ཐའེ་ཝན་ནང་མཆོད་འབུལ་དང་ཟས་བཅད།

ཟླ་འདིའི་ཕྱི་ཚེས་ ༢ ཉིན་ཐའེ་ཝན་བོད་རིགས་ཚོགས་པ་དང་ས་གནས་གཞོན་ནུ། ཐའེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པ་བཅས་ཀྱིས། ཉེ་ཆར་བོད་ནང་རང་ལུས་མེར་བསྲེག་བཏང་བའི་བཙུན་མ་བསྟན་འཛིན་དབང་མོ་ལགས་ཀྱི་དགོང་ཞག་ཞེ་དགུའི་ཉིན་མོ་དང་སྟབས་བསྟུན་ཏེ། ཐའེ་ཝན་རང་དབང་ཐང་ཆེན་དུ་ཟས་བཅད་དང་མཆོད་འབུལ། རང་ལུས་མེར་བསྲེགས་བཏང་བའི་དཔའ་བོ་དཔའ་མོ་རྣམས་ཀྱི་པར་རིས་འགྲེམས་སྟོན་བཅས་ཀྱི་ལས་འགུལ་ཞིག་གོ་སྒྲིག་གནང་འདུག་ལ། ལས་འགུལ་ཐའེ་ཝན་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་དང་རྒྱུན་ལས་སྐལ་བཟང་ལྷུན་འགྲུབ། རྒྱུན་ལས་དཀོན་མཆོག་ལྷག་པ། ས་གནས་གཞོན་ནུའི་ཚོགས་གཙོ་བསྟན་འཛིན་ཆོས་འཕེལ། ཚོགས་གཞོན་བསྟན་འཛིན་རྣམ་དག ཚོགས་མི་དབང་འདུས་ཚེ་རིང་བཅས་མི་ ༦ གིས་ཆུ་ཚོད་ ༤༩ རིང་ཟས་བཅད་གནང་ཡོད་པ་མ་ཟད། ཕྱི་ཚེས་ ༣ ཉིན་གསར་འགོད་ལྷན་ཚོགས་ཤིག་སྐོང་ཚོགས་གནང་སྟེ། ཐའེ་ཝན་དམངས་ཁྲོད་རྩ་ཁྲིམས་བསྐྱར་བཅོས་སྐུལ་སྤེལ་ཚོགས་པའི་ཚོགས་གཙོ་སྐུ་ཞབས་ལིས་ཕེང་ཀྲང་དང་། ཏུང་ཝུ་གཙུག་ལག་སློབ་ཆེན་འགྲོ་བ་མིའི་ཐོབ་ཐང་ལྟེ་གནས་ཀྱི་འགན་འཛིན་དང་དགེ་རྒན་ཆེན་མོ་སྐུ་ཞབས་ཧོང་མོའོ། དམངས་གཙོ་ཡར་ཐོན་ཚོགས་པའི་སྐུ་ཞབས་ཡཱང་ཀྲེན་ཀྲན། ཐའེ་ཝན་ངལ་རྩོལ་དཔུང་ཁག་གི་དྲུང་ཆེ་སྐུ་ཞབས་སུན་ཡོའོ་ལན། གྲོས་ཚོགས་འཐུས་མི་ཟུར་པ་སྐུ་ཞབས་ཇན་ཏཱ།  ཐའེ་ཝན་བོད་རྒྱ་མཐུན་ཚོགས་ཀྱི་ཚོགས་གཙོ་དང་དགེ་རྒན་ཆེན་མོ་སུན་ཀྲེ་པེན་བཅས་ཆེད་ཕེབས་ཀྱིས་བོད་མི་ཚོར་གདུང་སེམས་མཉམ་སྐྱེད་དང་རྒྱ་གཞུང་གི་དྲག་པོའི་སྲིད་ཇུས་ལ་སྐྱོན་བརྗོད། བོད་མིར་མུ་མཐུད་རྒྱབ་སྐྱོར་གནང་རྒྱུའི་གསུང་བཤད་གནང་འདུག

ཕྱི་ཚེས་ ༤ ཉིན་སྟེ། ལས་འགུལ་གྱི་མཐའ་མའི་ཉིན་ཐའེ་ཝན་གྲོས་ཚོགས་འཐུས་མི་ལྕམ་ཐན་ཆིའུ་ཇིན་ཆེད་དུ་ཟས་བཅད་གནང་ཡུལ་དུ་ཕེབས་ཏེ། ཐེངས་འདིའི་ལས་འགུལ་ལ་རྒྱབ་སྐྱོར་དང་པར་རིས་འགྲེམས་སྟོན་ལ་གཟིགས་ཞིབ་བཅས་གནང་ཡོད་པ་མ་ཟད། དགོང་དྲོ་ཐའེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཆེད་ཕེབས་ཀྱིས་དེར་ཡོད་ཟས་བཅད་གནང་མཁན་རྣམས་ལ་མཇལ་དར་སྒྲོན་ཡོད་པ་དང་། དེར་ཡོད་སེར་སྐྱ་བོད་མི་དང་བོད་དོན་རྒྱབ་སྐྱོར་བ་ ༡༠༠ མ་ཟིན་ཙམ་གྱིས་མཆོད་འབུལ་སྨོན་ལམ་སོགས་གནང་སྟེ་ལས་འགུལ་མཇུག་སྒྲིལ་ཡོད་འདུག

གསར་འགོད་པ། དོན་གོ