༧གོང་ས་མཆོག་གིས་རྡོ་རྗེ་གདན་དུ་དུས་འཁོར་དབང་ཆེན་ཐེངས་ ༣༢ པ་སྐུར་གནང་མཛད་ཀྱི་ཡོད་པ་དང་བསྟུན་ཏེ། གསར་འགོད་པས་རྣམ་རྒྱལ་གྲྭ་ཚང་གི་མཁན་ཟུར་བྱ་ཏོ་རིན་པོ་ཆེ་མཆོག་ལ་དུས་འཁོར་དབང་གྱི་ནང་དོན་དང་ངོ་བོ། དབང་ཞུས་པའི་ཕན་ཡོན་སོགས་ཀྱི་སྐོར་ལ་བཅར་འདྲི་ཞུས་ཡོད།
དྲི་བ། སྟོན་པ་ཤཀྱཱ་ཐུབ་པའི་འཁྲུངས་ཡུལ་དང་དུས་འཁོར་རྩ་རྒྱུད་གསུངས་ཡུལ་རྒྱ་གར་ནང་ཡིན་ཡང་། ད་ཆར་རྒྱ་གར་བའི་ཁྲོད་དུ་ནང་པ་དེ་ཙམ་དར་ཁྱབ་མེད་པ་དང་། ལྷག་པར་དུ་དུས་འཁོར་དབང་ཆེན་གསུངས་པའི་ལམ་སྲོལ་མེད་དོན་ཅི་ཡིན།
ལན། འཛམ་གླིང་ཡོངས་གྲགས་ཀྱི་ལོ་རྒྱུས་གཞིར་བཟུང་བྱས་ན། ལོ་ ༢༦༠༠ ཡས་མས་ནང་སྟོན་པ་ཤཀྱཱ་ཐུབ་པ་ལུམྦི་ནིར་སྐུ་འཁྲུངས་ཤིང་། རྡོ་རྗེ་གདན་དུ་སངས་རྒྱས་པ་རེད། ཝ་ར་ཎ་སིར་ཆོས་ཀྱི་འཁོར་ལོ་ཐོག་མ་དང་། བྱ་རྒོད་ཕུང་བོ་རིར་གཉིས་པ། ཡངས་པ་ཅན་དུ་གསུམ་པ་བཅས་བསྐོར་བ་རེད། ཝ་ར་ཎ་སིར་ཆོས་ཀྱི་འཁོར་ལོ་དང་པོ་བསྐོར་བ་དེ་ཐེག་པ་ཆེ་ཆུང་ཡོངས་རྫོགས་ཀྱིས་ཁས་ལེན་པ་ཞིག་རེད། བྱ་རྒོད་ཕུང་པོ་རིར་ཐེག་པ་ཆེན་པོའི་ཆོས་འཁོར་བསྐོར་བ་རེད་ཟེར་བ་འདི་འཛམ་གླིང་ཡོངས་གྲགས་ཀྱི་སྐད་ཆ་ཞིག་མ་རེད་ལ། ཡངས་པ་ཅན་དུ་ཆོས་ཀྱི་འཁོར་ལོ་གསུམ་པ་བསྐོར་བ་དེའང་ཡོངས་གྲགས་ཤིག་མ་རེད། གདུལ་བྱ་ཁྱད་པར་ཅན་ཉུང་ཤས་ཤིག་ལ་ཆོས་འཁོར་གཉིས་པ་དང་གསུམ་པ་བསྐོར་བ་ཡིན་ས་རེད། དེ་བས་ཀྱང་ཟབ་མོ་རྡོ་རྗེ་ཐེག་པ་སྔགས་ཀྱི་སྐོར་དེ་གདུལ་བྱ་ཆེས་ཉུང་ཤས་ཤིག་ལ་གསུངས་པ་ཏན་ཏན་རེད། དུས་འཁོར་ནང་ལྟར་བྱས་ན། སྟོན་པ་མངོན་པར་རྫོགས་པར་སངས་རྒྱས་པའི་ཟླ་བ་ ༡༢ ཀྱི་རྗེས་ལ། རྒྱ་གར་ལྷོ་ཕྱོགས་ཨ་མར་ཝ་ཏི་དཔལ་ལྡན་འབྲས་སྤུངས་སུ་དུས་འཁོར་རྩ་རྒྱུད་ཐོག་མར་གསུངས་པ་རེད། འོན་ཀྱང་དེང་སྐབས་རྒྱ་གར་དུ་ནང་པའི་བསྟན་པ་དར་སྲོལ་ཆེར་མེད་པ་དེ་ལོ་རྒྱུས་ཐོག་རྒྱ་གར་དུ་ནང་པའི་བསྟན་པར་འགོག་རྐྱེན་མང་པོ་བྱུང་བ་རེད། དཔལ་ན་ལནྚར་མཚོན་ན། དེང་སྐབས་གྱང་རོ་འགའ་ལས་མཇལ་རྒྱུ་མེད་པ་དེ་རེད། སྔོན་ཆད་དགེ་འདུན་པ་ཁྲི་ཕྲག་གི་བསྟི་གནས་རེད། མགོན་པོ་ཀླུ་སྒྲུབ་དང་འཕགས་པ་ཐོག་མེད་སོགས་ཀྱིས་བསླབ་པ་སློབ་གཉེར་གནང་ས་རེད། དུས་རབས་ ༡༡ ཡས་མས་སུ་དུས་ཞབས་པ་སོགས་རྒྱ་གར་གྱི་པཎ་གྲུབ་མང་པོས་ཁྱབ་བརྡལ་ཆེན་པོ་བཏང་ཡོད་ཀྱང་། ད་ཆར་རྒྱ་གར་རང་ལ་དུས་འཁོར་རྒྱུད་འཛིན་མཁན་མེད་པ་ལྟ་བུ་རེད།
