ཕར་གནོད་འཚེ་བྱ་རྒྱུའི་ཚབ་ལ་སོ་སོ་མེར་སྒྲོན་པ་རེད།

སྐུ་ཞབས་སྤེ་ཊིར་ལགས་ཀྱིས་བརྗོད་པ་ལྟར་ན། ཁོང་ཐོག་མར་ངྷ་སར་འབྱོར་སྐབས་བོད་མི་རྣམས་སྤྱི་ཚོགས་རྙིང་པའི་མི་རྐྱང་རྐྱང་ཡིན་ཡང་། གཞན་རྟེན་གྱི་བསམ་བློ་དེ་ཙམ་མེད་པར་རང་གི་རྐང་པའི་སྒང་ལ་ལངས་ཏེ་རང་ཁ་རང་གསོ་བྱ་རྒྱུའི་སྤོབས་པ་དང་། རྒྱ་ནག་ལ་ཁ་གཏད་གཅོག་རྒྱུའི་སེམས་ཤུགས་ཧ་ཅང་ཆེན་པོ་ཡོད་པ་རེད་ཟེར།

སྤི་ཊིར་ལགས་ཀྱིས་བརྗོད་ན། བོད་པའི་སྤྱི་ཚོགས་ནང་སྐུ་དྲག་ཚོར་ལྟ་སྟངས་ཡག་པོ་མེད་ཀྱང་། སྐུ་དྲག་རེ་ཟུང་གིས་སྒེར་དོན་བསྒྲུབས་ཏེ་སྤྱི་དོན་སྣང་མེད་བཞག་པ་ཁོ་རང་གིས་མཐོང་ཐོས་ཡོད་ཀྱང་། སྤྱི་ཡོངས་ནས་བཤད་ན་སྐུ་དྲག་ཚོ་ཧ་ཅང་རྒྱལ་ཞེན་ཆེན་པོ་དང་། སློབ་སྦྱོང་དང་ཉམས་མྱོང་སོགས་གང་ཅིའི་ཐད་ནས་མི་དམངས་དཀྱུས་མ་ལས་ཡག་པོ་ཡོད་སྟབས། རྒྱལ་ཁབ་དང་མི་རིགས་ལ་བྱས་རྗེས་ཆེན་པོ་ཡོད་པ་དང་། བཙན་བྱོལ་སྤྱི་ཚོགས་གསར་འཛུགས་དང་སྲ་བརྟན་ཐོག་དཀའ་ལས་མང་པོ་བརྒྱབ་ཡོད་སྐོར་བརྗོད་བྱུང་། 

ཡང་ཁོང་གིས་བོད་མིའི་གཤིས་ཀའི་སྐོར་བརྗོད་དོན། “ ལོ་ ༣༠ ཡས་མས་གོང་བོད་པ་ཟེར་ན་ཡིད་ཆེས་བློས་འགེལ་ཆོག་པ་ཞིག་ཡིན་ཡང་། དེང་སྐབས་བོད་མིར་ཡིད་ཆེས་བྱེད་ཁག་པོ་ཆགས་འདུག དེ་བས་རྒྱ་གར་བ་ཚོ་ཅུང་ཡག་པ་འདུག བོད་པ་ཚོར་མི་རིགས་གཞན་དང་མ་འདྲ་པའི་ཁྱད་ཆོས་ཤིག་ཡོད་པ་ནི། ཕྱི་ལོགས་ཀྱི་རྣམ་འགྱུར་སྟོན་སྟངས་དེ་རེད། མི་སུ་ཞིག་ཡིན་ཡང་གདོང་མཐོང་ཡོང་སྐབས་འཛུམ་མུལ་མུལ་དང་གད་མོ་སིལ་སིལ། སེམས་འཁྲལ་ཉུང་པ་འདྲ་བོ་དང་། རྙོག་དྲ་མི་སློང་མཁན་འདྲ་བོ་ཡིན་ཡང་། ནང་ལོགས་ན་དེ་འདྲ་ཡོད་པ་མ་རེད། དེ་ངས་ཧ་གོ་ཡི་ཡོད” ཟེར།

