གནའ་མི་དྲང་མོ་ཡིན་ཟེར། དེས་ན་དེང་སང་གི་མི་ག་འདྲ་ཡོད།

བོད་ཀྱི་ཁ་དཔེ་དང་བཤད་རྒྱུན་ཞིག་ལ་གནའ་མི་དྲང་མོ་ཡིན་ཟེར་ནས་བཤད་སྲོལ་ཡོད། དེ་ནི་འུ་ཅག་གི་ཕ་མེས་ནས་རྒྱུད་དེ་འོང་བའི་གཏམ་ཞིག་རེད། དེས་ན་གནའ་མི་ཟེར་བ་མཚམས་གང་ཞིག་ནས་བཟུང་ན་འགྲིག་གི་ཡོད་དམ། ལོ་ངོ་བརྒྱ་ཕྲག་ཁ་ཤས་ཀྱི་གོང་ནས་བཟུང་བརྩི་དགོས་སམ། དེ་དུས་ནས་བརྩི་དགོས་པ་ཡིན་ན། དེ་དུས་མི་གསོད་ཁྲག་སྤྱོར་བྱེད་མཁན་མེད་དམ། རྫུན་བཤད་མཁན་མེད་དམ། རྐུ་བྱེད་མཁན་མེད་དམ། ཇག་པ་མེད་དམ། སྐབས་དེ་ཡི་མི་ལ་གཡོ་སྒྱུ་མེད་དམ། ངས་འདི་ལྟར་བསམ་བློ་བཏང་ནས་དེང་དུས་ཀྱི་ནུབ་ཕྱོགས་པའི་བཤད་ཚུལ་གསར་བ་ཞིག་ལ་ཉན། ནུབ་ཕྱོགས་པ་དག་གིས་གནའ་མི་ཚོ་གླེན་པ་ཡིན། འཕྲོད་བརྟེན་མེད། ཚེ་ཐུང་ཐུང་ཡིན་ཟེར་བ་སོགས། གནའ་མི་ལས་དེང་དུས་ཀྱི་མི་རྣམས་གང་ཅིའི་ཆ་ནས་བཟང་བར་གླེང་གི་ཡོད།

དེས་ན་བཤད་ཚུལ་ཤར་ནུབ་གཉིས་ནས་གང་ལ་ཆ་འཇོག་དགོས་པ་ཡིན་ནམ། ངས་བསམ་ན་རང་ཉིད་གང་ནས་སྐྱེ་བ་དེ་ནས་སྐད་ཆའི་བྲོ་མ་ཉམས་པར་རང་གི་རྒྱུད་དུ་འཛུལ་ཡོད་དུས། ངས་དེ་ནས་གླེང་ན་འོས་པ་ཡིན་ངེས། གནའ་མི་དག་ནི་དངོས་ནས་ཡ་རབས་པོ་དང་གཞུང་དྲང་ཚུལ་ལྡན། ཁྲེལ་དང་ངོ་ཚ། མི་ཆོས་དང་ལས་རྒྱུ་འབྲས་བརྩི་མཁན་ཤ་སྟག་ཡིན་ནམ། རང་ཉིད་ཀྱི་འཚར་ལོངས་ཀྱི་རྒྱུད་རིམ་ནས་ཕྱིར་མིག་རེ་བལྟས་ན། ལོ་ངོ་བརྒྱ་ཕྲག་གོང་གི་གནའ་མི་དག་ནི་བདག་གིས་མ་མཐོང་ལ། དེ་དག་གི་ཤུལ་རྗེས་རི་མོ་དེ་དག་ཡང་ཕྲ་ཞིང་ཞིབ་པ། ཚགས་ཚུད་པོ་དེ་འདྲ་བདག་ལ་བཤད་རྒྱུ་མེད་ཀྱང་། ལོ་ངོ་བཅུ་ཕྲག་ཁ་ཤས་ལ་ཕྱིར་འདང་ཞིག་བརྒྱབས་དུས། དངོས་ནས་ཁྲེལ་གཞུང་དང་ཕྱི་ཐག མི་ཆོས་དང་རྒྱུ་འབྲས། གུས་བཀུར་དང་བརྩི་མཐོང་། ཆེ་བཀུར་ཆུང་བྱམས་ཀྱི་གོམ་གཤིས་ལ་དངོས་ནས་ཉམ་ཆག་འགྲོ་བཞིན་འདུག

ང་ཆུང་ཆུང་ཡིན་དུས་ཤིག་ལ། ང་རང་གི་འགྲམ་དུ་ཨ་མ་རྒན་མོ་ཞིག་སྐོར་ནས་འགྲོ་བཞིན་འདུག ངས་ཨ་མ་ཁོང་ལ་ཁྱེད་དེ་འདྲའི་ཐག་རིང་བོ་སྐོར་ནས་གང་བྱེད་ཅེས་དྲིས་པ་ན། ཁོ་མོས་གྲྭ་བ་ཞིག་གི་གྲིབ་མ་ཙམ་ལ་ཡང་བརྒལ་ན་ཉེས་པ་ཡོད་པ་རེད། གྲྭ་བ་ནི་དངོས་ནས་སངས་རྒྱས་ཀྱི་རྗེས་མཇུག་སློབ་མ་ཡིན་དུས་དེ་ལ་གུས་པ་ནི་སངས་རྒྱས་ལ་གུས་པ་དང་གཅིག་པ་ཡིན་ནི་རེད་ཅེས་གསུངས་མྱོང་བའི་སྐད་ཆ་དེ་ཡི། གནའ་མི་དག་གི་སེམས་ནང་གི་སངས་རྒྱས་ལ་བཅིངས་པའི་དད་པ་དང་། དགེ་སྡུག་དང་ཡ་རབས་ཀྱི་འདུ་ཤེས་བཅས་ལ་དངོས་ནས་ཁ་ཞེ་གཉིས་མེད་ཡིན་པ་བསྟན་འདུག དེས་ན་དེང་དུས་སུ་གྲྭ་བ་ཞིག་གི་གྲིབ་མ་ལ་བརྒལ་མིན་ཕར་ཞོག གྲྭ་བའི་ན་བཟའ་དང་གྲྭ་བའི་བཞུགས་གདན་སོགས་ཀྱི་སྟེང་དུ་ཡང་འདྲ་མཉམ་དུ་བསྡོད་ཀྱི་ཡོད། འདི་ནི་གནའ་མི་དང་ད་ལྟའི་མི་རབས་བར་གྱི་ཁྱད་པར་རེད་འདུག འདི་ལ་བཟང་ངན་གྱི་ལེགས་ཉེས་ཇི་འདྲ་ཡོད་མེད་དེ་ཡི་སྐོར་ལ་སྤུན་ཟླ་ཁྱེད་ཅག་གི་བསམ་གཞིགས་ལྷུག་པོ་ཞིག་གནང་ནས་བསམ་ཚུལ་རེ་གསུང་རོགས་ཞུ། གཅིག་བྱས་ན་འུ་ཅག་གིས་དངོས་ནས་གནའ་མི་དག་ལ་དམིགས་དཔེ་བལྟ་དགོས་པའི་བྱ་བ་གལ་ཆེན་རེ་བརྗེད་ཀྱི་ཡོད་པ་འདྲ།