བོད་མིས་རང་ཉིད་ལ་ལྟ་བའི་འདུ་ཤེས་མཁྲེགས་དུ་གཏོང་དགོས་ཀྱི་འདུག

མི་རིགས་ཤིག་ལ་མཚོན་ན། ཐོག་མར་རང་ཉིད་མི་རིགས་དེ་ཉིད་ཡིན་པར་འདུ་ཤེས་ཟབ་མོ་ཞིག་ཡོད་དགོས་པ་དེ་ནི་གལ་ཆེན་པོ་ཆགས་ཡོད་པ་ཡིན། དེ་ཡོད་ན་གཟོད་ནས་མི་རིགས་དེ་ས་སྒང་འཛམ་གླིང་འདིར་གསོན་གནས་ཐུབ་པའི་རེ་བ་ཡོད་པ་ནི་བཤད་མི་དགོས་པ་ཞིག་ཆགས་ཀྱི་ཡོད། ད་ལྟའི་འཆར་བོད་མི་དག་གིས་རང་ཉིད་བོད་མི་ཞིག་ཡིན་པའི་འདུ་ཤེས་དེ་ཉིད་ཟབ་དུ་ནས་མཁྲེགས་དུ་གཏོང་བའི་དུས་སུ་འབབས་ཡོད་པ་དེ་ནི་འགོར་མེད་ན་སྔ་མེད་པ་ཡིན།

ཐོག་མར་བོད་མི་རིགས་འདི་ཉིད་གངས་ཅན་ཁ་བ་རི་བོའི་མི་རིགས་ཟེར་བ་འདི་འཛམ་གླིང་འདིར་གསོན་གནས་བྱེད་པ་ལ་རྒྱུ་མཚན་ཡོད་མེད་དེ་ཞིབ་ཚགས་པོ་སྒོ་ནས་བསམ་གཞིགས་ནན་ཏན་ཞིག་བྱས། གསོན་པར་དོན་སྙིང་ཡོད་པ་དང་མ་གསོན་ཐབས་མེད་ཡིན་པའི་ངེས་པ་བརྙེད་སོང་ན། གཞི་ནས་མི་རིགས་དེ་ཉིད་ཀྱི་འདུ་ཤེས་མཁྲེགས་དུ་གཏོང་བའི་ཐབས་ལམ་ལ་མཇུག་པར་འོས་པ་ཡིན། མཁྲེགས་ཟེར་ནས་གླེང་དེ་འོང་ན། མི་ཁ་ཤས་ནས་མཁྲེགས་འཛིན་གྱི་བསམ་བློ་ཟེར་བ་ནི་དུག་དུ་རློམ་བཞིན་ཡོད་པ་ཡིན་དུས། སྐད་ཆ་འདི་གོ་མ་ཐག ངས་བཤད་བཞིན་པའི་སྐད་ཆ་འདི་དག་གི་མཇུག་ཉན་འདོད་མེད་པ་དེ་འདྲ་ཡང་ཡོང་མི་སྲིད་པ་མ་རེད། གཟབ་ནན་གྱིས་ཤེས་དགོས་པ་ཞིག་ནི། ངས་འདི་ནས་གླེང་བཞིན་པའི་མཁྲེགས་འཛིན་ཟེར་བ་དེ་ནི། བཟང་བོའི་འདུ་ཤེས་ཀྱི་ལྟ་བ་ཡོད་པའི་མི་རིགས་ཤིག་གི་བླ་སྲོག་གི་ལ་རྒྱའི་ལྟ་བ་མཁྲེགས་དུ་གཏོང་དགོས་པ་དང་གཏོང་ལུགས་ཀྱི་སྐོར་ནས་གླེང་གི་ཡོད་པ་དེ་ཡིན་པ་ལས། གཞན་གང་ལ་ཡང་མཁྲེགས་འཛིན་བྱེད་ཀྱི་མེད།

ངས་མི་རིགས་ཤིག་མཁྲེགས་པར་གཏོང་བ་དང་འདུ་ཤེས་ཀྱི་ལྟ་བ་མཁྲེགས་པོ་ཞིག་ཆགས་དགོས་པ་ཡིན་ན། མེད་དུ་མི་རིང་བའི་ཆ་རྐྱེན་གཉིས་མཐོང་གི་ཡོད། དེ་གཉིས་ནི་ཆེས་མེད་དུ་མི་རུང་བ་དང་གཙོ་བོར་འཛིན་དགོས་པ་དེ་ཡིན། ཐོག་མར་བོད་མི་དག་གིས་བོད་རིགས་གཙང་མིའི་གཉེན་སྒྲིག་བྱེད་པ་ནས་བྱིས་པ་གསོ་སྐྱོང་བྱེད་པ། གཉིས་པ་དེ་ནི་བོད་སྐད་བཤད་མཁན་གྱི་ཕ་མ་ཡིན་དགོས་པ་དེ་ཡིན། འདི་གཉིས་ཆེས་མེད་དུ་མི་རུང་བའི་ཆ་རྐྱེན་གཙོ་བོ་དེ་གཉིས་རེད། དེ་ཡི་རྗེས་སུ་ཁོར་ཡུག་ཆགས་ཡོད། ཁོར་ཡུག་ནི་ཕ་མ་དེ་གཉིས་གནས་སའི་ཁོར་ཡུག་ཡང་བོད་མི་གནས་ཡུལ་ཡིན་དགོས་པ་དང་། བོད་ཀྱི་ཁོར་ཡུག་ཡིན་དགོས་པ་དེ་ཡིན། དེ་དག་འཛོམས་པ་ཡིན་ན། ས་ཁུལ་དེ་ཡི་རིགས་ལ་འདུ་ཤེས་མཁྲེགས་འཛིན་གྱི་ལྟ་བ་འདི་ཉིད་ཟབ་དུ་གཏོང་བའི་ལས་འགུལ་མ་སྤེལ་ཡང་འགྲིག་གི་ཡོད། སྐྱེ་ནས་འཆི་བའི་བར་དུ་བོད་གཙང་མ་དང་བོད་སྐད་བཤད་ཤེས་པའི་བག་ཆགས་དེ་ཡིས་འདུ་ཤེས་མཁྲེགས་པོ་རང་བཞིན་གྱིས་ཆགས་ནས་ཡོད།

