བལ་ཡུལ་དུ་གནས་སྡོད་མགོ་ལོག་པ་སྐར་ཁྲི་བཙན་ལགས་ཀྱིས་འདི་གའི་གསར་འགོད་པར་བརྗོད་པ་ལྟར་ན། དེ་རིང་བདག་གིས་ཕ་ཡུལ་དུ་ཁ་པར་བཏང་སྟེ་གོ་གསལ་ལྟར་ན། དེ་རིང་ཞོགས་པ་སྔ་བོར་མགོ་ལོག་དར་ལག་རྫོང་ཐོག་གི་ལམ་འགྲམ་ནས་དགེ་འདུན་པ་ཞིག་གིས་རང་ལུས་མེར་བསྲེགས་བཏང་སྟེ། སྐུ་ཕུང་ཡོངས་སུ་མེར་འཚིགས་ཡོད་འདུག སྐབས་དེར་རྫོང་ཉེན་རྟོག་པ་ཡོང་སྟེ་སྐུ་ཕུང་འཁྱེར་ཡོད་ཀྱང་། ས་གནས་བོད་པ་མང་པོ་ཞིག་འདུ་འཛོམས་ཀྱིས་སྐད་འབོད་བརྒྱབ་སྟེ་སྐུ་ཕུང་ཕྱིར་འཕྲོག་འདུག ཁོང་ཚོས་བརྗོད་གསལ་ལ། དགེ་འདུན་པ་དུས་ཐོག་མར་གཞུང་ལམ་སུམ་མདོའི་གློག་སྡོང་ཆེན་པོ་ཞིག་གི་མདུན་ནས་སྐུ་ལུས་མེར་བསྲེགས་བཏང་འདུག་ལ། མེར་བསྲེགས་གཏོང་མཁན་དོ་བདག་དེ་ནི་མགོ་ལོག་དགའ་བདེ་རྫོང་སྟོང་སྐྱོབ་དགོན་པའི་བླ་མ་བསོད་བྷ་ཡིན་པར་ཚོད་དཔག་བྱེད་ཀྱི་འདུག་ཟེར།
ཡང་གནས་ཚུལ་ཡོང་ཁུངས་གཞན་ཞིག་གིས་ཁ་པར་བརྒྱུད་བརྗོད་པ་ལྟར་ན། དེ་རིང་ཞོགས་པ་སྔ་བོ་བོད་ནང་གི་ཆུ་ཚོད་ ༦ སྟེང་། དགའ་བདེ་རྫོང་སྟོང་སྐྱོབ་དགོན་པའི་བླ་མ་བསོད་བྷ་མཆོག་གིས་སྐུ་ལུས་ལ་ས་སྣུམ་མང་པོ་བླུགས་ཤིང་། ཞལ་དུ་ཡང་ས་སྣུམ་མང་པོ་མཆོད་དེ་མེར་སྒྲོན་ཡོད་པ་དང་། སྐབས་དེར་ཉེ་འཁོར་གྱི་མི་མང་པོས་འཛིན་ཐབས་བྱས་ཀྱང་། ཁོང་གིས་ཕྱག་ཏུ་བོད་པའི་རྒྱལ་དར་ཆེན་པོ་ཞིག་འཕྱར་བཞིན་” བོད་རང་བཙན་ཡིན། རྒྱལ་བ་རིན་པོ་ཆེ་བོད་ནང་གདན་འདྲེན་ཞུ་དགོས” ཅེས་ཀྱི་འབོད་ཚིག་སྒྲོག་བཞིན་ཁྲོམ་ལམ་དུ་བརྒྱུགས་ཏེ་སར་འགྱེད་ཡོད་པ་དང་། དེ་མ་ཐག་རྫོང་གི་ཉེན་རྟོག་པ་མང་པོ་འབྱོར་ནས་སྐུ་ཕུང་འཁྱེར་རྩིས་བྱེད་སྐབས། ས་གནས་བོད་རིགས་མང་པོ་འདུ་འཛོམས་ཀྱིས་སྐད་འབོད་སྒྲོག་པ་སོགས་བྱས་ཏེ་སྐུ་ཕུང་ཉེན་རྟོག་པའི་ལག་ནས་ཕྱིར་འཕྲོག་ཡོད་ཀྱང་། བོད་པའི་རྒྱལ་དར་དེ་འཕྲོག་ཐུབ་ཡོད་མི་འདུག
