བོད་ནས་དུས་འཁོར་དབང་ཆེན་ལ་ཕེབས་མཁན་བོད་རིགས་ཨ་མ་རྒན་མོ་ཞིག་སྙིང་ནད་ཀྱི་རྐྱེན་པས་རྒྱལ་ས་ལྡི་ལིའི་སྨན་ཁང་ཞིག་ཏུ་གློ་བུར་གྲོངས་ཡོད་འདུག
ད་ལོའི་ལོ་མཇུག་ཏུ་༧གོང་ས་མཆོག་གིས་རྒྱ་གར་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༢ པ་དེ་བསྩལ་འཆར་ཡོད་པ་ལྟར། ཉེ་ལམ་བོད་ནས་ཆོས་ཞུ་བ་བརྒྱ་ཕྲག་མང་པོས་དཀའ་ངལ་ལ་མ་འཛེམས་པར་བཞུགས་སྒར་ངྷ་རམ་ས་ལར་འབྱོར་བཞིན་ཡོད་ནའང་། གནས་བསྐོར་བ་གང་མང་ཞིག་ལ་ས་ཆུ་མ་འཕྲོད་དང་། ཟ་མ་དང་འཐུང་ཆུ་མ་འཕྲོད་པ་བཅས་ཀྱིས་ལུས་པོའི་འཕྲོད་བསྟེན་ཐོག་དཀའ་ངལ་འཕར་མ་ཞིག་འཕྲད་ཀྱིན་ཡོད་པ་རེད། ཟླ་འདིའི་ཕྱི་ཚེས་ ༨ ཉིན་བོད་མདོ་སྨད་བླ་བྲང་མཛོད་དགེ་ནས་ཡིན་པའི་རང་ལོ་ ༧༢ སོན་པའི་ཨ་མ་སྒྲོལ་མ་འཚོ་ལགས། བལ་ཡུལ་ནས་ལྡི་ལིར་འབྱོར་མཚམས་སྙིང་ནད་ཀྱི་རྐྱེན་པས་གློ་བུར་དུ་འདས་གྲོངས་སུ་ཕྱིན་ཡོད་འདུག་ལ། དེ་བཞིན་མདོ་སྨད་རྨ་ཆུ་ནས་ཡིན་པའི་རང་ལོ་ ༧༢ ཡིན་པའི་གྲྭ་སྐལ་བཟང་ལགས་ཀྱང་ཁྲག་ཤེད་དང་ཕོ་བའི་ནད་གཞིའི་རྐྱེན་པས་ད་ཆར་ལྡི་ལིར་སྨན་ཁང་ཞིག་ཏུ་ཛ་དྲག་ཐོག་སྨན་བཅོས་བྱེད་བཞིན་ཡོད་འདུག
གནས་ཚུལ་དེའི་ཐད་འདི་གའི་གསར་འགོད་པས་ཁ་པར་བརྒྱུད་ལྡི་ལིའི་མདོ་སྨད་ས་གནས་རྒྱུན་ལས་ཚོགས་གཙོ་རིག་འཛིན་ལགས་སུ་བཅར་འདྲི་ཞུས་པར་ཁོང་གིས་བརྗོད་དོན། “ དུས་འཁོར་དབང་ཆེན་ལ་ཕེབས་མཁན་བླ་བྲང་མཛོད་དགེ་ནས་ཡིན་པའི་བགྲེས་སོང་སྒྲོལ་མ་འཚོ་ཞུ་བ་ཞིག་ཕྱི་ཚེས་ ༨ ཉིན་གློ་བུར་དུ་ལྡི་ལིའི་སྨན་ཁང་ཞིག་ཏུ་གྲོངས་པ་རེད། སྨན་ཁང་གི་སྨན་པས་བཤད་ན་བགྲེས་སོང་དེའི་སྙིང་ལ་ཆུ་བསགས་ཏེ་གྲོངས་པ་རེད་ཟེར། ཁོ་མོས་འདས་གྲོངས་སུ་མ་ཕྱིན་གོང་ཉལ་ཁྲིའི་སྟེང་ “ ཚེ་འདིར་རྒྱལ་དབང་རིན་པོ་ཆེར་མཇལ་ཐུབ་མ་སོང་ ” ཟེར་ནས་མིག་ཆུ་ཡང་ཡང་གཏོང་གི་འདུག ཕྱི་ཚེས་ ༩ ཉིན་ཁོ་མོའི་བུ་གཉིས་དང་མདོ་སྨད་ས་རྒྱུན། ས་གནས་གཞོན་ནུ། གཞིས་ཆགས་བརྒྱ་དཔོན་བཅས་ཀྱིས་ལྡི་ལིར་མཱ་ཇིན་ཊི་ལར་ཁོ་མོའི་ཕུང་པོ་ཞུགས་འབུལ་ཞུས་པ་ཡིན། སྐབས་དེར་བོད་ནས་ཕེབས་པའི་བུ་དེས་ངས་ཨ་མ་རྒྱལ་དབང་རིན་པོ་ཆེའི་དུས་འཁོར་དབང་ཆེན་ལ་ཁྲིད་ཡོང་བ་ཡིན། ད་ལྟ་ང་ལ་ཨ་མ་ཕྱིར་ཁྲིད་རྒྱུ་ཡོད་པ་མ་རེད་ཟེར་ནས་ངུས་སོང་ ” ཞེས་བརྗོད་བྱུང་།
ད་ལྟ་ལྡི་ལིའི་སྨན་ཁང་དུ་སྨན་བཅོས་བྱེད་བཞིན་པའི་བགྲེས་སོང་སྐལ་བཟང་ལགས་ཀྱི་གནས་སྟངས་ཐད། ཁོང་གིས་ “ བོད་ནས་ཕེབས་པའི་གྲྭ་སྐལ་བཟང་ཞུ་བ་དེ་ལོ་ ༧༢ ཡིན་པ་དང་། ཁོང་ལ་ཁྲག་ཤེད་ན་ཚ་དང་ཕོ་བའི་ན་ཚ་ཡོད་སྟབས།ནད་གཞི་ཚབས་ཆེན་པོ་འདུག ཟ་མ་གང་ཟས་ཀྱང་ལམ་སེང་སྐྱུག་ཡོང་གི་འདུག ད་ལྟ་མདོ་སྨད་ས་རྒྱུན་དང་དེ་མིན་འབྲེལ་ཡོད་མི་སྣ་ཁག་ཅིག་གིས་ཁོང་ལ་ལྟ་རྟོགས་བྱེད་ཀྱི་ཡོད། རྒྱ་གར་སྨན་པས་སྨན་ཁང་དུ་སྨན་བཅོས་བྱ་དགོས་འདུག་ཟེར ” ཞེས་བརྗོད་བྱུང་།
བོད་ནས་གསར་དུ་ཕེབས་མཁན་གང་མང་ཞིག་ལ་ས་ཆུ་འཕྲོད་མིན་གྱི་དབང་གིས་ནད་གཞི་འདྲ་མིན་ཕོག་སྟེ། ཉིན་རྟག་པར་གངས་སྐྱིད་བདེ་ལེགས་སྨན་ཁང་ནང་སྨན་བཅོས་བྱེད་དུ་འགྲོ་དགོས་ཀྱི་ཡོད་ཅིང་། དེ་དག་ལས་རིགས་ཁ་ཤས་བདེ་ལེགས་སྨན་ཁང་དུ་དྲག་སྐྱེད་མ་བྱུང་བར་ས་གནས་རྒྱ་གར་སྨན་ཁང་ཆེ་ཁག་ཏུ་འགྲོ་བཞིན་ཡོད་སྟབས། འཕྲོད་བསྟེན་ལས་ཁུངས་ཀྱི་འཆར་འགོད་འགན་འཛིན་བསྟན་འཛིན་དབྱིན་གཉེན་ལགས་སུ་བཀའ་འདྲི་ཞུས་པར། འཕྲོད་བསྟེན་ལས་ཁུངས་ཀྱིས