གངས་ཅན་པ་ཞིག་ཡིན་པའི་ངོས་ནས་མ་ཤི་བར་རྩ་དོན་ཐོག་ཤུཊ་རྒྱག་རྒྱུ་ཡིན།

དེ་རིང་སྔ་དྲོར་༧གོང་ས་མཆོག་གིས་བོད་ནས་ཕེབས་པའི་ཆོས་ཞུ་བ་རྣམས་ལ་དམིགས་བསལ་བཀའ་སློབ་གནང་སྟེ། དེང་སྐབས་བོད་ནང་རྒྱན་འཛུགས་ཤོ་རྒྱག་དང་བཟང་སྤྱོད་ཉམ་ཆག་ཏུ་འགྲོ་བཞིན་ཡོད་པའི་ཐད་ཐུགས་སྣང་གནང་དགོས་པ་དང་། བོད་ནང་གི་ཁོར་ཡུག་གཅེས་ཉར་དང་ཤེས་ཡོན་ཡར་རྒྱས་ཐོག་འབད་བརྩོན་གནང་དགོས་པའི་སྐུལ་མ་བཅས་གནང་སོང་།

དེ་རིང་སྔ་དྲོའི་ཆུ་ཚོད་ ༡༠ དང་ཕྱེད་ཀའི་སྟེང་༧གོང་ས་མཆོག་གིས་གནས་མཆོག་རྡོ་རྗེ་གདན་གསུང་ཆོས་ར་བའི་ནང་། བོད་ནས་ཕེབས་པའི་ཆོས་ཞུ་བ་ ༨༠༠༠ ལྷག་ལ་དམིགས་བསལ་བཀའ་སློབ་བསྩལ་སོང་། སྐབས་དེར་༧གོང་ས་མཆོག་གིས་བོད་རྒྱའི་དཀའ་རྙོག་དང་། རྒྱ་གཞུང་གིས་བོད་པའི་འབྲོག་པ་རྣམས་གྲོང་བརྡལ་ཅན་དུ་བསྒྱུར་བ། དེ་བཞིན་བོད་པའི་ཁོར་ཡུག་དང་ཤེས་ཡོན། ཡ་རབས་བཟང་སྤྱོད་སོགས་ཀྱི་ཐོག་ཧ་ཅང་ནན་ཏན་གྱིས་གསུངས་སོང་། ཐོག་མར་༧གོང་ས་མཆོག་གིས་བོད་རྒྱའི་དཀའ་རྙོག་གི་ངོ་བོའི་སྐོར་ལ་གསུངས་དོན། “ གཞིས་ལུས་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ་ལ་ངོ་མཚར་སྐྱེ་དགོས་པ་ཞིག་རེད། འཛམ་གླིང་སྟེང་མི་མང་པོ་ཞིག་གིས་བོད་མིའི་ཡ་རབས་སྤྱོད་བཟང་དང་དྲང་པོ་བྱེད་པ་དེ་གཞན་དང་མི་འདྲ་བ་ཞིག་རེད་ཟེར་གྱི་འདུག་ལ། རྒྱ་རིགས་གྲོགས་པོ་ཚོའི་ནང་བློ་གཟུ་བོར་གནས་མཁན་ཚོས་ཀྱང་། བོད་མིའི་གཤིས་ཀ་ཡ་རབས་དང་དྲང་པོ་རེད་ཟེར་མཁན་འདུག ཁོང་ཚོ་རྒྱ་རིགས་ཡིན་ནའང་རྒྱ་རིགས་ལས་བོད་པ་ཡག་པོ་འདུག་ཅེས་བཤད་ཀྱི་འདུག