སྐར་ཁྲི་བཙན་ལགས་ཀྱིས་གོ་ཐོས་ལྟར་ན། ཐེངས་འདིར་བསོད་བྷོ་ལགས་ཀྱིས་རང་ལུས་མེར་བསྲེགས་གཏོང་དོན། བླ་མ་བསོད་བྷ་མཆོག་གིས་ཉེ་ལམ་དགའ་བདེ་རྫོང་ཉེན་རྟོག་ལས་ཁུངས་སུ་ཕྱིན་ཏེ། ཐེངས་འདིའི་རྡོ་རྗེ་གདན་གྱི་དུས་འཁོར་དབང་ཆེན་ཞུ་བར་སྐྱོད་ཆེད་ཐོངས་མཆན་ཞུས་སྐབས། འབྲེལ་ཡོད་ལས་བྱེད་ཚོས་ཁྱེད་རང་སྔོན་རྒྱ་གར་ལ་ཐེངས་ཁ་ཤས་ཕྱིན་མྱོང་མཁན་ཞིག་རེད་ཅེས་ཆབ་སྲིད་ཀྱི་ལས་ཀ་འདྲ་མིན་བྱས་ཡོད་པའི་ཉེས་འཛུགས་འོག་ལག་འཁྱེར་མ་སྤྲད་སྟབས། ཉིན་དེར་ཁོང་ཚོའི་བར་ཁ་རྩོད་ཤོར་ཏེ། བླ་མ་བསོད་བྷ་ལགས་ཀྱིས་ཐེངས་འདིར་ཁྱེད་ཅག་གིས་ང་ལ་ལག་འཁྱེར་མ་སྤྲད་ཚེ་ངས་རང་ལུས་མེར་བསྲེགས་གཏོང་རྒྱུ་ཡིན་ཚུལ་བརྗོད་པ་གཞན་གྱིས་ཐོས་ཡོད་འདུག་ཟེར།
སྐར་ཁྲི་བཙན་ལགས་ཀྱིས་བརྗོད་དོན། “དགེ་འདུན་པ་དེས་རང་ལུས་མེར་བསྲེགས་གཏོང་སྟངས་དང་། ཁོང་སུ་ཡིན་མིན་ཐོག་སྐད་ཆ་འདྲ་མིན་ཞིག་ཡོང་གི་འདུག ངས་ཀྱང་དེ་རིང་ཕ་ཡུལ་ལ་ཁ་པར་བཏང་སྟེ་གོ་པ་ཡིན། ད་དུང་འདིར་ཡོད་པའི་མགོ་ལོག་དགའ་བདེ་ཕྱོགས་ཀྱི་ཆོས་ཞུ་བ་གཞན་སྐོར་ཞིག་གིས་ཀྱང་ཁྱིམ་ལ་ཁ་པར་བཏང་སྟེ་གོ་འདུག གལ་སྲིད་བླ་མ་བསོད་བྷ་ཁོང་ཡིན་ཚེ་ང་ཁོང་ལ་རྒྱུས་མངའ་ཆེན་པོ་ཡོད། ཁོང་གི་འཁྲུངས་ཡུལ་མགོ་ལོག་དགའ་བདེ་རྫོང་གོང་སྟོད་ཡུལ་ཚོ་དང་། སྟོང་སྐྱོབ་དགོན་པའི་བླ་མ་རེད། ད་ཆར་དགུང་ལོ་ ༤༠ ཙམ་ཡིན། སྟོང་སྐྱོབ་དགོན་དུ་གདེང་འཇོག་ཆེན་པོ་ཡོད་པ་མ་ཟད། རྨ་ཉིན་སྲིབ་གཉིས་ཀྱི་སེར་སྐྱ་མི་མང་གིས་ཧ་ཅང་བརྩི་གུར་དང་དད་གུས་ཆེན་པོ་ཞུ་ས་ཞིག་རེད” ཅེས་བརྗོད་བྱུང་།
ང་ཚོས་སྐྱིད་ཀྱི་རྟ་ཕོ་མཉམ་ཞོན་དང་སྡུག་གི་ཁུར་པོ་མཉམ་ཁུར་བྱས་ཏེ། དཀའ་སྡུག་གང་འདྲ་ཞིག་བྱུང་ན་ཡང་གཡུལ་ས་དེ་ལས་རྣམ་པར་རྒྱལ་རྒྱུ་ནི་ང་ཚོའི་བཟློག་མེད་ཀྱི་འགན་འཁྲི་ཡིན།
