དུས་དབང་ཐོག་གི་དཀའ་ངལ།

རྡོར་གདན་དུས་དབང་ཐོག་ཆོས་ཞུ་བ་ཁག་ཅིག་ལ་འཐུང་ཆུ་དང་གློག དེ་བཞིན་གསང་སྤྱོད་འཁྲུད་ཁང་བཅས་ཀྱི་ཐད་ནས་དཀའ་ངལ་མི་ཉུང་བ་ཞིག་འཕྲད་བཞིན་འདུག

རྡོར་གདན་དུས་དབང་གོ་སྒྲིག་ཚོགས་ཆུང་གིས་ཆོས་ཞུ་བ་རྣམ་ལ་གྲ་སྒྲིག་གནང་བའི་སྡོད་གུར་ཁག་ཏུ་ཉིན་འདི་འགར་ཆུ་དང་གློག གསང་སྤྱོད་བཅས་ཀྱི་དཀའ་ངལ་འཕྲད་ཀྱིན་ཡོད་པ་མ་ཟད། སྡོད་གུར་དང་གསུང་ཆོས་ར་བའི་ལམ་ཐག་རིང་དྲགས་པའི་དབང་གིས་དེ་སྔོན་སྡོད་གུར་སྔོན་མངགས་གནང་མཁན་མང་དག་ཅིག་གིས་གུར་ཕྱིར་སློག་བྱས་ཏེ། རྡོར་གདན་མཆོད་རྟེན་ཆེན་མོ་དང་གསུང་ཆོས་ར་བའི་ཉེ་འཁོར་གྱི་རྒྱ་གར་ཡུལ་མིའི་ཁང་པ་གླས་ཏེ་སྡོད་བཞིན་ཡོད་འདུག དེ་བཞིན། ཆོས་ཞུ་བའི་སྡོད་གུར་གྱི་འཁོར་ཡུག་གཙང་སྦྲ་མེད་པ་དང་། ཅ་དངོས་རྐུ་ལ་ཤོར་བ་སོགས་ཀྱི་གནས་ཚུལ་ཡང་མི་ཉུང་བ་ཞིག་འབྱུང་བཞིན་ཡོད་འདུག

འདིའི་ཐད་དུས་དབང་གོ་སྒྲིག་ཚོགས་ཆུང་གི་དྲུང་ཆེ་ཐུབ་བསྟན་བྱམས་པ་ལགས་སུ་བཅར་འདྲི་ཞུས་པར། གོ་སྒྲིག་ཚོགས་ཆུང་གིས་ཐོག་མར་ས་གནས་གཅིག་ཏུ་སྡོད་གུར་ ༢༠༠༠ ལྷག་ལས་རྒྱག་འཆར་མེད་ཀྱང་། གུར་སྔོན་མངགས་བྱེད་མཁན་ཇེ་མང་དུ་ཕྱིན་སྟབས། བདུན་ཕྲག་གཅིག་ལྷག་གི་རིང་མཱ་གྷ་ངྷ་གཙུག་ལག་སློབ་གྲྭའི་ཐང་ཆེན་གཙོས་པའི་ས་གནས་བཞིའི་ནང་གུར་ཇེ་མང་དུ་བཏང་སྟེ་མཐར་གུར་ ༣༥༠༠ ཙམ་རྒྱག་དགོས་བྱུང་ཡོད་པ་དང་། དེ་སྔ་གོ་སྒྲིག་ཚོགས་ཆུང་གི་གུར་དེ་ཕྱི་ཚེས་ ༢༥ ཉིན་གཏོང་རྒྱུ་བྱས་ཡོད་ཀྱང་། མི་མང་པོ་ཞིག་སྔ་མོ་ནས་འབྱོར་ཡོད་སྟབས། དེ་དག་གི་སྔ་ངལ་སེལ་ཆེད་དུས་བཅད་སྔ་བསྣུར་གྱིས་བགོ་འགྲེམས་བྱས་ཡོད་པ་མ་ཟད། གུར་ཕྱིར་རྩིས་སྤྲོད་བྱས་པ་དག་གུར་མ་རག་པ་ཚོར་སྤྲད་དེ་ཕན་ཚུན་ཁ་གསབ་ལྟ་བུ་ཡང་བྱས་ཡོད་འདུག

དྲུང་ཆེ་ཐུབ་བསྟན་ལགས་སུ་སྡོད་གུར་ནང་དཀའ་ངལ་འཕྲད་བཞིན་པ་དེ་དག་དུས་ཡུན་ག་ཚོད་ནང་སེལ་ཐུབ་མིན་དྲིས་པར་ཁོང་གིས་བརྗོད་དོན།  “ ཐེངས་འདིར་མི་འབོར་མང་པོ་དང་སྡོད་སྒར་གྱི་གྲངས་ཀ་མང་པོ་ཡིན་སྟབས། ལས་ཀའི་ཕྱོགས་ནས་ཆུ་ཚོད་འགོར་འགྱང་རིགས་ཡོང་གི་འདུག  ཡིན་ནའང་། ང་ཚོའི་ངོས་ནས་མངའ་སྡེ་གཞུང་གི་མི་སྣ་ར་འབྲེལ་བ་བྱས་ཡོད་སྟབས། ཆུ་དང་གློག་གི་དཀའ་ངལ་དེ་མགྱོགས་མྱུར་སེལ་ཐུབ་པ་རེད་ལ། བདེ་འཇགས་སྲུང་སྐྱོབ་ཀྱི་ཐད་ནས་ཀྱང་མངའ་སྡེ་གཞུང་གི་མངགས་གཏོང་བྱས་པའི་བདེ་སྲུང་མི་སྣ་དང་། བོད་ཀྱི་གཞོན་ནུ་ལྷན་ཚོགས་ཀྱི་དང་བླངས་བ་བཅས་གོ་སྒྲིག་བྱེད་བཞིན་པ་ཡིན། མི་མང་ཡོངས་ལ་གཅིག་གྱུར་གྱི་དཀའ་ངལ་ཞིག་ཡོད་པ་ནི། གསུང་ཆོས་ར་བ་དང་སྡོད་གནས་བར་ལམ་ཐག་རིབ་བ་དེ་ཡིན་སྟབས། ང་ཚོས་ད་ཆར་ཉིན་ལྟར་རླངས་འཁོར་ཆེ་བ་ཁག་གོ་སྒྲིག་གིས་མི་མང་སྐྱེལ་འདྲེན་བྱེད་བཞིན་ཡོད། གསུང་ཆོས་དངོས་གཞིའི་སྐབས་ཉིན་རེར་རླངས་འཁོར་ ༢༠ གཏོང་འཆར་ཡོད། གལ་སྲིད་ད་དུང་མ་འདང་ཚེ་རླངས་འཁོར་མང་དུ་གཏོང་རྒྱུ་ཡིན” ཞེས་བརྗོད་བྱུང་།

