བོད། ནམ་ཡང་འཆི་མི་སྲིད།

རང་རེ་ནི་ལོ་ངོ་ཁྲི་སྟོང་གོང་ནས་འཛམ་གླིང་མཐོ་སྒང་དུ་གནས་གཞི་བཟུང་སྟེ་ས་ཁྱོན་དང་རིག་གནས། དཔལ་འབྱོར་དང་དམག་དོན་སོགས་ཀྱི་ཐད། དར་རྒུད་སྣ་ཚོགས་མྱངས་མྱོང་བ་དང་། དར་བའི་རྩེ་མོར་ཤར་ཕྱོགས་རྒྱ་དང་ལྷོ་ཕྱོགས་རྒྱ་གར། ནུབ་ཕྱོགས་ཁ་ཆེའི་ལུང་པ་སོགས་སུ་སྙོང་སྟོབས་ཀྱི་གོ་ཆ་བཙན་པའི་དམག་དཔུང་ཁྲི་ཕྲག་གིས་རྒོལ་འཛིང་དང་། རྒྱལ་ཁ་ཆེན་པོ་བླངས་མྱོང་བའི་བློ་རིག་ལྡན་པའི་མི་རིགས་རྙིང་པ་ཞིག་ཡིན། ཆེས་རྒུད་པའི་རྩེ་མོ་དེང་གི་དུས་སུ་ཡང་སྔོན་བྱོན་མེས་པོ་རྣམས་ཀྱིས་ལུས་སྲོག་ལོངས་སྤྱོད་འཕང་མེད་དུ་བཏང་སྟེ། མི་རིགས་ཀྱི་ཁྱད་ནོར་དུ་བཞག་པའི་ཤེས་རིག་གི་བང་མཛོད་འདི་ཀོས། འཛམ་གླིང་ཤར་ནུབ་ཀྱི་ས་ཁྱོན་ཧྲིལ་པོར་བོད་ཅེས་པའི་རྒྱལ་ཁབ་ཅིག་དང་། བོད་པ་ཞེས་པའི་བློ་རིག་བཀྲ་བའི་མི་རིགས་ཤིག་ཡོད་པ་བདེན་དཔང་བྱེད་དང་བྱེད་མུས་ཡིན།

བོད་རྒྱལ་ཁབ་ཧྲིལ་པོ་འཐོར་ཞིག་ཏུ་ཕྱིན་ནས་མི་ལོ་ཧྲིལ་པོ་དྲུག་ཅུར་ཟིན་ལ་ཉེ་ཡོད། དུས་རབས་ཕྱེད་ལྷག་ཙམ་གྱི་དུས་ཡུན་དེ་ནི་བོད་མི་རིགས་དང་རིག་གཞུང་། ཁོར་ཡུག་དང་བཅས་པར་ཤིན་ཏུ་ཚབས་ཆེ་བའི་གོད་ཆགས་ཕོག་པའི་ལོ་རྒྱུས་ཀྱི་ཉི་མ་ནག་པོ་དེ་ཡིན། བརྡ་འཕྲིན་ཅན་དང་གོ་ལ་གཅིག་གྱུར། ཞི་བདེ་མཉམ་གནས་སུ་འབོད་པའི་དེང་གི་དུས་སུ་ཡང་བོད་ཁམས་ན། དྲག་ཆས་དམག་མི་དང་ཉེན་རྟོག་རུ་མིས་བོད་ཀྱི་ས་ཁུལ་གང་ས་དང་། ལྷག་དོན་གྲོང་ཁྱེར་ཁག་ཏུ་མངོན་ལྐོག་གང་རུང་གི་ཐོག་ནས་བག་ཕེབས་ཀྱི་འཚོ་བ་རོལ་རྒྱུ་ལྟ་ཅི། ཐ་ན་མཁའ་རླུང་ཡང་ལྷོད་པོར་རྔུབ་ས་མེད་པའི་ཚོད་དུ་གནས་ཡོད།

