དུས་རབས་ཀྱི་མི་དང་དུས་རབས་ཀྱི་བོད་མིའི་བར་ཁྱད་མདོར་ཞིག

འདུ་ཤེས་ཟེར་བ་ནི་མིའི་སེམས་རྒྱུད་དུ་ཇི་ལྟར་འཛུལ་གྱི་ཡོད་མེད་ཀྱི་སྐོར་ནས་རང་ཉིད་ལ་བལྟས་དེ་ཞིབ་དུ་བལྟས་དུས། རང་ཉིད་གང་ལ་དགའ་བ་དེ་ཡི་ཕྱོགས་སུ་འབད་འབུངས་བྱེད་པ་དང་དེ་ལ་འཇུག་པར་སྤྲོ་བའི་སྔ་ཕྱི་བར་གསུམ་ལ་བསམ་བློ་བཏང་ནས་བཤད་དགོས་པར་སྙམ། མི་ཞིག་གིས་རང་ཉིད་ཀྱི་འཚོ་བའི་འགྲུལ་བཞུད་ཀྱི་སྔ་གཞུག་དང་རང་ཉིད་ཀྱི་གང་སྤྱངས་པ་དང་གང་མཐོང་བ། གང་ཤེས་པ་བཅས་ནི་གཏམ་གླེང་འདིའི་ཆ་རྐྱེན་རེད། དེས་ན་དེང་དུས་སུ་དུས་རབས་ཟེར་ནས་གླེང་བར་སྤྲོ་བ་དང་མི་རིགས་ཟེར་ནས་ལ་རྒྱ་ལ་དགའ་བའི་མི་ཞིག་གི་ངོས་ནས་བཤད་ན། ཐོག་མར་རང་ཉིད་གང་ནས་སྐྱེ་བའི་མི་རིགས་དེ་ཡི་འདས་མ་ད་གསུམ་ལ་རྒྱུས་མངའ་ཕུལ་དུ་བྱུང་བ་མེད་ཀྱང་། གོ་མྱོང་ཐོས་མྱོང་དང་རང་ཉིད་ཀྱང་དེར་འབྲེལ་འདྲིས་ཆེས་མི་དམན་པ་ཞིག་བྱུང་དགོས་པ་དེ་ནི་མི་རིགས་དེ་ཉིད་ཆགས་པའི་སྔོན་འགྲོའི་ཆ་རྐྱེན་རེད།

རང་ཉིད་བོད་མི་ཞིག་ཡིན་པ་དང་བོད་མི་ཞིག་བྱེད་པ་དང་དུས་རབས་དང་མཐུན་པའི་བོད་མི་ཞིག་བྱེད་པ་ལ་ཆ་རྐྱེན་གང་དགོས་པར་དུས་རྒྱུན་དུ་རང་གིས་རང་དང་ཉེ་འཁྲིས་རྒྱང་རིང་གི་གྲོགས་པོ་དག་ལ་གླེང་སློང་བྱེད་པར་སྤྲོ་བ་ཡིན་དུས། དེ་རིང་འདི་ནས་གླེང་གཞི་གཙོ་བོ་ནི། དུས་རབས་དང་འཚམ་པའི་བོད་མི་ཞིག་ཇི་ལྟར་བྱེད་དགོས་མིན་དེ་ཡི་སྐོར་ནས་ཐུང་ཐུང་ཞིག རིགས་རུས་ཀྱི་འབྲེལ་ཐག་དམ་པའི་ཁ་བ་རི་བོའི་རྗེས་རབས་པ། བོད་ཡིག་གི་ལྗགས་ཕྱེ་ལ་གོམ་པའི་སྤུན་ཟླ་དག་ལ་འབུལ། མི་ཞིག་དང་མི་རིགས་ཤིག་ཇི་ལྟར་བྱེད་རྒྱུ་ཡིན་དེ་གཉིས་ཀྱི་གོང་ནས་མི་ཞིག་བྱེད་པ་ནི། ཆེས་སླ་བོ་ཞིག་མིན་ན་ཡང་། དེ་འདྲའི་དཀའ་ཚེགས་ཡོད་པ་ཞིག་མ་རེད། དེ་ནི་རང་ཉིད་གང་ལ་འཐིམ་ན་འཐིམ་དུ་བཅུགས་ནས་དེ་ཡི་ཁྲོད་ནས་གང་ཞིག་ཤེས་པ་དང་འཇོན་པ་དེ་ཉིད་དང་དུ་ལེན་རྒྱུ་དེ་ཡིན། དེས་ན་ཕྱི་མ་བོད་མི་ཞིག་བྱེད་པའི་སྐད་ཆ་ནི། མི་ཞིག་བྱེད་པ་ལས་ཀྱང་དཀའ་ཚེགས་ཆེ་བའི་གནད་ཅིག་ཆགས་ནས་ཡོད།

