དུས་རྒྱུན་དུ་རང་གིས་རང་ལ་ནང་བ་ཞིག་གི་མི་རབས་སུ་གཏོགས་པར་བསམ་བློ་འཁོར་གྱི་ཡོད་པ་རེད། ཁོ་བོ་ལ་མི་སུས་ཁྱེད་རང་ཆོས་ལུགས་གང་ཡིན་ཞེས་དྲིས་དུས། ང་ནི་ནང་བ་ཡིན་ཟེར་ནས་ལན་འདེབས་པར་སྤྲོ་བོ་བྱེད་ཀྱི་ཡོད་པ་རེད། ཡིན་ཡང་། ཁོ་བོས་རང་གིས་གང་བྱེད་ཀྱི་ཡོད་མེད་དང་གང་བཤད་ཀྱི་ཡོད་མེད། ནང་བ་ཟེར་བ་ནི། མི་ག་འདྲ་ཞིག་ལ་རན་གྱི་ཡོད་མེད་དང་། ཇི་ལྟར་བྱས་པ་ཡིན་ན་ད་གཟོད་ནང་བ་ཟེར་བའི་ཆོས་ལུགས་མི་སྣ་ཞིག་དུ་གྱུར་མིན་གྱི་ཐད་དུ། བསམ་བློ་ཞིབ་མོ་ཞིག་གཏོང་མ་ཐུབ་པར་ལུས་པ་མ་ཟད། བརྩེ་བ་ཟེར་བའི་མི་སྤྱིར་བཏང་བ་ཞིག་ལ་དགོས་པའི་ཆ་རྐྱེན་དེ་ཡང་རང་ཉིད་ལ་ཚང་གི་ཡོད་མེད་ཀྱི་ལན་གང་ཡང་ད་ལྟའི་བར་དུ་མ་བརྙེད་པར། སྲང་བར་དོགས་ས་དང་རྒྱ་ལམ་ཆེ་ས་གང་རུང་ནས། མི་སུ་དང་འཕྲད་དུས་སུ། རང་ཉིད་ནི་ནང་བ་ཟེར་བའི་ཆོས་ལུགས་དེ་ཡི་རྗེས་འགྲེང་བ་ཡིན་པར་རློམ་གྱི་ཡོད་པ་རེད།
ཡིད་སྐྱོ་བ་ཞིག་ལ་ཁོ་བོ་ལ་མ་མཐའི་མི་སྤྱིར་བཏང་བ་ཞིག་ལ་ཡོད་པའི་བརྩེ་བ་དེ་ཡང་མེད་པར། ཆགས་སྲེད་ཅེས་པའི་འཁྲིག་སྲེད་ཀྱི་བརྙན་ཐག་དང་བརྙན་འཁོར། བརྙན་རིས་སོགས་ལ་མགོ་བོ་འཁོར་ནས། ཐ་ན་རང་གི་བརྩེ་བའི་མི་ཞིག་ཀྱང་ད་ལྟའི་བར་དུ་སྙིང་ལ་བརླན་རྒྱུའི་གོ་སྐབས་ཤིག་བྱུང་མེད་པ་རེད། ཁོ་བོས་ད་དུང་རང་ཉིད་ནི་འཛམ་གླིང་འདིའི་སྟེང་གི་མི་ཡ་རབས་ཤིག་དང་ཆོས་ལུགས་རྩ་ཆེན་ཞིག་གི་རྗེས་འགྲེང་དུ་འདོད་ཀྱི་ཡོད་པ་ཡིན། དོན་དངོས་ཐོག་ཁོ་བོས་ཆོས་ལུགས་རྩ་ཆེན་དུ་འདོད་པའི་ནང་བའི་ཆོས་ལུགས་ལ་བག་ཆགས་བཟང་བོ་ཞིག་ཀྱང་བཞག་མེད་ལ། འགྲོ་བ་མིའི་སྤྱིར་སྟངས་ཀྱི་ཡ་རབས་གོམ་གཤིས་ཤིག་ཀྱང་རང་གི་ལུས་སེམས་ལ་འཐིམ་མེད་པ་ཡིན།
གནམ་འོག་གི་མི་འདི་དག་ལ་ཆོས་ལུགས་ལས་ཀྱང་གལ་ཆེ་བ་ཞིག་ཡོད་པ་དེ་ནི། མི་དང་མིའི་བར་གྱི་འདུ་ཤེས་ལ་མེད་དུ་མི་རིང་བའི་བརྩེ་བ་དེ་ཡིན་དུས། བརྩེ་བ་མེད་པར་ཆོས་ལུགས་ཤིག་གི་རྗེས་ཞུགས་པ་ཉན་ཐུབ་མེད་པའི་ཆ་རྐྱེན་དེ་ཡང་ཁོ་བོས་ད་ལྟའི་འཆར་རྙེད་མེད་པ་རེད། ཡིད་སྐྱོ་བའི་གནས་སྟངས་འདིའི་འོག་ནས་ཁོ་བོས་རང་གིས་རང་ལ་དྲི་བ་མང་བོ་ཞིག་གཏོང་མི་འཕོད་ལ། གཏོང་ཤེས་ཀྱི་ཡང་མེད་པར། དཀར་ནག་དབྱེ་ལྡོག་གི་ལམ་ཕྲན་ཞིག་ནས་རང་གི་ང་རྒྱལ་གྱི་མགོ་བོ་གནམ་དུ་བཀྱགས་ནས། ཅི་ཞིག་བཤད་ཀྱིན་ཡོད་པ་དང་། གང་ཞིག་ཤེས་ཀྱི་ཡོད་པའི་ཚུགས་ཀ་ཞིག་བསྟན་ནས། མི་ཚོགས་ཀྱི་གསེང་དུ་བརྩེ་བ་མེད་པའི་རི་གྲོང་ཞིག་གི་ལམ་འགྲོ་བ་ཆགས་ནས་ཡོད་པ་རེད།
བཀླགས་ཟིན་ཡིན།