སི་ཏཱ་ལེན་གྱི་བུ་མོ་འདས་གྲོངས།

ཟླ་འདིའི་ཕྱི་ཚེས་ ༢༢ ཉིན་སི་ཏཱ་ལེན་ (Josef Stalin) གྱི་བུ་མོ་ནཱ་ནཱ་པེ་ཊར་སི་ (Nana Peters) རང་ལོ་ ༨༥ སོན་པ་ཁོང་ཨ་རིར་སྐྲན་ནད་ཀྱིས་རྐྱེན་པས་འདས་གྲོངས་སུ་གྱུར་ཡོད་འདུག ནཱ་ནཱ་པེ་ཊར་ནི།  ༡༩༦༧ ལོར་ཨུ་རུ་སུ་ནས་ཨ་རིར་སྐྱབས་བཅོལ་དུ་ཕྱིན་པ་དང་། ཁོང་ཨུ་རུ་སུར་ཡོད་སྐབས་སི་ཏཱ་ལེན་གྱི་སྲིད་དབང་དང་ཁ་བྲལ་ཡོད་པ་མ་ཟད། མི་མང་ས་ཡ་མང་པོ་ངལ་རྩོད་རུ་ཁག་ལ་བཏང་པའི་སྲིད་ཇུས་ཐད་དམར་ཤོག་དཔོན་རིགས་གཞན་ཚོར་ཡང་སྐྱོན་བརྗོད་མཐའ་གཅིག་ཏུ་བྱེད་མཁན་ཞིག་ཡིན་འདུག

ནཱ་ནཱ་པེ་ཊར་ཨ་རིར་འབྱོར་རྗེས། ཁོ་མོ་ཨུ་རུ་སུར་ཡོད་སྐབས་ཀྱི་དྲན་ཐོ་དང་གྲོགས་པོ་དག་ལ་བཏང་པའི་འཕྲིན་ཡིག་སོགས་ཚུད་པའི་དཔེ་དེབ་འགའ་བརྩམས་པར་རྒྱལ་སྤྱིའི་སྟེང་གདེང་འཇོག་ཆེན་པོ་ཐོབ་ཡོད་འདུག་ལ། ཨ་རིར་འབྱོར་རྗེས་རང་ཉིད་རཱ་ཤི་ཡའི་ཆབ་སྲིད་ཀྱི་གནོན་ཤུགས་འོག་སྡོད་མ་ཐུབ་པར་བྲོས་བྱོལ་དུ་ཡོང་དགོས་བྱུང་ཡོད་པ་དང་། སྐབས་དེའི་རཱ་ཤི་ཡའི་ཆབ་སྲིད་ལམ་ལུགས་ལ་དགའ་མོས་མེད་ཀྱང་། གཞུང་གིས་ཁོང་ཆབ་སྲིད་ཀྱི་ལག་ཆར་བེད་སྤྱོད་བཏང་སྟེ་འདུག་ཐབས་མེད་པའི་གནས་སུ་གྱུར་ཡོད་ཚུལ་སོགས་བརྗོད་ཡོད་འདུག

ནཱ་ནཱ་པེ་ཊར་ཨ་རིར་སྐྱབས་བཅོལ་དུ་ཕྱིན་པའི་སྐབས་ནི། འཛམ་གླིང་གྲང་དམག་སྟེ། ཨུ་རུ་སི་དང་ཨ་རི་སོ་སོའི་རྒྱབ་ཏུ་རྒྱལ་ཁབ་གཞན་རྣམས་ཕྱོགས་ཁག་ཕྱེས་པའི་དུས་སྐབས་ཡིན་སྟབས། དམར་ཤོག་རིང་ལུགས་པ་དང་སྲིད་དབང་སྒེར་གཅོད་པ་སི་ཏཱ་ལེན་གྱི་བུ་མོ་ཨ་རིར་སྐྱབས་བཅོལ་དུ་ཕྱིན་པའི་ཐད་དམར་པོའི་ཤོག་ཁག་གི་སྲིད་གཞུང་དག་ལ་ཁོང་ཁྲོ་ཆེན་པོ་བསླངས་ཡོད་འདུག འཛམ་གླིང་དམག་ཆེན་གཉིས་པའི་རྗེས་ཀྱི་གྲང་དམག་ (Cold War) གི་ཐད་སྐབས་ཤིག་ནཱ་ནཱ་པེ་ཊར་གྱིས།  “ད་ལྟའི་དཀའ་ངལ་ནི་དམར་ཤོག་རིང་ལུགས་དང་མ་རྩ་རིང་ལུགས་ཀྱི་དཀའ་ངལ་མ་རེད། འདི་ནི་མིའི་རིགས་ཀྱི་ལྟ་སྤྱོད་ཡག་སྡུག་ལས་བྱུང་པ་ཞིག་རེད། ” ཅེས་བརྗོད་འདུག

ནཱ་ནཱ་པེ་ཊར་ད་སྔ་གཉེན་སྒྲིག་ཐེངས་བཞི་བྱས་ཡོད་ཅིང་བུ་བུ་མོ་ ༣ བྱུང་ཡོད་འདུག