་་་་་་་་་་་་་་་་་སྲིད་པའི་གཏམ་དུ།
དེང་སང་མི་མང་བོ་ཞིག་གསར་གཏོད་ལ་ཕྱོགས་ཤིང་། གསར་བ་ལ་མོས་པའི་སྐབས་འདི་འདྲ་ཞིག་ལ། གསར་བ་ནི་དུས་རབས་ཉེར་གཅིག་པའི་ཁྲོད་ཀྱི་དགོས་འཁོ་ཡིན་པར་འདོད་ཀྱི་ཡོད། གསར་བ་ནི་འགྲོ་འདུག་བསྡོད་གསུམ། འཆད་རྩོད་རྩོམ་གསུམ། བཤད་གླེང་སྨྲ་གསུམ་གང་དུ་ཡང་མེད་དུ་མི་རུང་བར་འདོད་པའི་མི་སྡེ་ཡི་སྤྱི་ཚོགས་ཤིག་བྱུང་བཞིན་ཡོད། དེ་ཡི་ནང་ནས་ན་གཞོན་དག་གིས་གཅིག་རྗེས་གཉིས་མཐུད་དུ་མི་རབས་གསར་བའི་སྡེ་ཁག་དང་བོ་དང་གཉིས་པ། གསུམ་པ་ནས་བཞི་བ་ནི་ང་ཚོ་ཡིན་ཟེར་ནས་གླེང་བཞིན་མདུན་དུ་འོང་བཞིན་ཡོད། དེ་དག་གི་ཁྲོད་ཀྱི་གཞོན་སྐྱེས་མི་ཉུང་བ་ཞིག་ནི་དངོས་ནས་རིགས་ཀྱི་མདུན་པའི་ཕྱུགས་ཤིང་། སེམས་ཤེས་ཀྱི་གད་རྒྱངས་མཐོ་བའི་གཞོན་ནུ་རེ་ཟུང་ཡོད་ལ། ཁོང་ཚོས་རང་གི་མི་རིགས་ལ་ཞབས་འདེགས་ཀྱང་ཆེས་མི་ཉུང་བ་ཞིག་སྒྲུབ་བཞིན་ཡོད་ལ། སྒྲུབ་པའི་ནུས་པ་དེ་དག་ལ་ཡང་རྗེས་སུ་ཡི་རུང་དང་ངོ་གསོ་ཡར་ལ་བསྟོད། གུས་བརྩི་དང་དགའ་ཞེན་བྱེད་འོས་པ་ཞིག་ཡིན།
ད་ནི་དངོས་ཀྱི་གླེང་གཞི་ཞིག་བཤད་ན། སྤྱི་ཚོགས་ཀྱི་ཟ་ཟུར་གང་ཞིག་ལ་ཡང་སྐྱོན་ཡོད་པ་ནི་སྨྲས་མེད་ཡིན་ལ། བཤད་རྒྱུ་རང་གིས་བྱས་ན། བཤད་མཁན་སྡེ་བ་ཡིན་ཟེར་སྲོལ་ཡོད་པ་ལྟར། ཉེས་པ་ནི་ཉེས་པར་བལྟས་དེ་གླེང་འོས་པ་ཞིག་ལོས་ཡིན། གླེང་དགོས་པ་དེ་ཡང་དོན་དག་དང་རྒྱུ་མཚན་ཡོད་མེད་ལ་བལྟས་དེ་བཤད་དགོས་དུས། ཉེས་པ་དང་སྐྱོན་མཚང་འདྲི་མཁན་དག་གིས་གཙོ་བོ་འགན་དེ་ཉིད་དང་དུ་བླངས་ནས་སྐད་ཆ་བཤད་པ་ནི་དངོས་ནས་འོས་ཤིང་འཚམ་པ་ཡིན། དེང་དུས་སུ་འཕྲུལ་རིགས་ལག་རྩལ་གྱི་བང་རྩལ་མྱུར་བའི་དུས་རབས་འདིའི་ནང་དུ་བོད་མི་དག་གིས་ཀྱང་བྱིས་པའི་གོམ་འགྲོས་བཞིན། འཕྲུལ་རིགས་ཀྱི་བང་ཁར་སྙེགས་ཀྱི་ཡོད་པ་ཡིན་ལ། དེ་ཡི་ཁྲོད་ནས་བཟང་ངན་དང་ཡག་ཉེས། དགེ་སྐྱོན་གླེང་བའི་མི་སྡེ་ཡང་རིམ་གྱིས་བྱུང་བ་རེད། བྱུང་སྟངས་འདི་ལ་བསམ་བློ་ཞིབ་མོ་ཞིག་གཏོང་འོས་པར་འདོད། རང་ཉིད་བསམ་བློ་གཏོང་བའི་ནུས་པ་བླ་ལྷག་མེད་པ་འདྲ་ཡིན་ན། བསམ་བློ་གཏོང་མྱོང་བ་དང་བསམ་བློའི་སྣེ་སྟོན་པ་དག་གིས་བཞག་པའི་ཤུལ་རྗེས་ཀྱི་གསང་འབུམ་ཟབ་མོ་དག་ལས་ཉམ་མྱོང་བསྡུ་ལེན་བྱས་ནས། གཟོད་ནས་དགེ་སྐྱོན་གླེང་བའི་ལམ་དུ་ཞུགས་དགོས་པ་དེ་ཡིན།
བོད་ཀྱི་གཞོན་སྐྱེ་ཡི་སྡེ་ཁག མི་རབས་གསར་བའི་ཁུངས་དུ་ཡོད་མེད་གང་ལྟར་ཡང་། ཟིན་བྲིས་ཀྱི་སྡེ་ནས་རིགས་ཞེན་འདུན་པ་ཟབ་མོའི་སྐད་ཆ་དག་ཤར་མར་འཆད་མཁན་ཞིག་ལ་མཚོན་ན། རིགས་ཞེས་པའི་འགན་དེ་ཉིད་ནི་རང་གི་ཚེ་སྲོག་དང་མངའ་ཐང་ལོངས་སྤྱོད་ལས་ཀྱང་རྩ་ཆེ་བའི་ངེས་ཤེས་དེ་ཉིད་ཅིས་ཀྱང་རྙེད་དགོས་པ་ཡིན། ངེས་ཤེས་དེ་ཉིད་ཡོད་རྗེས་ཀྱི་ཟིན་བྲིས་པ་ཞིག་ལ་མཚོན་ན། རང་གི་མིང་ལ་མི་རབས་གསར་བ་ཞེས་མ་བོས་ཀྱང་། མི་རིགས་ཤིག་གི་ན་གཞོན་གསར་བ་ཡིན་པ་ནི་སྨྲས་མེད་ཡིན། དེ་ནས་བོད་མི་སྤྱི་བོའི་སྡེ་ལ། གནའ་ནས་ད་ལྟའི་བར་དུ་རིགས་གཞུང་གི་ནང་བཅུད་ཉམས་དུ་མ་བཅུགས་པར། ཤུལ་རྗེས་ལ་ཤར་བསྐྱོད་ཀྱིས་དཀའ་ཚེགས་རིམ་རྒྱུད་ཀྱི་ལོ་ཟླའི་ཁྲོད་ནས། བོད་ཀྱི་རིག་གཞུང་གི་བཅུད། སྲོག་གི་རྩ་བ། མི་རིགས་ཀྱི་དོན་སྙིང་ལ་སྲུང་སྐྱོབས་ཀྱི་བྱས་རྗེས་རླབས་པོ་ཆེ་དེ་ཉིད་འཇོག་མཁན་ནི། དུས་དེང་སང་ཡང་སེར་མོ་བའི་སྡེ་ཡིན་དུས། སེར་མོ་བ་ཟེར་ན་ཡོད་ཚད་ནི་གསེར་གྱི་འོད་བཞིན་འཕྲོ་བའི་ཤེས་རབ་ཀྱི་མིག་ཟུང་ཡོད་མཁན་རྐྱང་མིན་ནའང་། མང་ཤོས་ཀྱི་དཀའ་སྤྱད་འབད་འབུངས་ཀྱི་གྲུབ་འབྲས་ཀྱིས་དུས་དེ་རིང་ཡང་བོད་མི་རིགས་ལ་སྟོན་རྒྱུ་ཡོད་པ་དང་། སྒྲུབ་པ་ཉམས་ལེན་བྱས་ན་གྲུབ་འབྲས་ཡོད་པ་ཞིག་ལུས་ཡོད་པ་དེ་ནི། སེར་མོ་བའི་སྡེ་ཡིས་བཟུང་དེ་ཡོད། འདི་ནི་བདག་གི་ཧམ་བཤད་མིན་ལ། མི་རབས་གསར་བའི་གཞོན་ནུ་དག་ལ་ཁྲེལ་དགོད་བྱས་པའང་གཏན་ནས་མིན། འདི་ནི་རང་ཉིད་བོད་ཀྱི་ཟིན་བྲིས་པ་ཕལ་བ་ཞིག་གི་དངོས་ནས་སེམས་ཀྱི་མ་གཟོད་པར་ཤར་མར་ཡི་གེར་བཏགས་པ་དེ་ཙམ་ཡིན།
མཇུག་མཐར་ཚང་མའི་སེམས་སུ་ངེས་དགོས་པ་ཞིག་ལ། ཕྱི་ནང་གང་དུ་ཡང་སེར་མོ་བའི་སྡེ་ཡི་ང་ཚོའི་མི་རིགས་ལ་སྒྲུབ་པའི་དགེ་སྐྱོན་གཉིས་ལས་བསྡུར་བ་ཡིན་ན། དགེ་བའི་ཕྱོགས་མང་བ་ལས་སྐྱོན་གྱི་ཕྱོགས་ཉུང་བ་དང་། བཞག་པའི་བྱས་རྗེས་ཀྱང་འཛམ་གླིང་ན། ཤར་རིའི་རྩེ་ཡི་ཉི་ཟླ་བཞིན་ཤར་ནས་ཡོང་གི་ཡོད་ལ། རང་མི་རིགས་ལ་ཡང་དུས་དེ་རིང་ཡང་རླབས་ཆེ་བའི་བྱ་བཞག་དག་གི་སྣེ་ཁྲིད་མཁན་གྱི་བརྒྱ་ཆའི་མང་ཤོས་ནི་སེར་མོ་བའི་སྡེ་ནས་འོང་གི་ཡོད་པ་དེ་ནི་མིག་མཐོང་ལག་ཟིན་ཡིན་པ་བོད་ལ་ཤ་ཚ་བའི་ཟིན་བྲིས་པ་དག་གིས་ཐུགས་འཇག་འཚལ།
ཁྱེད་ཀྱི་ལྟ་ཚུལ་འདིར་༡༠༠% རྒྱབ་སྐྱོར་ཡོད། བྱིས་པ་དེ་ཚོ་མགྱོགས་པོར་ལག་ཆགས་ནི་རེད།
ཤ་ཁྲག་རུས་གསུམ་ལགས། རོགས་པ་ཞིག་བྱེད་རོགས། དུས་བབས་སྟེང་གི་ས་བྱི་ལོའི་བརྙན་ཕབ་གསར་བ་ཞིག་འབྱོར་ཡོད་པ་དེར་ཐེངས་གཉིས་ལ་དཔྱད་བརྗོད་སྤེལ་ནས་ཉིན་ཧྲིལ་བོ་ཞིག་འགོར་ཡང་འཆར་རྒྱུ་མཐོང་རྒྱུ་མི་འདུག། ངའི་ཚབ་ཏུ་ཁྱེད་ཀྱིས་དུས་བབས་ཚང་ལ་ཁ་ངོ་ཞིག་སློང་རོགས། དུས་བབས་ཚང་གི་ལས་བྱེད་ཚོས་དུས་འཁོར་རྩ་བརྒྱུད་ཀྱི་གསང་བ་ཉམས་ལེན་བྱས་ནས་ཁོམ་གི་ཡོད་ས་མ་རེད། ཐུགས་རྗེ་ཆེ།
འདི་ནི་ངོ་མ་རིགས་པ་བཞི་དང་རྟོན་པ་བཞིས་བརྟག་ཤིང་དཔྱད་པའི་མཁས་པའི་གསུང་ལྟ་བུ་ཞིག་བྲིས་འདུག་པས་བསྔགས་བརྗོད་ཡོད།
དབྱུག་པ་བཟུང་ན་ཁྱི་མི་དགའ། ཨེ་རེད།
བརྒྱ་ཆ་བརྒྱ་ཐམ་པ་རྒྱབ་སྐྱོར་ཡོད། དེ་ག་རང་རེད་ཟེར་རྒྱུ་ཡིན། འོ་་་ ཕྱོགས་ཞེན་བྱས་པ་མིན་གོ