ཐོག་མར་བོད་མི་ཟེར་བ་འདི་ལ་འགྲོ་བ་གཞན་དག་དང་འདྲ་བའི་རང་བདག་གི་ཁྱིམ་ཞིག་ད་ལྟའི་འཆར་མེད་པ་ཡིན་དུས། འགྲོ་བ་མི་གཞན་དག་གི་སྐད་དང་ཡི་གེ་ཡི་བཀོལ་སྤྱོད་ལ་མགོ་སྒུར་ནས་འཚོ་བ་རོལ་བའི་དུས་ཤིགས་ཆགས་ཡོད་དུས། འཚོ་བའི་དགོས་འཁོ་ནས་གླེང་དུས། རང་མི་རིགས་ཀྱི་སྐད་དང་ཡི་གེ་ཤེས་པ་དེ་ཁོ་ནའི་དུས་རབས་ཀྱི་མི་ཡི་རྗེས་ཟིན་པར་དཀའ་ངལ་ཆགས་ཡོད། རང་མི་རིགས་ཀྱི་སྐད་དང་ཡི་གེ་ཤེས་པ་དེ་ཙམ་གྱིས་དུས་རབས་ཀྱི་མི་ཡི་རྗེས་ཟིན་གྱི་མེད། དེ་ཡིན་དུས་སུ་དུས་རབས་ཀྱི་བོད་མི་ཞིག་བྱེད་པ་ལ། མ་མཐའི་ཆ་རྐྱེན་ནི་སྐད་ཡིག་གཉིས་ཕུལ་དུ་བྱང་བ་ཞིག་མ་ཤེས་ན། ཟས་གོས་ངན་ངོན་དང་འཚོ་བ་འདྲ་མཉམ་ཞིག་རོལ་བ་ལ་དཀའ་ངལ་འཕྲད་ཀྱི་ཡོད་པ་དེ་ནི་དངོས་ཡོད་ཆགས་ཡོད། དེ་ཡིན་དུས་དུས་རབས་ཀྱི་བོད་མི་ཞིག་བྱེད་པ་ལ་རང་གི་མི་རིགས་ཀྱི་སྐད་དང་ཡི་གེ་ཐོག་མར་ཤེས་པ་མ་ཟད། རང་མི་རིགས་ཀྱི་སྲོལ་རྒྱུན་དང་ཡ་རབས་གོམ་གཤིས་བཟང་བོའི་གྲུབ་འབྲས་དེ་དག་ལ་ངེས་ཟིན་ཡོད་པའི་སྒོ་ནས། རང་ཉིད་གང་དུ་གནས་སུ་གཏོགས་པའི་ཁྱིམ་ཚང་དེ་ཡི་སྐད་ཡིག་ཤེས་དགོས་པ་ནི་སྨྲོས་མེད་ཅིག་ཆགས་ཡོད། དེ་ལྟར་ཤེས་པ་ཡིན་ན་གཟོད་ནས་དུས་རབས་ཀྱི་བོད་མི་ཞིག་བྱེད་པ་ལ་ཆ་རྐྱེན་ཚང་ཡོད། ཆ་རྐྱེན་དེ་དག་ཚང་བའི་སྒོ་ནས་མི་རིགས་ཀྱི་ལ་རྒྱ་ཟེར་ནས་ཁོང་དབུང་དེ་ཉིད་འཛིན་པར་འགན་འཁུར་ཐུབ་མིན་དེ་ནི་སྐྱེ་བུ་སོ་སོའི་སེམས་ཀྱི་འདུ་ཤེས་དང་གོ་རྟོགས། སད་སྟོབས་ཀྱི་སྤོབས་པ་བཅས་ལ་རེག་ལས་ཀྱི་ཡོད་པ་ཡིན་ཞེས་བསྒྲགས་པ་ཡིན།