བོད་པའི་ཆབ་སྲིད་ཀྱི་ལངས་ཕྱོགས་ཐད། ཐོག་མ་བཙན་བྱོལ་གཞུང་དམངས་ཡོངས་ཀྱིས་བོད་རང་བཙན་ཁོ་ནའི་ཐོག་ཤུགས་བརྒྱབ་ཡོད་ཀྱང་། སི་ཌ་སུ་སྦག་གི་ཞི་བའི་གྲོས་འཆར་དོན་ཚན་ལྔ་ཟེར་བ་ཞིག་བཏོན་རྗེས་དབུ་མའི་ལམ་བྱུང་བ་དང་། བསམ་བློ་ཡག་པོ་བཏང་ན་དབུ་མའི་ལམ་བྱུང་རྗེས་ཆབ་སྲིད་ཤོག་ཁག་གཉིས་སུ་གྱེས་ཏེ། བོད་པའི་སྤྱི་ཚོགས་འདི་ཏོག་ཙམ་ཁ་འཐོར་དུ་ཕྱིན་ཡོད་པ་དང་། ཤེས་ཡོན་ཅན་དང་རང་བཙན་འཐབ་རྩོད་པ་མང་པོ་ཞིག་རྒྱ་མིའི་འོག་འགྲོ་འདོད་མེད་ཀྱང་༧གོང་ས་མཆོག་གི་སྲིད་བྱུས་ལ་ངོ་རྒོལ་བྱ་མ་ཕོད་པར་རྒྱ་གར་ནས་འདུག་འདོད་མེད་པར་ཕྱི་རྒྱལ་ཁག་ཏུ་ཕྱིན་ཡོད་པ་རེད་ཟེར།

ཡང་ཁོས་༧གོང་ས་མཆོག་གིས་མུ་མཐུད་བོད་པའི་ཆབ་སྲིད་ཀྱི་ཐུགས་འགན་འཁྱེར་བ་ཡིན་ན། གཞུང་གི་སྲིད་བྱུས་ཐོག་བསམ་ཚུལ་འདོན་མཁན་དང་སྐྱོན་བརྗོད་བྱེད་མཁན་མེད་པ། གལ་སྲིད་གཞུང་དང་གཞུང་གི་སྲིད་བྱུས་ཐོག་བསམ་ཚུལ་བཤད་ན་༧གོང་ས་མཆོག་ལ་ཐུག་ཡོང་གི་ཡོད་པ་དང་། སྤྱི་ཚོགས་ནང་གནོན་ཤུགས་ཡོང་སྲིད་པའི་དོགས་གཞིའི་འོག་དམངས་གཙོའི་བཀག་རྒྱ་ཡིན་སྐོར་བརྗོད་བྱུང་།  

ཁོང་གི་བསམ་ཚུལ་དུ། ༧གོང་ས་མཆོག་གི་དགོངས་པར་ད་ལྟ་བར་ཐབས་ཤེས་མང་པོ་བྱས་ཀྱང་གྲུབ་འབྲས་མ་ཐོན་པས། ད་མང་ཚོགས་ལ་སྲིད་དབང་རྩིས་སྤྲོད་བྱས་ན་ནུས་པ་འདྲ་འདོན་ཐུབ་ན་དགོངས་ཀྱི་མེད་འགྲོ་དྲན་གྱི་འདུག་ཟེར། མ་གཞི་ཁོ་རང་༧གོང་ས་མཆོག་ལ་ཧ་ཅང་དགའ་བོ་ཡོད་ཀྱང་། དབུ་མའི་ལམ་ལ་ཡིད་ཆེས་མེད། ༧གོང་ས་མཆོག་ལ་དགོངས་པ་གུ་ཡངས་པོ་ཡོད་ཀྱང་རྒྱ་ནག་གཞུང་ལ་བསལ་བློ་དེ་འདྲ་མེད་པ་མ་ཟད། རྒྱ་ནག་གུང་ཁྲན་མ་འཐོར་བར་དུ་ཡིད་ཆེས་བྱ་རུང་བ་ཞིག་ཀྱང་མིན། གྲོས་མཐུན་དོན་ཚན་ ༡༧ ནས་མགོ་བརྩམས་ཏེ་ཁ་ནས་ཅིག་བཤད་ཀྱི་ཡོད་ཀྱང་ལས་ཀ་གཞན་པ་ཞིག་བྱས་ཏེ། སྣུམ་གྱིས་ཤོག་བུ་ཟ་བ་ནང་བཞིན་ཆགས་ཡོང་གི་ཡོད་པ་རེད་ཟེར།

