དེ་རིང་ཧོང་ཀོང་གི་ཁྲིམས་ཁང་ཞིག་གིས་ཧོང་ཀོང་ནང་དྲུག་བཞིའི་དོན་རྐྱེན་རྗེས་དྲན་ཞུ་མཁན་གྱི་ལས་འགུལ་བ་གསུམ་ལ་རྒྱལ་ཁབ་མགོ་རྟིང་སློག་རྩིས་བྱས་པའི་ཉེས་མིང་འོག་ལོ་ལྔ་ནས་བདུན་བར་གྱི་བཙོན་འཇུག་ཁྲིམས་ཐག་བཅད་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཧོང་ཀོང་སྲིད་གཞུང་གིས་རང་ལོ་ ༦༩ ཡིན་པའི་ཧོང་ཀོང་གི་ལས་འགུལ་བ་ལི་ཆཱོག་ཡན་(Lee Cheuk-yan) ལ་ལོ་བདུན་དང་ཆའོ་ཧན་ཏོང་(Chow Hang-tung) ལ་ལོ་བདུན་དང་ཟླ་གསུམ། དེ་བཞིན། ལས་འགུལ་བ་ཨལ་བྷར་ཊི་ཧོ་(Albert Ho) ལགས་སུ་ལོ་ལྔ་བཅས་ཀྱི་བཙོན་འཇུག་ཁྲིམས་ཐག་བཅད་འདུག ཁོང་ཚོས་ལོ་རྟག་པར་ཧོང་ཀོང་ནང་དྲུག་བཞིའི་དོན་རྐྱེན་ལ་རྗེས་དྲན་གྱི་མར་མེ་ཁྲོམ་སྐོར་གོ་སྒྲིག་བྱེད་བཞིན་ཡོད་ཅིང་། ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཀྱི་རྗེས་ནས་བཟུང་ཧོང་ཀོང་ནང་དྲུག་བཞིའི་དོན་རྐྱེན་ལ་རྗེས་དྲན་ཞུ་རྒྱུ་བཀག་སྡོམ་བྱས་ཡོད་པ་རེད།
ཆའོ་ཧན་ཏོང་ལགས་ཀྱིས་བཙོན་འཇུག་ཁྲིམས་ཐག་མ་བཅད་གོང་དུ། དམངས་གཙོ་ལོངས་སྤྱོད་བྱེད་པ་ནི་ནག་ཉེས་སུ་བརྩི་ཡི་ཡོད་ཚེ། ང་ཚེ་གང་ཉེས་ཅན་པ་ཞིག་ཏུ་གྱུར་འདོད་པ་ལས། རང་ཉིད་ཀྱི་འདུ་ཤེས་ལ་མགོ་སྐོར་གཏོང་མཁན་ཞིག་བྱེད་འདོད་མེད་ཅེས་བརྗོད་འདུག ད་ལྟའི་ཆར་ཧོང་ཀོང་ནང་རྒྱལ་ཁབ་བདེ་འཇགས་ཟེར་བའི་ཁྲིམས་འོག་ནས་དྲུག་བཞིའི་དོན་རྐྱེན་ལ་རྗེས་དྲན་ཞུ་མི་ཆོག་པའི་ཁར། རྒྱ་ནག་གཞུང་གི་ལངས་ཕྱོགས་དང་མི་མཐུན་པའི་ལས་འགུལ་གཅིག་ཀྱང་སྤེལ་ཆོག་གི་མེད་པ་རེད།
དེ་རིང་བཙོན་འཇུག་ཁྲིམས་ཆད་ཕོག་པའི་ཧོང་ཀོང་གི་ལས་འགུལ་བ་གསུམ་ནི། ཕྱི་ལོ་ ༡༩༨༩ ལོར་རྒྱ་ནག་གི་དྲུག་བཞིའི་དོན་རྐྱེན་ལ་རྒྱབ་སྐྱོར་མཚོན་ཆེད་དུ་བཙུགས་པའི་ཧོང་ཀོང་གནའ་འབྲེལ་མཐུན་ཚོགས་ཞེས་པའི་ཚོགས་པའི་མགོ་འཁྲིད་ཡིན་ཞིང་། ཚོགས་པ་དེས་འདས་པའི་ལོ་ངོ་སུམ་ཅུ་ལྷག་གི་རིང་རྒྱ་ནག་གཞུང་གིས་དྲུག་བཞིའི་དོན་རྐྱེན་གྱི་འགན་འཁུར་དགོས་པ་དང་། སྐབས་དེར་འཛིན་བཟུང་བྱས་པའི་སློབ་མ་རྣམས་ཀློད་གྲོལ་གཏོང་དགོས་པ། དེ་བཞིན། རྒྱ་ནག་ལ་དམངས་གཙོས་བཅོས་བསྒྱུར་བྱ་དགོས་པའི་དགོས་འདུན་བཏོན་ཡོད་འདུག་ལ། ད་རེས་ལས་འགུལ་བ་གསུམ་ལ་ཁྲིམས་ཐག་བཅད་པ་དང་འབྲེལ་ནས་ཧོང་ཀོང་གནའ་འབྲེལ་མཐུན་ཚོགས་ལའང་ཨ་སྒོར་ ༡༩༡༠༠༠ ཡི་ཉེས་ཆད་བཅད་འདུག