ང་ཚོར་དཀའ་ངལ་ཞིག་འཕྲད་ཡོད་པ་རེད། དཀའ་ངལ་འཕྲད་པ་དེ་མིས་བཟོས་པའི་དཀའ་ངལ་ཞིག་རེད། འཛམ་གླིང་གང་སར་འབྱུང་བཞིའི་དཀའ་ངལ་འཕྲད་ཀྱི་ཡོད་ཀྱང་། དཀའ་ངལ་མང་པོ་ཞིག་མིས་བཟོས་པའི་དཀའ་ངལ་ཡིན་པ་གསལ་པོ་རེད། མིས་བཟོས་པའི་དཀའ་ངལ་ཡིན་ན། དཀའ་ངལ་དེ་མིས་སེལ་ཐུབ་པ་ཞིག་ཏན་ཏན་ཡིན་དགོས་པ་རེད། མི་སུ་ཡིན་ནའང་དཀའ་རྙོག་བཟོ་འདོད་ཡོད་པ་མ་རེད། དཔེར་ན། རྒྱ་རིགས་གྲོགས་པོ་ཚོའི་ནང་དུ་རྙོག་དྲ་བཟོ་འདོད་མཁན་ཡོད་པ་མ་རེད། རྒྱ་ནག་སྲིད་གཞུང་ལྟ་བུར་མཚོན་ནའང་འདྲ་ཆགས་པོ་དང་ཡིད་དུ་འོང་བ། གཞན་གྱིས་བསྟོད་བསྔགས་གཏོང་ས་ཞིག་ཆགས་ན་འདོད་ཀྱི་ཡོད། སུ་ཡིན་ནའང་རྙོག་དྲ་འདོད་མཁན་ཡོད་པ་མ་རེད། བྱེད་སྟངས་ཀྱི་རྐྱེན་པས་རྙོག་དྲ་མི་འདོད་ནའང་ཡོང་བསྡད་པ་ཞིག་རེད། ཐུག་ས་དེ་མ་ཤེས་པའི་དབང་གིས་བྱུང་བ་གསལ་པོ་རེད། བཅོམ་ལྡན་འདས་ཀྱིས་སྲིད་པའི་རྩ་བ་མ་རིག་པ་ལས་བྱུང་བ་རེད། འཛམ་གླིང་གི་དཀའ་ངལ་མང་པོ་ཞིག་བླང་དོར་མ་ཤེས་པར་རྨོངས་པའི་དབང་གིས་ཡོང་བསྡད་པ་རེད་ཅེས་གསུངས་ཡོད ” ཅེས་གསུངས་སོང་།

ཁོང་གིས་མུ་མཐུད་དུ་གསུངས་དོན། “ བོད་པའི་དཀའ་ངལ་ལ་མཚོན་ནའང་། རྩ་བ་མ་ཤེས་པའི་དབང་གིས་བྱུང་བ་གསལ་པོ་རེད། རྒྱ་རིགས་དབང་ཆ་ཡོད་མཁན་དེ་ཚོས་བོད་ཀྱི་གནས་ཚུལ་ངོ་མ་མ་ཤེས། བོད་ཀྱི་ལོ་རྒྱུས་ཇི་བཞིན་མ་ཤེས། ལྷག་པར་དུ་བོད་ཀྱི་ཆོས་དང་རིག་གཞུང་སྤུས་དག་པོ་དང་གཏིང་ཟབ་པོ་ཡོད་པ་མ་ཤེས། འཛམ་གླིང་གི་དངོས་ཡོད་གནས་ཚུལ་སོགས་མ་ཤེས་པར་མིག་བཙུམ་ནས་བསྡད་ཡོད་སྟབས། དཀའ་ངལ་འདི་བྱུང་བ་རེད། མི་སུ་ཡིན་རུང་ཉམས་མྱོང་བསགས་ཏེ་གནས་ཚུལ་མང་པོ་མཐོང་ཡོང་སྐབས་དངོས་ཡོད་གནས་ཚུལ་ཁས་མི་ལེན་རང་