ཡང་ཁོང་གིས་བོད་པ་ཚོས་རང་བཙན་ཁོ་ནའི་ཐོག་ཤུགས་རྒྱག་དགོས་པ་དང་། ལངས་ཕྱོགས་དེ་བརྟན་པོར་བཟུང་ན་བརྒྱ་ཆའི་བརྒྱ་རག་དཀའ་ཡང་གང་འཚམ་ཞིག་རག་རྒྱུར་རེ་བ་ཡོད་ལ། རེ་ཟུང་གིས་རང་བཙན་བརྩད་ན་རྒྱལ་སྤྱིའི་རྒྱབ་སྐྱོར་རག་གི་མ་རེད་ཟེར་བ་ནི་རི་བོང་གནམ་རྡིབ་ཀྱི་སེམས་འཁྲལ་ཡིན་པ་དང་། བོད་པ་ཚོ་བཙན་བྱོལ་དུ་འབྱོར་རྗེས་ལོ་མང་རིང་རང་བཙན་བརྩད་བསྡད་ཀྱང་། རོགས་རམ་བྱེད་འདོད་མཁན་ཚོས་མུ་མཐུད་བྱས་བ། ད་ཆར་དབུ་མའི་ལམ་དུ་ཕྱིན་རྗེས་རྒྱབ་སྐྱོར་རོགས་རམ་ཉུང་དུ་སོང་མེད་ན་མང་དུ་ཕྱིན་མེད་པ་མ་ཟད། རྒྱལ་སྤྱིའི་སྲིད་གཞུང་ཁག་གིས་བཙན་བྱོལ་གཞུང་ངོས་ལེན་མེད་པ་གཅིག་མཚུངས་ཡིན་པ། སྔོན་ཆད་རང་བཙན་ཐོག་མུ་མཐུད་བསྐྱོད་ཐུབ་ཡོད་ན། རྒྱལ་སྤྱིའི་རྒྱབ་སྐྱོར་ད་ལྟ་ལས་ཡག་ཙམ་ཡིན་སྲིད། དེ་ནི་ཨ་རི་སོགས་རྒྱལ་ཁབ་མང་པོ་ཞིག་གིས་རྒྱ་ནག་ལ་ན་ཟུག་བཟོ་རྒྱུའི་གོ་སྐབས་འཚོལ་གྱི་ཡོད་པ་དང་། རྒྱལ་ཁབ་ཁག་གི་སྲིད་འཛིན་དང་སྲིད་བློན་ཚོས་བོད་པར་རྒྱབ་སྐྱོར་བྱེད་མིན་དེ་ཁོ་རང་ཚོ་སྒེར་ལ་དབང་ཆ་ཡོད་པ་ཞིག་མིན་པར། མི་མང་དང་གྲོས་ཚོགས་ཀྱི་དགོངས་པར་བསྟུན་དགོས་ཚུལ་སོགས་བརྗོད་བྱུང་། 

