ཐའེ་ཝན་སྐུ་ཚབ་དོན་གཅོད་ཀྱིས་ཧོང་ཀོང་ནས་བཅར་བའི་རྒྱ་རིགས་སྐོར་ཞིག་ལ་བོད་ཀྱི་གནས་སྟངས་ངོ་སྤྲོད་བྱས་ཡོད་འདུག
ཉེ་ལམ་ཐའེ་ཝན་རྒྱལ་ཡོངས་སྲིད་འཛིན་འོས་འདེམས་ཀྱི་སྐབས་དང་བསྟུན་ཏེ། ཐའེ་ཝན་རྒྱལ་ས་ཐེ་པཱེ་རུ་ཀྲུང་ཧྭ་ཨེ་ཤ་ཡ་ཕུལ་བྱུང་འབྲེལ་ལམ་མཐུན་ཚོགས་ཞེས་པས་༼ཐེ་ཝན་གྱི་འོས་བསྡུའི་མཇུག་འབྲས་དང་རྒྱ་ནག་མང་གཙོའི་མདུན་ལམ་༽ཞེས་པའི་བགྲོ་གླེང་ཚོགས་འདུ་ཞིག་གོ་སྒྲིག་བྱས་ཡོད་ཅིང་། ཚོགས་འདུའི་སྟེང་ཚོགས་ཞུགས་པ་ཚོས་རྒྱ་ནག་མང་གཙོ་ཅན་དུ་འགྱུར་བར་ཐའེ་ཝན་དང་བོད་ཀྱི་གནད་དོན་གཉིས་རྨང་གཞིར་འཇོག་དགོས་པའི་བསམ་ཚུལ་ཤུགས་ཆེར་བཏོན་ཡོད་འདུག་ལ། བགྲོ་གླེང་གཏམ་བཤད་དེ་དྲ་རྒྱ་བརྒྱུད་རྒྱ་ནག་སྐམ་ས་ཆེན་མོ་གཙོས་འཛམ་གླིང་ཧྲིལ་པོའི་རྒྱ་རིགས་འདུས་སྡོད་ཁག་ཏུ་ཐད་གཏོང་བྱས་འདུག ཚོགས་འདུ་དེར་ཐའེ་ཝན་བོད་གཞུང་སྐུ་ཚབ་དོན་གཅོད་ཁང་གི་ལས་བྱེད་བསོད་ནམས་རྡོ་རྗེ་ལགས་ཀྱང་མཉམ་ཞུགས་བྱས་ཏེ། རྒྱ་ནག་མང་གཙོ་ཅན་དུ་འགྱུར་བར་བོད་དོན་ངེས་པར་ཐག་གཅོད་དགོས་པའི་གཏམ་བཤད་སྤེལ་ཡོད་འདུག
ཚོགས་འདུ་གྲུབ་རྗེས་ཧོང་ཀོང་ནས་བཅར་བའི་ཚོགས་ཞུགས་ ༡༧ ཙམ་གྱིས་ཐའེ་ཝན་བོད་གཞུང་དོན་གཅོད་ཁང་ལ་རྟོག་ཞིབ་བྱས་འདུག་ལ། སྐབས་དེར་ཐའེ་ཝན་སྐུ་ཚབ་དོན་གཅོད་ཟླ་བ་ཚེ་རིང་མཆོག་གིས། རྒྱ་རིགས་ཚོགས་ཞུགས་པ་དེ་ཚོར་ཐའེ་ཝན་དུ་གནས་སྡོད་བྱེད་བཞིན་པའི་བཙན་བྱོལ་བོད་མིའི་གནས་སྟངས་དང་། བོད་ནང་གི་བོད་མིའི་དཀའ་ངལ། འདས་པའི་མི་ལོ་ ༥༠ རིང་གི་བཙན་བྱོལ་བོད་མིའི་ཆོས་དང་རིག་གཞུང་། མང་གཙོའི་འཕེལ་རིམ། ལམ་དབུ་མ་བཅས་ངོ་སྤྲོད་གནང་ཡོད་འདུག
གསར་འགོད་པ། དཔལ་ལྡན།
