ཁ་སང་སྟོན་པ་ཡེ་ཤུའི་འཁྲུངས་སྐར་ཉིན་ནེ་ཇེ་རེ་ཡའི་ནང་དྲག་སྤྱོད་པས་འགད་རྫས་གཏོར་ཏེ་མི་ ༤༠ ཙམ་དམར་གསོད་དང་། མི་མང་པོ་ཞིག་ལ་རྨས་སྐྱོན་བཟོས་ཡོད་འདུག
ཕྱི་ཚེས་ ༢༥ ཉིན་ཏེ་སྟོན་པ་ཡེ་ཤུའི་འཁྲུངས་སྐར་ཉིན་ནེ་ཇི་རེ་ཡའི་ (Nigeria) རྒྱལ་ས་ཨ་བྷུ་ཇཱ་ (Abuja) ཡི་ཉེ་འགྲམ་གྱི་ཡེ་ཤུའི་ལྷ་ཁང་ཞིག་ལ་དྲག་སྤྱོད་པས་འགད་རྫས་གཏོར་ཏེ་མི་ ༣༥ རྐྱེན་ལམ་དུ་བཏང་ཡོད་པ་དང་། དེ་བཞིན་ས་གནས་གཞན་འགར་ཡང་འགད་རྫས་གཏོར་ཏེ་མི་ ༤ དང་ཉེན་རྟོག་པ་ ༡ བཅས་ཉིན་དེར་ཁྱོན་མི་ ༤༠ ཙམ་འགས་གཏོར་ཁྲོད་རྐྱེན་ལམ་དུ་བཏང་ཡོད་འདུག
དྲག་སྤྱོད་པས་འགས་གཏོར་དོན་རྐྱེན་དེ་བྱུང་རྗེས་ནེ་ཇི་རེ་ཡའི་སྲིད་འཛིན་ཇོ་ནཱ་ཐན་ (Gooodluck Jonathan) གྱིས་དྲག་སྤྱོད་པའི་བྱ་འགུལ་འདི་ནི། ཉེན་བརྡ་མེད་པར་རྒྱལ་ཁོངས་གཅིག་སྒྲིལ་གྱི་བདེ་འཇགས་དང་རང་དབང་ལ་གཏོར་རྒོལ་བྱས་པ་ཞིག་ཡིན་སྟབས། ནེ་ཇི་རེ་ཡའི་མི་མང་ཚང་མས་དྲག་སྤྱོད་པ་ཕམ་པར་རྒྱག་རྒྱུར་རྡོག་རྩ་གཅིག་སྒྲིལ་བྱ་དགོས་པར་བརྗོད་འདུག་ལ། དོན་རྐྱེན་དེའི་ཐན་ཨ་རིའི་གཞུང་དང་ཧྥ་རན་སིའི་སྲིད་འཛིན། དེ་བཞིན་དབྱིན་ཇིའི་ཕྱི་སྲིད་དྲུང་ཆེ་བཅས་ཀྱིས་ཀྱང་ནེ་ཇི་རེ་ཡའི་མི་མང་ཐུགས་གསོ་དང་རྐྱེན་འདས་སུ་གྱུར་པ་རྣམས་ལ་མྱ་ངན་ཞུ་ཚིག་ཕུལ་ཡོད་པ་མ་ཟད། དྲག་སྤྱོད་པར་སྐྱོན་བརྗོད་ཀྱང་བྱས་འདུག
ཐེངས་འདིའི་འགད་རྫས་གཏོར་མཁན་ནི་བྷོ་ཁོ་ཧཱ་རམ་(Boko Haram) དྲག་སྤྱོད་དམག་གི་སྒྲིག་འཛུགས་ཀྱི་བྱ་འགུལ་ཞིག་ཡིན་ཞིང་།སྒྲིག་འཛུག་དེ་ནི་ནེ་ཇི་རེ་ཡའི་ཁ་ཆེ་རང་ལུགས་པ་ཁག་ཅིག་གིས་༢༠༠༢ལོར་གསར་འཛུགས་བྱས་པ་ཞིག་དང་།ཁོང་ཚོའི་ལངས་ཕྱོགས་ནི་ཁ་ཆེ་སྤྱི་ཚོགས་ནང་ནུབ་ཕྱོགས་པའི་ཤེས་ཡོན་དང་ཤུགས་རྐྱེན་ལ་འགོག་རྒོལ་ཐོག ཁ་ཆེ་ཆོས་ལུགས་གཞིར་བཟུང་གིས་ཡུལ་གྱི་ཁྲིམས་ལུགས་གཏན་འབེབ་དང་སྤྱི་ཚོགས་རྒྱུན་གནས་བྱ་དགོས་པ་དེ་ཡིན་འདུག
གཞན་ཡང་། ཉིན་དེར་ཨབ་གྷན་གྱི་བྱང་ཤར་ཊ་ལོ་ཁན་ (Taloqan) ས་གནས་སུའང་རང་སྲོག་བློས་གཏོང་གི་དྲག་སྤྱོད་པ་ཁག་ཅིག་གིས་འགད་རྫས་གཏོར་ཏེ། གྲོས་ཚོགས་འཐུས་མི་ཞིག་ཚུད་པའི་མི་ ༢༢ ཙམ་དམར་གསོད་དང་མི་ ༥༠ ་ཙམ་ལ་རྨས་སྐྱོན་བཟོས་ཡོད་འདུག འགད་རྫས་གཏོར་མཁན་སུ་ཡིན་ཁ་གསལ་ཤེས་རྟོགས་བྱུང་མེད་ཀྱང་། དོགས་གཞི་ཆེ་ཤོས་ནི་ཨབ་གྷན་གྱི་བྱང་ཤར་ས་ཁུལ་དུ་ཊ་ལེ་བྷན་གྱི་ཕྱོགས་གཏོགས་ཁ་ཆེ་དྲག་སྤྱོད་པའི་སྒྲིག་འཛུགས་བསྡུས་མིང་ལ་ “ཨའེ་ཨེམ་ཡུའུ” (IMU) ཞེས་པ་ཞིག་ཡོད་པ་དེ་ཡིན་པར་ཚོད་དཔག་བྱེད་བཞིན་ཡོད་འདུག
གསར་འགོད་པ། བནྡེ་སྐྱབས།
དྲང་བདེན་དང་བྱམས་བརྩེ་མེད་ན། དྲག་སྤྱོད་རང་བཞིན་གྱིས་མེད་པར་ཆགས་མི་སྲིད་དེ་ཡང་ཤེས་དགོས་འདུག