བྱང་ཀོ་རེ་ཡའི་འབྱུང་འགྱུར་ལ་ལྷག་པའི་དྲི་རྟགས།

བྱང་ཀོ་རེ་ཡའི་སྲིད་དབང་གཅིག་སྡུད་པ་ཀེམ་ཇོང་ཨེལ་གློ་བུར་དུ་འདས་གྲོངས་ཕྱིན་པ་དེས། བྱང་ཀོ་རེ་ཡའི་དམར་ཤོག་གཞུང་སྲ་བརྟན་དང་ཀེམ་ཁྱིམ་རྒྱུད་ཀྱི་དབང་ཆ་རྒྱུན་གནས་ཐུབ་མིན་ལ་དྲི་བ་ཆེན་པོ་ཞིག་ལྷག་ཡོད་པ་མ་ཟད། རྒྱ་ནག་དང་ཨ་རི་གཉིས་ཀྱི་འཐབ་རྩོད་ཅིག་ཏུའང་གྱུར་ཡོད་འདུག

ཕྱི་ཚེས་ ༡༧ ཉིན་བྱང་ཀོ་རི་ཡའི་དམར་ཤོག་གཅིག་སྡུད་མགོ་གཙོ་ཀེམ་ཇོང་ཨེལ་མེ་འཁོར་དུ་བསྡད་དེ་ས་གནས་སུ་རྟོག་ཞིབ་ལ་བསྐྱོད་པའི་ལམ་བར་དུ་སྙིང་ནད་བྱུང་ནས་འདས་གྲོངས་སུ་ཕྱིན་ཡོད་ཅིང་། ཁོང་འདས་གྲོངས་སུ་ཕྱིན་ཏེ་ཉིན་གཉིས་ཀྱི་རྗེས་སུ་གནས་ཚུལ་ཁྱབ་བསྒྲགས་བྱས་ཡོད་པ་རེད། ཀེམ་འདས་གྲོངས་ཕྱིན་པའི་གནས་ཚུལ་ཐོན་འཕྲལ་ལྷོ་ཀོ་རི་ཡའི་རྒྱལ་ཁབ་བདེ་འཇགས་ལས་དོན་ཚོགས་འདུ་བསྡུ་སྐོང་བྱས་ཡོད་འདུག་ལ། ཉི་ཧོང་སྲིད་གཞུང་གིས་ཀྱང་རྒྱལ་ཁབ་བདེ་འཇགས་ཀྱི་ཚོགས་འདུ་བསྐངས་ཡོད་པ་རེད།

བྱང་ཀོ་རི་ཡའི་དམར་ཤོག་སྲིད་འཛིན་ཀེམ་ཇོང་ཨེལ  (Kim Jong Il) ནི་ད་ལྟ་ལོ་ ༦༩ ཡིན་པ་དང་། ཕྱི་ལོ་ ༡༩༩༤ ལོར་ཁོ་རང་གི་ཕ་ཀེམ་ཨེལ་སུང་ (Kim Il-sung) འདས་རྗེས་བྱང་ཀོ་རིའི་ཆེས་མཐོའི་དབང་འཛིན་པར་གྱུར་ཏེ་ད་ལྟའི་བར་གཅིག་སྡུད་སྲིད་དབང་བཟུང་ཡོད་པ་རེད། ཀེ་ཇོང་ལ་ ༢༠༠༨ ལོར་སྙིང་ནད་ཚབས་ཆེན་ཞིག་འཕར་རྗེས་ཁོས་རང་གི་བུ་གསུམ་པ་ཀེམ་ཇོང་ཨུན་ (Kim Jong-un) སྲིད་དབང་རྒྱུད་འཛིན་པར་གསོ་སྐྱོང་བྱས་ཡོད་པ་རེད། ཆབ་སྲིད་དབྱེ་ཞིབ་པ་དག་གིས་ཀེམ་ཇོང་ཨེལ་གྱིས་འདས་པའི་ལོ་གཉིས་ནང་རྒྱ་ནག་ཏུ་ལྟ་སྐོར་ལ་ཐེངས་འགར་བསྐྱོད་པ་དེ་ནི། རང་ཉིད་ཀྱི་བུའི་སྲིད་དབང་རྒྱུན་འཛིན་ཐད་རྒྱ་གཞུང་གི་རྒྱབ་སྐྱོར་ཐོབ་ཆེད་ཡིན་པར་ངོས་འཛིན་བྱས་ཡོད་པ་རེད། ཀེམ་འདས་གྲོངས་ཕྱིན་པར་ཡུལ་མི་སྟོང་ཕྲག་མང་པོས་མྱ་ངན་དང་ངུ་འབོད་བྱས་ཡོད་པ་དེར། དཔྱད་བརྗོད་པ་དག་གིས་སྔོན་མ་མའོ་ཙེ་ཏུང་དང་ཀེམ་ཇོང་སུང་སོགས་གཅིག་སྡུད་དབང་འཛིན་པ་དག་འདས་གྲོངས་སྐབས་མི་མང་གིས་མྱ་ངན་ངུ་འབོད་བྱས་པའི་སྣང་ཚུལ་ལྟར་བྱུང་པ་ཞིག་ཡིན་པར་བརྗོད།

