རྫ་ཚེ་རིང་བཀྲ་ཤིས།
དུས་དབང་སྔ་མའི་སྐབས་སུ་ཨམ་སྐད་གསུང་སྒྱུར་ཟེར་བ་ཞིག་བཙུགས་པ་དང་། ད་ཆ་ཁམས་སྐད་ལ་ཡང་གསུང་སྒྱུར་བཞག་འདུག ལས་ཀ་འདི་འཕྲལ་དུ་ཕན་ཡང་ཕུགས་སུ་གནོད་པ་ཞིག་རེད། གསུང་ཆོས་སྐབས་བོད་པ་ནང་ཁུལ་ལ་སྐད་སྒྱུར་བརྒྱུད་ནས་བརྡ་ཕྲོད་པ་འདིར་ཉེས་དམིགས་ཆེན་པོ་གསུམ་ཡོད། དང་པོ་ནི་མི་རིགས་དང་རིག་གཞུང་གི་བར་ཐག་རིང་དུ་བཏང་ནས་བོད་པ་ནང་ཁུལ་གྱི་མི་འདྲ་བའི་འདུ་ཤེས་ཆེ་རུ་གཏོང་བ་ཡིན།
གཉིས་པ་ནི། ༸གོང་ས་མཆོག་གི་གསུང་གི་བག་ཆགས་རང་རྒྱུད་ལ་གཏན་པོར་ཉར་བར་འགོག་རྐྱེན་བཟོ་གི་རེད། གསུམ་པ་ནི། བོད་སྐད་གཅིག་གྱུར་གྱི་བརྒྱུད་ལམ་ཡག་ཤོས་སམ་མ་མཐའ་ཡང་ཆོལ་གསུམ་སྤུན་ཟླ་ཕན་ཚུན་སྐད་ཆ་ཤོད་ཐུབ་པའི་ལམ་ཁ་ཡག་ཤོས་དེ་འགོག་གི་ཡོད།ྋགོང་ས་མཆོག་གི་གསུང་སྐད་དང་པོ་ཚང་མ་མི་གོ་མཁན་ཞིག་ཡིན་ན་ཡང་བཀའ་སློབ་ཡིག་ཐོག་ཏུ་ཡོད་པ་དང༌། སྒྲ་བརྙན་ཕབ་ཀྱི་འཁོར་ལོ་བརྒྱུད་ནས་འདྲེས་གང་ཐུབ་བྱེད་པ་གཙོ་བོ་བྱེད་རོགས། རིན་པོ་ཆེས་བཀའ་ཆོས་གསུང་སྐབས་རྣ་ཉན་ཡོ་ཆས་ཤིག་གིས་རྣ་བ་བཀབ་བསྡད་ན་ཕལ་ཆེར་ལུང་ཙམ་ཡང་ཨེ་ཐོབ་མི་ཤེས།
བོད་ནས་ཕེབས་མཁན་རྣམས་ནས་ཀྱང་རང་རང་གིས་རྒྱལ་བ་རིན་པོ་ཆེའི་གསུང་རང་ལ་ཉན་རོགས། རྒྱལ་བ་རིན་པོ་ཆེའི་གསུང་སྐད་དང་བཞད་མོ་དེས་བོད་སྐད་གཏན་ནས་མི་གོ་ཞིང་ཆོས་དད་ཀྱང་མེད་མཁན་གྱི་འཛམ་གླིང་གི་མི་ས་ཡ་མང་པོའི་སྣང་བ་བསྒྱུར་ཐུབ་གྱིན་ཡོད། ཚང་མས་རྒྱལ་བ་རིན་པོ་ཆེའི་བཞད་མོ་ཐོས་པ་ཙམ་གྱིས་སེམས་ལ་བདེ་སྐྱིད་ཀྱི་སྣང་བ་ཆེན་པོ་ཐོབ་ཀྱིན་ཡོད། གསུང་དེ་འདྲ་ཞིག་དངོས་སུ་ཉན་པའི་གོ་སྐབས་དེ་ཡང་ཡང་ཐོབ་ནི་མ་རེད། བོད་ནས་དཀའ་ལས་རྒྱབ་ནས་སྐུ་མདུན་དུ་ཐོན་པ་དང་རྣ་བ་རང་གི་རྣ་བ་རང་གིས་མི་འགེབས་རོགས།