ལེན་རེད། དེ་ཡིན་དུས་མིས་བཟོས་པའི་དཀའ་ངལ་དེ་མི་རང་ཉིད་ཀྱིས་སེལ་ཐུབ་ཀྱི་རེད་ལ། སེལ་རྒྱུའི་བསམ་བློ་ཏན་ཏན་འཁོར་ཡོང་གི་རེད། བོད་ཀྱི་གནས་སྟངས་ལ་ཆ་བཞག་ན་རྒྱ་ནག་ནང་ལོ་བཅུ་གྲངས་གསར་འགྱུར་བཀག་སྡོམ་དང་འཁྱོག་བཤད་བྱས་པ་རེད། ཡིན་ནའང་དེང་སང་རྒྱ་ནག་ནང་ཤེས་ཡོན་ཅན་ཚོའི་ཁྲོད་བོད་ཀྱི་གནས་སྟངས་ཐོག་དོ་སྣང་ཆེ་རུ་འགྲོ་བཞིན་ཡོད་ལ། དངོས་ཡོད་གནས་ཚུལ་ལ་ཞིབ་འཇུག་བྱས་ཡོང་དུས་བོད་ཀྱི་དཀའ་ངལ་དེ་དྲག་གནོན་བྱས་ཏེ་སེལ་ཐབས་མེད་པར་གཉིས་ཕན་ཐོག་སེལ་ཐུབ་རྒྱུར་བསམ་བློ་འཁོར་གྱི་ཡོད། ང་ཚོས་དབུ་མའི་ལམ་གྱི་ཐོག་ཐབས་ཤེས་བྱེད་བཞིན་པ་རེད། རང་རྒྱལ་གཞན་ཕམ་ཟེར་བ་དེ་མ་རེད། རང་གཞན་གཉིས་ལ་ཕན་པ་ཞིག་རེད། ངས་རྟག་པར་འཛམ་གླིང་གི་དཀའ་ངལ་རྣམས་རང་མཐའ་གཅིག་ཏུ་རྒྱལ། གཞན་མཐའ་གཅིག་ཏུ་ཕམ་དགོས་ན། འཛམ་གླིང་གི་དཀའ་རྙོག་སེལ་ཐུབ་ཀྱི་མ་རེད་ཅེས་བཤད་ཀྱི་ཡོད། འབྱུང་འགྱུར་གྱི་བདེ་བ་དང་སྡུག་བསྔལ་དེ་ཕན་ཚུན་ལ་བརྟེན་ཡོད་དུས། གཉིས་ཕན་འོག་སེལ་རྒྱུ་རེད་མ་གཏོགས་ཕྱོགས་གཅིག་གིས་མཁྲེགས་པོ་བྱས་བསྡད་ན་ཁག་པོ་རེད། དཔེར་ན། པཱ་ལཱི་སཱི་ཐན་ལྟ་བུ་རེད། ཕྱོགས་གཉིས་ཀས་ལྟ་བ་མཁྲེགས་པོ་བཟུང་ཡོང་དུས་རྙོག་དྲ་རྒྱུན་མ་ཆད་པར་ཡོང་གི་ཡོད། བདེན་པའི་འཐབ་རྩོད་དེ་བདེན་པ་བདེན་ཐོག་ཏུ་འཁྱོལ་བར་འཚེ་བ་མེད་པའི་ལམ་ནས་འགྲོ་དགོས། ང་ཚོའི་འཐབ་རྩོད་དེ་བདེན་པའི་འབད་རྩོད་རེད། བདེན་པའི་འཐབ་རྩོད་དེ་འཚེ་བ་མེད་པའི་ཐོག་འགྲོ་རྒྱུའི་རྒྱུ་མཚན་ཆ་ཚང་ཡོད།  