ཨ་འཇམ།
ད་ལྟ་འུ་ཅག་བོད་ཀྱི་རིག་གནས་སློབ་གསོའི་ཁོར་ཡུག་གཉིས་ཏེ། ཆོས་ལུགས་རིག་གནས་སློབ་གསོ་དང་སྤྱི་ཚོགས་རིག་གནས་སློབ་གསོ་ཞེས་པའི་སྡེ་ཁག་ཆེ་ཤོས་གཉིས་སུ་དབྱེ་ཆོག་ལ། མི་སྡེ་ཚོ་ཁག་འདི་གཉིས་ནི་རིགས་མི་འདྲ་བའི་བོད་ཀྱི་སློབ་གསོའི་ཚན་ཁག་གཉིས་ཏེ། སྐྱ་བོའི་སྡེ་ཁག་དང་སེར་མོའི་སྡེ་ཁག་གི་རིག་གནས་དར་སྤེལ་གཏོང་བའི་ཁོར་ཡུག་ཆེ་ཤོས་ཡིན། ད་ལྟ་བཙན་བྱོལ་གྱི་དགོན་སྡེ་ཁག་ནི་ཆེས་ཉེན་ཁའམ་ཉམས་རྒུད་ཀྱི་རྣམ་པ་ཞིག་མཐོང་བ་ནི་ནང་གི་འཆད་ཉན་ཙམ་མ་ཡིན་པར། དེ་ཉིད་འཛིན་སྐྱོང་སྤེལ་གསུམ་བྱེད་པའི་མི་སྡེ་ཉམས་རྒུད་དུ་འགྲོ་བཞིན་པའི་དངངས་སྐྲག་དེའོ།།
སྔོན་ཆད་དགོན་པའི་ལམ་ལུགས་ཀྱི་ཁྲོད་དུ་ལས་ཀྱི་སྣེ་མོ་བ་དག་གིས་ཡོངས་ཁྱབ་ཏུ་བརྗོད་སྟངས་ཤིག་ནི། བརྒྱ་ཕར་འགྲོ་དང་།། སྟོང་ཚུར་ཡོང་ཡིན།། ཞེས་པའི་གཏམ་གྱི་ངར་ཁ་བཙན་པོ་དེ་ཡིན་ལ། དེ་དུས་ངུར་སྨྲིག་གི་སྡེ་ཡི་རླབས་རྒྱུན་ཧ་ཅང་གཟེངས་མཐོ་བའི་སྐབས་ཤིག་ཀྱང་ཡིན། ད་ལྟ་ནི་དེ་ལས་ལྡོག་སྟེ་ཉིས་སྟོང་བརྒྱད་ཀྱི་ལས་འགུལ་དེ་ནས་བཟུང་། བོད་ཀྱི་དགོན་སྡེ་དག་གི་གྲྭ་རྒྱུན་ཡང་ལྟག་ཆུ་ཆད་པའི་རྫིང་བུ་བཞིན་དུ་ལོ་རེ་ནས་ལོ་རེར་དགེ་འདུན་པའི་གྲངས་ཚད་འགྲིབ་འགོ་ཚུགས་བཞིན་ཡོད། དེ་ལྟར་དུ་དགོན་པ་ཆུང་ཆུང་མང་པོ་ཞིག་གིས་ཧི་མ་ལ་ཡའི་རི་རྒྱུད་བྱིས་པ་དག་བསྡུས་ནས་དགོན་པ་མ་སྟོང་བ་ཙམ་བྱེད་བཞིན་ཡོད། ག་ལེར་སེ་འབྲས་དགེ་གསུམ་གཙོ་བྱས་ཏེ་དགོན་ཆེན་དག་གི་གྲྭ་རྒྱུན་ཉམས་ཚད་ནི་ལོ་རེ་ནས་ལོ་རེར་ཧ་ཅང་མགྱོགས་པར་གྱུར། གྲྭ་རྒྱུན་ཉམས་ཚད་ནི་གྲྭ་བ་རེ་ཟུང་གི་གྱོང་གུད་དང་གྲྭ་ཚང་རེ་གཉིས་ཀྱི་ལར་ཞེན་ཤོར་བའི་སྣང་ཚུལ་ཞིག་མ་ཡིན་པར་དེ་ནི་ཆོས་སྐྱོང་མི་སྡེ་ཞིག་ཚབས་ཆེ་བའི་ཉམས་རྒུད་འབྲེལ་བར་མ་ཟད། བོད་ཀྱི་རིག་གནས་ཤིག་གི་ཉམས་རྒུད་ཀྱི་གནད་འགག་ཅིག་ལ་ཐུག་ཡོད་པས། གོང་ས་མཆོག་གིས་ཀྱང་དང་ཐོག་གཞན་ཡུལ་དུ་ཕེབས་མ་ཐག་དགོན་པ་དང་སློབ་གྲྭ་འཛུགས་པའི་ལས་གཞི་ཐོག་མར་སྤེལ་བའི་དགོས་མཁོ་ཡང་དེ་ལྟར་རོ།།
