ང་དང་འདྲ་བའི་སྨྱུག་ཐོག་པར་རློམ་པ་དང་། ཟིན་བྲིས་པའི་སྡེ་བོད་ཕྱི་ནང་གཉིས་སུ་དེང་སང་མང་ནས་མང་དུ་འགྲོ་བ་དེ་ནི། མི་རིགས་ཤིག་གི་སྐད་ཡིག་གི་འཆི་གསོན་ལ་བསམ་ན་དངོས་ནས་དགའ་འོས་པ་དང་བསྟོད་དགོས་པ་ཞིག་ལོས་ཡིན། རེད་དེ། ལྡོག་ཕྱོགས་ནས་བསམ་བློ་ཞིག་བཏང་དུས། ང་དང་འདྲ་བའི་སྐྱེ་བོ་ཆེས་མི་ཉུང་བ་ཞིག་གིས་རང་གིས་ཁ་ནང་གི་ཚིག་ལ་བདག་པོ་མི་རྒྱགས་པར། གང་ཞིག་འབྲི་བ་ལ་ཐོག་མར་དེ་ཡི་ཕྱོགས་ནས་འགན་རང་ཉིད་ལ་ཡོད་པ་གཏན་ནས་གཏིང་བརྗེད་དུ་འགྲོ་བའི་མི་རབས་ཤིག་འཚར་བཞིན་པ་འདི་ནི་དངོས་ནས་ཡིད་སྐྱོ་བའི་གནས་ཤིག་ཆགས་ཡོད།
ངས་འདི་ནས་དེ་རིང་རང་ཉིད་འགོ་ལ་བཞག་ནས་འུ་ཅག་གིས་གང་ཞིག་འབྲི་ཤེས་མིན་ནས་བརྩམས་དེ་དེ་ཉིད་ལ་འགན་འཁུར་བའི་རང་ཉིད་ཅིག་ཀྱང་ཅི་ནས་ཀྱང་ངོ་ཤེས་དགོས་པར་འབོད་སྐུལ་སེམས་བསམ་པའི་དཀྱིལ་ནས་ཞུ་རྒྱུ་ཡིན། དེང་དུས་སུ་གླེང་ཕྱོགས་ཆེས་མི་ཉུང་བ་ཞིག་ཡོད་ལ། བོད་དུ་གཞོན་སྐྱེས་སྨྱུག་ཐོག་པའམ་དྲ་ཐོག་པ། ཟིན་བྲིས་ཆེས་མི་ཉུང་བ་ཞིག་ནི་དེང་རབས་ཀྱི་གཞོན་སྐྱེས་ཤ་སྟག་ཆགས་ཡོད་དུས། ཁོང་ཚོས་རང་ཉིད་ནི་གསར་གཏོད་དང་མདུན་བསྐྱོད་ལ་དགའ་བའི་རིགས་སུ་བརྩི་བ་དང་། རྙིང་ཞེན་མེད་པ་དང་། རྙིང་བའི་རིགས་ནི་དོར་འོས་པ་ལས་ལེགས་ཆ་གང་ཡང་མེད་པར་སྨྲ་བར་དགའ་བའི་གཤིས་ཀ་ཞིག་འཚར་བཞིན་ཡོད་པ་འདི་ནི་དངོས་ནས་མི་རིགས་ཤིག་གི་རང་ཉིད་རང་གིས་གསོད་པའི་སྔ་ལྟས་སུ་ཤར་གྱི་ཡོད་པ་ཡིན་དུས། ལྷག་དོན་དུ་དེང་དུས་སུ་རང་ཉིད་ནང་ཆོས་ལ་གོ་ཐོས་ཙམ་གྱི་བག་ཆགས་ཀྱང་མེད་པར། ནང་ཆོས་ནི་བོད་མི་རིགས་ཀྱི་འཕེལ་རྒྱས་ཀྱི་འགག་རྡོ་ཡིན་པར་གླེང་ནས། འགོ་སྟོན་པ་ཐུབ་པའི་དབང་བོ་དང་། མཇུག་རྗེ་ཙོང་ཁ་བ་རྩིས་དེ། དེ་དག་གི་རིགས་པའི་ལུང་དང་། སྟོན་པའི་གདམས་ངག་དག་ལ་ཞིབ་དཔྱོད་མེད་པའི་སྐད་ཆ་ཤུགས་ཆེར་དར་བའི་དུས་རབས་ཤིག་གི་མི་རབས་འཚར་ནས་ཡོད་པ་འདི་ལ། གསར་གཏོད་ཀྱི་རྣམ་པར་རློམ་མཁན་གྱི་བོད་ཀྱི་སྐྱེ་བོ་དེ་དག་གིས། བསམ་བློ་ཞིབ་མོ་ཞིག་གཏོང་དགོས་པར་འདུག་ལ། རང་ཉིད་སྐྱེ་སའི་མི་རིགས་འདི་ལ་སྲུ་ཞུ་ཞིག་སྒྲུབ་དགོས་པའི་དམིགས་དོན་ཡང་ཤེས་པར་ཕྱོགས་དགོས་ཀྱི་འདུག་ལགས།