་དབུས་སྣེ་ལེན་ཁང་བརྒྱུད་བོད་ནས་ཕེབས་མཁན་ཚོར་འཕྲོད་བསྟེན་དང་ཁ་ལག་སྐོར་གོ་རྟོགས་རིམ་པར་སྤེལ་བཞིན་ཡོད་པ་དང་། ནད་པ་ཚོར་དུས་ཡུན་ཟླ་དྲུག་རིང་རིན་མེད་ཐོག་སྨན་བཅོས་བྱེད་ཀྱི་ཡོད་པ། བདེ་ལེགས་སྨན་ཁང་དུ་དྲག་སྐྱེད་མ་བྱུང་བའི་རིགས་ལ་རྒྱ་གར་སྨན་ཁང་དུ་སྨན་བཅོས་ཀྱི་མཐུན་འགྱུར། ལྷག་པར་དུ་གནས་མཆོག་རྡོ་རྗེ་གདན་དུ་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་གསར་འབྱོར་བ་ཚོེར་དམིགས་བསལ་མཐུན་འགྱུར་གནང་རྩིས་ཡོད་སྐོར་བརྗོད་སོང་།
བདེ་ལེགས་སྨན་ཁང་གི་སྨན་པ་བསྟན་འཛིན་དབྱངས་འཛོམས་ལགས་སུ་གསར་འབྱོར་བའི་ན་ཚའི་གནས་སྟངས་སྐོར་བཀའ་འདྲི་ཞུས་སྐབས། ཉེ་ལམ་བདེ་ལེགས་སྨན་ཁང་དུ་ཉིན་ལྟར་བོད་ནས་ཕེབས་པའི་ནད་པ་མང་པོ་ཡོང་གི་ཡོད་པ་དེ་ཚོ། ཕོ་བའི་ན་ཚ་དང་ཆམ་པ། ཟ་མ་མ་འཕྲོད་པའི་སྟབས་ཀྱིས་ཡིན་སྐོར་དང་། དུས་དབང་ལ་ཕེབས་མཁན་ཚོར་ཆ་བཞག་ན། རྡོ་རྗེ་གདན་གྱི་ཁོར་ཡུག་གཙང་མ་མེད་པར་ས་རྡུལ་གྱིས་ཁེངས་ཡོད་པ་དང་། དེའི་ཐོག་མི་མང་པོ་འཛོམས་ན་ན་ཚ་འདྲ་མིན་འགོས་རྒྱུའི་ཉེན་ཁ་ཡོད་སྟབས། ནམ་རྒྱུན་ཆུ་གཙང་མ་འཐུང་རྒྱུ་དང་ཁ་རས་གོན་རྒྱུ། ཟ་མ་གང་བྱུང་མི་ཟ་བ་བཅས་ལ་དོ་སྣང་སྤྲོད་རྒྱུ་ཧ་ཅང་གལ་ཆེན་ཡིན་སྐོར་སོགས་བརྗོད་ཡོད།
བོད་ནས་ཕེབས་པའི་གནས་བསྐོར་བ་ཞིག་ལ་བཀའ་འདྲི་ཞུས་པར། “ ང་རང་རྒྱལ་བ་རིན་པོ་ཆེར་མཇལ་ཐུབ་པ་སྐལ་བ་བཟང་པོ་བྱུང་། ཡིན་ནའང་། ངྷ་རམ་ས་ལ་ན་རྐུན་མ་ཡོད་ས་རེད། བདུན་ཕྲག་སྔོན་མར་ང་རང་གིས་ངྷ་ས་མེག་གྷན་རླངས་འཁོར་འབབ་ཚིགས་ཀྱི་མ་ཎི་འཁོར་ལོ་སྐོར་སྐབས། མི་ཚོགས་ཁྲོད་ཅི་ཡིན་འདི་ཡིན་མེད་པར་ངའི་སྒོར་ཁུག་བརླགས་སོང་། སྒོར་ཁུག་ནང་རྒྱ་ནག་ཐོབ་ཐང་ལག་འཁྱེར་དང་ཧིན་སྒོར་ ༢༠༠ ལས་བཅུག་མེད། ཐོབ་ཐང་ལག་ཁྱེར་གལ་ཆེན་ཡིན་སྟབས་ཕྱི་ཉིན་སྔ་མོ་ནས་ས་དེར་སྒོར་ཁུག་འཚོལ་དུ་འགྲོ་སྐབས། སྒོར་ཁུག་སྟོང་པ་དེ་མ་ཎི་འཁོར་ལོའི་གྱང་ངོས་ཞིག་ཏུ་བཀལ་འདུག སྒོར་ཁུག་ཁ་ཕྱེ་སྐབས་ཐོབ་ཐང་ལག་འཁྱེར་མ་གཏོགས་སྒོར་མོ་ཁྱེར་ཚར་འདུག ” ཅེས་བརྗོད་སོང་། དེ་བཞིན་མི་གཞན་ཞིག་གིས་བཤད་ན་ཟླ་སྔོན་མའི་ནང་བོད་ཀྱི་བདེ་རྩ་ (Tibet Charity) ཚོགས་པའི་མ་བྱན་ཚེ་སྐྱིད་ལགས་ཀྱི་ཧིན་སྒོར་ ༢༠༠༠ ཙམ་ཡང་རླངས་འཁོར་འབབ་ཚིགས་ཀྱི་མ་ཎི་འཁོར་ལོ་སྐོར་སྐབས་གཞན་གྱིས་རྐུ་འཁྱེར་བྱས་འདུག
དབུས་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་གསུངས་བ་ལྟར་ན། ད་ལོར་བོད་ནས་དུས་དབང་ལ་ཕེབས་མཁན་ ༧༠༠༠ ལྷག་ཡོད་འདུག
གསར་འགོད་པ། དཔལ་ལྡན།
བརྩེ་བའི་ཡུམ་ཆེན་ཨ་མ་སྒྲོལ་མ་ལགས།
ཁྱེད་རང་སེམས་པ་བདེ་ཐང་ངང་ནས་ཕེབས་དང་། ཁྱེད་ཀྱིས་བུ་ཕྲུག་ང་ཚོའི་ཁྱེད་ཀྱིས་ཆེད་དུ་ཕྱག་བསྐོར་སྒྲུབ་བྱང་དང་ཁ་འདོན་དགེ་སྒྲུབ་ཀྱིས།
ཚེ་ཕྱི་མ་བོད་ཆོས་ལྡན་གྱི་མི་ལུས་ཡོངས་བསྐྱར་ལེན་ནས་༸གོང་ས་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཞལ་མཇལ་ཡོང་བའི་སྨོན་ལམ་ཡོང་ཡོང་འདེབས་བཞིན་ཡོད།
བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག།།
སྐྱེས་པ་ཉམས་པ་མེད་པ་དང་། །གང་ནས་གང་དུ་འཕེལ་བར་ཤོག།
འཕགས་མཆོག་སྤྱན་རས་གཟིགས་ལ་གསོལ་བ་འདེབས། ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།ཨོཾ་མ་ཎི་པདྨེ་ཧཱུྃ།