ད་ལྟ་དགོན་པའི་གྲྭ་རྒྱུན་ཉམས་ཚད་ཤིན་ཏུ་མགྱོགས་པར་རྒྱུ་རྐྱེན་དུ་མ་ཞིག་མཆིས་ཏེ། གཅིག ཉིས་སྟོང་བརྒྱད་ཀྱི་ལས་འགུལ་དེ་ལས་བྱུང་བའི་རྒྱ་ནག་གི་སྲིད་ཇུས་ཀྱི་ཤུགས་རྐྱེན་དང་། གཉིས། ད་ལྟ་བོད་དུ་ལོག་པའི་ཡིག་ཆ་ཐོབ་སྟེ་སྔར་ལས་མང་དུ་ཕྱིན་པ། གསུམ། ལོ་རེར་དགེ་བཤེས་ཐོན་མཁན་དག་དགོན་སྡེ་རུ་གཏན་བཞུགས་གནང་མཁན་ཉུང་བ། བཞི། དགོན་པའི་སྒྲིག་གཞི་སོགས་དུས་དང་ཅུང་ཟད་མ་མཐུན་པས་གྲྭ་གཞོན་མང་པོའི་འདོད་བློ་དང་མ་འཚམ་པས་ཕྱིར་འབུད་བྱས་པ། ལྔ། ནུབ་ཕྱོགས་སུ་གྲྭ་བ་དག་ཕྱིར་སྐྱོད་བྱེད་མཁན་ཡང་མང་དུ་ཡོད་པ། དྲུག ད་ལྟ་གཞིས་ཆགས་ཁག་ནས་བྱིས་པ་རབ་ཏུ་འབྱུང་མཁན་དཀོན་པ་བཅས་ཕྱི་ནང་གི་རྒྱུ་རྐྱེན་མང་པོ་ཞིག་གིས་ད་ལྟ་དགོན་པའི་དགེ་འདུན་པའི་གྲངས་འབོར་སྔར་ལས་ལྡབ་འགྱུར་གྱི་མར་ཆག་ཅིང་། དེ་བས་ཀྱང་ཆེས་མྱུར་ཚད་རང་བཞིན་གྱི་ཛ་དྲག་གི་ངོ་བོར་འགྱུར་བཞིན་ཡོད། ཡང་འདི་ལས་འགའ་ཤས་ཀྱིས་གྲྭ་བའི་སྤུས་ཚད་གཙོ་བ་ལས་གྲངས་ཚད་མི་གཙོ་བའི་གནས་ལུགས་ལུང་འདྲེས་མ་ཞིག་ཀྱང་བརྗོད་སྲིད་ཀྱང་། ཕྱི་རྗེས་སུ་ལྷག་པའི་ཆེས་ཉུང་བའི་ཁྲོད་དུ་སྤུས་ཚད་དེ་ལས་ཡར་རྒྱས་འགྲོ་རྒྱུ་ནི་ཆེས་འོང་དཀའ་བའི་གནས་སུ་གྱུར་ཡོད། རྩ་འཛུགས་ཤིག་གི་མི་གྲངས་མར་ཆག་པའི་གོ་རིམ་ནི་རྩ་འཛུགས་དེ་ཉིད་ཀྱི་ཁྲོད་དུ་ཡར་རྒྱས་འགྲོ་ཐབས་མེད་པའི་རྒྱུ་རྐྱེན་ཞིག་ཡོད་པ་གཏན་འཁེལ་ཟིན་པས། དེ་ལས་སྤུས་ཚད་ཅིག་གླེང་རྒྱུ་ནི་དེ་བས་ཀྱང་རྒྱང་ཐག་རིང་བའི་སྐད་ཆ་ཞིག་གོ།
ད་ལྟ་བཙན་བྱོལ་གྱི་དགོན་སྡེ་ཁག་གི་གྲྭ་རྒྱུན་ནི་ལ་དྭགས་དང་སྤྱིས་ཏེ། འབྲུག་དང་འབྲས་ལྗོངས། ཁུ་ནུ། བལ་བོ་སོགས་ཀྱིས་བཟུང་ཡོད་ལ། དེ་ཡང་ཤིན་ཏུ་མི་འོས་པ་ཞིག་ཏུ་མི་བསམ་སྟེ། ཆོས་དང་སྐད་ཡིག་སྲུང་སྐྱོབ་ཀྱི་ཁེ་ཕན་ཙམ་དུ་མ་ཟད། རྒྱ་བསྐྱེད་རང་བཞིན་གྱི་ནུས་པ་ཞིག་ཀྱང་མི་མངོན་པར་གནས་ཤིང་རྒྱུ་བར་བྱེད་པས། འགྱུར་ལྡོག་ཁྲོད་ཀྱི་ཆོས་ཉིད་ཀྱི་སྣང་ཚུལ་དེ་ནི་ཤིན་ཏུ་བློར་ཤོང་དཀའ་བའི་གནས་ཚུལ་གང་ཡང་མིན་མོད། ང་ཚོས་ངེས་པར་དུ་བསམ་དགོས་པ་ཞིག་ནི། རང་ཉིད་ཀྱི་གྲྭ་བ་དག་གང་དུ་འཚོ་སྡོད་བྱེད་བཞིན་པ་དང་། གང་ནས་བོར་བརླགས་སུ་ཐེབས་བཞིན་པའི་ཆེས་ཚབས་ཆེ་བའི་གནས་ཚུལ་དང་གནས་ལུགས་དག་བརྩད་གཅོད་དང་ཉམས་ཞིབ་བྱ་རྒྱུ་ནི་དུས་སུ་བབ་པའི་དགོས་མཁོ་འབའ་ཞིག་ཏུ་གཏོགས་སོ།།