འདིའི་ཐད་ ༢༠༠༦ ལོའི་དུས་འཁོར་དབང་ཆེན་སྐབས་བོད་ནས་ཕེབས་མཁན་འབྲོག་པ་རྒད་པོ་ཞིག་གིས་༼རྣམ་ཅུ་དབང་ལྡན་༽ཚགས་པར་དུ། མ་གོ་ནའང་༸རྒྱལ་བ་རིན་པོ་ཆེ་རང་གི་གསུང་སྐད་ཉན་ནས་སྡོད་རྒྱུ་ཡིན་ཞེས་ལབ་པ་དེ་ཧ་ཅང་འགྲིག་པ་རེད། ཁོས་བཅོས་མིན་གྱི་དུང་སེམས་དེར་འཐད་པ་ཡོད། འོན་ཀྱང་བསྡད་པ་ཙམ་གྱིས་ཀྱང་མི་འགྲིག་པས་གསུང་ཆོས་གོ་སྒྲིག་ཚན་པ་ལྟ་བུ་འབྲེལ་ཡོད་སྡེ་ཁག་གིས་ཀྱང་ཉིན་རེའི་བཀའ་སློབ་ཁག་འོད་སྡེར་དང་ཤོག་ཐོག་ཏུ་ཕབ་ནས་དུས་ཐོག་འགྲེམ་སྤེལ་གནང་རོགས།
མི་མང་གིས་ཀྱང་དེ་ལ་ཞིབ་ཏུ་གཟིགས་རོགས། ཡི་གེ་མི་ཤེས་མཁན་ཞིག་ཡིན་ན་མི་ལ་ཀློག་ཏུ་འཇུག་པ་ཚུན་ཆད་ཀྱི་ཐབས་ཤེས་བཏོན་ཏེ་བཀའ་ཆོས་ཀྱི་ནང་དོན་ལ་བསམ་བློ་ངེས་པར་དུ་གཏོང་རོགས། སྐད་ཡིག་གི་ཚོགས་པ་ཡིན་ཟེར་མཁན་ཚང་མས་འདི་ལ་བརྡ་ལན་རེ་འབུལ་རོགས། ཚགས་པར་ལས་ཁུངས་ཁག་གིས་ཀྱང་འདི་ལ་ཤུགས་སྣོན་རྒྱག་རོགས། གལ་ཏེ་སྐད་བསྒྱུར་ཅིས་ཀྱང་དགོས་ན། དགོང་མོ་དང་ཞོགས་པ་སོགས་སུ་སྒྲ་སྡུད་ཡོ་ཆས་བརྒྱུད་ནས་རྒྱང་བསྲིང་གནང་རོགས། གོ་སྒྲིག་ཚོགས་པ་དང་ཚགས་པར་ཁག་གིས་ཀྱང་དེ་ལྟར་བྱས་ནས་གསུང་ཆོས་ཀྱི་གོ་རྟོགས་མཐུས་ཤོར་དུ་མི་འགྲོ་བ་དང་། རིགས་གཞུང་ཁ་བྲལ་རིང་ལུགས་པ་ཞིག་ཀྱང་ཆགས་མི་དགོས་པ་ཡིན།
བོད་མི་རིགས་ཀྱི་གཅིག་གྱུར་གྱི་སྐད་ཡིག་གཉིས་འཐོར་ཞིག་གི་སྔ་ལྟས་རེད། ད་ལྟ་མདོ་ཁམས་གཉིས་སུ་སྐད་སྒྱུར་རེ་དགོས་ན། རིམ་གྱིས་མདོ་ཁམས་ཀྱི་ལུང་ཚན་སོ་སོ་དང་། ད་དུང་དབུས་ཀྱི་ལུང་ཚན་སོ་སོར་ཡང་སྐད་སྒྱུར་རེ་མི་དགོས་ཐབས་མེད་རེད།