བདེན་པའི་འཐབ་རྩོད་ཡིན་ནའང་འཚེ་བའི་ལམ་དུ་ཕྱིན་ན་བདེན་པའི་གཟི་བརྗིད་ཉམས་འགྲོ་ཡི་རེད། འཛམ་གླིང་སྟེང་གི་གནས་ཚུལ་མང་པོ་ཞིག་རྒྱུ་མཚན་བདེན་པ་ཡོད་ཀྱང་འཚེ་བའི་ཐོག་འགྲོ་སྐབས་རྙོག་དྲ་མང་པོ་ཞིག་ཡོང་གི་ཡོད། དཔེར་ན་ཨི་རག་དང་ཨབ་གྷན་ལྟ་བུ་རེད། དེ་ཡིན་དུས། བདེན་པའི་འཐབ་རྩོད་བྱེད་ན་འཚེ་བ་མེད་པའི་ལམ་དུ་འགྲོ་དགོས་རྒྱུ་གལ་ཆེན་རེད། དོན་ཆེན་བསྒྲུབ་པར་ངང་རྒྱུད་རིང་ཟེར་བ་ལྟར། འདས་པའི་ལོ་ ༥༠ རིང་ང་ཚོས་ངང་རྒྱུད་རིང་པོའི་ལས་ཀ་མང་པོ་བྱས་ཡོད་སྟབས། བོད་ཀྱི་བདེན་མཐའ་སེལ་རྒྱུར་ཐག་ཆོད་པ་ཞིག་རེད། བདེན་མཐའ་སེལ་བར་རྐྱེན་མང་པོ་ཞིག་འཛོམ་དགོས་པ་རེད། ད་ལྟ་རྒྱ་ནག་ནང་བོད་དོན་ལ་རྒྱབ་སྐྱོར་བྱེད་མཁན་མང་དུ་འགྲོ་བཞིན་ཡོད་ལ། ཡིག་ཆ་ཁག་ཏུ་རྒྱ་ནག་ཏུ་ནང་པ་ས་ཡ་ ༣༠༠ ཙམ་ཡོད་སྐོར་རྗོད་ཀྱི་འདུག ནང་པའི་གྲངས་འབོར་མང་དུ་ཕྱིན་པ་དེ་ང་ཚོའི་མཐུན་པའི་རྐྱེན་ཆགས་པ་རེད ” ཅེས་གསུངས་སོང་།

༧གོང་ས་མཆོག་གིས་བོད་ནང་གི་ཁོར་ཡུག་དང་འབྲོག་ས་གནས་སྤོར་སྐོར་ལ་གསུངས་དོན།  “ བཙན་བྱོལ་དུ་མ་འབྱོར་གོང་ང་ཚོར་ཁོར་ཡུག་ལ་དོ་སྣང་ཡོད་པ་མ་རེད། དེའི་སྐོར་ཤེས་ཀྱི་ཡོད་པ་མ་རེད། ད་ཆར་འཛམ་གླིང་མི་འབོར་དུང་ཕྱིར་༧༠འཚོ་གནས་ཐུབ་དང་མ་ཐུབ་ཀྱི་གནས་སུ་ལྷུང་ཡོད་སྟབས། རྒྱལ་ཁབ་སོ་སོའི་སྲིད་གཞུང་ཁག་གིས་ཀྱང་ཁོར་ཡུག་ཐོག་དོ་སྣང་ཆེན་པོ་བྱེད་ཀྱི་ཡོད་པ་རེད། ངས་ཧི་མ་ལའི་རི་རྒྱུད་ཀྱི་ཡུལ་བ་དང་དགོན་སྡེ་ཁག་ཏུ་ཤིང་ནགས་འདེབས་འཛུགས་དགོས་པའི་འབོད་སྐུལ་ཞུས་བསྡད་ཡོད། བོད་ནང་སྡོད་མཁན་ཚོས་ཀྱང་རང་ཉིད་སྡོད་སའི་ཡུལ་དང་དགོན་པའི་ཉེ་འཁོར་དུ་ཤིང་ནགས་འདེབས་འཛུགས་ཐུབ་ན་ཡག་པོ་འདུག