ཀེམ་ཇོང་ཨེལ་འདས་གྲོངས་སུ་གྱུར་རྗེས་གཞུང་གི་བརྙན་འཕྲིན་ནས། བྱང་ཀོ་རེ་ཡའི་ཚོགས་པ་དང་དམག་དཔུང་། མི་མང་བཅས་ཀེམ་ཇོང་ཨེལ་གྱི་བུ་ཀེམ་ཇོང་ཨུན་གྱི་མགོ་ཁྲིད་འོག་ཆིག་སྒྲིལ་བྱ་དགོས་པའི་བཀའ་ཁྱབ་བསྒྲགས་བྱས་ཡོད་ཀྱང་། བྱང་ཀོ་རེ་ཡའི་ཆབ་སྲིད་བརྟན་བརླིང་ཡོང་ཐུབ་མིན་དང་ཕ་ཤུལ་བུ་འཛིན་གྱི་སྲིད་དབང་གཅིག་སྡུད་རྒྱུན་གནས་ཐུབ་མིན་བཅས་ནི་ཛ་དྲག་གི་གནས་བབ་ཞིག་ཏུ་གྱུར་ཡོད་སྐོར་ཆབ་སྲིད་དཔྱད་བརྗོད་པ་དག་གིས་ཤུགས་ཆེན་གླེང་བཞིན་ཡོད་འདུག  དེ་སྔོན་ཀེམ་ཇོང་སུང་གིས་རང་ཉིད་ཀྱི་དབང་ཆ་སྲ་བརྟན་ཡོང་ཕྱིར་བུ་ཀེམ་ཇོང་ཨེལ་ལ་ལོ་ ༣༠ རིང་སྲིད་སྐྱོང་གི་སྦྱོང་བརྡར་སྤྲད་ཡོད་ཀྱང་། ད་ལྟའི་རང་ལོ་ ༢༧ ཙམ་ལ་སོན་པའི་ཀེམ་ཇོང་ཨུན་ལ་ལོ་ ༢ ཙམ་གྱི་སྦྱོང་བརྡར་ལས་རག་མེད་པ་མ་ཟད། ཁོའི་མདུན་དུ་ལྷག་པའི་དཀའ་ངལ་ཆེན་པོ་བཞི་ཙམ་ཡོད་འདུག དེ་བཞིན་ལེ་བྷེ་ཡ་དང་སེ་རི་ཡ། ཨེ་རན། ཨེ་རག་སོགས་ཀྱི་ད་ལྟའི་ཛ་དྲག་གི་གནས་བབ་འདི་མི་འགྱངས་པར་བྱང་ཀོ་རེ་ཡའི་རྒྱལ་ཁོངས་སུ་འབྱུང་རྒྱུར་སྔོན་དཔག་བྱེད་མཁན་མང་པོ་ཡོད་པ་རེད།