ད་ལྟ་ནུབ་ཕྱོགས་ཁག་ཏུ་བོད་ཀྱི་ཆོས་ཚོགས་མང་པོ་ཞིག་བཙུགས་ཡོད་མོད། དེ་དག་གི་གདུལ་བྱ་ཕྱི་རོལ་མགོ་སེར་ཡིན་པ་ལས་ནང་གི་མགོ་ནག་བོད་པ་མིན་པའི་གནད་དོན་དེ་ཡིན་ལ། དེ་ནི་ཆོས་ལུགས་ཀྱང་དཔལ་འབྱོར་གྱི་ཁེ་ཕན་རང་བཞིན་གྱི་རྣམ་པ་ཞིག་ཀྱང་མིན་ནོ་ཞེས་སུས་ཀྱང་ཁ་ཚོན་གཅོད་པའི་གནས་སུ་གྱུར་ལ། དེ་ལྟར་ད་ལྟ་རྒྱ་གར་གྱི་དགོན་སྡེ་ཁག་གི་གྲྭ་བ་ཚོ་ནུབ་ཕྱོགས་སུ་སླེབས་ན་ཡང། སྔར་བཞིན་བལ་ཡུལ་སྣེ་ལེན་ཁང་ནས་གདན་ས་ཁག་ཏུ་མཚན་ཐོ་འགོད་རྐྱང་བྱེད་པའི་རང་དབང་གི་གདམ་གསེས་གུ་ཡངས་པོ་དེ་ཉིད་བོར་བརླགས་སུ་ཤོར་བས། ད་གཟོད་དུས་ཚོད་ཀྱི་སྔ་འཕྱི་ཙམ་ལས་ཁོ་ཚོ་ཡང་གྲྭ་བ་ལོག་དགོས་པ་ནི་འུ་ཐུག་པའི་སྣང་ཚུལ་ཞིག་འབྱུང་བཞིན་ཡོད། འདི་ནི་ཆོས་ཚོགས་དེ་དག་གིས་རང་མི་རིགས་ཀྱི་གྲྭ་བའི་སྡེ་ཞིག་ནུབ་ཕྱོགས་ནས་འཛུགས་པའི་ཁ་ཕྱོགས་མ་བཟུང་བར། དགེ་བཤེས་རེ་ཟུང་ཞིག་བེད་དུ་སྤྱད་དེ་ཕྱི་གླིང་གི་དད་ལྡན་འགུག་པའི་དཔལ་འབྱོར་གྱི་དམིགས་ཡུལ་ཁོ་ན་བཟུང་བས། ད་གཟོད་བོད་ཀྱི་གྲྭ་བ་ནུབ་ཕྱོགས་སུ་འགྲོ་བ་ནི་མི་སྐྱ་ཞིག་གི་གྲངས་ཚད་འཕེལ་བའི་གནས་སྟངས་ཙམ་དུ་འགྱུར་དགོས་པའི་གནས་སྟངས་ལ་ཐུག་པ་རེད། རིང་པོ་མ་སོང་བར་ལྷ་རམས་དགེ་བཤེས་མང་པོ་ཞིག་ཀྱང་འཕྲོ་བརླགས་སུ་མི་འགྲོ་བའི་ངེས་པ་མེད་པ་ནི་ད་ལྟའི་གནས་བབ་ལ་གཞིགས་པས་དཔག་ཐུབ་པ་ཞིག་ཡིན། འདི་ནི་རྣམ་རྟོག་མགོ་སློང་བར་དགའ་བས་མ་ཡིན་པར། གནད་དོན་གྱི་ཟུར་མཐོང་བས་ཡིན། དེས་ན་ད་ལྟ་ནས་ས་དགེ་བཀའ་རྙིང་གཙོ་བྱས་ཏེ། སེ་འབྲས་དགེ་གསུམ་གྱི་དགོན་ལག་ལྟ་བུ་མང་པོ་ཞིག་ཀྱང་ནུབ་གླིང་ནས་གཟུགས་རྒྱུ་ནི་མ་འོངས་པའི་ནང་བསྟན་རིག་གནས་འཛམ་གླིང་རང་བཞིན་བསྒྱུར་བའི་དགོས་མཁོ་ཡིན་ལ། བོད་ཀྱི་བསྟན་འཛིན་སྐྱེས་བུ་དག་གི་ད་ལྟ་ཉག་ཕྲ་བའི་གནས་བབ་དག་སྐྱོབ་པའི་ཐབས་ལམ་ཞིག་ཀྱང་ཡིན་པས། འདི་ནི་དགོན་སྡེའི་བླ་སྤྲུལ་ཚོགས་པ་དང་ལས་ཀྱི་སྣེ་མོ་བ་དག་གིས་ཅིས་ཀྱང་ཐུགས་བསམ་ཁོད་ཆུང་མི་རུང་བའི་དུས་ལ་བབ་པའི་ལས་དོན་ཞིག་ཏུ་སེམས་སོ།།