མདོར་ན་སྐད་སྒྱུར་མི་དགོས་པ་གཅིག་པུ་དེ་ལྷ་ས་བ་དང་དེའི་ཉེ་འཁོར་གྱི་ལུང་ཚན་ཇི་སྙེད་ཅིག་ལས་མེད། རིམ་གྱིས་དེ་ལྟར་མདུན་སྐྱོད་བྱེད་ཀྱིན། ཉིན་ཞིག་དེང་གི་འབྲུག་པའི་ཡི་གེ་ལྟར་ཚུར་རྡ་དག་ལ་མ་ལྟོས་པར། ཕར་ལུང་སྐད་ལ་ཕྱོགས་ཏེ་བོད་ཡིག་ལས་ཐ་དད་པར་འགར་ངེས་རེད།
ད་གཟོད་བོད་པ་དང་བོད་ཡིག་གང་ཞིག་ལ་ངོས་འཛིན་དགོས། འདི་ཀོ་ནི་འཐོར་ཞིག་དང་རྩ་བ་རྨེག་མེད་དུ་འགྱུར་བའི་སྔ་ལྟས་ལས་མ་འདས།
འོན་ཀྱང་མཇུག་འབྲས་ལ་མི་བསམ་པའི་དྲ་འབུ་འགས་བསམ་ཚུལ་དེར་སྣང་མེད་དམ་ཁྱད་གསོད་བྱས་འདུག་པས། ངོ་མ་ཡ་མཚར་རེད།
ང་ག་དུས་ཡིན་ན་ཕྱོགས་རེ་ལས་མི་མཐོང་ཞིང་. དེར་བསམ་མཁན་ཚོས་དེའི་ཞེ་འདོད་གཙོ་བོ་མ་ངེས་པའི་ཟོར་འདྲ་ཡང་ཡང་ཡོང་དོན་ཅི་ཡིན་ནམ. རྫ་ཚེའི་ཞེ་འདོད་ནི་གསུང་ངོ་མ་ཐོས་ན་ལེགས་པ་དང. སྐད་སྒྱུར་མེད་ན་ཐེང་ཁ་ཤས་ནས་གོ་འགྲོ་བ. དེས་སྤྱི་སྐད་ཅིག་འབྱུང་རེ་དེ་རེད་འདོད.
དེར་དྲི་བ་ནི. གོ་དོན་རྟོགས་ན་ལེགས་སམ་སྒྲ་ཙམ་ཐོས་བས་དགའ.
བློ་བརྟན་གྱི་ཆོལ་གསུམ་འགལ་ཟླ་བྱུང་བ་དང་དེའི་རྐྱེན་གང་ཡིན་བསམ་པ་དེ་ངེས་ལེན་ཐབས་མེད་པའི་རྒྱུ་མཚན་ལྟར་སྣང་འབའ་ཞིག་ཏུ་འདོད་དོ
དཀོན་མཆོག་མཁྱེན། མི་ཤེས་ན་འང་བཤད་ལ་དགའ་བའི་མི་འདི་དག་སྙིང་རེ་རྗེ། རྗེ་རིན་པོ་ཆེས། མཛད་པ་ཀུན་ལས་གསུང་གི་ནི།། མཛད་པ་མཆོག་ཡིན།། གསུང་བའི་ཚིག་འདིའི་དོན་ཡང་གོ་མེད་པ་འདྲ། སྙིང་རྗེ།
རྩོམ་ཡིག་འདིའི་ཁ་བྱང་ལ་རྒྱལ་བ་ཆེད་དུ་མཇལ་ཟེར། རྒྱལ་བ་དང་ཆེད་དུ་མཇལ་གཉིས་ལ་ཨམ་སྐད་དང་དབུས་སྐད་ལས་ཀྱང་བར་ཐག་ཕྱེས་འདུག མི་མཛའ་ནིའི་མཁས་བཤད་ཅིག་ད་དུང་གཡུག་གིན་འདུག གཏམ་རྒད་པོས་བཤད་རྒྱུ་རྒན་མོས་བཤད་ཅེས་བ་དེ་འདི་རེད། རྒྱལ་བ་བྱེད་པ་པོ་རེད་དམ་བྱ་བའི་ཡུལ་རེད། དེ་རེ་རེ་ལ་སྟོན་བྱེད་ཀྱི་ཕྲད་རེ་ཡོད་བ་རེད། ངས་ཁ་བྱང་མཐོང་ནས་གླེན་བཤད་ཅིག་ཡིན་པ་དེ་ག་རང་ནས་ཤེས་ཏེ་བཀླགས་མེད།