ཤིང་ནགས་འདེབས་འཛུགས་བྱ་རྒྱུ་ལུང་པ་སྤྱི་ལ་ཕན་གྱི་ཡོད། དེ་ཆབ་སྲིད་གནད་དོན་ཆགས་ཡོད་པ་མ་རེད ” ཅེས་དང་། “ དེང་སྐབས་བོད་ནང་གི་འབྲོག་ས་ཁག་གྲོང་བརྡལ་ཅན་དུ་བསྒྱུར་ཏེ། འབྲོག་པའི་ལོ་ངོ་སྟོང་ཕྲག་རིང་གི་འཚོ་བ་རོལ་སྟངས་ལ་འགྱུར་བ་ཐེབས་བཞིན་པ་དེ། འབྲོག་པ་རང་ཉིད་ལ་དཀའ་ངལ་འཕྲད་པ་དང་བོད་པའི་གོམས་གཤིས་མེད་པ་ཆགས་འགྲོ་ཡི་ཡོད། སྤྱིར་ཡིན་ན་འབྲོག་པ་དེ་ཚོར་འབྲོག་ས་རང་ནས་འབྲོག་པའི་གནས་སྟངས་དང་འཚམ་པའི་སློབ་གྲྭ་དང་སྨན་ཁང་། ཚོང་ཁང་སོགས་རྒྱག་ཐུབ་ན་ཡག་པོ་ཡོད་པ་རེད། ངས་གོ་ཐོས་ལ་ས་ཆ་ཁ་ཤས་སུ་ར་ལུག་རྣམས་བཙོང་སྟེ་མཐོང་རྒྱུ་མེད་པ་མ་ཟད། ལྷག་པར་དུ་ར་ལུག་ཁྱུ་དང་ཁྱུ་བྱས་ཏེ་རླངས་འཁོར་ནང་བླུགས་ཏེ་འཚོང་གི་ཡོད་པ་རེད་ཟེར་གྱི་འདུག རྒྱུ་ལ་བརྔམས་ཏེ་ཕྱུགས་ཟོག་ལ་སྲོག་གི་འདུ་ཤེས་མ་བཟུང་ན་ཧ་ལས་པའི་སྡིག་པ་རེད། མ་གཞི་དཀར་སྐྱོང་གནང་ཐུབ་ན་འཕྲོད་བསྟེན་ལ་ཕན་གྱི་ཡོད་ཀྱང་། བོད་པར་ཤ་ཟ་རྒྱུའི་གོམས་གཤིས་ཤིག་ཡོད་པ་རེད། ལོ་ངོ་སྟོང་ཕྲག་རིང་བོད་ལ་ས་ཐོབ་པའི་བྱང་ཆུབ་སེམས་དཔའ་མང་པོ་བྱུང་ཡོད་ཀྱང་། ཚང་མས་བོད་ས་ཡོངས་ལ་དམར་ཟས་བཀག་སྡོམ་གནང་མྱོང་མེད་སྟབས། ང་ཚོས་ཆོས་ཕྱོགས་དང་སྤྱི་ཚོགས་གཉིས་ཀྱི་གནས་སྟངས་ལ་བལྟས་ཏེ་བསམ་བློ་གཏོང་དགོས་པ་ཆགས་འདུག ” ཅེས་བཀའ་གནང་བྱུང་།

ཁོང་གིས་མུ་མཐུད་དུ་གསུངས་རྒྱུར། “ བདེན་པ་ཡིན་མིན་མི་ཤེས་ཏེ་བོད་ཀྱི་ས་ཆ་ཁ་ཤས་སུ་ནང་མི་གྲོངས་ན་འདས་པོར་མྱ་ངན་ཞུ་རྒྱུའི་ཚབ་ལ་སྤྲོ་སྐྱིད་གཏོང་གི་ཡོད་ས་རེད། དོན་དག་ཕ་མ་སྤུན་མཆེད་གྲོངས་ན་སྡུག་བསྔལ་མ་ཐེགས་པར་སྤྲོ་སྐྱིད་བཏང་བ་ཡིན་ས་རེད། འདས་པོའི་ཆེད་དགེ་བ་བསྒྲུབ་