དྲི་བ། སྟོན་པ་ཤཀྱཱ་ཐུབ་པའི་འཁྲུངས་འདས་དང་སངས་རྒྱས་པ། ཆོས་འཁོར་བསྐོར་བ་སོགས་ཀྱི་ལོ་ཚིགས་ལ་དཔྱད་ན་དུས་འཁོར་རྩ་རྒྱུད་འདི་སྟོན་པ་རང་གི་གསུང་ཡིན་མིན་གྱི་བཤད་ཚུལ་ཞིག་ཡོད་པ་དེ་གང་འདྲ་རེད།
ལན། ལོ་རྒྱུས་སྨྲ་བ་ཚོས་བཤད་པ་དེ་དང་། ཐུན་མོང་མ་ཡིན་པའི་བྱུང་བ་གཉིས་མ་མཐུན་པ་ཡོང་གི་རེད། ངས་དཔེ་མཚོན་ཞིག་ཞུས་ན། སངས་རྒྱས་བཅོམ་ལྡན་འདས་ཀྱི་ལུང་བསྟན་ནང་། ང་མྱ་ངན་ལས་འདས་པའི་འོག་ཏུ་ལོ་ ༤༠༠ ན། དགེ་སློང་ཀླུ་ཡི་མིང་ཅན་ཞིག་ཡོང་སྟེ་ངའི་སངས་རྒྱས་ཀྱི་བསྟན་པ་སྤེལ་གི་རེད་ཅེས་གསུངས་ཡོད། དེ་ལོ་རྒྱུས་མང་པོ་ཞིག་ཏུ་བཀོད་ཡོད། འོན་ཀྱང་དཔལ་ན་ལནྡ་ཆགས་རབས་ཀྱི་ལོ་རྒྱུས་ནང་བལྟས་ན། སྤྱི་ལོའི་དུས་རབས་མགོ་བཙུགས་ཙམ་ཡིན་པ་འདྲ་བོ་ཞིག་བྲིས་ཡོད། སྟོན་པའི་ལུང་བསྟན་ལྟར་ན་སྤྱི་ལོའི་དུས་རབས་མ་བྱུང་གོང་དུ་ན་ལནྡ་ཚུགས་ཚར་བ་ཞིག་དགོས་ཀྱི་ཡོད། གང་ཡིན་ཟེར་ན་འཕགས་པ་ཀླུ་སྒྲུབ་སྐུ་བལྟམས་ཏེ་ན་ལནྚའི་མཁན་པོ་སྒྲ་གཅན་འཛིན་གྱི་མདུན་དུ་འཆི་མེད་ཚེ་ཡི་དངོས་གྲུབ་ཚེ་དབང་ཞུས་བ་དང་རབ་ཏུ་བྱུང་བ་སོགས་ཀྱི་ལོ་རྒྱུས་ཡོད། དེ་ལྟར་བྱས་ན་མགོན་པོ་ཀླུ་སྒྲུབ་མ་འཁྲུངས་གོང་ནས་ན་ལནྡ་ཡོད་དགོས་པ་དང་ན་ལནྡའི་མཁན་པོ་ཡང་ཡོད་དགོས་པ་ཞིག་རེད། དེར་བརྟེན། ལོ་རྒྱུས་སྨྲ་བའི་བཤད་སྟངས་དང་ཐུན་མོང་མ་ཡིན་པའི་གནས་ཚུལ་གཉིས་གཞི་གཅིག་ཏུ་སྦྲགས་རྒྱུ་ཁག་པོ་ཡོད་པ་རེད།
དེ་བཞིན། དུས་འཁོར་རྒྱུད་དེ་སངས་རྒྱས་བཅོམ་ལྡན་འདས་ཀྱིས་གསུངས་པ་མ་རེད་ཟེར་བའི་སྐད་ཆ་ཞིག་ཡོད། དཔེར་ན། ཐེག་པ་ཆེན་པོའི་ཆོས་སྟོན་པའི་གསུང་པ་མ་རེད་ཟེར་བ་དང་སྔགས་སྟོན་པའི་གསུང་པ་མ་རེད་ཟེར་བ་ལྟ་བུ་རེད། དེ་ནི་ཐུན་མོང་གི་ལོ་རྒྱུས་ནང་མེད་པ་གཞི་རྩར་འཛིན་གྱི་ཡོད། ཐུན་མོང་གི་ལོ་རྒྱུས་ནང་མེད་པ་ཙམ་གྱིས་མེད་པས་ཁྱབ་ཐུབ་པ་མ་རེད། གསང་བ་བསམ་གྱིས་མི་ཁྱབ་པའི་གནས་ཚུལ་མང་པོ་ཡོད། སངས་རྒྱས་བཅོམ་ལྡན་འདས་ཟླ་དྲུག་རིང་སུམ་ཅུ་རྩ་གསུམ་གྱི་གནས་སུ་ཕེབས་པ་རེད་ཟེར་བ་དེ་ཡང་ཐུན་མོང་གི་ལོ་རྒྱུས་ནང་ཡིད་ཆེས་པ་ཁག་པོ་རེད། ཐུན་མོང་གི་ལོ་རྒྱུས་ནང་མི་གསལ་བ་མང་པོ་ཞིག་ཐུན་མོང་མ་ཡིན་པའི་མཛད་པའི་ཐོག་ནས་ཡོང་ཆོག་གི་རེད། དེ་བཞིན་དུ་དུས་འཁོར་རྒྱུད་སྟོན་པའི་གསུང་ཡིན་པར་ཁུངས་ཇི་ལྟར་བསྐྱལ་དགོས་ཟེར་ན། སྟོན་པས་ཝ་ར་ཎ་སིར་བཀའ་དང་པོ་བདེན་བཞིའི་ཆོས་འཁོར་སྐོར་བའི་རྣམ་བཞག་དེ་ལ་འགལ་འདུ་ཁྱོན་ནས་མེད་པར། དེའི་བརྗོད་བྱ་ཡོངས་རྫོགས་དུས་འཁོར་རྒྱུད་ནང་ཚང་ཡོད་པས། དུས་འཁོར་འདི་སྟོན་པའི་ཆོས་ཚུལ་དྲི་མ་མེད་པ་ཞིག་ཡིན་པ་གསལ་བོ་རེད། ཟབ་མོ་རྟེན་འབྱུང་གི་དེ་ཁོ་ན་ཉིད་དང་། བྱང་ཆུབ་ཀྱི་སེམས། ཡང་དག་པའི་ལྟ་བ་དེ་ཚོ་གཞི་ལ་བཞག་ཡོད་པ་མ་ཟད། ད་དུང་བདེན་བཞིའི་རྣམ་བཞག་རྒྱ་ཆེ་རུ་བཏང་སྟེ་ཕྱི་དུས་ཀྱི་འཁོར་ལོ། ནང་དུས་ཀྱི་འཁོར་ལོ། གཞན་དུས་ཀྱི་འཁོར་ལོ་བཅས་ཞིབ་ཕྲར་བཏང་ཡོད།
དྲི་བ། ནང་བསྟན་ཆོས་ལུགས་ནང་དབང་ལུང་མན་ངག་མང་པོ་གནང་སྲོལ་ཡོད་ཀྱང་། དུས་འཁོར་དབང་ཆེན་འདི་རྩ་ཆེ་ཤོས་སུ་བརྩི་དོན་གང་ཡིན་པ་དང་། དུས་འཁོར་དབང་ཆེན་ཞུས་པའི་ཕན་ཡོན་གཙོ་བོ་གང་ཡིན།
ལན། སངས་རྒྱས་ཀྱི་གོ་འཕང་འཐོབ་རྒྱུར་སངས་རྒྱས་ཀྱི་སྐུ་དང་ཐུགས་གཉིས་བསྒྲུབ་བྱ་ལྟེ་བ་རེད། ཐ་མལ་བའི་ལུས་དང་སེམས་གཉིས་མ་དག་པ་རེད། དེ་སྦྱངས་ཏེ་དག་པར་བྱེད་པ་ལ་སངས་རྒྱས་ཀྱི་སྐུ་ཐུགས་གཉིས་བསྒྲུབ་དགོས། སངས་རྒྱས་ཀྱི་སྐུ་ཐུགས་ཟུང་འཇུག་གི་གནས་མཐར་ཐུག་དེ་བསྒྲུབ་པར་དུས་འཁོར་རྒྱུད་འདི་གསལ་ཤོས་རེད་ཟེར་གྱི་ཡོད། འདི་ལ་ཀུན་གྱིས་བསྔགས་བརྗོད་གནང་གི་ཡོད། བླ་མེད་རྒྱུད་སྡེ་གཞན་དག་དེ་ཚོར་ཟུང་འཇུག་སྐོར་སྦེད་ནས་གསུངས་ཡོད། གཉིས་པ། ང་ཚོའི་འཛམ་གླིང་འདི་དང་ཐག་ཉེ་བའི་ཤོས་དང་འབྲེལ་བ་ཆེ་ཤོས་དེ་བྱང་ཕྱོགས་ཤམ་བྷ་ལ་རེད་ཟེར་གྱི་ཡོད། བྱང་ཕྱོགས་ཤམ་བྷ་ལ་དེ་དུས་འཁོར་གྱིས་མཉམ་བཞག་གནང་ཡུལ་གྱི་དག་ཞིང་ཞིག་ཡིན། ང་ཚོས་དུས་འཁོར་དབང་ཞུ་པ་དང་དེ་ཉམས་ལེན་བྱས་ན། སྐྱེས་པ་ཕྱི་མར་ཤམ་བྷ་ལ་ནས་སྐྱེས་པ་དང་། ད་ལྟའི་སྙིགས་མའི་རྒུད་ཚོགས་ཐམས་ཅད་ཞི་ནས་རྫོགས་ལྡན་གསར་པ་ཞིག་དང་། བཀྲ་ཤིས་པའི་དུས་རབས་གསར་པ་ཞིག་འཆར་བར་ཡིད་ཆེས་བྱེད་ཀྱི་ཡོད། སྐབས་དེར་འཁོར་གྱི་ཐོག་མར་སྐྱེས་ཏེ་མུ་མཐུད་དུས་འཁོར་ཉམས་ལེན་བྱས་ན། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་འཐོབ་རྒྱུར་བག་ཆགས་ཁྱད་པར་ཅན་འཇོག་ཐུབ་པའི་ནུས་པ་ཡོད།
