བཀག་ཀྱང་མི་ཐུབ་པའི་ཉིས་སྟོང་བཅུ་གཉིས་སླེབས་སོང་།

ཉིས་སྟོང་བཅུ་གཉིས། ༢༠༡༢ལོ་འདི་ནི་ལོ་ངོ་གཞན་དག་དང་འདྲ་བར་བཀག་ཀྱང་མི་ཐུབ་པར་ང་ཚོའི་མིག་མདུན་དུ་སླེབས་ཡོད། མིག་མདུན་དུ་སླེབས་མ་ཐག་པའི་ལོ་འདི་ལ་འཛམ་གླིང་གི་མི་མི་ཉུང་བ་ཞིག་གིས་ཆེས་སེམས་ཁྲལ་བྱེད་སའི་ལོ་ཞིག་ཀྱང་ཆགས་མྱོང་ཡོད། དེ་ཡི་ཆེད་དུ་སྙན་གྲགས་ཅན་གྱི་གློག་བརྙན་དང་སྙན་གྲགས་ཅན་གྱི་རྩོམ་པ་པོ་སོགས་ཆེས་མི་ཉུང་བ་ཞིག་གིས་ཉིས་སྟོང་བཅུ་གཉིས་ལ་སྔོན་བརྡ་གྲངས་མེད་ཅིག་རྒྱགས་མྱོང་ཡོད། གང་ལྟར། དེ་རིང་ནི་ཉིས་སྟོང་བཅུ་གཉིས་ཀྱི་སྤྱི་ཟླ་དང་པོའི་ཚེས་གཅིག་གི་འགོ་བཟུང་མ་ཐག་ཡིན། ངས་ལོ་འདིའི་འགོ་བཟུང་མ་ཐག རང་ཉིད་བོད་མི་ཞིག་ཡིན་པའི་ངོས་ནས་ཐོག་མར་བོད་མི་དག་ལ་ང་ཚོ་ཡང་འཛམ་གླིང་སྤྱི་མཚུངས་ཀྱི་མི་ཞིག་བྱེད་པའི་ཐོབ་ཐང་དང་འོས་འགན་ཚང་མ་ཡོད་པར་བསྐུལ་འདེད་གཏོང་གི་ཡིན།

ཉིས་སྟོང་བཅུ་གཉིས་ནི་ལོ་ངོ་གཞན་དག་དང་འདྲ་བར་ང་ཚོས་དེ་རིང་བསྐྱེལ་མ་བྱེད་བཞིན་པའི་ཉིས་སྟོང་བཅུ་གཅིག་བཞིན་ང་ཚོའི་ལག་ནང་ནས་མ་ཤོར་གོང་དེར། ངས་འདི་ནས་འཛམ་གླིང་གི་ཉིས་སྟོང་བཅུ་གཅིག་ཁྲོད་ཀྱི་ཉམ་མྱོང་དང་འཛམ་གླིང་གཞན་དག་ནས་གཉིད་ལས་སད་པའི་ཁ་ཆེ་མི་རིགས་ཆེས་མང་བོ་ཞིག་གི་གསར་བརྗེ་ཡི་མདུན་བསྐྱོད་དང་མི་མང་གི་སྙིང་སྟོབས་ཀྱི་བཞུར་བའི་ཁྲག་དམར་པོའི་འཇིག་རྟེན་སོགས་ལ་བསམ་བློ་ཞིབ་དུ་བཏང་ནས། མི་རིགས་ཤིག་གི་བདེ་སྡུག་ནི་མི་རིགས་རང་ཉིད་ཀྱི་ཐག་གཅོད་བྱེད་དགོས་པ་ལས་གཞན་ཞིག་གི་སྣེ་ཁྲིད་པར་རེ་སྟོང་ནམ་ཡང་བཅིངས་མི་རིང་བར་བརྡ་སྐུལ་དེ་ལ་ཡང་བསམ་གཞིགས་ནན་པོ་བྱེད་དགོས་པའི་སྐུལ་འདེད་ནི། ཉིས་སྟོང་བཅུ་གཅིག་གིས་བྱས་རྗེས་དང་ཉིས་སྟོང་བཅུ་གཉིས་བསུ་བའི་སྔོན་བརྡ་དང་། གསར་དུ་སླེབས་པའི་ཉིས་སྟོང་བཅུ་གཉིས་འདི་ལ། འཛམ་གླིང་ན་སེམས་ཚབ་བྱེད་པའི་སྒྲོམ་གྱི་ལུགས་ལྟར་ན། ཉིས་སྟོང་བཅུ་གཉིས། སྤྱི་ཟླ་བཅུ་གཉིས། ཚེས་ཉེར་གཅིག་ཉིན་འཛམ་གླིང་ཧྲིལ་བོར་འཇིག་པར་རློམ་གྱི་ཡོད་པ་རེད། ང་ནི་དེ་ལ་ཡིད་ཆེས་མི་བྱེད་མཁན་གྱི་གྲངས་དུ་གཏོགས་པ་ཡིན་དུས། ངས་ཀྱང་དེ་དག་གི་བསམ་ཚུལ་དེ་ཡང་ས་གནས་ས་ཁུལ་ཁ་ཤས་ཤིག་དང་འབྲེལ་བ་ཡོད་པར་ཏན་ཏན་ཁས་ལེན་བྱས་ཀྱང་མ་འགྲིག་པ་མེད། དེ་ཡིན་དུས་ས་གནས་ས་ཁུལ་དེ་དག་གང་དུ་ཡིན་མིན་ནི་ད་ལྟའི་འཆར་བཤད་ཐུབ་མེད་ཀྱང་། འཛམ་གླིང་འདིར་གོད་ཆག་ཉམས་རྒུད་ཅིག་མི་ཡོང་བར་འབད་འབུངས་བྱེད་རྒྱུ་ནི། གོ་ལའི་ཤར་ལྷོ་ནུབ་བྱང་ཚང་མར་འཚོ་བའི་འགྲོ་བ་མི་ཡོངས་རྫོགས་ལ་གཅིག་གྱུར་གྱི་འགན་ཞིག་ཡོད་པ་ལས། ཉིས་སྟོང་བཅུ་གཉིས་སླེབས་པ་དང་བསྒྲགས་ནས་གོ་ལ་ཧྲིལ་བོར་འཐོར་འགྲོ་བ་དེ་འདྲ་ཡང་གཏན་ནས་མིན། གོ་ལ་འདི་ཉིད་ནམ་ཞིག་འཇིག་པར་ཡིད་ཆེས་བྱེད་ཆོག་ན་ཡང་། ཉིས་སྟོང་བཅུ་གཉིས་ཀྱི་ལོ་འདི་ནི་གཏན་ནས་མིན་པར་ངས་འདི་ནས་བཤད་ཐུབ་ཀྱི་འདུག