ཨ་ཁ་ཁ།
དཀོན་མཆོག་མཁྱེན།
ཁྱོད་ཚོས་འདི་ལྟར་གནང་བ་གཟི་བརྗིད་ལ་ཆེ།།
ཁྱེད་ཚོ་འདི་ལྟར་ཕེབས་པ་འོད་རླབས་ཆེ།།
ཁྱེད་ཚོ་གངས་ཅན་བོད་ལ་བཀའ་དྲིན་ཆེ།།
ཁྱེད་ཚོ་འབར་བའི་མེ་ལྕེ་ཤིན་ཏུ་ཆེ།།
ཁྱེད་ཚོའི་མཚན་སྙན་ནམ་ཡང་ཡལ་བ་མེད།།
ཁྱེད་ཚོའི་ནམ་ཡང་བོད་ཀྱིས་བརྗེད་ཐབས་མེད།
ཁྱེད་ཚོའི་མཛད་རྒྱས་འདི་ལས་ཆེ་བ་མེད།
ཁྱེད་ཚོ་ས་སྟེང་འདི་ན་འགྲན་ཟླ་མེད།།
གཞན་དོན་བསྒྲུབ་པའི་དཔའ་བོ་ཁྱེད་ཚོ་རེད།།
བསྟན་འགྲོ་དགོངས་མཁན་དཔའ་བོ་ཁྱེད་ཚོ་རེད།།
བོད་འདི་དངོས་གནས་བསམ་མཁན་ཁྱེད་ཚོ་རེད།།
རྒྱལ་སྲས་བྱང་ཆུབ་སེམས་དཔའ་ཁྱེད་ཚོ་རེད།།
མ་ཎི་ཡིག་དྲུག་ཁྱེད་ཚོའི་དོན་དུ་འདོན།།
མཆོག་གསུམ་སྐྱབས་འཇུག་ཁྱེད་ཚོའི་དོན་དུ་ཞུ།།
སླར་ཡང་གངས་ཅན་བོད་ལ་སྐྱེ་བར་ཤོག།
སྐྱེས་ནས་བསྟན་འགྲོའི་འགྲོ་དོན་བསྒྲུབ་པར་ཤོག།
བར་དོའི་སྐྱེལ་མ།
མེ་རྟག་ཕྲ་མོ་ལུས་ལ་ཕོག་ཀྱང་བཟོད་མེད་ཚོར་བའི་ན་གཟུགས་ཤིག།
དུས་གསུམ་ཁ་ཟས་དུས་ཐོག་མ་རག་བཟོད་མེད་ཕོ་བའི་ངར་སྐད་ཅིག།
སེམས་ཞུམ་དམན་པའི་ལྟ་བ་དེ་ལས་རང་ལུས་གཅེས་པའི་དཔང་རྟགས་ཤིག།
འོན་ཀྱང་རླབས་ཆེན་ཁྱེད་ཀྱི་སྟོབས་ནི་བདག་གི་བསམ་པའི་ཡུལ་ལས་འདས།།
སྔོན་དུས་སུམ་གཉིས་མངའ་དབང་བསྒྱུར་དུས་ཡ་མེད་དཔའ་རྒོད་བརྗོད་མི་དགོས།།
ལྷ་སྒྲུང་གེ་སར་བློན་པོར་ཡ་མེད་དཔའ་བའི་སྙིང་སྟོབས་ཚད་མེད་གདའ།།
བར་སྐབས་སིལ་བུའི་དུས་སུ་རིགས་མཐུན་གཅེས་སྲོག་འཕྲོག་པའི་ལག་དམར་མང་།།
འོན་ཀྱང་དེང་དུས་རླབས་ཆེན་སྙིང་སྟོབས་མེ་ལྕེས་གསལ་སྟོན་བྱེད་བཞིན་འདུག།
སེམས་ཀྱི་དཀའ་སྡུག་སེམས་ཀྱི་སེམས་ནས་སེམས་ནུས་ཡོད་དགུ་བྱིན་ཟར་བཏབ།།
ལུས་ཀྱི་དཀའ་སྡུག་ཇི་ལྟར་ཆེ་ཡང་བྱིན་ཟའི་ཚོགས་ལ་ཕངས་མེད་བཏབ།།