ད་ལྟ་བཙན་བྱོལ་བོད་པ་དག་ཀྱང་ནུབ་ཕྱོགས་སུ་བཞུད་སྐྱོད་ཀྱི་སྣང་ཚུལ་ནི་ཤིན་ཏུ་འཕེལ་ཚད་མགྱོགས་པའི་རྣམ་པར་གྱུར་བས། ཕྱིས་སུ་བོད་ཀྱི་དགོན་སྡེ་དག་ནི་རང་གི་མི་མང་དང་འབྲེལ་བ་མེད་པའི་གནའ་བོའི་རི་ཁྲོད་བཞིན་ཁེར་རྐྱང་དུ་ལྷག་ཐབས་མེད་པ་ནི་ད་ལྟའི་ཡུལ་དུས་གནས་བབ་གང་གིས་ཀྱང་འགྲེལ་བཤད་མི་དགོས་པའི་ཚད་དུ་ཡོད་པས། བོད་ཀྱི་དགོན་སྡེ་ཡང་རྒྱ་བལ་འབྲུག་གསུམ་ནས་མུ་མཐུད་དུ་བསྐྱར་བཞེངས་དང་རྒྱ་བསྐྱེད་བྱ་རྒྱུ་ནི་མཚམས་བཞག་སྟེ། ནུབ་ཕྱོགས་ནས་བོད་ཀྱི་དགོན་སྡེ་གསར་བ་མང་པོ་གཟུགས་རྒྱུ་ནི་ཆེས་ཁ་ཚ་དགོས་གཏུགས་ཀྱི་སྐབས་སུ་མཆིས། འདི་ལྟར་བརྗོད་པ་ནི་ཆོས་ཀྱི་སྡེ་ཆེན་པོ་དག་ལ་རྨ་འབྱིན་པའམ་འབྲེལ་མེད་ཅིག་ལ་བྱུས་གཏོགས་བྱེད་པ་གང་ཡང་མ་ཡིན་ཏེ། དེ་བས་ཀྱང་བདག་ནུབ་ཕྱོགས་ལ་དགའ་དྲགས་བརྗོད་པར་དེ་བས་ཀྱང་ཐུགས་ལ་འདོགས་མི་རིགས་ཏེ། མི་མང་ནུབ་ཕྱོགས་སུ་སྤོ་བསྐྱོད་ཀྱི་རྣམ་པ་མགྱོགས་དྲག་པ་དང་། ད་ལྟ་དགོན་སྡེ་དག་གི་དགེ་འདུན་པའི་གྲངས་ཚད་མར་ལྟུང་བ་དང་། ལྷག་པར་དུ་བོད་ཀྱི་ཆོས་ལུགས་རིག་གནས་ཀྱི་ཉམས་ཤིང་ཉག་ཕྲ་བའི་གནས་ལུགས་གཞན་ཞིག་མངོན་པར་མཐོང་བར་མ་བཟོད་པས་སྤེལ་བ་ཙམ་དུ་ཟད་ཀྱང། འདི་ལས་ཟུར་གྱིས་ཕོག་པའི་ཉེས་པ་མཆིས་ཚེ་མཐོལ་དུ་བཤགས་པའོ།།
༢༠༡༡ ། ༡༢ ། ༩ ལ་བྲིས།
༼ རྩོམ་པ་པོའི་ཟིན་བྲིས་ལས་བདམས་བཀོད་བྱས། ༽
སྡོམ་པ་ཤོར་མཁན་ཚོས་སྐལ་མེད་སར་སྐེ་མ་སྲིངས།
སྤྱིར་སངས་རྒྱས་ཀྱི་བསྟན་པ་གནས་པ་དང་ལྷག་པར་བོད་གངས་ཅན་གྱི་ལྗོངས་སུ་སངས་རྒྱས་ཀྱི་བསྟན་པ་གནས་དགོས་ན་དེ་གྲྭ་བཙུན་གཅིག་བུ་ཙམ་མ་ཡིན་པར་བོད་མི་རིགས་སྤྱི་ཡོངས་ལ་ཆོས་ཞེས་པའི་གོ་རྟོགས་སྤེལ་རྒྱུ་གལ་ཆེན་རེད། མ་ཟད་ཆོས་ཟེར་པ་ཕྱག་དང་སྐོར་བ་ཁ་ནས་མ་ནི་སྒྲེང་བ་ཙམ་མ་ཡིན་པར་བྱམས་སྙིང་རྗེ་དང་བྱང་ཆུབ་སེམས་སོགས་ངོ་སྤྲོད་གནང་ཐུབ་ལ་འབད་དགོས་པ་རེད་དྲན་སོང་དེ་འདྲ་མ་གནང་པར་གྲྭ་བཙུན་གཅིག་བུ་ལ་ལྟས་དགོས་ན་དེ་ནི་ཁག་པོ་ཡིན་པར་མ་ཟད་གྲངས་ཉུང་མི་རིགས་ཞིག་ལ་མཚོན་ན་གྲྭ་བཙུན་མང་དྲག་ན་དེ་ལ་ཡང་བསམ་བློ་གཏོང་དགོས་པ་ཞིག་རེད་དྲན་སོང་། ༧གོང་ས་མཆོག་དུས་ལྟར་གསུང་བཞིན་ཡོད་པ་ལྟར་གྲྭ་བཙུན་གྱི་མང་ཉུང་ཙམ་མ་ཡིན་པར་གཙང་མ་ཞིག་གལ་ཆེན་མ་ཡིན་ནམ། དེའི་ཕྱོགས་ལ་བོད་མི་སྤྱི་བོ་གནང་བསྟན་ཡོང་ནས་བསམ་བློ་གཏོང་བའི་དུས་ལ་བབ་འདུག
