དེ་རིང་ཞོགས་པར་ངྷ་ས་དགུ་བཅུ་གསུམ་ལས་འགུལ་ཚོགས་པའི་ཚོགས་ཁང་དུ། ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་ཁོང་དང་བཙོན་རོགས་ཚོའི་དཀའ་སྡུག་གི་བྱུང་པ་བརྗོད་པའི་བརྙན་སྡེར་ ༼བཙོན་པ་དང་ངའི་དྲན་འཆར༽ ཞེས་པ་ཞིག་དབུ་འབྱེད་བྱས་སོང་།
གློག་བརྙན་འདི་དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཀརྨ་ཡེ་ཤེས་ལགས་དང་ཆབ་སྲིད་བཙོན་ཟུར་དང་སྤྱི་འཐུས་སྒྲོལ་དཀར་སྐྱབས་གཉིས་ཕེབས་འདུག་ལ། གློག་བརྙན་དེའི་བཙོན་ཟུར་ནང་ལྷ་མོ་སྐྱབས་ཁོང་གི་མྱོང་ཚོར་དང་། ལྷ་སའི་ཆུ་ཤར་བཙོན་ཁང་སྐོར། ཁོང་བཙོན་འོག་ཏུ་ཡོད་སྐབས་ཐུགས་འཕྲད་བྱུང་པའི་ཆབ་སྲིད་བཙོན་པ་ ༣༠ ལྷག་གི་གནས་སྟངས། ཁོང་བཙོན་ཁང་ནས་ཕྱིར་ཐོན་རྗེས་རྒྱ་གར་དུ་ཡོང་སྟེ་མུ་མཐུད་ལས་འགུལ་རིགས་སྤེལ་བ་བཅས་རིང་ཚད་ཆུ་ཚོད་ཕྱེད་ཀ་ཙམ་འདུག
བརྙན་སྡེར་བཟོ་སྒྲིག་པ་ལྷ་མོ་སྐྱབས་ལགས་ཀྱིས་ཐེངས་འདིའི་བརྙན་སྡེར་བཟོ་འགྲེམ་གྱི་དགོས་དོན་ངོ་སྤྲོད་གནང་དོན་ལྟར་ན། གཅིག་ནས་རྒྱའི་བཙོན་འོག་ན་བོད་ཀྱི་ཆབ་སྲིད་བཙོན་པ་རྣམས་ཀྱིས་མནར་གཅོད་ཇི་ལྟར་མྱོང་གི་ཡོད་པའི་དངོས་ཡོད་གནས་ཚུལ་རྒྱལ་སྤྱིར་ཤེས་རྟོགས་ཡོང་ཆེད་དང་། གཉིས་ནས་རྒྱལ་སྤྱིའི་རང་དབང་སྡེ་ཚན་དང་དྲང་བདེན་ལ་རྒྱབ་སྐྱོར་བྱེད་མཁན་ཚོ་བརྒྱུད་དཀའ་སྡུག་མྱོང་བཞིན་པའི་བོད་ཀྱི་ཆབ་སྲེད་བཙོན་པ་ཚོ་མགྱོགས་མྱུར་ཀློད་གྲོལ་གྲོལ་ཡོང་ཐབས། གསུམ་ནས་རང་ཉིད་ཆབ་སྲིད་བཙོན་ཟུར་ཞིག་ཡིན་པའི་འགན་ཁུར་བཅས་ཀྱི་ཐད་ནས་བརྙན་སྡེར་འདི་བཟོ་འགྲེམས་བྱས་པ་ཞིག་ཡིན་འདུག