དྲི་བ། བོད་པའི་ཆོས་ལུགས་ཆོས་བརྒྱུད་གཞན་དག་ལ་དུས་འཁོར་དབང་ཆེན་གསུང་པའི་ལམ་སྲོལ་ཡོད་མེད་དང་། ཡོད་ན་རྣམ་པ་དང་ངོ་བོ་གང་འདྲ་ཡིན་ནམ།
ལན། དུས་ཀྱི་འཁོར་ལོའི་དབང་རྡུལ་ཚོན་གྱི་ཐོག་ནས་འབྲི་བཞེངས་དང་། ས་གར་མཆོད་གར་སོགས་ཆོ་ག་རྒྱས་ཤོས་ཀྱི་ཐོག་ནས་དུས་འཁོར་དབང་ཆེན་སྐུར་མཁན་དེ་ཕལ་ཆེར་དགེ་ལུགས་པ་མིན་འགྲོ་སྙམ། ༧གོང་ས་མཆོག་དང་པཎ་ཆེན་སྐུ་ཕྲེང་མང་པོ་ཞིག་གིས་གནང་ཡོད་པ་རེད། དེ་མིན་རས་བྲིས་ཀྱི་དཀྱིལ་འཁོར་ཐོག་ས་སྐྱ་གོང་མ་རིན་པོ་ཆེ་དང་ཇོ་ནང་གི་བླ་མ་མཁན་པོ་ཚོས་དུས་འཁོར་དབང་གསུང་གི་ཡོད། གཞན་རྙིང་མ་དང་བཀས་བརྒྱུད་སོགས་སུ་ཡང་ཡོད་རྒྱུ་རེད་བསམ།
དྲི་བ། དཔལ་རྒྱལ་བ་ཇོ་ནང་བ་འདི་དུས་འཁོར་ཉམས་བཞེས་ཐོག་དམིགས་བསལ་ནུས་པ་ཡོད་ཚུལ་གསུང་སྲོལ་ཡོད་པ་དེ་གང་འདྲ་རེད།
ལན། སྤྱིར་བཏང་དུས་འཁོར་རྩ་རྒྱུད་ལ་བདག་པོ་རྒྱག་མཁན་བུ་ལུགས་ཟེར་བ་ཞིག་དང་། ཇོ་ནང་ལུགས་ཟེར་བ་ཞིག་བྱུང་བ་རེད། ཇོ་ནང་ལུགས་ཀྱིས་དུས་འཁོར་རྫོགས་པའི་རིམ་པ་སྦྱོར་བ་ཡན་ལག་དྲུག་ཟེར་བའི་ཕྱག་ལེན་གྱི་རྒྱུད་དེ་ཁྲིད་པའི་རིམ་པ་ཙམ་མ་ཡིན་པར། ཉམས་བཞེས་སྦྱོང་བརྡར་བྱས་ཏེ་དཀར་ཁུང་ཁྱོན་ནས་མེད་པའི་ཁང་པ་ནག་ཁུང་ནང་མཚན་མོའི་རྣལ་འབྱོར་ཉམས་ལེན་བྱེད་པ་དང་། ཉིན་མོའི་རྣལ་འབྱོར་ཉམས་ལེན་བྱེད་པ་སོགས་སྦྱོར་དྲུག་གི་ཉམས་ལེན་བྱེད་པའི་ཕྱག་སྲོལ་རྒྱུན་བཟང་པོ་ཞིག་མགོ་ལོག་འཛམ་ཐང་ཕྱོགས་སུ་ད་ལྟའི་བར་མ་ནུབ་པར་ཡོད་ས་རེད། དེ་དག་ཉི་མ་གཅིག་གཉིས་ཀྱི་སྐད་ཆ་མིན་པར་ལོ་རབས་དང་དུས་རབས་བརྒྱུད་དེ་མྱོང་ཁྲིད་དང་དམར་ཁྲིད་ཀྱི་ཐོག་ནས་ཡོང་བ་ཞིག་རེད། དེར་བརྟེན་༧གོང་ས་མཆོག་གིས་ཀྱང་ཕྱག་སྲོལ་བཟང་བོ་དེ་དག་གི་རྒྱུན་མ་ཉམས་པར་བདག་པོ་རྒྱག་རྒྱུ་གལ་ཆེན་པོ་རེད་གསུང་གི་ཡོད་པ་རེད།
དྲི་བ། རྒྱ་ནག་དང་ཐའེ་ཝན། སིངྒ་པོར། ཐེ་ལན་ཌི། མ་ལེ་ཤི་ཡ་སོགས་ནང་ཆོས་དར་བའི་རྒྱལ་ཁབ་དག་ཏུ་དུས་འཁོར་དབང་ཆེན་གསུང་པའི་ལམ་སྲོལ་ཡོད་དམ།
