ཐེ་ཝན་ལ་གོ་སྐབས་ཐེངས་གཅིག་སྤྲོད་རོགས།

ཐེ་ཝན་གྱི་སྲིད་འཛིན་འོས་བསྡུ་ལ་ཉིན་ ༢ ལས་ལྷག་མེད་པའི་མཚམས་འདིར། ཐེ་ཝམ་དམངས་གཙོའི་ལམ་དུ་འཁྲིད་མཁན་དང་ཐེ་ཝན་མི་དམངས་ཀྱིས་ཐད་ཀར་འོས་འདེམས་བྱུང་པའི་སྲིད་འཛིན་ཐོག་མ་སྟེ། ཐེ་ཝན་གྱི་སྲིད་འཛིན་ཟུར་པ་ལིས་ཏིན་ཧའེ་ཡིས་གསར་ཤོག་སྟེང་རང་ཉིད་ཀྱི་དངོས་སུ་ལག་བྲིས་བྱས་པའི་ “ ཐེ་ཝན་ལ་གོ་སྐབས་ཐེངས་གཅིག་སྤྲོད་རོགས ” ཞེས་པའི་བརྡ་ཁྱབ་གསལ་བསྒྲགས་ཤིག་སྤེལ་ཏེ། ཐེ་ཝན་མི་མང་གིས་དམངས་གཙོ་ཚོགས་པའི་སྲིད་འཛིན་འོས་མི་ཚེ་ཡཱན་ཝུན་ལ་རྒྱབ་སྐྱོར་ཡོང་བའི་རེ་སྐུལ་ཞུས་ཡོད་པ་དང་། ཁོང་གིས་འདས་པའི་ལོ་རྒྱུས་ཀྱིས་བདེན་དཔང་བྱེད་ཐུབ་པ་ལྟར། མ་འོངས་པར་ཐེ་ཝན་སྲིད་འཛིན་ལ་སུ་ཞིག་བདམས་ཐོན་བྱུང་ཡང་།  མཚོ་འགག་གཉིས་ཀྱི་འབྲེལ་བའི་ཐད་སྔར་དང་མ་འདྲ་བའི་རྣོ་ངར་ལྡན་པའི་འགྱུར་ལྡོག་ཅིག་འགྲོ་མི་སྲིད་པའི་སྐོར་གསལ་བཤད་བྱས་འདུག

སྲིད་འཛིན་ཟུར་པ་ལིས་ཏིན་ཧའེ་ཡི་ཡོང་ཁྱབ་གསལ་བསྒྲགས་དེའི་ནང་། ཐེ་ཝན་གྱི་དམངས་གཙོའི་འཕེལ་རིམ་གསུམ་པ་ལ་འཕྲད་སྲིད་པའི་ཉེན་ཁ་ཞིག་ནི་རྙིང་ཞེན་པའི་ཤུགས་རྐྱེན་འོག་ལམ་ལོག་རྒྱག་རྒྱུ་དེ་ཡིན་པ་དང་།   སྤྱིར་ཆབ་སྲིད་དམངས་གཙོའི་ལམ་ལུགས་ཀྱི་འཇིགས་སྣང་གཅིག་པུ་ནི་དབུ་ཁྲིད་ཀྱི་མགོ་སྐོར་བསླུ་འཁྲིད་དང་ནུས་འཇོན་མེད་པའི་བྱ་སྤྱོད་དེ་ཡིན་ལ། དམངས་གཙོའི་རྒྱལ་ཁབ་ནང་གལ་སྲིད་དབུ་ཁྲིད་ལ་ཁྲིམས་འགལ་བྱུང་བ་ཡིན་ན་སྲིད་ཁྲིམས་ལྟར་ཁྲིམས་གཅོད་བྱས་ཆོག་མོད། ཡིན་ནའང་། དབུ་ཁྲིད་ལ་ནུས་འཇོན་མེད་པ་དང་མགོ་སྐོར་བསླུ་འཁྲིད་ཀྱི་ཉེན་ཁ་དེ་འོས་ཤོག་ཁོ་ནར་བརྟེན་ནས་བསྒྱུར་བཅོས་བྱ་རྒྱུ་ལས་ཐབས་གཞན་མེད་པ་བཀོད་འདུག 