སྤྱི་འཐུས་ཀརྨ་ཡེ་ཤེས་ལགས་ཀྱིས་ཁོང་ལ་བསྔགས་བརྗོད་དང་འབྲེལ། བརྙན་སྡེར་འདིས་བོད་ཀྱི་ཆབ་སྲིད་བཙོན་པའི་གནས་བབ་རྒྱལ་སྤྱིར་དྲིལ་བསྒྲགས་བྱ་ཐུབ་པ་ཙམ་མ་ཟད། ཁོང་རང་ཉིད་ལྟ་བུའི་བཙན་བྱོལ་དུ་སྐྱེས་ཤིང་བོད་མིག་གིས་མཐོང་མྱོང་མེད་མཁན་ཚོར་ཡང་། སེམས་ཚོར་དང་བོད་ཀྱི་ཆབ་སྲིད་བཙོན་པའི་གནས་སྟངས་སྐོར་ལ་ཤེས་རྟོགས་དང་རྒྱུས་ལོན་ཡོང་རྒྱུར་ཕན་རླབས་ཆེན་པོ་འབྱུང་ངེས་པ་དང་། བརྙན་སྡེར་འདིར་དབྱིན་ཡིག་དང་རྒྱ་ཡིག་གི་འགྲེལ་བཤད་ཀྱང་འགོད་ཐུབ་ན་རྒྱལ་སྤྱིའི་ནང་དྲིལ་བསྒྲགས་འགྲོ་རྒྱུར་ཕན་ཐོགས་འབྱུང་ངེས་སྐོར་གསུངས་སོང་ལ། དེ་བཞིན་བོད་མི་རྣམས་བཙན་བྱོལ་དུ་ཡོང་དགོས་དོན་ནི་ཕྱིའི་ལུང་པ་ནས་གཏན་སྡོད་བྱ་རྒྱུ་དང་བཙན་བྱོལ་སྒྲིག་འཛུགས་ཚགས་ཚུད་གཏོང་ཆེད་མིན་པར་བོད་ལ་འཕྲད་བཞིན་པའི་ཆབ་སྲིད་ཀྱི་དཀའ་རྙོག་སེལ་ཆེད་ཡིན་སྟབས། ཆབ་སྲིད་བཙོན་པ་ཚོ་དང་མི་མང་ཚང་མས་བོད་ཀྱི་ཆབ་སྲིད་ཀྱི་དཀའ་ངལ་སེལ་རྒྱུར་འབད་བརྩོན་བྱ་དགོས་སྐོར་བརྗོད་སོང་།
སྤྱི་འཐུས་སྒྲོལ་དཀར་སྐྱབས་ལགས་ཀྱིས་བོད་ཀྱི་ཆབ་སྲིད་བཙོན་པ་རྣམས་རྒྱའི་བཙོན་འོག་ནས་ཕྱིར་ཐོན་པ་ཙམ་གྱིས་ལས་དོན་ཆ་ཚང་བསྒྲུབས་ཟིན་པ་ཞིག་མིན་པར། རྒྱུའི་བཙོན་ཁང་ནས་ཕྱིར་ཐོན་ཡང་བོད་ཀྱི་ལས་དབང་ལ་མུ་མཐུད་འགན་འཁུར་དགོས་པ་དང་། བོད་ཀྱི་རྩ་དོན་དང་འབྲེལ་པའི་གནས་ཚུལ་རྣམས་ཁ་ཕྱོགས་མ་ནོར་པའི་ཐོག་ནས་རྒྱལ་སྤྱིའི་སྡིངས་ཆའི་སྟེང་བསྐྱལ་ཐུབ་དགོས་པ། ལྷ་མོ་སྐྱབས་ཀྱིས་ལོ་ ༢ ལྷག་ཙམ་རིང་རང་འགན་རང་ཁུར་གྱིས་དཀའ་ལས་བརྒྱབ་སྟེ། ཁོང་ལ་རྒྱུས་མངའ་ཡོད་པ་དང་ཤེས་རྟོགས་ཡོད་པའི་ཆབ་སྲིད་བཙོན་པ་ཚོའི་གནས་སྟངས་སྐོར་ངོ་སྤྲོད་གནང་བ་ནི་ལས་དོན་ལ་འགན་ཁུར་པ་ཞིག་ཡིན་པར་བརྗོད་སོང་།