ལན། བོད་བརྒྱུད་ནང་བསྟན་དེ་ཡུལ་ལུང་གཞན་ལ་དར་བའི་ནང་ཆོས་ལས་ཕྱུག་པོ་རེད་ཟེར་གྱི་ཡོད། དེ་དོན་དངོས་དང་མཐུན་པ་ཞིག་རེད། དཔེ་ན། སོ་སོ་ཐར་བའི་འདུལ་བའི་སྐོར་དང་དགེ་ཚུལ་སློང་གི་སྡོམ་པའི་སྐོར། མངོན་པའི་གཞུང་སོགས་ཐའེ་ལན་ཌི་དང་འབར་མ། ཤི་རི་ལིངྒ་སོགས་ཀྱི་གནས་བརྟན་སྡེ་བའི་དགེ་འདུན་པ་དང་། པ་ལཱེ་སྐད་ཀྱི་ཐོག་ནས་སྡེ་སྣོད་གསུམ་ལ་སློབ་སྦྱོང་ཡོད་པའི་མཁས་པ་ཚོ་དང་མཉམ་དུ་གོ་བསྡུར་བྱས་ན་ཕན་ཚུན་རྩེ་མཐུན་ཡོང་བ་ཞིག་ཆགས་ཡོད། སྔགས་ཀྱི་ཐོག་ལ་རྒྱུད་སྡེ་འོག་མ་བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་སོགས་ཀྱི་སྐོར་ལ། བོད་བརྒྱུད་ནང་བསྟན་གྱི་ཐོག་ནས་ཉི་ཧོང་དང་ཐའེ་ཝན། ཀོ་རི་ཡ་སོགས་གསང་སྔགས་ཆོས་ལུགས་པ་དག་དང་གོ་བསྡུར་བྱས་ན། གོང་ལྟར་ཕན་ཚུན་ལ་ཡིད་ཆེས་གུས་བཀུར་བརྒྱ་ཆའི་ཐོབ་པ་ཞིག་རེད། འོན་ཀྱང་། ང་རང་གི་ཤེས་ཚོད་བྱས་ན། ཐེག་དམན་པ་ཟེར་ན་འདྲ། གནས་བརྟན་སྡེ་བའི་དགེ་འདུན་སྡེ་སྣོད་གསུམ་པ་བ་དེ་ཚོ་དང་། ཉི་ཧོང་དང་ཐའེ་ཝན། ཀོ་རི་ཡ་སོགས་གསང་སྔགས་ཆོས་ལུགས་པའི་གཞུང་ན་མེད་པར། བོད་བརྒྱུད་ནང་བསྟན་ནང་ཐུན་མོང་མ་ཡིན་པ་ཞིག་ཡོད་པ་ནི། སྔགས་བླ་མེད་ཀྱི་ཆོས་འཁོར་གསང་བདེ་འཇིགས་གསུམ་དང་དུས་འཁོར། ཚད་མའི་གཞུང་སོགས་རེད་བསམ་གྱི་ཡོད། དེར་བརྟེན་ནང་ཆོས་དར་བའི་ཡུལ་ལུང་དེ་དག་ནང་དུས་འཁོར་དབང་ཆེན་བསྐུར་བའི་ལམ་སྲོལ་ཡོད་པ་དེ་སྔ་མཐོང་ཐོས་མ་བྱུང་།
དྲི་བ། དུས་འཁོར་དབང་ཆེན་ཞུ་མཁན་སློབ་མ་ཞིག་ལ་མཚོན་ན་ཐོག་མའི་ཆ་རྐྱེན་གང་དག་ཚང་དགོས་པ་དང་། དབང་ཞུས་པའི་རྗེས་སུ་སྲུང་བྱ་གང་དག་ཡོད་དམ།
ལན། དུས་འཁོར་དབང་ཆེན་ཞུ་མཁན་གྱི་སློབ་མར་དད་པ་དང་ཡིད་ཆེས་གལ་ཆེ་ཤོས་རེད། སློབ་མ་ཚོས་སོ་སོའི་ན་ཚ་སེལ་ཐབས་དང་བྱ་བ་ལམ་འགྲོ་ཡོང་ཐབས་ཙམ་གྱི་སྐད་ཆ་མ་རེད། མཐའ་ཡས་པའི་མ་གྱུར་སེམས་ཅན་ཐམས་ཅད་བསམ་པའི་སེམས་སྐྱེད་ཅིག་དང་། རང་ལས་གཞན་གཅེས་འཛིན་གྱི་བྱང་ཆུབ་སེམས། བརྩེ་བ་སྙིང་རྗེ་ཆེན་པོ་ཞིག་ལ་སེམས་པ་བཅོས་རྒྱུ་གལ་ཆེན་པོ་རེད། ནང་པ་སངས་རྒྱས་བའི་ཆོས་ཚུལ་གྱི་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པ་རེད། དེ་འདྲའི་མཉམ་ལེན་གནང་མཁན་ཞིག་ཡིན་ན་དུས་འཁོར་དབང་ཞུ་བའི་སློབ་མའི་ཆ་རྐྱེན་ཚང་བ་རེད། དུས་དབང་ཞུས་པའི་རྗེས་ཀྱི་སྲུང་བྱ་གཙོ་བོ་ཡང་དེ་དག་རེད་བསམ་གྱི་ཡོད། དེ་འདྲ་ཞིག་བྱུང་ན་བྱང་ཆུབ་སེམས་པའི་སྡོམ་པ་དང་སྔགས་ཀྱི་སྡོམ་པའི་རྩ་བ་ཕལ་ཆེར་ཟིན་ཡོད་པ་རེད།