ཐེ་ཝན་དམངས་གཙོའི་ལམ་དུ་འཁྲིད་མཁན་སྲིད་འཛིན་ཟུར་པ་ལིས་ཏིན་ཧའེ་ཡིས་ཡོང་ཁྱབ་གསལ་བསྒྲགས་བརྒྱུད། རྒྱ་གཞུང་གིས་དྲག་མཚོན་འཇིགས་སྐུལ་དང་ཡིག་ཐོག་ཚུར་རྒོལ་ཕྱོགས་གཉིས་ནས་གནོན་ཤུགས་སྤྲད་དེ། ཐེ་ཝན་གྱིས་རང་གི་བདག་དབང་བློས་གཏོང་ཡོང་ཐབས་ཀྱི་རེ་ངན་འཆིང་གི་ཡོད་པ་དང་།   ༡༩༩༦ ལོའི་རྒྱ་གཞུང་གི་མཚོ་འགག་མེ་ཤུགས་འཕུལ་མདེལ་ཚོད་ལྟ་དེ་ནི་དྲག་མཚོན་གྱི་འཇིགས་སྐུལ་ཡིན་ལ།  ད་ལྟའི་ཆར་ཐེ་ཝན་འོས་བསྡུས་སྐབས་གོ་མིན་ཏང་ཚོགས་པར་དཀའ་ངལ་འཕྲད་བཞིན་པའི་གོ་སྐབས་འཇུས་ཏེ། “དགུ་གཉིས་སྤྱི་མོས་ངོས་འཛིན” ཞེས་པའི་རྒྱ་ནག་གཅིག་གི་ལྟ་བ་ངོས་ལེན་ཡོང་ཐབས་ལ་གནོན་ཤུགས་སྤྲོད་ཀྱིན་པ་འདི་ནི་ཡིག་ཐོག་ཚུར་རྒོལ་ཡིན་སྟབས། ཐེ་ཝན་གྱི་དམངས་གཙོས་རྒྱ་ནག་གི་གནོན་ཤུགས་ལ་གདོང་ལེན་བྱེད་དགོས་བའི་སྐོར་བརྗོད་ཡོད་པ་རེད།  

ད་དུང་ཡོང་ཁྱབ་གསལ་བསྒྲགས་དེའི་ནང་། རྒྱ་དམར་གཞུང་གིས་རྒྱ་ནག་ནང་ཚོང་ལས་གཉེར་བཞིན་པའི་ཐེ་ཝན་གྱི་བཟོ་ཚོང་ཚོགས་སྡེ་ཁག་བེད་སྤྱད་དེ།  ཡོང་ཁྱབ་ཐོག་ད་ལྟའི་རྒྱ་དམར་གཞུང་གི་སྲིད་དབང་ངོས་ལེན་དགོས་པའི་གནོན་ཤུགས་སྤྲད་དེ་ཐེ་ཝན་གྱི་དམངས་གཙོ་ལ་ཉེན་ཁ་བཟོ་བཞིན་ཡོད་པ་དང་། མ་གཞི་ཐེ་ཝན་གྱིས་རྒྱ་ནག་དང་མཉམ་དུ་ཚོང་འབྲེལ་བྱེད་དགོས་མོད། ཡིན་ནའང་། ཐེ་ཝན་གྱི་གཞི་རྩའི་ངོ་བོ་མུ་མཐུད་བརྟན་སྲུང་བྱེད་ཐུབ་པའི་ཐོག་ནས་ཚོང་འབྲེལ་བྱེད་དགོས་ལ། དེ་ལྟར་བྱས་ན་ད་གཟོད་ཐེ་ཝན་གྱི་བཟོ་ཚོང་ལ་རྒྱབ་རྟེན་དང་ཡུན་རིང་རྒྱུན་གནས་ཀྱི་ཁེ་ཕན་ཐོབ་ཐུབ་པ་བཀོད་ཡོད་པ་མ་ཟད། ལིས་ཏིན་ཧའེ་ཡིས་ “རྒྱ་གཞུང་གི་ཁ་གཏད་དུ་ལངས་ཡོད་པ་དེ་ནི་ཐེ་ཝན་མི་དམངས་ཡིན་པ་ལས། ཆབ་སྲིད་ཚོགས་པ་གང་རུང་ཞིག་མིན་པ་དེ་རྒྱ་གཞུང་གིས་ངེས་པར་གསལ་བོ་ཤེས་དགོས་པ་རེད།  ལོ་རྒྱུས་ཀྱིས་བདེན་དཔང་བྱེད་ཐུབ་པ་ཞིག་ནི་སུ་ཞིག་སྲིད་འཛིན་ལ་བདམས་ཐོན་བྱུང་བ་ཡིན་ནའང་། རྒྱ་གཞུང་གིས་མ་འོངས་པར་ཐེ་ཝན་དང་ངེས་པར་དུ་འབྲེལ་བ་བྱ་དགོས་པ་མ་ཟད།  མཚོ་འགག་གཉིས་ཀྱི་འབྲེལ་བར་རྣོ་ངར་ལྡན་པའི་འགྱུར་ལྡོག་འབྱུང་མི་སྲིད། ” ཅེས་རྒྱ་གཞུང་ལ་བརྡ་ལན་ཞིག་ཀྱང་སྤྲད་ཡོད་འདུག   