ལྷ་མོ་སྐྱབས་ལགས་ཀྱིས་ཁོང་བཙོན་དུ་ཚུད་པ་དང་ད་ཆར་ “བཙོན་པ་དང་ངའི་དྲན་འཆར” ཞེས་པའི་བརྙན་སྡེར་བཟོ་འགྲེམས་སྐོར་ནས་བརྗོད་དོན།་“ང་ནི་རྨ་ཆུའི་འབྲོག་ཁྱིམ་ཞིག་ནས་སྐྱེས་ཤིང་། ༢༠༠༣ ལོར་༧གོང་ས་མཆོག་ལ་མཇལ་ཕྱིར་རྒྱ་གར་དུ་ཡོང་། སྐབས་དེར་རང་ཉིད་འབྲོག་པ་ཞིག་དང་སློབ་སྦྱོང་མེད་མཁན་ཞིག་ཡིན་བསམ་ནས་བསྡད་ན་འགྲིག་གི་མི་འདུག་བསམ་པའི་སེམས་ཚོར་ཆེན་པོ་ཞིག་བྱུང་སྟེ། ཤི་རུང་འགྱོད་པ་མེད་པའི་སེམས་ཐག་གཙང་བཅད་ཀྱིས་ ༢༠༠༦ ལོར་བོད་ཀྱི་རྒྱལ་དར་ཁྱེར་ནས་ཕྱིར་ཕ་ཡུལ་དུ་ལས་དོན་བསྒྲུབ་པར་ལོག་པ་ཡིན། འོན་ཀྱང་། ལྷ་སར་བསླེབས་པ་ནས་རྒྱ་གཞུང་གིས་ཤེས་ཏེ་གསང་ཉུལ་པའི་ངའི་རྗེས་འདེད་བྱས་པ་དང་། མཐར་ ༢༠༠༦ ཟླ་ ༥ ཚེས་ ༡༣ ཉིན་འཛིན་བཟུང་བྱས་སོང་། ལོ་ ༣ རིང་བཙོན་འཇུག་གིས་ཀློད་གྲོལ་བྱུང་རྗེས་བསྐྱར་དུ་ཐེངས་གཉིས་ཙམ་བཀག་ཉར་བྱས་སྟབས་འདུག་མ་ཐུབ་པར་རྒྱ་གར་དུ་ཡོང་དགོས་བྱུང་། ད་ལྟ་གཟུགས་པོར་སྨན་བཅོས་ཀྱི་ཞོར་དུ་དགུ་བཅུ་གསུམ་གྱི་འཛིན་གྲྭར་འགྲོ་བཞིན་ཡོད། བརྙན་སྡེར་འདི་ནི་གཙོ་བོ་བོད་ནང་གི་ཆབ་སྲིད་བཙོན་པ་ཚོའི་གནས་སྟངས་ལ་ཤེས་རྟོགས་དང་། ཚང་མ་བོད་ཀྱི་རྩ་དོན་ཐོག་འགན་ཁུར་མཉམ་ཞུགས་ཡོང་རྒྱུ། རྒྱལ་སྤྱིའི་བོད་དོན་རྒྱལ་སྐྱོར་པ་དག་དང་འཛམ་གླིང་མི་མང་གིས་བོད་དོན་ལ་རྒྱལ་སྐྱོར་དང་རྒྱ་ནག་ལ་གནོན་ཤུགས་སྤྲོད་རྒྱུར་ནུས་ཤུགས་འདོན་རྒྱུ་བཅས་ལ་རེ་བ་བཅིངས་ཏེ་བཟོས་པ་ཡིན” ཞེས་བརྗོད་བྱུང་།
གསར་འགོད་པ། བནྡེ་སྐྱབས།
ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱི་བོད་མི་རིགས་ཀྱི་བདེན་དོན་ཁྱེད་མི་ལོ་གསུང་རིང་བཙན་ནས་དཀའ་སྡུག་མནར་གཅོད་མྱངས་བར་གདུང་སམས་མཉམ་སྐྱེད་ཡོད། མ་ཟད་རིང་ཉིན་གྱི་བདེ་སྡུག་ལ་མ་ལྟས་པར་མི་རིགས་ཤིག་གི་ཁྱེད་དེ་འདྲ་ལས་འགུལ་གནང་པ་ཡི་རང་དང་གུས་འདུག་ཡོད། ད་དུང་མུ་མཐུད་དུ་བོད་ལ་རང་དབང་མ་ཐོབ་པར་ལས་འགུལ་གང་མང་ནང་མཉམ་བཞུགས་གནང་བའི་རེ་བ་བཅས།