ཡང་ཁོང་གིས་བོད་པའི་འཐབ་རྩོད་སྐོར་ལ། རྒྱ་ནག་གིས་ག་ཚོད་མནན་ཡང་བོད་པ་ཚོ་དེ་ཙམ་གྱིས་ཆིག་སྒྲིལ་ཆེ་རུ་འགྲོ་བཞིན་ཡོད་པ་དང་། ༢༠༠༨ ལོའི་ཞི་རྒོལ་ཆེན་མོ་དང་དེང་སྐབས་རང་ལུས་མེར་བསྲེགས་གཏོང་གི་ཡོད་པ་བཅས་ལ་བལྟས་ཡོང་ན་བོད་མི་རིགས་འདི་མི་རིགས་རང་འགའ་བ་ཞིག་མིན་པ་ཤེས་ཐུབ་ཅིང་། ད་ལྟ་བོད་ནང་གཅིག་འཕྲོར་གཅིག་བསྟུད་ཀྱིས་རང་ལུས་མེར་བསྲེགས་གཏོང་གི་ཡོད་པ་དེས་བོད་དོན་རྒྱལ་སྤྱིའི་ཐོག་ཁྱབ་བསྒྲགས་ཤུགས་ཆེན་པོ་འགྲོ་བ་མ་ཟད། བོད་ཕྱི་ནང་གི་བོད་མི་ཚོར་སེམས་ཤུགས་སྤར་ཡོང་གི་ཡོད་སྟབས། ཁོང་ཅག་ལ་མྱ་ངན་གུས་འདུད་ཞུ་རྒྱུ་དང་། ད་དུང་དེ་འདྲའི་ལས་འགུལ་རིགས་གང་མང་བྱུང་ཐུབ་ན་གནད་དོན་ཞིག་ཐག་གཅོད་བྱ་རྒྱུར་ཕྱོགས་ཡོངས་ནས་ཐག་ཉེ་རུ་འགྲོ་བཞིན་ཡོད་སྐོར་སོགས་བརྗོད་བྱུང་། དོན་དངོས་ཐོག་རྒྱ་གཞུང་གིས་བོད་མི་ཚོ་འུ་ཐུག་ཐབས་ཟད་ཀྱི་གནས་སུ་བསྐྱལ་ཡོད་སྟབས། ཁོ་རང་ལ་མཚོན་ན་ཕར་རྒྱ་མི་གཅིག་གཉིས་ག་ཚོད་གསོད་ཐུབ་ཀྱང་གསོད་རྐྱང་བྱ་ངེས་ཡིན་ཡང་། བོད་པའི་གྲྭ་བ་ཨ་ནེ་ཚོར་མཚོན་ན་གཅིག་ནས་གྲྭ་བཙུན་ཡིན་པ་དང་། གཉིས་ནས་༧གོང་ས་མཆོག་གི་བཀའ་སློབ་ལ་ཉན་དགོས་པས། ཕར་གནོད་འཚེ་བྱ་རྒྱུའི་ཚབ་ལ་སོ་སོ་མེར་བསྒྲོན་པ་རེད་ཟེར།

ཁོང་གིས་རྒྱ་ནག་གི་སྐོར་ལ་འདི་ལྟར་བརྗོད་བྱུང་། རྒྱ་ནག་གུང་ཁྲན་གཞུང་སྔ་ཕྱི་མ་གཏོགས་འཐོར་ཞིག་ཏུ་འགྲོ་ངེས་ཡིན་ཡང་། ལས་སླ་བོར་མགོ་རྟིང་སློག་ཐུབ་ཀྱི་མེད་པ་དེ་གཙོ་བོ་རྒྱ་ནག་གཞུང་གི་དཔོན་རིགས་དེ་ཚོ་མི་གཅིག་མིན་པར་འགྱུར་པ་ཐེབས་བཞིན་ཡོད་སྟབས། མི་མང་དཔོན་རིགས་གཅིག་གི་སྟེང་ཁོང་ཁྲོ་ཆེན་པོ་ལངས་བཞིན་ཡོད་དུས་ཁོང་བརྗེ་བོ་ཐེབས་ཏེ། ཤུལ་དུ་གསར་པ་ཞིག་བསླེབས་ཏེ་ཁོའི་བྱེད་སྟངས་ལ་བལྟ་དགོས་ཆགས་ཡོང་གི་ཡོད་པ་རེད། འོན་ཀྱང་དེང་སྐབས་རྒྱ་ནག་ནང་ཁུལ་དུ་གུང་ཁྲན་ལ་མི་དགའ་མཁན་མང་དུ་འགྲོ་བཞིན་ཡོད་པ་དེ་དམར་པོའི་གཞུང་མགོ་རྟིང་སློག་རྒྱུར་ཐག་ཇེ་ཉེ་རུ་འགྲོ་བཞིན་ཡོད་པའི་རྟགས་ཤིག་ཡིན་ཚུལ་བརྗོད་སོང་། 