ཐེ་ཝན་མི་མང་གིས་ཐད་ཀར་འོས་འདེམས་བྱས་པའི་སྲིད་འཛིན་ཐོག་མ་ལིས་ཏིན་ཧའེ་ལས་གཞན་ད་དུང་།  བསྟུད་མར་ལོ་གཉིས་ལ་མི་མང་གི་འོས་འདེམས་བརྒྱུད་ཐེ་ཝན་སྲིད་འཛིན་ཁུར་མྱོང་མཁན་ཁྲིན་ཧྲིས་པེན་གྱིས་ཀྱང་བཙོན་ཁང་ནང་ཡོང་ཁྱབ་གསལ་བསྒྲགས་སྤེལ་ཏེ། ཐེ་ཝན་མི་མང་གིས་དམངས་གཙོ་ཚོགས་པའི་སྲིད་འཛིན་འོས་མི་ཚེ་ཡཱན་ཝུན་ལ་རྒྱབ་སྐྱོར་གནང་དགོས་པའི་རེ་སྐུལ་ཞུས་ཡོད་པ་རེད།  དེ་བཞིན། གོ་མིན་ཏང་གི་སྲིད་འཛིན་འོས་མི་མཱ་ཡཱན་ཅིག་ལ་མཚོ་འགག་གཉིས་ཀྱི་དཔལ་འབྱོར་བཟོ་ཚོང་སྡེ་ཁག་དག་གིས་རྒྱབ་སྐྱོར་ཆེན་པོ་བྱེད་བཞིན་ཡོད་པ་རེད། ཡིན་ནའང་། འབྱོར་ལྡན་ཚོང་བ་དེ་དག་གི་རྒྱབ་ན་རྒྱ་གཞུང་གི་ལྐོག་ཇུས་ངན་གཡོ་ཡོད་པའི་གླེང་སློང་ཡང་སླེབས་ཀྱིན་ཡོད་འདུག

ཕྱི་ལོ་ ༢༠༡༢ ཟླ་ ༡ ཚེས་ ༡༤ ཉིན་ཐེ་ཝན་གྱི་སྲིད་འཛིན་འོས་བསྡུ་ཆེན་མོ་གནང་གི་ཡོད་པ་དང་།  ཐེངས་འདིའི་ཐེ་ཝན་སྲིད་འཛིན་འོས་མི་གསུམ་ནི། རང་ལོ་ ༦༡ སོན་པའི་གོ་མིན་ཏང་ཚོགས་པའི་འོས་མི་དང་ད་ལྟའི་ཐེ་ཝན་སྲིད་འཛིན་ལས་ཐོག་སྐུ་ཞབས་མཱ་ཡན་ཅིག་དང་། རང་ལོ་ ༥༥ སོན་པའི་དམངས་གཙོ་ཚོགས་པའི་འོས་མི་ལྕམ་ཚེ་ཡཱན་ཝུན། རང་ལོ་ ༦༩ སོན་པའི་མི་དམངས་ཚོགས་པའི་འོས་མི་སཱུང་ཁྲུའུ་ཡུས་བཅས་ཡིན་པ་རེད།

གསར་འགོད་པ། ཚེ་རིང་རྒྱལ།