ཁ་སང་ཕྱི་ཚེས་ ༡ ཉིན་གསར་འགོད་པ་བསྐྱར་དུ་མི་མང་སྡོད་གནས་སུ་ཕྱིན་ཏེ། སྡོད་གུར་གོ་སྒྲིག་ཚོགས་ཆུང་གི་ཚོགས་གཙོ་པ་སངས་ལགས་སུ་བཅར་འདྲི་ཞུས་པར། ཉེ་ལམ་གོ་སྒྲིག་ཚོགས་ཆུང་གིས་མི་སྟོང་ཕྲག་ ༤༠ ལྷག་གི་ཚད་གཞི་བཟུང་བའི་སྡོད་གུར་ཁག་ལས་མི་སྟོང་ཕྲག་ ༢༥ ཡས་མས་ཁེངས་ཏེ། སྤྱི་ཡོངས་ཀྱི་སྡོད་གུར་དཀའ་ངལ་སེལ་ཡོད་ཀྱང་། མངའ་སྡེ་གཞུང་ངོས་ནས་ཐོག་མའི་ཁས་ལེན་ལྟར་ལས་ཀ་ཏག་ཏག་མ་བསྒྲུབ་པའི་དབང་གིས། ད་ལྟའི་ཆར་འཐུང་ཆུ་དང་གསང་སྤྱོད་འཁྲུད་ཁང་ལ་ཆུ་མེད་པར་སྦུ་གུ་འགག་འགྲོ་བའི་དཀའ་ངལ་ཆེན་པོ་འཕྲད་བཞིན་ཡོད་པ་དང་། གློག་གི་ཐད་ནས་ཀྱང་དེ་སྔ་མངའ་སྡེ་གཞུང་ལ་འབོད་སྐུལ་ཞུས་ཏེ་ཧིན་སྒོར་འབུམ་ ༤༠ ལྷག་གི་འགྲོ་སོང་བཏང་ཡོད་ཀྱང་། ད་ལྟ་གློག་དུས་ལྟར་གཏོང་མི་ཐུབ་པ་དང་ཡང་ཡང་ཆད་འགྲོ་བའི་དཀའ་ངལ་འཕྲད་བཞིན་ཡོད་འདུག གོ་སྒྲིག་ཚོགས་ཆུང་གིས་མི་མང་གི་དཀའ་ངལ་སེལ་ཐབས་སུ་ཉིན་རེར་ཆུ་སྐྱེལ་འདྲེན་དང་། སྡོད་གུར་ཁག་ནང་གློག་གཏོང་འཕྲུལ་ཆས་ཀྱང་བཙུགས་འདུག   

མཐར་གསར་འགོད་པས་མི་མང་སྡོད་གནས་སུ་ཟ་ཁང་བཟུང་ཡོད་པ་བསོད་ནམས་ཚེ་རིང་ལགས་སུ་བཅར་འདྲི་ཞུས་པར་ཁོང་གིས། “ཐོག་མར་གོ་སྒྲིག་ཚོགས་ཆུང་གིས་ཚེ་ ༢༢ ཉིན་ནས་བཟུང་ཆུ་གཏོང་གི་ཡིན་གསུངས་ཀྱང་། ད་ལྟ་དངོས་སུ་ས་གནས་སུ་བསླེབས་སྐབས་ཉིན་གྲངས་འདི་དག་རིང་ཆུ་དུས་ཐོག་ཏུ་ཡོང་གི་མི་འདུག་ལ། གློག་གི་ཐད་ནས་ཀྱང་དཀའ་ངལ་འདུག ཁ་སང་ཁས་ཉིན་ནས་བཟུང་དོང་ཆུ་འཐེན་གྱི་འདུག་ཀྱང་། དོང་ཆུ་རྙོག་པ་དང་འདམ་དྲིའི་དབང་གིས་འཐུང་ཐུབ་ཀྱི་མི་འདུག ཟ་ཁང་དག་ལ་གློག་གི་དཀའ་ངལ་འཕྲད་དེ་ཉིན་རེར་ཧིན་སྒོར་ ༣༠༠ རེའི་འགྲོ་སོང་བཏང་སྟེ་རང་ངོས་ནས་འཐེན་པ་ཡིན། གང་ལྟར། གོ་སྒྲིག་པའི་ངོས་ནས་མགྱོགས་མྱུར་འཐུང་ཆུ་དང་གློག་གི་དཀའ་ངལ་སེལ་རྒྱུ་གལ་ཆེན་པོ་རེད ”ཅེས་བརྗོད་བྱུང་།

གསར་འགོད་པ། དོན་གོས་རྡོ་རྗེ་གནད་ནས།