དེ་མིན་དེང་དུས་སུ་བོད་མི་དག་ས་གནས་གང་སར་འཐོར་ནས་ཡོད་དུས། བོད་མི་ཀླད་གསར་བར་རློམ་མཁན་ཆེས་མི་ཉུང་བ་ཞིག་གིས་རང་ཉིད་ཀྱི་བུ་ཕྲུག་དག་གི་མི་ཚེའི་མདུན་ལམ་ནི་ཕྱི་རྒྱལ་ཡུལ་གྲུ་ཁག་དུ་ཡོད་པར་འདོད་ཀྱི་ཡོད་ལ། དེ་དག་ལ་སླེབས་པར་རང་ཉིད་ནས་འགོ་བཙུགས་དེ་རང་གི་སྐྱེ་རྒྱུད་དག་གཞན་ཡུལ་དག་ལ་འཚར་ལོངས་བྱུང་བའི་འགོ་བཙུགས་དེ་མི་རབས་གསར་བ་ཞིག་ཕྱི་རྒྱལ་ཁག་ན་འཚར་བཞིན་ཡོད་ལ། དེ་དག་གི་ཁྲོད་དུ་བོད་སྐད་ཤེས་ལ་མ་ཤེས་ཀྱི་སྐྱེ་རྒྱུད་ཀྱང་ཆེས་མི་ཉུང་བ་ཞིག་བྱུང་གི་ཡོད་ལ། དེ་དག་གིས་ཕ་མ་དག་གིས་ཀྱང་རང་རང་གི་བུ་ཕྲུག་དག་གི་མདུན་ལམ་ནི་མ་འོངས་པར་དཀའ་ཚེགས་མེད་པའི་མི་རབས་ཤིག་དུ་བསྐྱལ་ཡོད་པར་འདོད་ཀྱི་ཡོད་པ་དེ་ཡིན། དོན་དངོས་དང་སྐད་ཆ་དྲང་མོ་བཤད་པ་ཡིན་ན། མི་དེ་ཡི་རིགས་ཀྱིས་རང་གི་སྐྱེ་རྒྱུད་ལ་འགན་འཁུར་ཐུབ་མེད་པ་མ་ཟད། རང་གི་རིགས་རུས་ཀྱི་བདག་དབང་ཡང་མི་རིགས་གཞན་ཞིག་ལ་ཕུལ་བ་ཡིན་པར་མ་ཟད། བོད་མི་རིགས་ཀྱི་འདུ་ཤེས་མཁྲེགས་པོ་དེ་ཡང་སྐྱེ་རྒྱུད་དག་ལ་གཏན་ནས་སྤྲོད་ཐུབ་ཀྱི་མེད་པ་ཡིན་དུས། དེ་ཡི་རིགས་ཀྱིས་རིགས་ཀྱི་འདུ་ཤེས་མཁྲེགས་དུ་གཏོང་བའི་ལས་འགན་འགྲུབ་མེད་ལ། ཁོང་ཚོས་རྨི་ལམ་ཁྲོད་ནས་ཀྱང་རང་གི་སྐྱེ་རྒྱུད་དག་གིས་ཁ་བ་གངས་ཅན་པའི་འདུ་ཤེས་མཁྲེགས་པོ་དེ་ནམ་ཡང་མེད། དེ་ཉིད་མེད་པ་ནས་ཁོང་ཚོས་ཁ་བ་གངས་ཅན་པའི་གསོན་གནས་ལ་འགན་མ་བླངས་པའི་མི་རིགས་ཤིག་ཆགས་པ་ཡིན། འདི་ནི་མི་རིགས་ཤིག་གིས་རང་ཉིད་གསོད་སྟངས་གསར་བ་ཞིག་ཆགས་ཡོད་པ་ཡིན་དུས། ངས་འདི་ནས་མི་རིགས་ཀྱི་འདུ་ཤེས་མཁྲེགས་དུ་གཏོང་བར་དྲན་སྐུལ་ཞིག་བྱེད་དོན་འདི་ལ་ཐུག་པ་ཡིན། སེམས་པར་གྱིས་ཤིག རིགས་ཀྱི་འདུ་ཤེས་ལ་དགའ་བའི་སྤུན་ཟླ་ཚོ།