་ཤས་ཀྱི་ཕ་མར་གྱུར། ཕ་མ་དེ་དག་གིས་རང་རང་གི་བུ་ཕྲུག་ཚོ། གྲོང་གསེབ་ནས་གྲོང་བརྡལ། གྲོང་བརྡལ་ནས་གྲོང་ཁྱེར་ལ་ཁྲིད་འདུག་ཟེར། གྲོང་ཁྱེར་དུ་ཁོང་ཚོས་སྐད་ཆ་ཡང་བོད་སྐད་མ་རེད་ཟེར། གྲོང་ཁྱེར་དུ་བོད་སྐད་ལ་གོང་ཚད་མེད་པ་དང་སྤྱོད་ཡུལ་མེད་པར་གྱུར་འདུག་ཟེར། དེ་ལྟར་ཁོང་ཚོས་རང་གི་ཕ་མ་དག་ལ་འཁང་ར་བྱེད་ཞོར་དུ། རང་གི་བུ་ཕྲུག་དག་ལ་སྐད་ཡིག་གཞན་གྱི་ཁ་བརྡ་བྱས། སྐད་ཡིག་གཞན་གྱི་གོ་བརྡ་སྤྲད། སྐད་ཡིག་གཞན་གྱི་འོག་ནས་འཚར་སྟངས་ཤིག་བསླབ་ཀྱི་འདུག་ཟེར། དེ་དག་ནི་བདེན་པ་ཡིན་པའི་དབང་དུ་བཏང་ན། ངས་དེ་རིང་རང་གི་བུ་ཕྲུག་འདི་གཉིས་ལ། བོད་ཡིག་གི་གོ་གནས་དང་བོད་སྐད་བཤད་སའི་ཁོར་ཡུག་གཏན་ནས་མེད་ས་ཞིག་ཏུ་ཨུ་ཚུགས་ཀྱིས་ཅི་ཞིག་བཤད་ཁུལ་བྱེད་ཀྱིན་པ་དེ་དག་ཡང་། ང་རང་གི་ནོར་འཁྲུལ་ཡིན་ནམ།

ང་རང་བོད་མི་ཞིག་གི་ཁྱིམ་དུ་སྐྱེ་བ་དང་། ཕ་མ་གཉིས་ཀ་བོད་མི་ཡིན་པ། ཕ་མ་གཉིས་ཀྱིས་ང་ལ་བོད་སྐད་བཤད་པ་དེ་ནི་ནོར་འཁྲུལ་དུ་གྱུར་ཡོད་དམ། ཡང་ན། ང་རང་ཆུང་དུས་འགྲོ་སའི་སློབ་ཆུང་དང་། ཁོར་ཡུག་གི་ གྲོགས་པོ་དང་ཉེ་དུ་དེ་དག་ནོར་བ་ཡིན་ནམ། དེ་མིན་དེ་རིང་གི་ངའི་གྲོགས་པོ་དང་གྲོགས་མོ་དེ་དག་གི་འགྱུར་བ་དེ་ནི་མི་ཞིག་གི་འགྱུར་ཚུལ་དང་ལེགས་ཤོས་ཤིག་དུ་བརྩིས་ན་འགྲིག་གི་ཡོད་དམ། དེ་ལས་གཞན་རང་ཉིད་འདི་ལྟར་མི་རིགས་གཞན་ཞིག་གི་ཁྱིམ་ནས་རང་གི་ཤ་ཁྲག་གི་རྒྱུད་པ་འདི་དག་ལ་ཁོར་ཡུག་མེད་ས་ནས་ཁོར་ཡུག་ཞིག་བསྐྲུན་པར་འབད་འབུངས་བྱེད་པ་འདི་ནི་ང་རང་གི་སྟོང་བསམ་ཡིན་ནམ། དེ་མིན་ན་ངས་རང་གི་བྱིས་པ་འདི་གཉིས་རང་ཉིད་འགྲིམ་མ་མྱོང་བའི་ཆུང་དུས་ཀྱི་ལམ་ཕྲན་དེ་འདྲ་ཞིག་དུ་བསྐྱེལ་མ་ཐུབ་ཀྱང་། རང་ཉིད་གང་ནས་ཡོང་བ་དེ་དག་ཤེས་མཁན་གྱི་མི་རྒྱུད་ཅིག་བཟོ་དགོས་པ་དེ་ནི་རང་ཉིད་མི་ཞིག་དང་བོད་མི་ཞིག་ཡིན་པའི་འགན་དུ་བརྩི་དགོས་པ་རེད་དམ། དེ་ལྟར་མ་བརྩིས་པ་ཡིན་ན་རང་ཉིད་མི་དང་མིའི་ཁྲོད་ཀྱི་བོད་མི་ཞིག་དུ་སྐྱེ་བ་དེར་ཁྲེལ་མེད་བྱས་པར་བརྩི་དགོས་སམ། སྐད་ཆ་འདི་ལྟར་སེམས་ཁོང་ནས་བཞུར་ནས་འོང་དུས། ངས་བསྟུད་མར་སྐད་ཆ་དག་ཞིབ་མོ་བློ་ཡིས་སྐྱུགས་མ་ཐུབ་པར་འདི་ནས་སྐྱུར་དགོས་བྱུང་སོང་།