སྤྱིར་ན་ང་རང་ལྟ་བུ་ནི་ཆུང་དུས་ནས་སྤྱངས་པའི་ཉམ་མྱོང་ལ་ཐར་ཕྱིན་པ་དེ་འདྲ་མིན་ནའང་། གོ་ཐོས་ཀྱི་ཉམས་མྱོང་ལས་དེང་དུས་ཀྱི་འཛམ་གླིང་ཡུལ་གྲུ་གཞན་དག་གི་སྟོན་པ་དག་གི་རྗེས་མཇུག་པ་དེ་དག་གིས་རང་རང་གི་སྟོན་པ་དག་གིས་བསྟན་པའི་ལམ་དུ་འཇུག་སྟངས་དང་བཤད་སྟངས་བཅས་ལ་བསྡུར་ནས་འོང་དུས། རང་ཅག་གི་སྟོན་པ་ཐུབ་པའི་དབང་བོ་དང་རྗེ་ཙོང་ཁ་བ། བསྟན་པའི་སྐྱེ་ཆེན་གནམ་མཁའི་སྐར་ཚོགས་ལྟ་བུ་བྱོན་པ་དེ་དག་གིས་བོད་ལ་བཞག་པའི་བྱས་རྗེས་དང་བསླབ་བྱ་ནི། ཆོས་ལུགས་གཞན་དག་གི་སྟོན་པ་དེ་དག་ལས་ཡང་བའི་རྩེ་རུ་སོན་ཡོད་པར་བཤད་ཆོག འདི་ནི་རང་ཉིད་སྐྱེ་སུའི་ལུང་ཁུག་གམ་རིགས་ཞེན་གྱིས་བཟི་བའི་གཏམ་ནི་མ་ཡིན་པར། ཉིན་ལྟར་ཆོས་ལུགས་གཞན་གྱི་མིའི་བཤད་སྟངས་དང་སྒྲུབ་སྟངས། ཆོས་ལུགས་དེ་དག་གིས་ཕྱོགས་ཞེན་གྱིས་འདྲུད་པའི་དབྱེ་འབྱེད་ཀྱི་ལྟ་གྲུབ་དེ་དག་ལ་བསམ་དུས། སྟོན་པ་ཐུབ་པའི་དབང་བོ་དང་རྗེ་ཙོང་ཁ་བ་སོགས་ནི། དངོས་ནས་ཚེ་ཕྱི་མ་ཟེར་ན་ངས་ཁྱེད་ཅག་ལ་ཁ་ཚོད་ཆོད་པོ་ཞིག་ཞུ་མི་ཐུབ་ཀྱང་། ཚེ་འདིའི་ལེགས་ཉེས་ལ་བྱང་ཆུབ་པའི་ལེགས་བཤད་བླ་མེད་ཅིག་ཡིན་པ་ཁ་ཚོད་གཅོད་ཐུབ་ཀྱི་འདུག་ན། རིགས་ཀྱི་མདུན་པ་ཟེར་ན་རེད། རང་ཉིད་བོད་ཀྱི་མི་དང་ནང་དགོས་ནང་བའི་ཁྱིམ་ཚང་ཞིག་ལ་སྐྱེ་བ་དེ་ནི་གཟི་བརྗིད་ཅིག་ལས་བྱ་འདྲེན་ལྟ་བུ་ཞིག་ལ་གཏན་ནས་ཚོར་གྱི་མི་འདུག
མཐའ་དོན་ཁ་གསལ་བོའི་སྒོ་ནས་ཞུས་ན། འུ་ཅག་ཟིན་བྲིས་ཀྱི་སྡེ་དང་། དྲ་ཐོག་པའི་སྡེ། སྨྱུག་ཐོག་པའི་སྡེ་གསར་བའི་ཚོ་ཁག་གིས་རང་ཉིད་གང་ནས་སྐྱེ་བའི་མི་རིགས་དེ་ཡི་ནང་བཅུད་ཤོར་དུ་མི་འཇུག་པར། རང་ཉིད་བོད་མི་ཞིག་བྱེད་པའི་ཆ་རྐྱེན་ཚང་བར་དགོས་ངེས་པའི་རིགས་དང་། མེད་དུ་མི་རུང་བ་དང་། དོན་མེད་དུ་འཕྱ་དམོད་བྱེད་མི་རུང་བའི་རིགས་དེ་དག་ལ་ངེས་ཟིན་པའི་སྒོ་ནས་ཟིན་བྲིས་པ་ཞིག་བྱེད་པར་ཐ་མལ་སྐྱེ་བོ་བོད་ཀྱི་རིགས་སུ་སྐྱེ་བུའི་ཡུལ་འཁྱམས་ལྡོམ་པོ་ངའི་སྐད་ཆ་སྙིང་ནས་ཤོར་སོང་།
བཀླགས་ཡོད། གནས་སྐབས་ནང་མི་ཡོང་བདེ་མོ་ཡིན་པར་སྨོན།