ངས་བལྟས་ན་ཐབས་ལམ་ཡག་ཤོས་ནི་བོད་ཀྱི་དགོན་སྡེ་དག་ཕྱིར་བོད་ནང་དུ་གནས་སྤོར་རྒྱུ་དེ་རེད། དེ་ལྟར་ཐུབ་སོང་ན་གཞི་ནས་ང་ཚོར་བོད་ཀྱི་ནང་ཆོས་ཉམས་མུས་དང་རྒྱུན་འཛིན་པ་སྟོང་རྒྱུའི་སེམས་ཁྲལ་མེད་ལ། ལྷག་པར་དུ་བསླབ་པ་སློབ་གཉེར་གྱི་ཐད་ནས་ཧ་ཅང་གི་སྤུས་དག་དང་ཚད་མཐོན་པོ་ཆགས་རྒྱུ་རེད། རྒྱུ་མཚན་ནི་ཚང་མ་བློ་གཅིག་སེམས་གཅིག་ཆགས་རྒྱུ་ཡིན་པ་དེ་རེད། དེ་མིན་བཙན་བྱོལ་ནང་ལྟ་བུར་མཚོན་ན་ཚང་མ་བློ་ཁ་གཅིག་ཐོག་ཏུ་གནས་ཐུབ་ཀྱི་ཡོད་པ་མ་རེད། ༸གོང་ས་མཆོག་བཞུགས་རིང་ལ་སུ་ལ་ཡང་སེམས་ཁྲལ་མེད་མོད། ཉིན་གཅིག་༸གོང་ས་མཆོག་མ་བཞུགས་པའི་ཉིན་དེ་ནས་ང་ཚོའི་འཚོ་གནས་ནི་ཡ་ང་བའི་གནས་སུ་འགྱུར་རྒྱུ་རེད། དེ་བས་ན་ད་ལྟ་ནས་མི་རྣམས་འགྲོ་ས་རག་ན་འགྲོ་གི་ཡོད་ལ། ཐ་ན་གྲྭ་བ་ཡང་ལོག་གི་ཡོད། གནས་སྟངས་ནི་དེ་ལྟར་རེད། གལ་སྲིད་བོད་ལ་ལོག་ཐུབ་པ་བྱུང་ན་ང་ཚོའི་སུ་ཡིན་རུང་ཉིན་རེར་རྩམ་ནག་ཆུ་ནག་རེ་ཐུན་གཅིག་རེར་མ་གཏོགས་མེད་རུང་ཚེ་གཅིག་པོར་དགོན་པ་དང་ཁ་མི་འབྲལ་བ་ཐག་གིས་གཅོད་ཐུབ།
བོད་ཀྱི་རིགས་གཞུང་དང་ནང་ཆོས་འདི་རྒྱུན་མཐུད་གནས་འདོད་ན། འདོམ་པ་ཞེས་པ་དེ་མེད་པར་མི་སྐྱ་གང་རུང་བཞུགས་ཆོག་པ་ཞིག་བྱུང་ན་ལེགས་ཤོས་རེད། མ་གཞི་ནས་བོད་པའི་དགོན་སྡེ་རྣམས་ཀྱང་འགྱུར་བ་བཏང་དགོས་ངེས་རེད། དེ་ལས་གྲྭ་པ་རྣམས་ཆང་ས་རྒྱབ་ནས་བོད་ཕྲུག་མང་ཙམ་བཟོས་ནས་བོད་དོན་གི་ཆེད་དུ་བྱ་བ་གང་མང་འགྲུབ་ན་ལེགས། དེ་མིན་གྲྭ་རྒྱུན་ལས་ལྷག་པ་བོད་རྒྱུན་ཆད་ཉེན་འདུག།
སྤྱིར་ན་རྒྱལ་བའི་བསྟན་པའི་འཕེལ་འགྲིབ་ཀྱང་རྒྱལ་བ་རང་ཉིད་ཀྱིས་ལུང་དུ་བསྟན་པ་ལྟར་ལས་བཟློག་ཐབས་མེད་འདོད། འོན་ཀྱང་ཐབས་མཁས་ཐུགས་རྗེ་དང་ལྡན་པའི་བྱང་སེམས་རྣམ་པས་བསྟན་འགྲོའི་ཕན་བདེའི་ལམ་བུ་རེ་བཏོད་དང་གཏོད་ཀྱིན་པ་རེད།
