གྲྭ་བ་གཉིས་འཛིན་བཟུང་།

ཉེ་ཆར་མཚོ་སྔོན་ཞིང་ཆེན་མཚོ་ནུབ་ཁུལ་ཐེམ་ཆེན་རྫོང་དུ་གྲྭ་བ་གཉིས་དང་གཞས་པ་ཁག་ཅིག་མཉམ་རུབ་ཐོག་༼རྡུལ་ནག་ཁྲོད་ཀྱི་ཕ་ཡུལ།༽ ཞེས་པའི་འོད་སྡེར་ཞིག་པར་བསྐྲུན་འགྲེམས་སྤེལ་བྱས་ཡོད་པ་དང་། འོད་སྡེར་ནང་རྒྱ་ནག་གཞུང་གིས་ས་གནས་སུ་རྡོ་སོལ་གཏེར་ཁ་སྔོག་འདོན་བྱས་ཏེ། ཁོར་ཡུག་ལ་གཏོར་བརླག་ཚབས་ཆེན་བཟོས་པའི་སྐོར་དང་། ས་གནས་བོད་མིའི་འཚོ་རྟེན་ཆགས་འཇིགས་ཀྱི་གནས་སུ་བསྐྱལ་ཡོད་པའི་སྐོར་བརྙན་པར་དང་གཞས་ཚིག་གི་ལམ་ནས་གསལ་བོ་བསྟན་ཡོད་སྟབས། ཟླ་འདིའི་ཕྱི་ཚེས་ ༦ ཉིན་སྔ་དྲོ་རྒྱ་ནག་གཞུང་གིས་འོད་སྡེར་གྱི་གཞས་ཚིག་རྩོམ་པ་པོ་གཉའ་ནག་ཕུན་ཚོགས་དར་རྒྱས་གླིང་དགོན་པའི་དགོན་བདག་གཉའ་ནག་ཕུན་ཚོགས་ལགས་དང་ཐེམ་ཆེན་རྫོང་བོང་སྟག་ནས་ཡིན་ཞིང་། ངྷི་ཚ་དགོན་པར་སློབ་གཉེར་བྱེད་བཞིན་པའི་གྲྭ་སྐལ་བཟང་འཇམ་དབྱངས་གཉིས་ཐེམ་ཆེན་རྫོང་ཐོག་ནས་འཛིན་བཟུང་བྱས་ཡོད་སྐོར་འབྲེལ་ཡོད་མི་སྣ་ཞིག་གིས་ཨེ་ཤ་ཡ་རང་དབང་རླུང་འཕྲིན་ཁང་ལ་བརྗོད་འདུག

ཡང་གནས་ཚུལ་མཁོ་སྤྲོད་པས་བརྗོད་པ་ལྟར་ན། ཉེ་ཆར་རྒྱ་ནག་གཞུང་གིས་ཁོང་གཉིས་འཛིན་བཟུང་བྱས་རྗེས་གཉའ་ནག་ཕུན་ཚོགས་ལགས་ཀྱི་ནང་མིས་ཁོང་ཐེམ་ཆེན་རྫོང་བཀག་ཉར་ཁང་དུ་ཡོད་པའི་གནས་ཚུལ་ཤེས་ཡོད་ཀྱང་། སྐལ་བཟང་འཇམ་དབྱངས་ལགས་འཛིན་བཟུང་བྱས་རྗེས། ཐེམ་ཆེན་རྫོང་དང་བར་ཐག་སྤྱི་ལེ་ ༨༠ ཙམ་ཡོད་པའི་ཝུ་ལེན་རྫོང་ཉེན་རྟོག་པས་ཁོང་གི་ཆོས་གོས་དང་རྒྱ་སྒོར་ ༢༠༠༠ ཕྱིར་ནང་མིར་རྩིས་སྤྲོད་བྱས་ཡོད་ནའང་། ཉེན་རྟོག་པས་ཁོང་ས་གནས་གང་དུ་འཁྲིད་ཡོད་མེད་ཀྱི་གནས་བརྗོད་མེད་པ་མ་ཟད། ཉེ་ལམ་རྒྱ་ནག་གཞུང་གིས་༼རྡུལ་ནག་ཁྲོད་ཀྱི་ཕ་ཡུལ།༽ ཞེས་པའི་འོད་སྡེར་ཕྱིར་བསྡུ་བྱེད་ཀྱི་ཡོད་འདུག

པར་དབང་འོད་དཀར་དྲ་ཚིགས།