ཁ་སང་དྷ་སར་ལོ་གསར་བའི་ཁ་བ་ཐོག་མ་བབས་པར་མ་ཟད། འདི་ལོ་ཀཱང་ར་ཕར་རྒྱབ་ཀྱི་རི་སྒང་ཆུང་ཆུང་དག་ཀྱང་ཁ་བས་གཡོགས་ཏེ་ལོ་ལྟར་མཐོང་དཀོན་པའི་ཡིད་འོང་གི་ཁ་བའི་མཛེས་ལྗོངས་ཤིག་སྐྲུན་འདུག
དྷ་རམ་ས་ལར་ལོ་རེར་ཁ་བ་ཐེངས་རེ་འབབ་པའི་སྲོལ་ཡོད་པ་ལྟར། ཁ་སང་ཕྱི་ཚེས་ ༧ ཉིན་འདི་ལོའི་ཁ་བ་ཐོག་མ་དེ་བབས་བྱུང་། ལོ་ལྟར་རི་བོ་རྡོ་ལ་དྷར་གྱི་རི་རྐེད་དུ་ཆགས་པའི་མོག་གྷན་དང་གངས་སྐྱིད་གཡས་གཡོན་ཙམ་མ་གཏོགས། རི་ཤོད་ཀྱི་དྷ་རམ་ས་ལའི་གྲོང་རྡལ་དང་། རི་འདབས་ཀྱི་ཀ་ཅ་རི་དང་ནོར་གླིང་སོགས་སུ་ཁ་བ་འབབ་སྲོལ་མེད་མོད། ད་ལོ་ཁ་བས་ཁེབས་ཚད་ནི་གྷ་གྷལ་དང་ཀཱང་ར་བརྒལ་ཏེ་ཕར་འདབས་ཀྱི་རི་སྒང་ཆུང་ཆུང་དག་ཀྱང་ཁ་བས་ཡོངས་སུ་བཀླུབས་ཏེ་མིག་གིས་ཟིན་ཚོད་ཀྱི་ས་གཞི་ཡོད་ཚད་དཀར་ལམ་ལམ་དུ་བསྒྱུར་འདུག མོག་གྷན་གྱི་ཁ་བ་མཐུག་སར་ཁྲི་གང་ལྷག་དང་དྷ་ཤོད་སོགས་སུ་ཁ་བའི་མཐུག་ཚད་ལ་མཐོ་གང་ཙམ་ཡོད་པ་དང་། འདས་པའི་ལོ་བཅུ་གྲངས་འགའི་རིང་དྷ་རམ་ས་ལའི་ཉེ་ཁུལ་དུ་ཁ་བའི་ཁེབས་ཚད་ཤུགས་ཆེ་ཤོས་ཤིག་ཆགས་ཡོད་འདུག
ལོ་ལྟར་ཁ་བ་འབབ་ཐེངས་རེར་ཉིན་གཅིག་གཉིས་རིང་མོག་གྷན་དང་གངས་སྐྱིད་བར་འགྲུམ་འགྲིལ་ཐད་དཀའ་ཕྲན་ཙམ་འཕྲད་ཀྱི་ཡོད་པ་ལྟར། ཁ་སང་ཕྱི་ཚེས་ ༧ ཉིན་ཁ་བས་རྐྱེན་པས་དྷ་རེ་དང་དྷ་ཤོད་བར་གྱི་གཞུང་ལམ་སྟེང་དུའང་འགྲུལ་སྐྱེལ་རླངས་འཁོར་གྱིས་གཙོས་པའི་རླངས་འཁོར་ཆེ་ཆུང་མང་པོ་འཁེགས་ཡོད་པ་དང་། ཉིན་དེར་ས་ཁུལ་ཡར་མར་དུ་ཕྱོགས་བསྐྱོད་བྱེད་མཁན་དག་ལ་འགྲུལ་བཞུད་ཐད་དཀའ་ངལ་འཕྲད་ཀྱིན་འདུག ལྷག་པར་དུ་ཁ་བའི་ལྗིད་ཁོགས་མ་ཐེགས་པར་སྡོང་བོའི་ཡལ་ག་རྣམས་ཆག་ཏེ་ལམ་གཞུང་སྟེང་ལྷུང་ཡོད་པ་མ་ཟད། ལམ་འགྲམ་གཡས་གཡོན་དུ་འཐེན་པའི་གློག་སྐུད་དང་ཁ་པར་དར་སྐུད་སོགས་བཅད་ཡོད་པར་བརྟེན། དྷ་ཤོད་གྲོང་རྡལ་གྱི་གཡས་གཡོན་ཁུལ་དང་། གངས་སྐྱིད། མོག་གྷན་སོགས་སུ་གློག་ཆད་དེ། ས་གནས་མང་ཚོགས་ཀྱི་རྒྱུན་ལྡན་གྱི་འཚོ་བའི་ཐད་གློག་དང་བརྡ་འཕྲིན་གྱི་དཀའ་ངལ་ཏོག་ཙམ་འཕྲད་ཀྱིན་འདུག་ལ། ལྷག་པར་དུ་དྲ་རྒྱ་བརྒྱུད་རྡོ་གདན་དུ་༸གོང་ས་མཆོག་གིས་གསུང་བཞིན་པའི་དུས་དབང་ལ་གསན་མཁན་རྣམས་དང་། དུས་དབང་དང་འབྲེལ་བའི་གསར་འགྱུར་ལ་མིག་གྱེར་མཁན་དག་ལ་བར་ཆད་བཟོས་ཆེན་པོ་ཞིག་ཡོད་པ་རེད།