གུས་འདུད་ཡི་རངས་ཡོད།
ཕྱིར་བོད་ལ་ལས་འགུལ་སྤེལ་དུ་ཕྱིན་ཞིང་བཙོན་དུ་ཚུད། ཡང་བསྐྱར་ཚུར་སླེབས་ཐུབ་པ་དང་ད་དུང་མུ་མཐུད་དེ་ཆབ་སྲིད་ཀྱི་འཐབ་རྩོད་བྱས་ནས་རང་འགན་ལེགས་པར་སྒྲུབ་ཚུལ་འདི་འདྲ་ཧ་ཅང་ཉུང་ཉུང་ཡིན་སྙམ། དེ་བས་ཡི་རང་དང་བསྔགས་བརྗོད་ཞུའོ།
ཆབ་སྲིད་བཙོན་ཟུར་རྣམས་ལ་གུས་འདུད་དང་། ཁྱེད་ཅག་གིས་རྒྱའི་བཙོན་འོག་ཏུ་དཀའ་སྡུག་མྱངས་པར་གདུང་སེམས་མཉམ་སྐྱེད་ཡོད་ཞུ་རྒྱུ་ཡིན། འོན་ཀྱང་། སོ་སོས་དཀའ་སྡུག་ག་ཚོད་མྱངས་པའི་ཐོག་མའི་དམིགས་ཡུལ་དང་བར་གྱི་བརྒྱུད་རིམ། མཐའ་མའི་གནས་སྟངས་སོགས་ལ་ཡག་པོ་དགོངས་པ་བཞེས་རོགས་གནོངས་ཞུ་རྒྱུ་ཡིན། ལྷག་པར་དུ་རྒྱའི་བཙོན་འོག་ཏུ་ཚུད་པ་ཙམ་གྱིས་ཆབ་སྲིད་ལ་མ་བསྒྱུར་རོགས། ས་བསྒྲགས་གནམ་བསྒྲགས་མ་གནང་རོགས། བདེན་པའི་གནས་ཚུལ་དྲང་བཤད་དང་། དངོས་ཡོད་གནས་སྟངས་གསལ་བཤད་གནང་རོགས་གནོངས་ཞུ་རྒྱུ་ཡིན།
བཙོན་ཟུར་ལྷ་མོ་སྐྱབས་ལགས་སུ་ང་ལ་རྒྱུས་མངའ་གང་འཚམ་ཡོད་ལ། ལྷག་པར་དུ་ནོར་གླིང་མཐོ་སློབ་ཀྱི་འགན་འཛིན་བོད་མི་མང་སྤྱི་འཐུས་གསར་པ་སྒྲོལ་དཀར་སྐྱབས་ལགས་སུ་དེ་བས་ཀྱང་རྒྱུས་མངའ་ཡོད། ཁོང་ཡང་སྔོན་མ་རྒྱའི་བཙོན་འོག་ཏུ་སོང་སྟེ་རྒྱ་གར་ལ་བཙན་བྱོལ་དུ་འབྱོར་རྗེས་བཙོན་ནང་གི་གནས་ཚུལ་སྐོར་ལ་དེབ་ཅིག་བྲིས་ཡོད། དེབ་དེ་ངས་བཀླགས་མྱོང་ཡོད། ད་ལོར་ཁོང་ཆབ་སྲིད་བཙོན་པའི་གྲས་སུ་ཨོ་སི་ཊོ་ལེ་ཡར་བརྒྱན་བབས་ཏེ། མི་འགྱངས་བར་ཨོ་སི་ཊི་ལེ་ཡར་ཆིབས་འཐོན་གནང་རྒྱུ་རེད།