དྲི་བ། དུས་འཁོར་དབང་ཞུས་ན་སྐྱེ་བ་ཕྱི་མར་བྱང་ཕྱོགས་ཤམ་བྷ་ལ་རུ་སྐྱེ་ངེས་ཡིན་ཟེར་བ་དེ་གང་འདྲ་ཞིག་ལ་ཞུ་བཞིན་ཡོད་དམ།
ལན། སྤྱིར་འཛམ་བུ་གླིང་འདིར་གནས་ཁྱད་པར་ཅན་ལྔ་ཡོད་པར་གྲགས། དབུས་སུ་གནས་མཆོག་རྡོ་རྗེ་གདན་དང་། ཤར་ཕྱོགས་སུ་རྗེ་བཙུན་འཇམ་པའི་དབྱངས་ཀྱི་ཞིང་རྒྱ་ནག་རི་བོ་རྩེ་ལྔ། ལྷོ་ཕྱོགས་སུ་འཕགས་པ་སྤྱན་རས་གཟིགས་དང་རྗེ་བཙུན་སྒྲོལ་མའི་ཞིང་རི་བོ་པོ་ཏཱ་ལ་དང་གཡུ་ལོ་བཀོད། ནུབ་ཕྱོགས་སུ་ཨོ་རྒྱན་མཁའ་འགྲོའི་གླིང་། བྱང་ཕྱོགས་སུ་ཤམ་བྷ་ལ་བཅས་རེད། རྒྱ་གར་གྱི་པཎ་གྲུབ་ཆེན་པོ་དུས་ཞབས་པ་སོགས་ཀྱིས་རྗེ་བཙུན་སྒྲོལ་མ་ཉམས་བཞེས་གནང་ཞིང་། ལྷག་པའི་ལྷ་ཡི་ཏིང་ངེས་འཛིན་གྱི་ཐུན་མོང་མ་ཡིན་པའི་རྫུ་འཕྲུལ་དང་ནུས་པ་བསྒྲུབས་ཏེ་བྱང་ཕྱོགས་ཤམ་བྷ་ལར་དངོས་སུ་ཕེབས་ཏེ། རིག་ལྡན་གྱི་དྲུང་ནས་དུས་ཀྱི་འཁོར་ལོའི་དབང་ལུང་མན་ངག་དང་བཅས་པ་འཕགས་ཡུལ་ལ་གདན་འདྲེན་ཞུས་རྗེས། རྒྱུན་དེ་རིམ་གྱིས་བོད་དུ་དར་བ་རེད་ཟེར་བའི་ལོ་རྒྱུས་ཡོད། བོད་གངས་ཅན་ལྗོངས་སུ་ཡང་པཎ་ཆེན་དཔལ་ལྡན་ཡེ་ཤེས་ཀྱིས་མཚོན་པའི་སྐྱེས་བུ་དམ་པ་མང་པོ་རྫུ་འཕྲུལ་གྱི་བཀོད་པ་ལ་བརྟེན་ཏེ་བྱང་ཕྱོགས་ཤམ་བྷ་ལར་ཕེབས་པ་མ་ཟད། ལམ་ཡིག་ཅིག་ཀྱང་མཛད་ཡོད་པ་རེད། དུས་ཚོད་ཀྱི་ཆ་ནས་ཀྱང་། སྟོན་པས་དཔལ་ལྡན་འབྲས་སྤུངས་སུ་དུས་འཁོར་རྒྱུད་དང་པོ་གསུངས་སར་ཆེད་དུ་བཅར་བའི་གདུལ་བྱ་དེ་ཤམ་བྷ་ལའི་ཆོས་རྒྱལ་ཟླ་བ་བཟང་པོ་གཙོས་པའི་རྒྱལ་ཕྲན་ ༩༦ ཙམ་ཤམ་བྷ་ལ་ནས་ཚུར་ཕེབས་ཏེ་སྟོན་པའི་མདུན་ནས་དུས་འཁོར་རྒྱུད་ཞུས་པ་རེད། སྐབས་དེའི་རྒྱལ་བོ་ཟླ་བ་བཟང་པོ་ནས་རྩིས་པའི་ཆོས་རྒྱལ་བདུན་གྱི་བར་ཉམས་བཞེས་གནང་ཞིང་། རིགས་ལྡན་དང་པོ་འཇམ་དཔལ་གྲགས་པ་ནས་ད་ལྟའི་བར་རིགས་ལྡན་ཉེར་གསུམ་པར་བསླེབས་ཡོད། རྒྱལ་བོ་དེ་དག་མང་ཆེ་བ་ལོ་བརྒྱ་ལྷག་ལ་རྒྱལ་སར་བཞུགས་པ་རྐྱང་རེད། ད་ལྟ་ང་ཚོས་སྨོན་ལམ་རྒྱག་ཡུལ་དེ་རིག་ལྡན་ཉེར་ལྔ་པ་དེ་རེད།
དྲི་བ། མ་འོངས་པར་བྱང་ཕྱོགས་ཤམ་བྷ་ལ་རུ་རིགས་ལྡན་དྲག་པོའི་འཁོར་ལོ་བསྐོར་ཏེ་ཀླ་ཀློའི་དཔུང་ཚོགས་བཅོམ་པ་རེད་ཟེར་བ་དེ་གང་འདྲ་ཞིག་ལ་ཟེར་གྱི་ཡོད།