འཛམ་གླིང་ཧྲིལ་བོ་འདི་ཇི་ལྟར་འཇིག་མིན་དེ་ནི་འགྲོ་བ་མིའི་རང་བྱུང་ཁོར་ཡུག་ལ་གནོད་ཚབ་ཇི་ཙམ་མང་དུ་བཏང་ན་དེ་ཙམ་ཐག་ཉེ་བར་འགྲོ་བར་བདག་གིས་ནི་ཡིད་ཆེས་བྱེད་རྒྱུ་ཡིན། དེ་ཡིན་དུས་རང་བྱུང་ཁོར་ཡུག་དང་རང་བྱུང་གཏེར་ཁ། རང་བྱུང་གི་སྐྱེ་དངོས་སྲོག་ཆགས་ཚང་མར་འགན་འཁུར་བྱེད་པའི་བདག་དབང་དེ་ཉིད་འགྲོ་བ་ཡོངས་ལ་ཡོད་པར་ངས་འདི་ནས་ཉིས་སྟོང་བཅུ་གཉིས་གསར་དུ་སླེབས་པ་དང་འགྲོག་ནས་དྲ་ཐོག་གི་སྤུན་ཟླ་དག་རྒྱུད་ནས། འགྲོ་བ་ཡོངས་དང་སྐྱེ་འགྲོ་བོད་ཀྱི་འཆི་གསོན་ལ་ངེས་ཤེས་རྙེད་པར་བོད་པ་ཡོངས་ལ་བརྡ་འདེད་ཅིག་ཞུས་པ་དང་ཉིས་སྟོང་བཅུ་གཉིས་ལ་ཁ་གཡང་ཞིག་ཀྱང་ཞོར་དུ་འབོད། ཉིས་སྟོང་བཅུ་གཉིས་ཀྱི་ལོ་འདི་ནི། འཛམ་གླིང་འདི་ན། མི་རིགས་ཀྱི་རང་དབང་གང་ན་མེད་པ་དང་། མི་རིགས་ཀྱི་བདག་དབང་སུ་ལ་མེད་པ། མི་རིགས་ཀྱི་འཆི་གསོན་ལ་ཉེན་ཁ་ཆེ་བ། མི་རིགས་ཀྱི་འདུ་ཤེས་ལ་གོ་རྟོགས་རྙེད་པར་བསམ་བློའི་ལང་ཚོ་སྨིན་པ་དང་། མི་རིགས་སུ་ལ་གང་ན་སྡུག་བསྔལ་ཡོད་པ་དེ་དག་སྡུག་བསྔལ་ལས་གྲོལ་བར་སྨོན་འདུན་གྲངས་མེད་ཞུ།