མཐར་ཁོང་གིས། རང་ཉིད་བོད་ཀྱི་གྲོགས་པོ་རྙིང་ཤོས་ཤིག་གི་ངོས་ནས། བོད་གཞུང་མེད་པ་བཟོས་པ་དེར་བློ་ཕམ་ཆེན་པོ་བྱུང་སྐོར་བརྗོད་དོན། “ ལས་ཀ་གང་འདྲ་ཞིག་བྱེད་ཀྱི་ཡོད་མེད་ལ་མ་བལྟས་པར་གཞུང་ཟེར་དུས་བོད་པ་ཡིན་ན་འདྲ་ལ་ཕྱི་རྒྱལ་བ་ཡིན་ནའང་འདྲ། ངོས་འཛིན་དམིགས་བསལ་པ་ཞིག་དང་རེ་བ་རྒྱག་སྟངས་མ་འདྲ་བ་ཞིག་ཡོད་པ་རེད། ད་ཆར་བོད་མིའི་སྒྲིག་འཛུགས་ཟེར་ན་ཚོགས་པ་འདྲ་བོ་ཞིག་ཆགས་ཚར་བ་རེད། བསམ་བློའི་ནང་ལྕི་ཁོག་དང་ངོས་འཛིན་ཞེ་དྲག་མེད་པ་ཆགས་འདུག བློ་བཟང་སེང་གེའི་ཆབ་སྲིད་ཀྱི་ལངས་་ཕྱོགས་ལ་བལྟས་ཡོང་ན། མཚམས་རེར་ཕོ་ལུ་མོ་ལུ་འཁྲབ་ཀྱི་ཡོད་པ་འདྲ་བོ་ཞིག་ལ་མཐོང་ཡོང་གི་འདུག མ་གཞི་ཆབ་སྲིད་པ་ཟེར་དུས་དེ་འདྲ་ཞིག་ཡིན་རྒྱུ་རེད། འོན་ཀྱང་མི་མང་ཚོས་དམངས་གཙོའི་ལྟ་གྲུབ་གཞིར་བཟུང་ཐོག་ཕྱོགས་ཡོང་ནས་རོགས་འདེགས་བྱ་དགོས་པ་རེད་ལ། འདོད་པ་མེད་ས་ནས་ངོ་རྒོལ་དང་སྐད་རྒྱག་ཐུབ་དགོས་པ་རེད” ཅེས་བརྗོད་བྱུང་།

སྤི་ཊིར་ལགས་ནི་ཨ་རི་བ་ཞིག་ཡིན་ཞིང་། ཁོང་ཕྱི་ལོ་ ༡༩༦༩ ལོ་ནས་ངྷ་སར་ཡོང་སྟེ་གཏན་སྡོད་བྱས་ཡོད་པ་དང་། ད་ལྟ་ངྷ་སར་ཁོང་གིས་སྦག་སྦག་བཤིག་གསོ་ཁང་ཞིག་བཟུང་སྟེ་འཚོ་བ་སྐྱེལ་བཞིན་ཡོད།