ད་དུང་ཡང་དཔའ་ངར་ཞུམ་མེད་ཀྱིས་མི་རིགས་ཀྱི་བདེ་དོན་སླད། རང་ལུས་མེར་སྲེག་གི་དུད་ནག་ཁྲོད་དུ་ན་ཟུག་གི་འཁུན་སྒྲ་ཙམ་ཡང་མི་འབྱིན་པར། དེ་ལས་ལྡོག་སྟེ་བོད་མི་རིགས་ཀྱི་སྐྱིད་སྡུག་ཞུ་འབོད་དང་འབྱུང་འགྱུར་སྒྲོག་གིན་ཡོད། ནམ་ཡང་འཇིག་པ་མེད་པའི་བདེན་དོན་གྱི་མེ་ལྕེ་འདི་དག་ནི། བོད་མི་རེ་རེ་ཡི་སེམས་ཁུང་གི་ན་ཟུག་ལྕི་མོ་རེ་དང་དྲན་སྐུལ་གྱི་རྡོ་རིང་རེ་ཡིན། དངོས་པོ་གང་ཞིག་ལ་ཡང་དར་གུད་ཀྱི་ཀྱོག་མཚམས་རེ་ཡོད་པ་བཞིན། དབང་ཆ་གཅིག་བསྡུས་ཀྱི་ལམ་ལུགས་གང་ཞིག་ཀྱང་དུས་རབས་འདིར་ནམ་ཡང་འཚོ་གནས་མི་ཐུབ། དེ་ནི་ཨ་རབ་ཀྱི་ “དཔྱིད་ཀ” གསར་བརྗེ་འདིས་བདེན་དཔང་བྱས་ཡོད། སྡུག་རྩུབ་དང་དྲག་དཔུང་གི་འོག་ནམ་ཡང་ཆིག་སྒྲིལ་ཞིག་ཡོང་མི་ཐུབ་པ་ནི། མིའི་རིགས་ཀྱི་འཚོ་གནས་ཀྱི་དགོས་མཁོ་གཙོ་བོ་རེད། རྒྱ་ནག་ནང་དཔལ་འབྱོར་གྱི་མཐོ་རླབས་འཕྱུར་གྱིན་ཡོད་ཀྱང་། སྨྲེ་ངག་དང་སྐྱོ་ཤས་ཀྱི་ངུ་འབོད་འདོན་མཁན་ཇེ་མང་རེད། དོན་དངོས་རྒྱ་ནག་གི་ཡར་རྒྱས་ནི་མཐོ་རིམ་དཔོན་རིགས་དང་ཁོ་ཚོའི་གཉེན་ཉེ། ད་དུང་ཁོང་ཚོ་དང་འབྲེལ་ཡོད་ཀྱི་ཚོང་པ་ཚོ་ཡིན་པ་ལས་མི་དམངས་རྣམས་མིན།

སྤྱི་ལོ་༢༠༡༡ ལོ་འདིར་བོད་ཀྱི་ལོ་རྒྱུས་ནང་ཆབ་སྲིད་ཀྱི་འགྱུར་འགྲོས་རླབས་ཆེན་ཞིག་བྱུང་ཡོད། དེ་ནི་རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་དགའ་ལྡན་ཕོ་བྲང་གི་གཞུང་སྲིད་ཆ་ཚང་མི་དམངས་ཀྱི་ལག་ཏུ་འཇོག་གནང་བ་དེ་རེད། དེ་ཡང་བཙན་བྱོལ་ནང་གི་མི་རབས་གསར་པ་ཚོས་འགན་ལེན་ཐུབ་ཀྱི་ཡོད་པས་ཡིན། འོན་ཀྱང་དེ་སྔ་དང་མི་འདྲ་བར་བོད་མི་རེ་རེར་ཡང་རང་ཁུར་གྱི་འགན་འཁྲི་ཇེ་ཆེར་ཕྱིན་ཡོད། དེ་སྔོན་གོང་ས་མཆོག་ཞི་བདེའི་དེད་དཔོན་ཞིག་དང་ནང་པའི་ཆོས་ཕྱོགས་ཀྱི་དབུ་ཁྲིད་ཅིག་གི་ངོས་ནས། གྲོས་ཚོགས་གང་སར་ཞབས་ཀྱིས་བཅག་སྟེ་ལྷན་ཅིག་ཏུ་བོད་ཀྱི་འདས་དང་ད་ལྟ། འབྱུང་འགྱུར་གྱི་སྐོར་བཀའ་སྡུར་གནང་ཐུབ་ཀྱི་ཡོད། ད་ལྟའི་སྲིེད་སྐྱོང་མཆོག་ལ་གོ་སྐལ་དེ་འདྲ་རེག་མི་སྲིད་ཀྱང་། སྔར་གྱི་ལམ་བུ་དང་གཞོན་སྐྱེས་ཞིག བསམ་བློ་གསར་པ་ཞིག་དང་དམ་བཅའ་དང་ཆོད་སེམས་གཏན་པོ་ཞིག་གིས་ཉམ་དམས་སུ་འགྲོ་མི་སྲིད།