ལན། སྐབས་དེའི་དམག་འཁྲུག་དེ་ད་ལྟའི་འཛམ་གླིང་གི་དམག་འཁྲུག་ལྟ་བུ་ཞིག་ལ་ཡིད་ཆེས་བྱེད་ཀྱི་མེད། གང་ཡིན་ཟེར་ན། ཤམ་བྷ་ལའི་རིགས་ལྡན་དྲག་པོའི་འཁོར་ལོས་བཅོམ་ཟེར་བ་དེ་ཕྱི་ལ་སྦྱར་རྒྱུ་དང་ནང་ལ་སྦྱར་རྒྱུ་སོགས་གསུངས་ཡོད། ནང་ལ་སྦྱར་རྒྱུ་དེ་གཟུགས་ཕུང་ནང་གི་རྩ་རླུང་ཐིག་ལེ་ལ་སྦྱོར་དགོས་སྟབས། དེང་གི་དམག་འཁྲུག་དེ་རྩ་རླུང་ཐིག་ལེ་ལ་སྦྱར་སྲོལ་མེད། རྫུ་འཕྲུལ་གྱི་བཀོད་པ་སྣ་ཚོགས་ཤིག་གི་ཐོག་ནས་བཏུལ་པར་མཛད་པ་ཞིག་ཡིན་པ་འདྲ། དཔེ་ན། བདག་ཅག་གི་སྟོན་པ་ཐོ་རངས་སངས་རྒྱས་པའི་སྔར་ནུབ་དེར་བདུད་དམག་བྱེ་བ་མང་པོ་བཏུལ་བའི་མཛད་པ་བསྟན་པ་རེད། ཙོང་ཁ་བས། “ མདའ་མཚོན་གོ་ཆ་མ་བཟུང་བར། །རང་ཉིད་གཅིག་པུས་བྱེ་བའི་བདུད། །མ་ལུས་ཕམ་མཛད་གཡུལ་འགྱེད་བས། །ཁྱོད་ལས་གཞན་པ་སུ་ཡིས་ནུས” ཞེས་གསུངས་པ་ལྟར་རེད།
དྲི་བ། དུས་འཁོར་དབང་ཆེན་སྐབས་རྨི་ལམ་བརྟག་སྲོལ་ཞིག་ཡོད་པ་དེ་རྨི་ལམ་གང་འདྲ་རྨིས་ན་བཟང་བ་དང་གང་འདྲ་རྨིས་ན་ངན་པ་ཡིན་ནམ།
ལན། རྨི་ལམ་བརྟག་སྐབས། ཟླ་བ་ཉི་མ་ཤར་བ་དང་གཙུག་ལག་ཁང་དུ་མཇལ་བ། དགེ་འདུན་མང་པོ་ཚོགས་པ། མེ་ཏོག་གི་གནས་སུ་འགྲོ་བ། གོས་གསར་པ་གྱོན་པ། ཞོ་དང་འོ་མ་འཐུང་བ། རི་བོའི་རྩེ་ལ་འཛེག་པ་སོགས་རྨས་ན་རྨི་ལམ་ཡག་པོ་དང་། དུས་ཀྱི་འཁོར་ལོ་ཉམས་ལེན་བྱེད་པའི་བག་ཆགས་བཟང་པོ་ཡོད་པའི་རྟགས་སུ་རྩི་བ་རེད། གཞན། མཚན་ནག་དཀྱིལ་དུ་མུན་ནག་ནང་ལ་འགྲོ་བ་དང་། ཁ་ཐུར་དུ་གཏད་དེ་འགྲོ་བ། འདམ་བག་དཀྱིལ་དུ་འཆིང་པ། ལུས་གཅེར་བུར་ཁ་ལྷོ་ཕྱོགས་སུ་བལྟས་ཏེ་འགྲོ་བ། རྔ་མོང་ལ་ཞོན་པ། མེ་ཏོག་དམར་པོའི་དཀྱིལ་དུ་འགྲོ་བ་སོགས་རྨི་ལམ་ངན་པའི་རིགས་རེད། ཚེ་ཡི་བར་ཆད་ཡོད་པའི་མཚན་མར་བཤད་ཀྱང་། དེ་རིགས་ལ་རྣམ་རྟོག་བྱ་རྒྱུ་ཡོད་པ་མ་རེད། རྨི་ལམ་བཟང་ངན་གང་ཞིག་རྨིས་ཀྱང་དེ་ལ་ཨ་འཐས་སུ་འཛིན་མི་རུང་། ཆོས་ཐམས་ཅད་རྨི་ལམ་སྒྱུ་མ་ལྟ་བུ་ཡིན་གསུངས་པ་ལྟར། རྨི་ལམ་ལ་ཡིད་ཆེས་ཞེ་དྲག་བྱ་རྒྱུ་ཡོད་པ་མ་རེད། རྨི་བལྟས་བཟང་ངན་གང་ཞིག་བྱུང་ཡང་དེ་ལ་འགྱུར་བ་མེད་པ་དང་ཟློག་ཐབས་མེད་པ་དེ་འདྲ་གང་ཡང་མ་རེད།
གསར་འགོད་པ། དོན་འགྲུབ་བཀྲ་ཤིས།
གསར་འགོད་པས་བྲེལ་དབང་གིས་ཡིག་ཆད་དང་ཡིག་ནོར་འགའ་འདུག
དེ་བས་ཀྱང་ཟབ་མོ་རྡོ་རྗེ་ཐེག་པ་བསྔགས་ཀྱི་སྐོར་དེ་ སྔགས
འདུལ་བྱ་ཁྱད་པར་ཅན་ གདུལ་བྱ་