སེམས་ལུས་ལྟ་བ་མཐུན་པའི་ཡོད་ཚད་བདེ་སྐྱིད་ཆོལ་གསུམ་ཆེད་དུ་ཕུལ།།
ཁྱེད་ཀྱི་སྙིང་སྟོབས་ནམ་ཡང་མི་བརྗེད་བདག་གི་ཡིད་ཀྱི་དྲན་གདུང་ཉིད།།
ཞུམ་མེད་ཀྱི་སྙིང་སྟོབས་དེ་ལྟ་བུ་ཡོད་པ་ནི་དངོས་གནས་སུམ་གཉིས་ས་ཡི་ཁྱོན་ལ་མངའ་དབང་བསྒྱུར་བའི་མི་རིགས་ཤིག་གི་དཔའ་རྟགས་ངོ་མ་རེད།
ཁོང་དང་ཁོང་འདྲ་བའི་སྐྱེས་བུ་རྣམས་ལ་ངས་སེམས་གཏིང་ནས་དཀའ་དྲིན་རྗེས་དྲན་དང་མ་འོངས་པར་ཁོང་རྣམས་ཀྱི་བསམ་དོན་མྱུར་འགྲུབ་ཡོང་བའི་གཏམ་བཟང་ལ་མཉམ་སྒུག་བྱེད་ངེས་ཡིན།
རྒྱལ་གཅེས་ཀྱི་དཔའ་རྒོད་ཁྱོད་ལ་གུས་བཀུར་ཞུ།
སྟག་སྣ་འཇིག་མེད་ནས་་་ཡིན་ནའང་མི་རིགས་ཀྱི་འཐབ་རྩོད་ཆ་ནས་ཞི་དྲག་ཡག་པོ་རེད།།།།ཅེས་དང་་་སླད་ཕྱིན་ཁོང་རྣམས་པའི་སྙིང་ལ་སློབ་སྦྱོང་བྱས་ཏེ་་ཚེ་སྲོག་འཕྲོ་བརླག་མ་སོང་བའི་ཐོག་རྒྱ་གཞུང་ལ་ངོ་རྒོལ་བྱ་དགོས་པ་རེད་་་གསུང་་་་་་་་་་་་་་་་་་་གོ་བྱུང་བས་བོད་པ་ཚོ་་་་ཤེས་བྱུང་བས་བོད་པ་ཚོ་་་་་
འགྲོ་འདུག་རང་དབང་བྲལ་བའི་སྲིད་དབང་དེས་འོག་ནས།
མི་བཟོད་སྡུག་གི་མནར་གཅོད་བར་མེད་དུ་མྱོང་དུས།
སེམས་ནས་བླ་མ་དྲན་པའི་སྐྱོ་བ་དང་འགྲོགས་ཏེ།
འཇིག་རྟེན་མི་ཡུལ་འདུག་པའི་མདུན་པ་དེ་བྲལ་སོང་།
ད་སྔོན་གཅེས་པར་སྐྱོང་བའི་དལ་འབྱོར་གྱི་ལུས་རྟེན།
ད་ལྟ་བཟོད་དཀའི་མེ་ལྕེའི་མཚོན་ཁ་ན་གཡོ་བཞིན།
ཞུམ་མེད་རང་དབང་དགོས་པའི་གད་རྒྱངས་ཀྱི་ཁྲོད་ནས།
མདོ་སྨད་གཙན་པོ་བུ་ཁྱེད་མི་ཡུལ་ནས་ཕེབས་སོང་།
རྒྱལ་སྲས་མཆོག་གི་སྤྱོད་པ་རླབས་པོ་ཆེ་འཁུར་དུ་ལེན་པ་ལ་ཆེས་ཆེར་སྤྲོ་བ། ཉམ་ཐག་འགྲོ་བའི་སྐྱོ་གདུང་སེལ་བའི་སྙིང་རྗེའི་སྨན་མཆོག་གི་ཀ་ཆེན་དགུང་དུ་འདེགས་པའི་སེམས་དཔའ་ཆེན་པོ། མགོ་ལོག་ཁུལ་གྱི་བླ་མ་དམ་པ་སྐྱབས་རྗེ་བསོད་བྷོ་རིན་པོ་ཆེ་ཁོང་ནི་འདི་ལྟ་བུའི་བླ་མ་རླབས་ཆེན་ཞིག་ཡིན་པ་དེ། གཞན་དོན་དུ་གཤེགས་ཚར་བའི་རྗེས་སུ་མ་གཏོགས་མ་ཤེས་བ་ནི་ལས་རེ་ངན་ལ་ཕངས་རེ་ཆེ་ཨང་།