ལོ་ངོ་བཅུ་ཕྲག་གཅིག་གོང་ཙམ་ནས་བཙན་བྱོལ་སྤྱི་ཚོགས་ནང་ཀྱོག་མཚམས་ཀྱི་དུས་རིམ་ཞིག་བསུ་གིན་ཡོད། དེ་ནི་མི་རབས་གསར་པའི་སྡེ་མང་པོ་ཞིག་ནུབ་ཕྱོགས་སུ་ཚང་ཁ་ཤིག་ཤིག་གིས་འགྲོ་བཞིན་པ་དེ་རེད། སྤྱི་ཡོངས་ནས་འཕོ་འགྱུར་དེ་དགེ་མཚན་ཞིག་ལས་ཕམ་ཁ་ཞིག་གཏན་ནས་མིན། མི་རབས་འདི་དང་ལྷག་དོན་མི་རབས་རྗེས་མ་ཚོར་དམིགས་བསལ་གྱིས་གོ་སྐབས་རེ་ཐོབ་ཀྱི་ཡོད། ནུབ་ཕྱོགས་སུ་བསྐྱོད་དང་སྐྱོད་བཞིན་པའི་བོད་པ་རེ་རེས། མ་མཐར་ཡང་བོད་མི་ཞིག་ཡིན་པའི་འོས་འགན་རེ་ཁུར་ནས་འགྲོ་གི་ཡོད། སྡུག་ས་ནས་བཤད་ན་བོད་ཀྱི་སྐད་ཡིག་སྟེང་ནས་ཁོང་ཚོར་གོ་སྐལ་ཧ་ཅང་ཉུང་བ་དེ་རེད། འགག་སྒོ་དེར་དབུས་བོད་མིའི་སྒྲིག་འཛུགས་དང་ལྷག་དོན་བཀའ་ཤག་གསར་པོའི་ངོས་ནས། ནུབ་ཕྱོགས་སུ་ལས་འཆར་གསར་པ་དང་གོམས་སྟབས་གསར་པ་ཞིག་སྤོ་དགོས་ངེས་རེད། ཇི་ཙམ་དཔལ་འབྱོར་དང་ཤེས་རིག་དར་རྒྱས་ཀྱི་ཕྱོགས་སུ་སླེབས་ན། དེ་ཙམ་གྱིས་རང་འགུལ་དང་འཐབ་རྩོད་ཀྱི་ནུས་པ་ཇེ་རྒྱས་སུ་འགྲོ་ངེས་རེད།

དེང་དཔལ་འབྱོར་དང་ཤེས་རིག ལ་ཞེན་དང་ཧུར་བརྩོན་མེད་ན་ལོ་རྒྱུས་བཤད་པས་ཅི་ཡང་མི་ཕན། ལོ་རྒྱུས་ནི་སྟོབས་དབང་ལྡན་པའི་རིགས་ལ་མ་གཏོགས་དགོས་མཁོ་མེད། ཐ་ན་འཛམ་གླིང་ནང་གི་དམངས་གཙོའི་རྒྱལ་ཁབ་ཆེ་ཤོས་རྒྱ་གར་ལ། ལ་དྭགས་དང་མོན་གྱི་ལོ་རྒྱུས་བཤད་ཀྱང་ནམ་ཡང་ཉན་འཇོག་བྱེད་མི་སྲིད། དེ་ལས་རང་ཁུར་མི་འདོར་བའི་སྟེང་ནས་ཆིག་སྒྲིལ་དང་དཔལ་འབྱོར། ཤེས་ཡོན་ལ་འབད་དགོས་པ་དེ་ནུས་པ་རླབས་ཆེ་ཤོས་དེ་ཡིན། ད་ལྟའི་རྒྱ་ནག་གཞུང་འདི་འབར་རྫས་ཤིག་གི་སྟེང་རྐང་པ་བཞག་ནས་ཡོད་པ་དང་གཅིག་མཚུངས་ཡིན། གལ་ཏེ་ཁྱེད་ཀྱི་རྐང་པར་ལྷོད་ཡངས་ཅུང་ཙམ་བྱུང་ན་འབར་རྫས་དེ་གས་ངེས་རེད། ད་ལྟའི་དུས་རབས་འདིར་དྲིལ་བསྒྲགས་སྙན་པོ་ཞིག་དང་དངུལ་ལོར་གྱི་བསླུ་བྲིད་ཀྱིས་གནས་སྐབས་ཙམ་མ་གཏོགས་འཁྱོལ་ཐབས་མེད། རྒྱ་ནག་འཛམ་གླིང་གི་མདུན་ཐད་དུ་འགྲོ་གི་ཡིན་ཟེར། ལམ་དེར་བསྐྱོད་པར་སྒོ་མོ་འབྱེད་དགོས་པ་ལས་ནམ་ཡང་ཐར་ཐབས་མེད། སྒོ་མོ་དེ་ནས་འཛུལ་འོང་བའི་རླུང་བུ་རེ་རེ་དབང་ཆ་གཅིག་བསྡུས་ཀྱི་དམར་པོའི་མེ་ལྕེ་འཇོམས་པའི་རྡུལ་ཕྲན་རེ་རེ་རེད།།