དེ་རིང་ཕྱི་ཚེས་ ༨ ཉིན་དྷ་ཤོད་ནས་གངས་སྐྱིད་བར་གྱི་གཞུང་ལམ་སྟེང་གི་ཁ་བ་ཞུར་ཏེ་འགྲུམ་འགྲིལ་རྒྱུན་ལྡན་སླར་གསོ་བྱུང་ཡོད་ནའང་། གངས་སྐྱིད་ནས་མོག་གྷན་བར་གྱི་གཞུང་ལམ་སྟེང་རླངས་འཁོར་བསྐྱོད་མ་ཐུབ་པར་མང་ཚོགས་རྣམས་རྐང་ཐང་ལ་འགྲུལ་བཞུད་བྱེད་བཞིན་འདུག་ལ། གློག་སྐུད་དང་ཁ་པར་དར་སྐུད་སོགས་ད་དུང་བསྐྱར་གསོ་བྱེད་མ་ཐུབ་པར་བརྟེན་དྷ་ཤོད་གཡས་གཡོན་དང་། གངས་སྐྱིད། མོག་གྷན་སོགས་སུ་གློག་དང་བརྡ་འཕྲིན་གྱི་དཀའ་ངལ་སྔར་བཞིན་འཕྲད་ཀྱིན་འདུག
ལོ་རེར་དྷ་ས་ཁུལ་དུ་ཁ་བ་ཐེངས་གཅིག་མ་གཏོགས་འབབ་ཀྱིན་མེད་སྟབས། ལོ་རྟག་པར་ས་གནས་ཡུལ་མི་གཙོས་ཉེ་འདབས་ས་ཁུལ་ཀཱང་ར་དང་པ་ཊན་གོ་ཊི། ཅཱན་དྷི་གྷར་སོགས་ནས་མི་མང་པོ་ཁ་བར་ལྟ་གཟིགས་དང་ཁང་རྩེད་བྱེད་དུ་ཡོང་གིན་ཡོད་པར་བརྟེན། ཉིན་གཅིག་གཉིས་རིང་མོག་གྷན་གྱི་སྲང་ལམ་གང་སར་ཕྱོགས་ཡོང་གི་མགྲོན་པོ་དང་ཁངས་རྩེད་བྱེད་མཁན་གྱིས་ཁེངས་ཏེ་ལས་སླ་བོའི་ངང་ཡར་མར་དུ་འགྲུལ་བསྐྱོད་བྱེད་རྒྱུ་ཁེགས་པོ་ཡོད་མོད། འདི་ལོ་གཅིག་ནས་དྷ་ས་ཁུལ་གྱི་བོད་མི་ཕལ་ཆེ་བ་རྡོ་གདན་དུ་༸གོང་ས་མཆོག་གི་དུས་དབང་ཞུ་བར་བསྐྱོད་ཟིན་པར་བརྟེན། ནམ་རྒྱུན་དྷ་ས་ཁུལ་འདུས་སྡོད་བོད་མི་ཉུང་ཙམ་མ་གཏོགས་ལྷག་མེད་པ་དང་། གཉིས་ནས་འདི་ལོར་དྷ་སའི་ཉེ་འདབས་ཀཱང་ར་སོགས་ས་ཁུལ་མང་པོ་ཞིག་ལ་ཁ་བ་བརྒྱབ་ཡོད་སྟབས། མོག་གྷན་དུ་ཆེད་དམིགས་ཁ་བར་ལྟ་གཟིགས་དང་ཁངས་རྩེད་ཆེད་ཡོང་མཁན་ཉུང་བར་བརྟེན། ཁ་བའི་ཁྲོད་ཀྱི་མོག་གྷན་དུ་ལོ་ལྟར་གྱི་ཁ་བའི་དུས་ཚིགས་ནང་བཞིན་འཁྲུག་ཆ་དོད་པོ་མི་འདུག ཡིན་ནའང་། ཁ་བའི་དབུས་ཀྱི་མོག་གྷན་གྲོང་རྡལ་དང་ཉི་ཟེར་འོག་དཀར་འོད་ལམ་ལམ་བྱེད་པའི་རྡོ་ལ་དྷར་རི་རྒྱུད་ཀྱིས་ཕྱོགས་ཡོང་གི་མགྲོན་པོ་དག་ལ་རང་བྱུང་ཁམས་ཀྱི་མཛེས་ཉམས་ཡིད་དུ་འོང་བ་ཞིག་མིག་གི་ལོངས་སྤྱོད་དུ་སྦྱིན་བཞིན་འདུག
ཁ་བའི་ཁྲོད་ཀྱི་མོག་གྷན།
དྷ་སའི་གངས་སྐྱིད་རི་ཁུལ།
དྷ་ཤོད་ཀ་ཊ་རིའི་སྲང་ལམ།
དྷ་སའི་མཐའ་འདབས་ཀྱི་གྲོང་རྡལ།
མོག་གྷན་སུམ་མདོའི་སྣང་བརྙན།
ཁ་བར་ལྟ་གཟིགས་སུ་ཕེབས་མཁན་གྱི་མགྲོན་པོ།
ཁ་བའི་ཁྲོད་འཐུམ་པའི་མོག་གྷན་གྱི་གླ་གཏོང་རླངས་འཁོར་རྣམས།
གསར་འགོད་པ་དང་པར་བ། ཚེ་རིང་རྒྱལ།
ང་ཚོ་ཡར་ཡར་འགྲོ་དུས། །
ཁ་བ་མར་མར་བབས་བྱུང་། །
ཞེས་པའི་གླུ་དེ་ཡང་དྲན་བྱུང་།