ངའི་བསམ་ཚུལ་ལ་ད་ནི་དགོན་པ་སྤུས་དག་མིང་དོན་མཚུངས་པ་ཆུང་ངུ་རེ་གནས་དབེན་པ་རེར་གསར་འདེབས་ཐུབ་ན་དེ་བཟང། དེང་སང་གི་དགོན་པ་མང་ཆེ་བ་གྲོང་པ་དང་འདྲེས་ནས་གྲྭ་ལོག་ཇེ་མང་ལ་འགྲོ་བཞིན་པ་འདི་རེད། དེ་བས་སྒྲུབ་གནས་ཀྱི་དགོན་པ་རེ་གནས་དབེན་པར་ཡོད་ན་ཆོས་རྣལ་མ་རེ་སྒྲུབ་མཁན་ཚོ་དེ་རུ་ཕེབས་ཆོག་གི འཆད་ཉན་གྱི་དགོན་སྡེའི་ནང་ལ་མི་སྐྱ་ཕོ་མོ་ཡང་རིམ་བཞིན་ཡོང་ཆོག་པ་ཞིག་ཆགས་རྒྱུ་རེད། ཡང་མིན་ན་མི་སྐྱ་ཕོ་མོར་ནང་ཆོས་འཆད་ཉན་གྱི་སྡེ་གསར་བ་རེ་འཛུགས་གལ་ཆེ། འདི་ཕྱི་གླིང་དང་གང་དུ་བཙུགས་ཀྱང་འོས།
ནང་ཆོས་གཤའ་མ་རེ་གནང་མཁན་ཚོར་དགོས་ངེས་ཀྱི་མཐུན་རྐྱེན་རེ་སྦྱོར་རྒྱུ་གལ་ཆེ་ལ། ནང་ཆོས་དེ་བསམ་སྤྱོད་ཀྱི་ཤེས་ཡོན་ཞིག་གི་ཚད་གཞི་ནས་སློབ་གྲྭ་སོགས་སུ་ཡང་རྒྱ་ཆེར་སྤེལ་འོས་པར་མཐོང།
མདོར་ན་ཕྱིའི་རྣམ་པ་དང་གྲངས་ཚད་ཉུང་བར་སོང་ཡང་ནང་གི་ཡོན་ཏན་མི་དམན་པ་རེ་གནས་ཐབས་ལ་བརྩོན་པར་རིགས། དེ་མིན་ཕྱི་གླིང་དུ་དགོན་པ་གསར་རྒྱག་གིས་བསྟན་པ་ནུབ་ནས་ནུབ་ཏུ་སྤེལ་ཐུབ་རེ་མཐོང་གིན་མི་འདུག དེང་སང་ཆོས་ཚོགས་མང་པོ་དང་དགོན་པ་ཆུང་ངུ་རེ་གང་སར་འདུག་མོད་ནང་ན་ཉམས་ལེན་གནང་མཁན་ཧ་ཅང་ཉུང་ཉུང་རེད། གལ་ཏེ་ཉམས་ལེན་པ་མང་སོང་ནས་ཤོང་གིན་མེད་པའི་གནས་སྟངས་འདྲ་བོ་ཡོད་ན་རྒྱ་ཆེར་བསྐྱེད་ལོས་འོས། དེང་སང་སྐལ་བ་བཟང་ངན་གང་ཡིན་མི་ཤེས་མོད། ཆོས་སྲིད་གང་སར་ཁ ལག་གཉིས་ཀ་རང་དབང་མེད་པར་ཤོར་འགྲོ་བས་འཁྲུལ་བར་གྱུར་ན་དགེ་བའི་བཤེས་གཉེན་རྣམ་པར་བཟོད་གསོལ་དང་མཐོལ་བཤགས་འབུལ་ལོ།
དང་པོ། ནུབ་གླིང་ཆོས་ཚོགས་ནང་དུ་དཀོན་གཉེར་བོད་པ་རེར་བཙུག་ཨ་ཐུབ་ལྟོས། དེ་ནས་ཆོས་ཚོགས་དེས་བོད་མིར་ཕན་ཐོགས་ཆ་ཚང་མི་ཡོང་བ་མཐོང་ཡོང་། དེ་ནས་བོད་མགོན་བཙུག་དགོས།
བོད་དགོན་དེ་ཡང་དང་པོ་ཁྱིམ་པའམ། དགེ་བསྙེན་ནམ་སྔགས་འཆང་ཁག་གཅིག་གིས་ནང་ཆོས་སློབ་གཉེར་བྱ་ས་གཅིག་དགོས། དེས་ཀྱང་མ་འཚིམ་ན་གཞི་ནས་དགེ་ཚུལ་དང་དགེ་སློང་གི་སྡེ་བཙུག་ཐུབ་ན་རྨང་གཞི་བརྟན་ལ་དགེ་མཚན་ཆེ་བར་མི་འོངས་སམ།
