ཟླ་འདིའི་ཕྱི་ཚེས་ ༢༡ ཉིན་རྔ་པ་ཀིརྟི་དགོན་པའི་རང་ལོ་ ༤༢ ཡིན་པའི་གྲྭ་རྨེའུ་སྲིབ་རྒྱ་མཚོ་ལགས་རང་ཤག་ནས་རྒྱ་གཞུང་གིས་འཛིན་བཟུང་བྱས་ཡོད་ཀྱང་། འཛིན་དགོས་པའི་རྒྱུ་མཚན་དང་། ད་ཆར་གང་དུ་བཀག་ཉར་བྱས་ཡོད་པ་སོགས་ཀྱི་གནས་ཚུལ་ཤེས་རྟོགས་ཐུབ་མི་འདུག
ཁོང་ནི་རྔ་པ་རྫོང་སྤྲོ་ཚིགས་ཞང་རྨེའུ་སྲིབ་སྡེ་བའི་རག་རྩ་ཚང་ཡིན་ཞིང་། ཆུང་དུས་ནས་རྔ་པ་ཀིརྟི་དགོན་པར་ཆོས་ཞུགས་བྱས་ཏེ། དེང་སྐབས་འཛིན་གྲྭ་དཀའ་རམས་དང་པོ་ཡིན་འདུག དེ་སྔོན་དགོན་པའི་སློབ་གྲྭ་རྒྱ་གཞུང་གིས་སྒོ་མ་བརྒྱབ་གོང་ཁོང་སློབ་གྲྭའི་དགེ་རྒན་ཡིན་པ་དང་། བོད་ནང་གི་དུས་དེབ་དང་ཚགས་པར་སོགས་སུ་རྩོམ་ཡིག་མང་པོ་སྤེལ་ཡོད་ཅིང་། ཡིག་གཟུགས་འདྲ་མིན་དང་རི་མོ་སོགས་ཀྱི་ཆེད་མཁས་པ་ཞིག་ཀྱང་ཡིན་འདུག
དེ་བཞིན་ཕྱི་ཟླ་ ༡༠ ཟླ་དཀྱིལ་ཙམ་ལ་རྔ་པ་ཀིརྟི་དགོན་པའི་དུས་འཁོར་གྲྭ་ཚང་གི་རང་ལོ་ ༤༨ ཡིན་པའི་དགེ་བསྐོས་ཟུར་བ་གྲྭ་བློ་བཟང་དགེ་འདུན་འཛིན་བཟུང་བཀག་ཉར་བྱས་ཡོད་ཀྱང་། ད་བར་ཁོང་གང་དུ་བཀག་ཉར་བྱས་ཡོད་པ་དང་གནས་སྟངས་གང་འདྲ་ཡིན་མིན་ཤེས་རྟོགས་ཐུབ་མེད། ཁོང་རྔ་པ་རྫོང་སྤྲོ་ཚིགས་ཞང་ཀ་ཉག་སྡེ་བའི་གཟས་འགོ་ཚང་ཡིན་ཞིང་། ཆུང་དུས་ནས་ཀིརྟི་དགོན་པར་ཆོས་ཞུགས་བྱས་ཏེ། དེང་སྐབས་འཛིན་གྲྭ་དཀའ་རམས་བཞི་པ་ཡིན་འདུག
དེ་མིན། དེང་སྐབས་རྔ་པའི་རྫོང་མཁར་སོགས་སུ་བཀྲམ་ཡོད་པའི་དམག་མི་རྣམས་ཀྱིས་བོད་ལྭ་འདྲ་མིན་གྱོན་ཏེ་མི་མང་ལ་མྱུལ་ཞིབ་བྱེད་ཀྱི་ཡོད་པ་དང་། ཡུལ་མིར་སྔར་ལས་དམ་དྲག་ཆེན་པོ་བྱས་ཏེ། ཉིན་ཤས་སྔོན་གོང་ནས་སྒེར་གྱི་རླངས་འཁོར་རིགས་ཁྲོམ་ལམ་དབུས་མ་ནས་འགྲོ་འོང་བཀག་འགོག་བྱས་ཏེ། མི་ཚོགས་ཉུང་སའི་ཁྲོམ་ལམ་མཐའ་མ་དག་ཏུ་འགྲོ་དགོས་པ་ཆགས་ཡོད་འདུག
འདི་ཟླའི་ཕྱི་ཚེས་ ༢༠ ཉིན་ཕྱི་ཚུལ་དུ་རྔ་པ་ཀིརྟི་དགོན་པར་དགའ་ལྡན་ལྔ་མཆོད་ཆེན་མོའི་མཚན་ཕུད་དམ་བཅའ་འཚོགས་བཅུག་ཡོད་ལ། མཚན་མོ་དེར་རྒྱུན་ལྡན་ལྟར་གློག་མཆོད་རྒྱ་ཆེན་པོ་མ་སྒྲོན་པར། དགེ་འདུན་པ་དང་མི་མང་རྣམས་ཀྱིས་མཆོད་མེ་བསྒྲོན་ཏེ་རང་དབང་གི་འབོད་སྒྲ་སྒྲོག་བཞིན་མེ་ཕུང་གི་དཀྱིལ་ནས་གཤེགས་ཟིན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གྱི་རྣམ་པས་རྗེས་དྲན་བྱས་ཡོད་ཀྱང་། མི་མང་དཀྱུས་མར་རྫུས་པའི་དམག་མི་དང་ཉེན་རྟོག་པ་མང་པོ་མང་ཚོགས་ཁྲོད་བཀྲམ་ཡོད་པར་མ་ཟད། དགོན་པའི་གླིང་མདོའི་སྒོ་ཆེན་སོགས་ལ་དམག་མི་དང་ཉེན་རྟོག་པ་ཧ་ཅང་མང་པོ་འགྲེམས་འཇོག་བྱས་ཤིང་། རྒྱུན་སྤྱོད་མ་ཡིན་པའི་རླངས་འཁོར་དམིགས་བསལ་བ་བཅུ་གྲངས་ཤིག་ཀྱང་མཉམ་དུ་བཞག་ཡོད་འདུག
གནས་ཚུལ་མཁོ་གཏོང་བ། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