ཁོང་ཙམ་མིན་པར་ད་དུང་བོད་ཀྱི་ལྷག་བསམ་ཅན་དང་བྱང་ཆུབ་སེམས་དཔའ་ཁྲི་ཕྲག་མང་པོ། བགྲོངས་བའི་རྗེས་སུ་མ་གཏོགས་བཀའ་དྲིན་དང་ཁོང་ཚོའི་ཡོན་ཏན་རྟོགས་ཐུབ་ཀྱི་མེད་པ་འདི་ཧ་ཅང་བློ་ཕམ་པོ་རེད། བོད་ཀྱི་དཔའ་བོའམ་སེམས་དཔའ་ཆེན་པོ་རྣམ་པ་ལགས། ཁྱེད་རྣམས་ཀྱིས་བདག་གཞན་མཉམ་བརྗེའི་སྤྱོད་པ་རླབས་པོ་ཆེའི་བློ་སྟོབས་ཕ་རོལ་ཏུ་སོན་ཡོད་ནའང་། བསྟན་དང་འགྲོ་བའི་ཆེད་དུ་འཇིག་རྟེན་འདིར་འཚོ་བཞེས་གནང་རོགས་ཞུ། བཞི་བཅུ་ཞེ་གྲངས་ནས་བཟུང་། དཔའ་བོ་ཁྲི་ཕྲག་མང་པོའི་སྲོག་ཤོར་དང་འཆོར་བཞིན་ཡོད། དེ་རིང་བར་རྒྱལ་སྲས་ཀྱི་སྤྱོད་པ་རླབས་པོ་ཆེར་ཞུགས་ཏེ་ཉིན་རེ་ནས་ཉིན་རེ་རང་ལུས་ཞུགས་འབུལ་གྱིས་གཞན་དོན་དུ་གཤེགས་བཞིན་ཡོད། ང་ཚོ་བཙན་བྱོལ་དུ་ཡོད་པའི་བོད་མི་ཚོས། ཁྱེད་ཚོས་དགོངས་དོན་སྒྲུབ་པ་ལྟ་ཞོག ཐོབ་གོ་ས་དང་། ཕྱོགས་རེའི་འཐེན་འཁྱེར་ཁོ་ནས་ནང་ལ་འཁྲུག་རྩོད་བྱེད་བཞིན་བསྡད་ཡོད། གལ་སྲིད་ལྷག་བསམ་ཅན་ཚོ་མུ་འཐུད་དེ། གཤེགས་སོང་ན། ང་ཚོའི་ཁ་སྟབས་ནི་མ་ནི་རེ་མོས་ལ་མ་མོས་ཀྱིས་འདོན་པ་ལས།ལས་དོན་གང་ཡང་བསྒྲུབ་ཐུབ་ཀྱིན་མེད་པ་མ་ཟད་ཁྱོད་ཚོ་གཤེགས་དོན་རྒྱལ་སྤྱིར་ཁྱབ་སྒྲོག་ཙམ་ཡང་བྱེད་ཐུབ་ཀྱི་མེད་པར་བརྟེན། ཁྱེད་ཚོ་འཚོ་ཞིང་བཞེས་ནས་སྤྱིའི་དོན་སྒྲུབ་ན་དགེ་མཚན་ཧ་ཅང་ཆེ་བར་འདུག་པས། བདག་གིས་ཞུ་བ་ནན་ཀྱི་ཕུལ་ལོ།།
ཞོར་དུ།
ཡང་སྐྱག་ཤོར་གཞུང་དང་ཡུལ་བྱོལ་པ་ཚོས་དམ་པ་ཁོང་གི་མེ་དཔུང་འབར་བའི་ཀློང་དཀྱིལ་གྱི་བདེན་པའི་འབོད་ཚིག་དག་ལ་བཅོས་ལྷད་མི་གཏོང་བའི་རེ་སྐུལ་ཡང་ནན་གྱིས་ཐལ་ལོ།།