དེ་རིང་རྒྱལ་སྤྱིའི་ཉེས་ཡངས་ཚོགས་པའི་ཨེ་ཤ་ཡའི་འགན་འཛིན་ས་རཱ་བྷི་རོག་སི་ལགས་ཀྱིས། ཁྲིམས་ཆད་འདི་ནི་དོན་རྐྱེན་གསུམ་ཡིན། ལས་འགུལ་བར་དྲང་བདེན་མིན་པའི་ཉེས་ཆད་བཅད་པ་དང་། དྲུག་བཞིའི་དོན་རྐྱེན་སྐབས་གནོད་འཚེ་ཕོག་པའི་ལས་འགུལ་བར་དྲག་གནོན་བྱེད་བཞིན་པ། ཧོང་ཀོང་གི་མི་རབས་ཚོར་རྒྱ་ནག་གི་ཉེ་རབས་ལོ་རྒྱུས་ཁྲོད་ཆེས་ཚབས་ཆེ་བའི་དོན་རྐྱེན་སྐོར་ལ་སྐད་ཆ་བཤད་པའི་རང་དབང་མེད་པ་བཅས་མཚོན་ཡོད་ཅེས་བརྗོད་འདུག
ཧོང་ཀོང་གི་ལས་འགུལ་བ་ལི་ཆཱོག་ཡན་དང་ཆའོ་ཧན་ཏོང་། དེ་བཞིན། ལས་འགུལ་བ་ཨལ་བྷར་ཊི་ཧོ་བཅས་ཕྱི་ལོ་ ༢༠༢༡ ལོ་ནས་འཛིན་བཟུང་བྱས་ཡོད་སྟབས། ད་ལྟའི་བཙོན་འཇུག་ཁྲིམས་ཆད་ཚུད་པའི་ཁྱོན་ལོ་ངོ་ཧྲིལ་པོ་ ༡༠ ལྷག་གི་རིང་བཙོན་འཇུག་ཁྲིམས་ཆད་འཁུར་དགོས་ཀྱི་ཡོད་འདུག་ལ། ད་ལྟ་ཧོང་ཀོང་གི་རང་དབང་དྲག་གནོན་འོག་གནས་ཤིང་། ཕྱི་ལོ་ ༢༠༡༩ ལོར་རྒྱ་ནག་གཞུང་གིས་ཧོང་ཀོང་ནང་ཉེས་ཅན་པ་རྩིས་སྤྲོད་དགོས་པའི་ཁྲིམས་ངོ་སྤྲོད་བྱས། སྐབས་དེར་དམངས་གཙོ་དང་རང་དབང་ལ་དགའ་བའི་ཧོང་ཀོང་བ་ཁྲི་ཁྲག་མང་པོས་ཁྲིམས་དེར་ངོ་རྒོལ་བྱས་ཡོད།
ཕྱི་ལོ་ ༢༠༢༠ ལོ་ནས་རྒྱ་ནག་གཞུང་གི་གནོན་ཤུགས་འོག་ཧོང་ཀོང་སྲིད་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ངོ་སྤྲོད་དང་ལག་བསྟར་གྱིས། ཧོང་ཀོང་གི་དམངས་གཙོ་དང་འགྲོ་བ་མིའི་ཐོབ་ཐང་། རང་དབང་སོགས་གཞི་རྩར་བཟུང་བའི་ཚོགས་སྡེ་ཁག་མང་པོ་ཞིག་སྒོ་བརྒྱབ་པ་དང་། མི་སྒེར་མང་པོ་ཞིག་གང་བྱུང་འཛིན་བཟུང་གིས་བཙོན་འཇུག་ཁྲིམས་ཆད་བཅད་ཡོད་ལ། སྐབས་དེར་དམངས་གཙོའི་ལས་འགུལ་གྱི་སྣེ་འཁྲིད་པ་ཇོ་ཧྲ་ཝང་ལ་ལོ་བཞི་དང་ཟླ་བརྒྱད་ཀྱི་ཁྲིམས་ཐག་བཅད། དེ་བཞིན་ལོ་དེར་འཛིན་བཟུང་བྱས་པའི་ཀུ་ཤུ་ཉིན་རེའི་ཚགས་པར་གྱི་སྤྱི་གཉེར་བ་ཇི་མི་ལའེ་ (Jimmy Lai) ལ་འདི་ལོའི་ཕྱི་ཟླ་ ༢ ནང་ལོ་ངོ་ ༢༠ བཙོན་འཇུག་ཁྲིམས་ཐག་བཅད་པ། ད་དུང་ལས་འགུལ་བ་མང་པོ་ཞིག་ཨ་རི་དང་དབྱིན་ཡུལ་སོགས་སུ་སྐྱབས་བཅོལ་བར་བྲོས་དགོས་བྱུང་ཡོད།
གསར་འགོད་པ། སྐལ་བཟང་སྦྱིན་པ།