ཀེམ་ཇོང་ཨུན་གྱི་མདུན་དུ་ལྷག་པའི་དཀའ་ངལ་གཅིག་ནི་སྤུན་མཆེད་བར་གྱི་དབང་ཆའི་འཐབ་རྩོད་དང་ཁྱིམ་ཚང་ནང་ཁུལ་དུ་འགལ་ཟླ་ཡོད་པ། གཉིས་པ།ཚོགས་པ་དང་དམག་དཔུང་། འཛིན་སྐྱོང་བཅས་ཀྱི་ནང་ཁུལ་དུ་དབང་ཆའི་འཐབ་རྩོད་ཤུགས་ཆེན་ཡོད་པ་རྣམས་ད་སྔ་ཀེམ་ཇོང་ཨེལ་གྱི་བཙན་ཤུགས་འོག་མགོ་འབུར་ཐུབ་མེད་ཀྱང་། ལོ་ན་ཆུང་ཞིང་ཉམས་མྱོང་མེད་པའི་ཀེམ་ཇོང་ཨུན་གྱིས་ཁོང་ཚོར་སྟངས་འཛིན་བྱ་ཐུབ་མིན་གྱི་ཉེན་ཁའི་གནས་སུ་གྱུར་ཡོད། གསུམ་པ། ཆབ་སྲིད་ཚོགས་པ་དང་དམག་དོན་རྩ་འཛུགས་ལས་གཞན། ད་དུང་འཛིན་སྐྱོང་ནང་དུའང་ཆབ་སྲིད་ཙམ་མིན་པར་དཔལ་འབྱོར་སྲིད་ཇུས་སྒྱུར་བཅོས་བྱ་རྒྱུའི་གོ་སྐབས་ལ་སྒུག་སྡོད་མཁན་གྱི་ཤོག་ཁག་ཤུགས་ཆེན་པོ་ཡོད་པ། བཞི་པ། བྱང་ཀོ་རེ་ཡིས་སྤྱི་ཚོགས་དང་ཆབ་སྲིད་བཅོས་བསྒྱུར། རྡུལ་ཕྲན་ལས་གཞི་མཚམས་འཇོག་བཅས་མ་བྱས་པར་མུ་མཐུད་དམག་ཤུགས་འོག་བསྡད་ཚེ། ཕྱོགས་གཅིག་ནས་རྒྱ་ནག་གཞུང་གིས་རྒྱབ་སྐྱོར་ཆེན་པོ་ཡོད་ནའང་། ཕྱོགས་གཞན་ཞིག་ནས་ལྷོ་ཀོ་རེ་ཡ་དང་ཨ་རི། ཉི་ཧོང་སོགས་ཀྱིས་གནོན་ཤུགས་སྤྲོད་པའི་སྲིད་ཇུས་ལངས་ཕྱོགས་འཛིན་རྒྱུ་ཡིན་པ་བཅས་རེད། ད་ལྟའི་ཆར་ཁེམ་ཇོང་ཨུན་གྱི་དབང་ཆ་སྲ་བརྟན་ཡོང་ཐུབ་མིན་དེ་ནི། གཙོ་བོ་ཁོང་གི་ཨ་ཞང་ཇང་སོན་ (Jang Song-thaek) དང་།  བྱང་ཀོ་རེ་ཡའི་དམག་སྤྱི་མཐོ་ཤོས་རེ་ཡོན་(Ri Yong) གཉིས་ཀྱི་རྒྱབ་སྐྱོར་ལ་རག་ལས་ཡོད་འདུག