གྲྭ་བ་ཉུང་དུ་འགྲོ་ནའི་གནད་འགག་གཙོ་བོ་ནི. ཕྲུ་གུ་སྐྱེས་ཚད་ཉུང་དྲག་པས་རེད. དེ་ནི་གཙོ་བོ་དཔལ་འབྱོར་དང་ཕ་མ་ས་དཀའ་ལས་རྒྱག་འདོད་མེད་པས་སོ. ཐབས་ལམ་གཅིག་རང་གཅིག་ཡོད་པ་ནི. ཚང་མ་ཆོས་སྒོར་ཞུགས་ནས་ལོ་ངེས་ཅན་ཞིག་ལ་སྡད་རྗེས་སྐྱ་བོ་བྱས་ཆོག་རྒྱུ་དང. དགེ་བཤེས་ཡིན་ན་གྲྭ་བ་ཡིན་དགོས་མེད་པ་བྱེད་རྒྱུ་དེའོ
གྲྭ་ལོག་ཚོས་དགོན་པའི་ནང་ལག་བསྲིང་མ་ཡོང་། ང་ངོ་ཚ་ནས་འབར་ཐལ།
བོད་པ་ཞིག་ཡིན་ན་ནང་བ་ཞིག་ཡིན་པའི་བསམ་ཚུལ་དེ་གླིང་སྡེ་བ་གཉིས་ཀར་ཡོད་པ་རེད། དེ་འདྲའི་རང་རློམ་ཞིག་བོད་པ་ཚོའི་རྒྱུད་ན་ཡང་ཡོད་པ་རེད། འོན་ཀྱང་། ང་ཚོར་དགོན་པ་རེ་ག་ས་གང་དུ་ཡོད་རུང་། བོད་པ་ཚོར་གྲྭ་བཙུན་ཞིག་མིན་པའི་ཕར་ནས་ནང་ཆོས་སྦྱོང་སའི་བསྟི་གནས་དམིགས་བཀར་བ་ཞིག་ད་བར་དུ་མི་འདུག
ད་ནི་བོད་པའི་གྲྭ་བཙུན་ཚོའི་རྒྱུན་ཆད་སོང་ན། མི་རིགས་གཞན་པ་དང་། ཐ་ན་ཕྱི་གླིང་བ་ཡིན་ཡང་གྲྭ་བཙུན་གྱི་རྣམ་པར་ཕེབས་པ་ཡིན་ན་སྒོ་ཕྱེ་རྒྱུ་མ་གཏོགས། བོད་རིགས་མི་སྐྱ་ཕོ་མོ་ཚོར་དགོན་སྡེ་ཁག་གི་སྒོ་མོ་དེ་གསལ་བོ་ཞིག་ཕྱེ་ཡོད་པ་མ་རེད། དེའི་རྐྱེན་གྱིས་ང་ལྟ་བུ་ཞིག་ལ་མཚོན་ན་ཆོ་ག་ཕྱག་ལེན་གྱི་རྒྱུན་སྲོལ་ཙམ་དང་། ཕ་རིང་བུ་བརྒྱུད་ལ་ནང་བ་ཞིག་ཡིན་ཅེས་པ་ཙམ་ལས་ནང་ཆོས་སློབ་གཉེར་གྱི་གོ་སྐབས་ནི་ཤར་མྱོང་མེད། ཁ་སང་དེ་རིང་ནི་ཉམ་རྒུད་ཀྱི་དུས་ཡིན་སྟབས། བསམ་ཚུལ་འདི་ལྟ་བུ་རེ་ཡང་མི་འཁོར་རང་འཁོར་རེད།
ཨ་འཇམ་ལགས་ཀྱི་ཐུགས་ཁྲལ་དང་དེ་སེལ་ཕྱོགས་ཀྱི་ཐབས་ལམ་གཉིས་ཀར་རྒྱུ་མཚན་འདུག ཡིན་ཡང་། ང་རང་གི་ཀླད་པའི་རྒྱ་ཐག་ལ་ཆོས་བརྒྱུད་སོ་སོའི་བུ་དགོན་རེ་ནུབ་ཕྱོགས་ཀྱི་གྲོང་ཁྱེར་རམ་གྲོང་སྡེ་རེ་ནས་འཛུགས་ཐུབ་ན་བསམ་པའི་བློ་ཞིག་འཁོར་མྱོང་མེད། ཐ་ན་ཁོང་གིས་བསམ་ཚུལ་བཏོན་རྗེས་ཀྱང་དེ་ལྟར་བྱུང་ན་ཅི་མ་རུང་སྙམ་པའི་བློ་དེ་འཁོར་གི་མི་འདུག
གཙོ་བོ་དེ། གྲྭ་རྒྱུན་ཆད། དགོན་པ་རྫིག་པོ་དེ་ཚོ་སྟོང་བར་ལུས་འགྲོ་རྒྱུ་དེ་རེད། དེའི་གོ་དོན་ནི་ནང་ཆོས་འདི་ཡང་རང་བཞིན་གྱིས་ཉམ་འགྲོ་རྒྱུ་དེ་རེད། འདི་ལ་ཐབས་ཤེས་རེ་ཡོད་ན་འཐེན་རན་རེད། དཔེར་ན། ནང་ཆོས་འདི་ཆོས་ལུགས་ཙམ་མིན་པར་ཚན་རིག་གི་ངོ་བོར་བཤད་གི་ཡོད་ཚུལ་འདུག