ད་རང་སྔ་དྲོའི་ཕྱག་མཆོད་འབུལ་བྱས་པའི་བསོད་ནམས་དེའི་སྟོབས་ཀྱིས་མ་རྒན་མོ་ཁྱེད་བདེ་འགྲོའི་ལུས་རྟེན་རིམ་པར་བདེ་བླག་རྙེད་པའི་ཐོག་ནས་མཐར་ཐུག་རྣམ་མཁྱེན་གོ་འཕང་གང་མྱུར་ཐོབ་པར་བསྔོ་སྨོན་ཡོད། ཨོཾམཎིཔདྨེཧྰུཾ།
དུས་འཁོར་དབང་ཆེན་ཞུ་བའི་སླད་བོད་ནས་གསར་དུ་ཕེབས་པ་རྣམས་ཀྱིས་ངེས་པར་དུ་རང་གི་འཕྲོད་བསྟེན་ལ་གཅེས་སྐྱོང་གནང་རོགས། རྐྱེན་ངན་གོད་ཆགས་དེ་འདྲ་སླར་ཡང་མ་འཕྲད་པའི་གཟབ་ནན་དགོས་གལ་ཆེན་པོ་ཡིན།
ཆོས་སྦྱིན་དམ་པའི་ཞིང་ས་འདི་འདྲ་ལ། དད་པའི་སྟོབས་ཀྱིས་གོམ་གང་སྤོས་པ་ཡང། དགེ་སྟོབས་ཤིན་ཏུ་ཆེ་ཞེས་གསུངས་པས་ན། དངོས་མཇལ་ལས་ལྷག་བསོད་ནམས་ཆེ་ཡང་སྲིད།
གཙོ་བོ་ཡིད་བཞིན་ནོར་བུའི་སྙན་ལ་སླེབས་པ་བྱེད་དགོས།
གསར་འབྱོར་བ་ཟེར་ནའང་བོད་མི་རེད། བྱས་ཙང་། རྨོ་ལགས་ཁོང་འདས་གྲོངས་སུ་སོང་བ་ལ་མྱ་ངན་ཞུ། སྐྱེ་བ་རྗེས་མར་ཁོང་སླར་ཡང་སྤྱན་རས་གཟིགས་ཀྱི་གདུལ་ཞིང་དུ་སྐྱེས་ནས་རྒྱལ་བ་རིན་པོ་ཆེ་མཇལ་རྒྱུར་སྨོན་འདུན་ཞུ།
ཡིད་སྐཡོའི་གནས་ཚུལ་འདིས། 2009འི་རྗེས་ས་ལ་བོད་འབྱོར་འཕྲོད་བསྟེན་གནས་སྟངས་འདི་ལས་མེད་ན། 1959འི་ལོ་རབས་ལ་ང་ཚོའི་ཕ་རྒན་མ་རྒན་ཚོས་གྲོངས་སྟངས་མ་བརྗེད་པ་བྱེད་དགོས་པའི་བསྐུལ་མ་ཅིག་ཐེབས་བྱུང་ལགས། སངས་རྒྱས་སྨན་བླ་མཁྱེན་ནོ། །
ཨོམ་མ་ཎི་པདྨེ་ཧཱུ། ཨོམ་མ་ཎི་པདྨེ་ཧཱུམ། ཨོམ་མ་ཎི་པདྨེ་ཧཱུ། ཨོམ་མ་ཎི་པདྨེ་ཧཱུ།
སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་ཀུན་ཏུ་ཨ་མ་རྒན་མོ་དེ་འཕགས་མཆོག་ཕྱག་ན་པདྨོས་རྗེས་སུ་འཛིན་པར་ཤོག
བོད་ནས་ཕེབས་མཁན་ཚོར་ངེས་པར་དུ་བདག་སྐྱོང་བྱེད་རྒྱུར་འབྲེལ་ཡོད་ཚང་མར་འགན་ཡོད་པར་མ་སད། རྒྱ་གར་དུ་སྔོན་ལ་ཡོང་ཡོད་མཁན་ཚོས་ཉམ་མྱོང་གི་ཐོག་ནས་བདག་སྐྱོང་བྱེད་དགོས། དེ་ཡང་ངའི་བསམ་ཚུལ་ལ།