ཀེམ་ཇོང་ཨེལ་འདས་གྲོངས་སུ་གྱུར་པའི་གནས་ཚུལ་ཕྱིར་བསྒྲགས་བྱས་རྗེས། ལྷོ་ཀོ་རེ་ཡ་གཞུང་གིས་ད་ལྟའི་གནས་བབ་འདི་འདྲའི་འོག་བྱང་ཀོ་རེ་ཡ་ཞི་བདེ་བརྟན་བརླིང་ཡོང་དགོས་པ་དང་། མི་མང་གིས་གཞུང་དང་མཉམ་འབྲེལ་བྱ་དགོས་སྐོར་བརྗོད་ཡོད་ཀྱང་། ལྷོ་ཀོ་རེ་ཡས་རྒྱལ་ཡོངས་བདེ་འཇགས་ལྷན་ཚོགས་ཀྱི་ཚོགས་འདུ་བསྐངས་ཡོད་པ་མ་ཟད། མཐའ་མཚམས་དམག་ཤུགས་ཆེ་རུ་བཏང་ཡོད་པ་དེས་བྱང་ཀོ་རེ་ཡར་བརྡ་ལན་ཞིག་སྤྲོད་བཞིན་པའི་རྣམ་པ་མཚོན་ཡོད་པ་རེད། ཀོ་རེ་ཡ་ལྷོ་བྱང་གཉིས་བར་དུས་ཡུན་རིང་དམག་འཐབ་བྱུང་མྱོང་ཡོད་པ་མ་ཟད། ལོ་སྔོན་མར་བྱང་ཀོ་རེ་ཡས་ལྷོ་ཀོ་རེ་ཡའི་དམག་གྲུ་གཏོར་པ་དང་མཚོ་གླིང་དུ་དྲག་རྒོལ་བྱས་པ་ནས་བཟུང་ཕན་ཚུན་བར་གྱི་གནས་བབ་སྔར་ལས་ཛ་དྲག་ཏུ་གྱུར་ཡོད་པ་རེད།

དེ་བཞིན་ཀེམ་འདས་གྲོངས་སུ་གྱུར་རྗེས་ཨ་རིའི་ཕྱི་འབྲེལ་དྲུང་ཆེ་ཧཱེ་ལ་རེ་ཡིས། བྱང་ཀོ་རེ་ཡའི་མགོ་ཁྲིད་གསར་པས་ཁྱིམ་མཚེས་རྒྱལ་ཁབ་དག་དང་འབྲེལ་ལམ་འཕེལ་རྒྱས་ཐོག  མི་མང་གི་རང་དབང་དང་ཐོབ་ཐང་ལ་བརྩི་མཐོང་ཡོང་རྒྱུར་རེ་བ་བྱེད་ཀྱི་ཡོད་ལ། དེ་བཞིན་བྱང་ཀོ་རེ་ཡའི་མི་མང་ལ་ཨ་རིས་རྒྱབ་སྐྱོར་བྱ་རྒྱུར་གྲ་སྒྲིག་ཡོད་ཚུལ། མགོ་ཁྲིད་གསར་པས་རྒྱལ་ཁོངས་བདེ་འཇགས་དང་ཞི་བདེ། ཡུལ་ལུང་གི་དགེ་མཚན་སོགས་གཙོ་བོར་བཟུང་སྟེ་རྒྱལ་སྤྱིའི་སྤྱི་ཚོགས་དང་མཉམ་འབྲེལ་བྱ་དགོས་པའི་འབོད་སྐུལ་ཞུས་ཡོད་པ་དང་།  ཨ་རིས་ལྷོ་ཀོ་རེ་ཡ་དང་ཉི་ཧོང་སོགས་རང་གི་ཕྱོགས་གཏོགས་རྒྱལ་ཁབ་དག་གི་བདེ་འཇགས་སྲིད་ཇུས་སྔར་བཞིན་གནས་རྒྱུ་ཡིན་པར་བརྗོད་འདུག  ཀེམ་འདས་པའི་གནས་ཚུལ་ཐོན་འཕྲལ་ཨོ་བྷ་མས་ཉི་ཧོང་སྲིད་བློན་དང་ལྷོ་ཀོ་རེ་ཡའི་སྲིད་འཛིན་སོ་སོར་ཁ་པར་བཏང་ཡོད་པ་དེའི་ཐད་ཆབ་སྲིད་དཔྱད་བརྗོད་དག་གིས་ལྟ་ཚུལ་སྣ་ཚོགས་འཛིན་གྱི་ཡོད་འདུག