རང་ཅག་གངས་ཅན་པའི་དཔའ་རྒོད་ཁྱེད་ཚོའི་སྙིང་སྟོབས་ནི་ནམ་ཡང་ཞུམ་པ་མེད་པར་རྒྱལ་བསྟན་སླར་འདེགས་ཀྱི་མེ་ལྕེ་ཕྱོགས་ཀུན་སྤྲོས་པ་ནི་ཁ་བ་གངས་ཅན་པ་རྣམས་ཀྱི་མི་བརྗེད་པར་སྙིང་དབུས་བཅང་རྒྱུ་དང་། འདས་པོ་དེ་རྣམས་གནས་སྐབས་བར་དོའི་འཇིག་སྐྲག་ཡ་ང་བ་ལས་ཐར་ཏེ། རྣམ་མཁྱེན་གྱི་རྟེན་བཟང་མྱུར་དུ་སྒྲུབ་པའི་སྨོན་འདུན་གྲངས་མེད་ཞུ། བོད་རྒྱལ་ལོ།
དངོས་གནས་དཔལ་རྒོད་ཚོད་རང་ལུས་མེ་རུ་བསྲེགས་ནས།
འཛམ་གླིང་མི་མང་ཚོ་ལ་བདེན་པའི་རོགས་སྐྱོར་གྱི་རེ་སྒུག་རེ་ཞུས། རྒྱ་དམར་བཙན་པོའི་ཁྲིམ་བཅད་འོག་ལ་ཤི་གསོན་གཉིས་ལས་ཤི་བ་འདམ་པ་ནི། རྒྱ་ཡིས་བོད་ལ་བཟོས་པའི་སྡུག་བསྔལ་གྱི་རྒྱ་མཚོ་དེ་ཡིན།
བཙན་གནོན་དང་སྡུག་ཡུས་ཀྱི་མནར་གཅོད་ལ་ཚེ་སྲོག་གིས་རྒོལ་ལན་སློག་པའི་མི་བུ་བསོད་བྷ་ཁོང་དང་ཁོང་ལྟ་བུའི་སེམས་དཔའ་ཆེན་པོ་དག་ལ་བཟོད་གསོལ་དང་དགོངས་དག་ཞུ་ཀི་ཡོད། མྱ་ངན་དང་གུས་འདུད་ཀྱང་ཞུ་ཀི་ཡོད།
དགའ་བདེ་རྫོང་ནི་རྭ་རྒྱ་དགོན་པའི་ཉེ་འཁྲིས་སུ་ཆགས་ཡོད་པ་ཞིག་གོ་ཐོས་བྱུང་།
རྕོམ་སྒྲིག་པ་ལགས། དགེ་འདུན་པ་ཞིག་གིས་རང་ལུས་མེར་བསྲེགས་ཟེར་རྒྱུའི་དོད་དུ་སྤྲུལ་སྐུ་ཞིག་གིས་རང་ལུས་མེར་བསྲེགས་ཞེས་བཏགས་ན་འོས། དམ་པ་ཁོང་ནི་དར་ལག་རྫོང་ཁྲོད་ཀྱི་དགོན་པ་ཞིག་གི་སྤྲུལ་སྐུ་ཡིན་ཚུལ་དང་། དར་ལག་རྫོང་དུ་རྒན་གསོ་ཁང་ཞིག་ཀྱང་བཙུགས་ཡོད་པ། ཁོང་གི་དགོས་འདུན་དང་སྐུ་པར་སོགས་ཨེ་ཤ་ཡ་རང་དབང་རླུང་འཕྲིན་གྱི་དྲ་ཚིགས་ན་འདུག་པས་བརྒྱུད་འགོད་ཐུབ་ན་བཟང་།
དཀོན་མཆོག་མཁྱེན། དངོས་ནས་བསམ་བློ་གཏོང་གིན་གཏོང་གིན། གཞིས་ལུས་བོད་མི་དག་གི་སྙིང་སྟོབས་ཀྱི་མེ་ལྕེ་འདི་མཆེད་སྟངས་ལ་སེམས་པ་སྐྱོ་བ་དང་མིག་ཆུའི་བྲང་ཁོག་བརླན་ཞོར་དུ། ཁོང་ཚོའི་རྣམ་ཤེས་དག་པའི་ཞིང་དུ་སྐྱེ་བར་སྨོན་ལམ་དང་། རིགས་རུས་གཅིག་པའི་སྤུན་ཟླ་ཡོངས་ཀྱིས་