དེ་ལྟར་ཡིན་ན། ཚན་རིག་དེ་སྦྱོང་ས་ལ་ཡིན་གཅིག་མིན་གཅིག་དགེ་སློང་ངམ་སེར་མོ་བའི་སྡེ་གཅིག་པུ་འཛུལ་དགོས་པའི་ངེས་པ་ཡོད་ཀྱི་མ་རེད་འདོད། མི་སྐྱ་དང་ཕོ་མོ་གང་ཡིན་ཡང་འཛུལ་ཞུགས་ཀྱིས་སྦྱང་ན་ཕན་ཐོགས་ཡོད་སྲིད་པ་རེད། དེ་ལ་འདུལ་ཁྲིམས་སམ་སྒྲིག་གཞི་གསར་པ་ཡང་བཟོ་མི་ཆོག་པ་ཅི་ཡོད་འདོད། སྲོལ་རྒྱུན་དང་ཀླང་རྙིང་མཁྲེགས་འཛིན་གཉིས་ཀྱི་གོ་དོན་ཡང་ཁ་ཁར་ཕྱེ་སྟེ་ཐབས་དང་ཤེས་རབ་གཉིས་ཀ་སྤྱད་ན་ལམ་ཁ་ནི་ད་དུང་ཡོད་པ་ཙམ་དུ་མ་ཟད། སྔར་ལས་མང་བ་ཡོད་པ་དང་། ནང་ཆོས་འདི་ཡང་སེར་མོ་བའི་སྡེ་གཅིག་པུ་མིན་པར་སྐྱ་སེར་གཉིས་ཀའི་ཐོས་བརྩོན་གྱི་ཡུལ་དུ་འགྱུར་རྒྱུ་རེད་འདོད། ད་དུང་སྤུས་ཀ་ཡང་ཇེ་ལེགས་པ་འགྲོ་སྲིད་པ་རེད། འདི་ནི་རྒྱུས་མེད་རྒྱུས་གཏམ་ལྟ་བུར་གྱུར་ཀྱང་གནས་སྐབས་དེ་ཙམ་ཡིན།
ནམ་རྒྱུན་རྩོམ་ཡིག་ཅིག་དྲ་ཐོག་ལ་སླེབ་ཐེངས་རེར་སོ་སོའི་ཁ་ལག་གཉིས་ཀ་དེར་ཐོན་གི་འཇུག་རྒྱུ་དེ་ངའི་དམིགས་ཡུལ་མིན་ལ། དེར་རྒྱུ་མཚན་ཡང་མི་འདུག ཡིན་ཡང་། ད་སྐབས་ཤར་ནུབ་གང་དུ་བསྡད་རུང་། གནས་ཚུལ་དང་བསམ་ཚུལ་ནི་འབེལ་འབེལ་ལྷུག་ལྷུག་རེད། དེའི་ཁར། མཆན་བུ་འདེབས་ས་དང་འདེབས་མཁན་ཡང་དེ་བཞིན་རེད། སྔར་མེད་པ་ཞིག་ད་ལྟ་ང་ཚོར་ཡོད་པར་གྱུར་བ་ནི་ང་རང་ཚོར་སྐལ་བ་ལྡན་སོང་བའམ། ལས་འགན་འཁྲི་སོང་བ་གང་ལྟར་ཕུན་སུམ་ཚོགས་པ་ཞིག་རེད། དེ་བས་མཚམས་རེར་སོ་སོའི་སྐབས་ཐོག་གི་འཆར་སྣང་མཚོན་པའི་མཆན་བུ་རེ་བཏབ་ན་རང་གི་སེམས་ཀྱི་ཟ་འཕྲུག་དེ་སོད་པའི་ཁར། གཅིག་བྱས་ན་རྩོམ་ཡིག་འབྲི་མཁན་དང་ཀློག་མཁན་ཚང་མར་ཡང་དེ་བཞིན་གྱི་སྤྲོ་བ་ཡོད་པར་འདོད་ནས་འབྲི་གིན་ཡོད།
ཨ་འཇམ་ལགས་ཀྱི་གསུང་ལ་སྤྱིར་བདེན་པ་རེད། འོན་ཀྱང་༧གོང་ས་མཆོག་གི་དུས་རྟག་པར་བཀའ་གནང་གི་ཡོད་པ་ལྟར་སྤྱིར་བོད་ལ་མཚོན་ན་གྲྭ་པ་མང་མེད་ན་ཉུང་མི་འདུག་བསམ་བྱུང་གང་ཡིན་ཟེར་ན་བོད་མི་རིགས་འདི་གྲངས་ཉུང་མི་རིགས་ཤིག་ཡིན་དུས་ད་དུང་མི་སྐྱེ་སྲང་བྱེད་རྒྱུ་གལ་ཆེན་རེད་དྲན་སོང་། མ་ཟད་ད་སྐབས་ཀྱི་གྲྭ་བཙུན་གྱི་གྲངས་ཚད་ལ་ལྟས་པ་ཡིན་མི་རིགས་ལ་ལྟས་ན་མང་མེད་ན་ཉུང་མེད་པས་གནས་སྟངས་ཤིག་རེད། དེ་འདྲ་ཡིན་དུས་མི་རིགས་འདི་ད་དུང་མང་ཐབས་ལ་འབད་དགོས་པ་གལ་ཆེན་མཐོང་།