༡ ཆུ་ཁོལ་མ་མང་བོ་བཏུང་དུ་འཇུག་དགོས་པ་དང་།
༢ ཟས་རྙིང་བ་བཟའ་མི་ཉན་པ།
༣ གོས་ཀྱི་སྟེང་གི་ཚུལ་དྲེགས་ལེན་པ།
༤ སྐྱ་ཟས་མང་བོ་བཟས་ན་སྐྱོན་ཞེད་དྲག་མེད།
༥ ཡང་གནས་སྐོར་ལ་ཁྲིད་མཁན་ཚོས་བསྟུད་མར་མི་འཁྲིད་པར་ངལ་གསོ་རྒྱག་བཞིན་འཁྲིད་རྒྱུ་གལ་ཆེ།
ཨ་མ་རྒན་མོ་དེ་ལྟར་བཞུད་པ་ཐོས་ནས་ངོ་མ་སྙིང་ལ་ན་ཟུག་ཆེན་པོ་ཞིག་ལྡང་སོང་། འདས་པོ་གང་ཉིད་ལས་མྱ་ངན་གྲངས་མེད་ཞུ།
ཨོ་མ་ཎི་པད་མའི་ཧུ།
འབྲེལ་ཡོད་ཞབས་ཞུ་གནང་མཁན་ལྷན་རྒྱས་ལ་ཞུ་རྒྱུ། བོད་ནས་གསར་དུ་འབྱོར་མཁན་ཚོའི་དཀའ་ངལ་ནི་རྒྱ་གར་ནང་འཕྲོད་བསྟེན་གནང་མ་ཤེས་པའི་རྐྱེན་གྱིས་རེད། གཙོ་བོ་ནི་ཆུ་འཐུང་ཡ་དང་། ཁ་རས་ཡག་པོ་མ་བརྒྱབ་པ་དེ་གཉིས་རེད། དེའི་ཐོག་ལ་ལམ་སྟོན་ཡག་པོ་གནང་རོགས། བོད་ནང་ཆུ་གྲངས་མོ་འཐུང་ཡ་གོམས་གཤིས་མེད་དུས་རྒྱ་གར་ཚ་བ་ལུང་པ་སླེབས་ན་ཡང་ཆུ་ཚ་བོ་དང་ཇ་ཚ་བོ་མ་གཏོགས་འཐུང་གི་མི་འདུག། གལ་སྲིད་ཆུ་འཐུང་ན་ཡང་ཆུ་གཙང་མ་ཉོ་མ་ཤེས་པའམ་ཉོ་ཐུབ་པར་རྐ་ལའི་ཆུ་འཐུང་སྐབས་དེས་མ་འགྲིག་པ་བཟོ་གི་འདུག། སྔོན་མ་ཨ་མ་ར་ཝ་ཏིའི་དུས་དབང་སྐབས་ངའི་ནང་མི་ལྔ་ཡོང་བ་རེད། དེ་དུས་ཆུ་གཙང་མ་ལི་ཊར་༢༠་ཅན་གྱི་འགྱིག་དམ་ཆེན་པོ་རྐྱང་ཉོས་ནས་ཆུ་ཚ་བོ་དང་ཇ་ཚ་བོ་འཐུང་མ་བཅུག་པར་ཆུ་དེ་མང་ཙམ་འཐུང་བཅུག་པ་ཡིན། ཁ་རས་ཀྱང་ཡག་པོ་བརྒྱབ་བཅུག་པས་གཅིག་ཀྱང་ན་མ་སོང་། གཞན་ཚོ་ཚ་བ་ནང་ཁ་སྐོམ་སྐབས་ཇ་དྭངས་བསྐོལ་ནས་ཚ་བོ་རྐྱང་འཐུང་། ཕྱི་ལོག་ལ་འགྲོ་དུས་ཁ་རས་མ་བརྒྱབ་པའི་རྐྱེན་གྱིས་མང་པོ་ན་གི་འདུག། སྐུ་མཁྱེན་དེའི་ཐོག་རིག་པ་བསྒྲིམ་རོགས་ཐུགས་རྗེས་གཟིགས། ཁ་རས་ཀྱང་བྱུང་ན་ཡག་པོ་ཡོད་མཁན་གཉིས་བརྩེགས་བརྒྱབ་ན་ཡག་པོ་འདུག།