ངས་ཀྱང་རྒྱལ་བའི་གསུང་དབྱངས་ཡན་ལག་དྲུག་ཅུ་མ་བོ་ཐད་ཀར་གསན་ལེགས་པར་འདོད. དབང་ལ་སྐད་གོ་མཁན་ཚོ་ཡང་ལེགས་པོ་ཞིག་ཐོབ་མིན་ཐེ་ཚོམ་རེད. གང་ཞེ་ན་རྣམ་གཡེང་དང་བྲེ་མོའི་གཏམ་གྱིས་བར་ཆད་ཡོད་ཡོད་འདྲ་ཞིག་རེད.
སྔོན་འགྲོའི་གསུང་ཆོས་ལ་སྐད་སྒྱུར་ངེས་པར་ཡོད་ན་ལེགས.
སྐད་གཅིག་གྱུར་དང་བོད་པ་ནང་ཁུལ་ལ་མི་ལེགས་པར་ཁོ་བས་མི་འདོད་དོ།།
རྫ་ཚེ་རིང་བཀྲིས་ལགས། ཁྱེད་རང་གིས་དགོངས་ཆར་དེ་ཕྱོགས་གཅིག་ནས་ཡག་པོ་རེད། ཡིན་ནས་ཡང་༧གོང་ས་མཆོག་གི་གསུང་ཆོས་དང་བཀའ་སློབ་རྣམས་དོན་དང་བདེན་པར་གོ་ཐུབ་ན་ཡག་གི་རེད། འཛམ་གླིང་གི་མི་མང་པོས་༧གོང་ས་མཆོག་གི་བཀའ་ཆོས་རྣམས་དོན་དང་བདེན་པར་རྟོགས་ནས་ཁོང་རྣམ་པས་ཀུན་འདུན་ལ་གུས་ཞབས་དང་དགའ་སུས་བྱེད་ཀྱི་ཡོད་རེད། དེ་མ་གཏོགས་བོད་སྐད་རང་ལ་མིན། གཉིས་ནས་བོད་ཆོལ་ཁ་གསུམ་ལ་སྤྱི་སྐད་ཅིག་མེད་པ་ནི་བདེན་པ་རེད། ཡིན་ནས་ཡང་སྤྱི་ཡིག་ཡོད་པ་དངོས་ཡོད་རེད། བོད་དབུས་གཙང་ཕྱོགས་དང་བཙན་འབྱོལ་དུ་ཡོད་པའི་བོད་མི་སྐད་གདངས་དེ་བོད་ཤར་ཕྱོགས་ཀྱི་མདོ་སྟོད་སྨད་དང་ལོགས་སུ་ཡིན་པ་དངོས་ལེན་བྱེད་དགོས་པ་མ་ཟད། དེ་དག་ཉམས་པ་སླར་བཟོ་དང་མི་ཉམས་གོང་འཕེལ་བྱེད་པ་དེ་འགལ་ཆེན་རེད། སྔར་བོད་ཆོལ་གསུམ་དུ་འགལ་ཟླ་བྱུང་བ་ནི་ཕན་ཚུན་གྱི་མཐུན་མོང་མ་ཡིན་པའི་སྐད་གདངས་དང་གོམས་གཤིས་སོགས་དངོས་ལེན་མ་བྱེད་པ་དང་རྩི་མཐོང་མ་བྱེད་པའི་རྐྱེན་གྱི་ཡིན་པར་བསམ།