ཕྱི་ཚེས་ ༡༩ ཉིན་རྒྱ་ནག་གི་སྲིད་འཛིན་ཧུའུ་ཅིན་ཐོ་པེ་ཅིན་དུ་ཡོད་པའི་བྱང་ཀོ་རེ་ཡའི་གཞུང་ཚབ་ཁང་དུ་ཕྱིན་ཏེ་ཀེམ་འདས་གྲོངས་སུ་གྱུར་པར་མྱ་ངན་འཚམས་འདྲི་ཞུས་ཡོད་པ་དང་།  ཉིན་དེར་རྒྱ་ནག་ཕྱི་འབྲེལ་ལས་ཁུངས་ཀྱིས་བྱང་ཀོ་རེ་ཡའི་མི་མང་རྣམས་སྲིད་འཛིན་གསར་པ་ཀེམ་ཇོང་ཨུན་གྱི་མགོ་ཁྲིད་འོག་ཆིག་སྒྲིལ་བྱ་དགོས་པའི་སྐུལ་མ་བྱས་འདུག དེ་བཞིན་ཁུ་བྷ་(Cuba) དམར་ཤོག་གཞུང་གིས་ཀེལ་འདས་གྲོངས་ཕྱིན་པར་ཉིན་གསུམ་རིང་རྒྱལ་ཡོངས་མྱ་ངན་ཞུ་རྒྱུའི་ཁྱབ་བསྒྲགས་བྱས་ཡོད་འདུག

བྱང་ཀོ་རེ་ཡ་ནི་རྡུལ་ཕྲན་མཚོན་ཆ་མང་ཤོས་བཟོ་སྐྲུན་བྱེད་མཁན་དང་ཚོད་ལྟ་བྱེད་མཁན་ཞིག་ཡིན་ལ། འདས་པའི་ལོ་མང་རིང་ཨ་རི་སོགས་ནུབ་ཕྱོགས་རྒྱལ་ཁབ་ཁག་དང་འབྲེལ་ལམ་ཆད་དེ། རྒྱ་ནག་གི་ཚོང་གྲོགས་ལེགས་ཤོས་ཤིག་ཏུ་གྱུར་ཡོད་ལ།  ཨེ་རག་དང་ལེ་བྷེ་ཡ་སོགས་ཀྱི་རྡུལ་ཕྲན་མཚོན་ཆའི་ཡོང་ཁོངས་ཆེ་ཤོས་ཤིག་ཀྱང་ཆགས་ཡོད་པ་རེད། ཆབ་སྲིད་དཔྱད་བརྗོད་པ་དག་གིས་ཨ་རིའི་གཞུང་གིས་གོ་སྐབས་འདི་དང་བསྟུན་ནས་བྱང་ཀོ་རེ་ཡས་རྡུལ་ཕྲན་མཚོན་ཆའི་ལས་གཞི་མཚམས་འཇོག་བྱ་རྒྱུར་མོས་མཐུན་ཡོང་ཐབས་དང་། ནུབ་ཕྱོགས་པའི་ཕྱོགས་གཏོགས་ཀྱི་གྲས་སུ་འདྲིད་ཐབས་བྱེད་ཀྱི་ཡོད་པར་གླེང་།

ཀེམ་ཇོང་སུང་ནི་ཕྱི་ལོ་ ༡༩༡༢ ལོར་སྐྱེས་ཤིང་ཁོང་གི་ཁྱིམ་རྒྱུད་དེ་ཀོ་རེ་ཡའི་སེ་ལཱ་རྒྱལ་རྒྱུད་ཅིག་ཡིན་པར་བརྗོད་ལ། ཁོང་ཆུང་དུས་ནས་དམར་ཤོག་ནང་ཞུགས་ཏེ་རང་ལོ་ ༡༤ སྟེང་བཙན་རྒོལ་དམག་དཔུང་དུ་ཞུགས། ལོ་ ༡༩ སོན་སྐབས་འཐབ་དམག་རྩ་འཛུགས་བྱས། ཉི་ཧོང་དང་ཨ་རིའི་བཙན་འཛུལ་འོག་ལོ་ ༢༠ ལྷག་རིང་རྒྱ་ནག་དང་ཨུ་རུ་སི་སོགས་དམར་ཤོག་རྒྱལ་ཁབ་ཁག་ཏུ་བྲོས་བྱོལ་གྱིས་རྒྱ་ནག་དང་ཨུ་རུ་སི་སོ་སོར་མཉམ་འབྲེལ་ཐོག ཉི་ཧོང་དང་ཨ་རིའི་བཙན་འཛུལ་ལ་ཁྱོ་ཤི་ང་གསོན་གྱི་དམག་འཐབ་བྱས་པ་དང་། ཁོང་ནི་སི་ཏཱ་ལེན་དང་མའོ་ཙེ་ཏུང་གཉིས་ལ་ལོ་ངོ་བཅུ་ཕྲག་མང་པོའི་རིང་འགྲོག་འདྲིས་དང་ཁོང་ཚོའི་ལྟ་གྲུབ་ལ་རྒྱབ་སྐྱོར་བྱེད་མཁན་ཞིག་ཡིན། ཀེམ་ཇོང་ཨུང་ནི་བྱང་ཀོ་རེ་ཡ་དང་དེའི་གཞུང་འཛིན་ཚོགས་པ་སྟེ། ཀོ་རེ་ཡའི་ངལ་རྩོལ་ཚོགས་པ་(Workers Party of Korea) གསར་འཛུགས་བྱེད་མཁན་དང་། ༡༩༤༨ ནས་ ༡༩༧༢ བར་སྲིད་བློན་དང་། ༡༩༧༢ ནས་ ༡༩༩༤ལོར་འདས་གྲོངས་སུ་མ་ཕྱིན་བར་དུ་བྱང་ཀོ་རེ་ཡའི་སྲིད་འཛིན་བྱས་ཡོད་ལ། ༡༩༨༠ ལོར་ཁོང་གིས་བུ་ཆེ་བ་ཀེམ་ཇོང་རང་ཉིད་ཀྱི་དབང་ཆའི་རྒྱུད་འཛིན་པ་ཡིན་པར་ཁྱབ་བསྒྲགས་བྱས་འདུག

བྱང་ཀོ་རེ་ཡའི་ཡུལ་མི་ས་ཡ་ ༢༣ ལས་ས་ཡ་གཅིག་ཙམ་དམག་མི་ཡིན་ཞིང་། བྱང་ཀོ་རེ་ཡ་ནི་འཛམ་གླིང་གི་དམག་ཤུགས་ཆེ་ཤོས་ཨང་ ༥ ཆགས་ཡོད་འདུག ཐོན་སྐྱེད་ཤུགས་ཆེ་ཤོས་དམག་མིའི་མཁོ་ཆས་ཀྱི་རིགས་ཡིན་འདུག  མི་མང་གི་ཉིན་རེའི་འཚོ་བ་ནི་གཞུང་གི་སྟངས་འཛིན་འོག་གནས་ཡོད་པ་དང་། རྒྱལ་ཁོངས་ཐོན་སྐྱེད་ཕལ་ཆེ་བ་དམར་ཤོག་གཞུང་དང་ཀེམ་ཁྱིམ་རྒྱུད་ཀྱིས་བཟུང་ཡོད་སྟབས། མང་ཚོགས་ཕལ་ཆེ་བ་དབུལ་ཕོངས་དང་བཀྲེས་ལྟོགས་ཀྱི་དཀའ་ངལ་ཆེན་པོའི་འོག་གནས་ཡོད་འདུག

གསར་འགོད་པ། བནྡེ་སྐྱབས།