ཨ་མ་རྒན་མོ་དེ་ཚེ་འདིར་རྒྱལ་དབང་ཐམས་ཅད་མཁྱེན་པར་མཇལ་མ་ཐུབ་མོད། ཁོ་མོ་ལྟ་བུའི་ཚེ་འདས་རྣམས་ཁོང་གི་བྱམས་བརྩེའི་འོག་ཏུ་ནམ་ཡང་འདོར་གྱི་མེད། སྐྱེ་བ་ཕྱི་མར་རྒྱལ་དབང་མཁྱེན་པའི་ཉེ་འཁོར་ཞིག་ནས་སྐྱེ་བར་ཤོག་་་་་་་་་་་ཨ་མ་རྒན་མོ་དེའི་ཆེད་དུ་ཨོ་མ་ནི་པདྨེ་ཧཱུ
ཁར་སྔོན་ནས་འབོད་བསྐུལ་རབ་དང་རིམ་པ་ཞུས་ཡོད། ད་ཡང་དུས་བབ་གསར་ཁང་དང་བོད་ཀྱི་བང་ཆེན་གསར་ཁང་ཨ་རི་ཨེ་ཤ་ཡ་གསར་འགྱུར་ཁང་བཅས་ལ་སྙིང་ཐག་པ་ནས་ཐལ་མོ་སྙིང་ཁར་སྦྱར་ནས་ཞུ་གསོལ་འདེབས་སྙིང་། བོད་ནང་དུ་ནང་རྐུན་ཚབ་ཆེ་བ་ནང་བསད་ཚབ་ཆེ་བ་འདི་རིགས་ལ་༧གོང་ས་མཆོག་གི་བཀའ་སྩལ་དང་ཕྱག་བྲིས་ནན་མོ་ཞིག་གནང་ཐུབ་པའི་འབོད་བསྐུལ་དང་། ཁྱེད་གསར་འགོད་པ་དང་རྒྱུད་བསྒྲག་པ་ཡོངས་ཀྱི་དེའི་དོན་རྐྱེན་དེ་ངེས་པར་དུ་མེད་པ་བཟོ་དགོས་པའི་ཁ་ད་སློབ་གསོའི་ཡིག་ཆ་དང་། ངག་བརྒྱུད་རྒྱང་གྲགས་ཀྱི་ཐོག་ནས་ད་ལན་དོན་འབྲས་དུས་ཐོག་དུ་སྨིན་པ་ཞིག་བཟོ་དགོས་པ་ནི་ཁ་ཚ་དགོས་གཏུག་གི་ཕྱག་ལས་གལ་ཆེན་ཞིག་ཡིན་པ་མཁྱེན་བཞིན་ལ་ཅི་ནས་ཀྱང་རེ་བསྐུལ་ཆུད་ཟས་སུ་མི་བཏང་བའི་འབོད་བསྐུལ་ནན་མོ་ཞུ་གི་ཡོད།།།
ཨ་མ་རྒན་མོ་སྙིང་དབུས་ནས་མ་ཎི་རེ་འགའ་འདོན་གྱིན་ཡོད། སྐྱེ་བ་ཕྱི་མར་༧རྒྱལ་དབང་རིན་པོ་ཆེ་མཇལ་ཐུབ་པར་སྨོན། གཞིས་ལུས་རྒྱ་ཆེའི་མི་མང་༧རྒྱལ་དབང་རིན་པོ་ཆེ་མྱུར་ཏུ་མཇལ་ཐུབ་པར་ཤོག ༧རྒྱལ་དབང་རིན་པོ་བསམ་གྱིན་བསམ་གྱིན་ཨ་མ་རྒན་མོ་འདི་ལྟར་བཞུད་སོང་བ་ཚོའི་ཆེད་དུ་ཨོམ་མ་ཎི་པདྨེ་ཧཱུམ།