ཕྱིས་སུ་འདི་འདྲའི་ཚེ་སྲོག་གོད་ཆག་བསྟུད་མར་མི་བྱུང་བར་འགན་འཁུར་དང་བསམ་ཤེས། དང་ལེན་བཅས་བྱེད་ཐུབ་པར་རེ་སྐུལ་ནན་པོ་ཞུ། ང་ཚོ་གསོན་པའི་ཆེད་དུ་བདེན་པའི་འཐབ་རྩོད་བྱེད་ཀྱི་ཡོད་དུས། ང་ཚོ་མི་གཅིག་ཡིན་ཡང་། གཏན་ནས་ཤི་མི་རུང་། ཤི་ལས་གསོན་པ་ནི་བདེན་པའི་འཐབ་རྩོད་བྱེད་པའི་ལམ་ཁ་ཆེས་མང་བ་ཡིན། ལྷག་དོན་དུ་བོད་དོན་ལ་སེམས་ཤུགས་མེ་ལྟར་འབར་བའི་དབའ་རྒོད་དག་འདི་ལྟར་གཅིག་རྗེས་གཉིས་མཐུད་དུ་ཕེབས་མི་རུང་གི གཞུགས་དགོས་ཀྱི་འདུག གསོན་དགོས་ཀྱི་འདུག གསོན་པ་དེ་ཡང་༧གོང་ས་རྒྱལ་བའི་དབང་བོའི་དུས་དབང་དུ་གསུངས་མ་ཐག་པ་བཞིན། འཚེ་མེད་ཞི་བའི་ལམ་ཁོ་ནར་བསྟེན་ནས་ང་ཚོའི་བདེན་པའི་འཐབ་རྩོད་བྱེད་དགོས་པ་ཡིན། ངས་འདི་ནས་ལག་ཟུང་སྙིང་གར་སྤྱར་ནས་བོད་མི་སེམས་ཤུགས་མེ་ལ་འཕུད་པར་གྲྭ་སྒྲིག་བྱེད་མཁན་དག་ལ་ཞུ་བ་བྱེད། རང་ལུས་མེ་ལ་མ་བསྒྲོན་རོགས། མེ་ཡིས་ང་ཚོ་ལ་རང་དབང་མི་སྤྲོད། མེ་ཡིས་ང་ཚོའི་སྙིང་སྟོབས་ཚིག་པ་རེད། སྐུ་མཁྱེན། མེ་ལ་མ་སྒྲོན་རོགས། ཞུ་བ་བྱེད། ཞུ་བ་བྱེད། བོད་རིགས་སྤུན་ཟླ་ཚོ། ངའི་སྙིང་ཁོང་རུས་པའི་གཏིང་ནས་ཞུ་བ་བྱེད། ང་ཚོ་གསོན་དགོས། གསོན་པའི་ཆེད་དུ་ང་ཚོའི་བདེན་པའི་འཐབ་རྩོད་བྱེད་ཀྱི་ཡོད་པ་རེད་ལགས།
་་་། ཉིན་དེར་ཁོང་ཚོའི་བར་ཁ་རྩོད་ཤོར་ཏེ། བླ་མ་བསོད་བྷ་ལགས་ཀྱིས་ཐེངས་འདིར་ཁྱེད་ཅག་གིས་ང་ལ་ལག་འཁྱེར་མ་སྤྲད་ཚེ་ངས་རང་ལུས་མེར་བསྲེགས་གཏོང་རྒྱུ་ཡིན་ཚུལ་བརྗོད་པ་གཞན་གྱིས་ཐོས་ཡོད་འདུག གཉིས་པ། ཁ་སང་ཕྱི་དྲོར་བླ་མ་བསོད་པ་དར་ལག་རང་ཁྱིམ་དུ་བཞུགས་ཡོད་ཀྱང་། དེ་རིང་ཞོགས་པ་ནས་གར་སོང་ཆ་མེད་ཆགས་ཡོད་འདུག་ལ། ནང་མི་གཉེན་འབྲེལ་ཚོས་འཚོལ་ཞིབ་བྱེད་སྐབས་ཁོང་གི་ལག་ཐོགས་ཁ་པར་ཡང་སྒོ་བརྒྱབ་ཡོད་འདུག ་་་་ཟེར།