་འདུལ་བྱ་ཆེས་ཉུང་ཤས་ གདུལ་བྱ་
ད་ཆར་རྒྱ་རང་ལ་དུས་འཁོར་ རྒྱ་གར་
སྐྱེས་པ་ཕྱི་མར་ཤམ་བྷ་ལ་ སྐྱེ་བ་
རྒུད་ཚོགས་ཐམས་ཅད་ཞུ་ནས་ ཞི་ནས
༧གོང་ས་མཆོག་དང་པཎ་ཆེན་ཕྲེང་ སྐུ་ཕྲེང་
གཞན་རྙིང་མ་དང་ཀ་བརྒྱུད་ བཀའ་བརྒྱུད་
དཔེ་ན། སོ་སོ་ དཔེར་ན།
གནས་རྟེན་སྡེ་བའི་ གནས་བརྟན་
གནས་རྟེན་སྡེ་བའི་དགེ་འདུན་སྡེ་སྣོད་ གནས་བརྟན།
བརྩེ་བ་སྙིང་རྗེ་ཆེན་པོ་ཤིག་ལ་ ཞིག་ལ་
ལྷག་པའི་ལྷ་ཡི་ཏང་ངེས་འཛིན་གྱི་ ཏིང་ངེ་
རིག་ལྡན་གྱི་དྲུང་ནས་ རིགས་
་ཆེད་དུ་བཅར་བའི་འདུལ་བྱ་དེ་ གདུལ་
རྒྱལ་བོ་དེ་དག་མང་ཆེ་བ་ལོ་རྒྱ་ལྷག་ལ བརྒྱ་
གང་འདྲ་རྨས་ན་བཟང་བ་དང་གང་འདྲ་རྨས་ན་ངན་པ་ཡིན་ནམ།
རྨིས་ན་
ཚེ་ཡའི་བར་ཆད་ ཚེ་ཡི་
གང་ཞིག་རྨས་ཀྱང་ རྨིས་
དེ་ལ་ཨ་འཐས་སུ་འཛིན་མི་རིང་། རུང་
ཙོང་ཁ་བས། “ མདའ་མཚོན་གོ་ཆ་མ་བཟུང་བར། །རང་ཉིད་གཅིག་པུས་བྱེ་བའི་བདུད། །མ་ལུས་ཕམ་མཛད་གཡུལ་འགྱེད་བས། །ཁྱོད་ལས་གཞན་པ་སུ་ཡིས་ནུས” ཞེས་གསུངས་པ་ལྟར་རེད།
མ་ལུས་ཕམ་མཛད་གཡུལ་གྱི་ལས།།
ངོ་མ་བཟང་གི གཏིང་ཟབ་ས་དང་རྒྱ་ཆེ་ས་ནས་དྲི་བ་བཏང་འདུག་ལ། དྲིས་ལེན་ཡང་ཁ་གསལ་ཞིང་གནད་དུ་འབབ་པ་ཞིག་རེད། ཀློག་པ་པོ་ཚོར་མཐོང་ཆུང་བྱས་པ་མིན་ཡང་། མཆན་བུ་འདེབས་མཁན་མེད་སྲོལ་ལ་བལྟས་ཡོང་ན་དེ་ཙམ་གོ་ཐུབ་ཀྱི་མེད་པ་འདྲ།
༼རིག་ལྡན་དང་པོ་འཇམ་དཔལ་གྲགས་པ་ནས་ད་ལྟའི་བར་རིག་ལྡན་ཉེར་གསུམ་པར་བསླེབས་ཡོད། ༽
ཅེས་པ་དེ་རིགས་ལྡན་དང་པོ་འཇམ་དཔལ་གྲགས་པ་ནས་ད་ལྟའི་བར་རིགས་ལྡན་ཉེར་གཅིག་པར་བསླེབས་ཡོད་པས་ད་ལྟའི་བར་རིགས་ལྡན་ཉེར་གསུམ་པར་བསླེབས་མི་འདུག
རིགས་ལྡན་མ་འགག་པ་ཁྲི་བཞུགས་ནི་རབ་རྒྱལ་མེ་ཡོས་ལོར་འཁེལ་བས་ད་ལོ་རིགས་ལྡན་ཁྲི་བཞུགས་ལོ་ཚིགས་༨༥བ་ཡིན་པས་ད་ལྟའི་བྱང་ཕྱོགས་ཤམ་བྷ་ལའི་རྒྱལ་བོ་རིགས་ལྡན་ཉེར་གཅིག་པ་མ་འགག་པ་ཡིན།
རིགས་ལྡན་ཉེར་གཉིས་པ་མི་ཡི་སེང་གེ་དང་ཉེར་གསུམ་པ་ནི་དབང་ཕྱུག་ཆེན་པོ་ཡིན་པས་ཉེར་གསུམ་པ་འབྱོན་རག་བར་དུ་ལོ་བརྒྱ་དང་བཅོ་ལྔ་ཡོད།
རིགས་ལྡན་གྱི་རིགས་ལ་ཡང་འཇུག་ས་ཆད་འདུག
དོན་བཀྲ་ལགས།
ལམ་ཉིད་ཅིག་ཀྱང་མཛད་ཡོད་པ་རེད། ཅེས་པ་དེ་ལམ་ཉིད་མ་རེད། ལམ་ཡིག་རེད། པཎ་ཆེན་དཔལ་ལྡན་ཡེ་ཤེས་ཀྱིས་བྱང་ཕྱོགས་ཤམ་བྷ་ལར་བགྲོད་པའི་ལམ་ཡིག་མཛད་ཡོད།