དགོས་པ་རེད་མ་གཏོགས། འདས་པོའི་ཆེད་སྤྲོ་སྐྱིད་གཏོང་བ་དེ་ཡག་པོ་ཁྱོན་ནས་མ་རེད། བོད་ལ་དེ་འདྲའི་གོམས་གཤིས་ཡོད་པ་མ་རེད། དེ་བཞིན་དེང་སྐབས་བོད་ནང་དུ་དཔལ་འབྱོར་ཕྲན་བུ་ཡག་ཏུ་འགྲོ་སྐབས་མང་ཚོགས་ནང་མཱ་ཅང་རྒྱག་པ་དང་། ཤོ་སྦག་སོགས་རྒྱན་འཛུགས་སྣ་ཚོགས་བྱེད་པ་དང་། ཆང་དང་ཨ་རག་ཚོད་མེད་འཐུང་མཁན་ཡོད་ཚོད་རེད། དེ་འདྲའི་རིགས་རྩ་བ་ནས་གནང་རྒྱུ་ཡོད་པ་མ་རེད། བོད་ནང་གི་བོད་མི་ཚོས་དམིགས་བསལ་ཤེས་ཡོན་ཐོག་ཤུགས་རྒྱག་དགོས་ཀྱི་འདུག གཞོན་སྐྱེས་ཚོར་གནའ་དེང་ཟུང་འབྲེལ་གྱི་ཤེས་ཡོན་ཚད་ལོངས་པ་ཞིག་དགོས་ཀྱི་འདུག ” ཅེས་གསུངས་བྱུང་།

མཐར་༧གོང་ས་མཆོག་གིས་བོད་མིའི་ཆབ་སྲིད་འགན་དབང་མང་ཚོགས་ལ་རྩིས་སྤྲོད་གནང་ཕྱོགས་སྐོར་གསལ་བཤད་གནང་དོན། “རྩ་བའི་ཆབ་སྲིད་སྐོར་ཊོག་ཊར་བློ་བཟང་སེང་གེས་འགྲེལ་བཤད་རྒྱག་གི་རེད། ཡིན་ནའང་གསལ་བཤད་ཐུང་ཐུང་ཞིག་ཞུས་ན། ཉེ་ཆར་ངས་འགྱུར་བ་ཆེན་པོ་ཞིག་བཏང་ཡོད་པ་རེད། ང་ཚོ་བཙན་བྱོལ་དུ་འབྱོར་མ་ཐག་དགའ་ལྡན་ཕོ་བྲང་དམངས་གཙོའི་ཐོག་འགྲོ་རྒྱུའི་མགོ་བཙུགས་པ་རེད། དེ་ནས་གོམ་པ་རིམ་སྤོ་བྱས་ཏེ་ ༢༠༠༡ ལོར་བཀའ་བློན་ཁྲི་པ་ཐད་ཀར་མང་ཚོགས་ཀྱིས་འོས་བསྡུའི་ལམ་ནས་བདམས་པ་རེད། དེ་ནས་ངའི་གནས་སྟངས་ཕྱེད་རྒན་ཡོལ་ཆགས་པ་རེད་ལ། ཆབ་སྲིད་ཀྱི་གལ་ཆེའི་གནད་དོན་རྣམས་བཀའ་བློན་ཁྲི་པས་ཐག་གཅོད་ཀྱི་ཡོད། ལོ་བཅུའི་རྗེས་ཏེ་ ༢༠༡༡ ལོར་བློ་བཟང་སེང་གེ་ལ་མང་མོས་རྒྱབ་སྐྱོར་ཐོབ་པ་རེད། འོས་བསྡུའི་སྐབས་མང་ཚོགས་ཀྱིས་དོ་སྣང་ཆེན་པོ་བྱས་ཏེ་འོས་བསྡུ་ཡག་པོ་བྱུང་ཡོད་པ་རེད། བློ་བཟང་སེང་གེ་ལགས་གཞོན་ནུའི་དུས་ནས་ངས་ངོ་ཤེས་ཀྱི་ཡོད། དེང་དུས་ཀྱི་ཤེས་ཡོན་ཐོག་རྩེར་སོན་པ་རེད། ལྷག་བསམ་རྣམ་དག་དང་སྙིང་སྟོབས་ལྡན་པ་ཞིག་ཡོད་པས་ཞེ་དྲག་ཡག་པོ་ཡོད། མི་རབས་རྒན་པ་ཚོས་ལོ་ ༥༠ རིང་ཤུགས་བརྒྱབ་སྟེ་རྨང་གཞི་ཡག་པོ་བཞག་ཡོད། བཙན་བྱོལ་བ་འདྲ་འདྲའི་ནང་ནས་མ་འདྲ་བ་ཞིག་ཆགས་ཡོད། དེང་དུས་ཤེས་ཡོན་ཆ་ཚང་ཡོད་མཁན་ཞིག་གིས་འགན་འཁུར་རྒྱུ་དེ་དུས་ལ་བབ་པ་ཞིག་རེད། ང་རང་མི་ཚེ་ཧྲིལ་པོར་ཕྱེད་རྒན་ཡོལ་ལ་བསྡད་ན་དགོས་པ་ཡོད་པ་མ་རེད། དེ་ལས་རྒན་ཡོལ་ཆ་ཚང་ཞུས་ན་ཡག་པོ་ཡོད་པ་རེད། དེ་སྔ་རྒྱལ་དབང་སྐུ་ཕྲེང་དང་པོ་ནས་བཞི་བའི་བར་ཆོས་ཕྱོགས་ཁོ་ན་ལས་ཆབ་སྲིད་ཀྱི་འགན་ཡོད་པ་མ་རེད། ༧གོང་ས་ལྔ་པ་ནས་ཆོས་སྲིད་གཉིས་ཀྱི་དབུ་ཁྲིད་ཆགས་པ་རེད། ལོ་ ༤༠༠ ཙམ་གྱི་དགའ་ལྡན་ཕོ་བྲང་གི་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་པ་དེ། སྐུ་ཕྲེང་བཅུ་བཞི་པའི་མིང་ཡོད་པའི་ང་རང་གིས་དགའ་བཞིན་སྤྲོ་བཞིན་དང་སྤོབས་པའི་ཐོག་མཚམས་བཞག་ན། རྒྱལ་བ་སྐུ་ཕྲེང་གོང་མ་ཚོར་ཞབས་འདེགས་ལ་འགྲོ་བ་རེད། ཁྱེད་ཚོ་གཞིས་ལུས་རྒྱ་ཆེའི་མི་མང་གི་ཆ་ཤས་ཤིག་ཡིན་སྟབས། ཁྱེད་ཚོར་ཞུ་རྒྱུ་ཞིག་ལ། ངས་ཐག་གཅོད་བྱས་པ་དེ་དགོས་པ་རྒྱུ་མཚན་མང་པོ་ཞིག་ལ་བལྟས་ཏེ་ཐག་གཅོད་བྱས་པ་ལས། ང་རང་སེམས་ཤུགས་ཆག་པ་དང་ལུས་པོའི་མ་ལྕོག་པ་དེ་འདྲ་མིན། ངའི་གཟུགས་པོའི་གནས་སྟངས་ལ་བལྟས་ན་ད་དུང་ལོ་ཉི་ཤུ་སུམ་བཅུར་སྡོད་ཐུབ་ཀྱི་རེད་བསམ་གྱི་ཡོད། རང་ཉིད་གངས་ཅན་པ་ཞིག་ཡིན་པའི་ངོས་ནས་མ་ཤི་བར་རྩ་དོན་ཐོག་ཤུགས་རྒྱག་རྒྱུ་ཡིན ” ཞེས་གསུངས་བྱུང་།

གསར་འགོད་པ། དཔལ་ལྡན་གྱིས་རྡོ་རྗེ་གདན་ནས།