ལུགས་རྙིང་ལོ་སར་ཚེས་ ༢ ཉིན་ཏེ་ཁ་སང་ཕྱི་ཚེས་ ༢༤ ཉིན་གསེར་རྟ་རྫོང་ཐོག་ཏུ། རྒྱ་དམག་གིས་མེ་མདས་བརྒྱབ་སྟེ་བོད་མི་ ༢ དམར་གསོད་དང་བཅུ་གྲངས་ཤིག་ལ་རྨས་སྐྱོན་ཚབས་ཆེན་བཟོས་འདུག
ལུགས་རྙིང་གི་ལོ་སར་ཚེས་ ༢ ཉིན་ཏེ་ཁ་སང་ཕྱི་ཚེས་ ༢༤ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༠ པའི་སྟེང་། གསེར་རྟ་རྫོང་ཐོག་ཏུ་བོད་མི་ཚོས་༧གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་ཞེས་ངོ་རྒོལ་སྐད་འབོད་བྱས་སྐབས། ས་གནས་རྒྱ་གཞུང་གི་དམག་མིས་མང་ཚོགས་ཁྲོད་མེ་མདས་གང་བྱུང་བརྒྱབ་སྟེ། བོད་མི་ ༢ དམར་གསོད་དང་བཅུ་གྲངས་ཤིག་ལ་རྨས་སྐྱོན་ཚབས་ཆེན་བཟོས་ཡོད་ལ། བོད་མི་ ༤༠ ཙམ་འཛིན་བཟུང་བཙོན་འཇུག་བྱས་ཡོད་འདུག
གནས་ཚུལ་དེའི་ཐད་རྒྱ་གར་ལྷོ་ཕྱོགས་སུ་གནས་སྡོད་མདོ་སྨད་སྤྱི་ཟུར་གསེར་རྟ་ཚུལ་ཁྲིམས་འོད་ཟེར་ལགས་ཀྱིས་བརྗོད་དོན་ལྟར་ན། ཟླ་འདིའི་ཕྱི་ཚེས་ ༢༢ ནས་ ༢༣ ཉིན་གཉིས་རིང་གསེར་རྟ་རྫོང་གི་ཁྲོམ་གཞུང་དུ། བོད་མི་སྐོར་ཞིག་གིས་འབོད་སྒྲ་སྣ་ཚོགས་ཀྱི་ཐོག་ནས་རྒྱ་གཞུང་ལ་ཞི་བའི་སྐད་འབོད་བྱས་ཡོད་ཀྱང་། རྒྱ་གཞུང་གི་དམག་མིས་བོད་མི་འཛིན་བཟུང་བྱས་པའི་གནས་ཚུལ་གང་ཡང་བྱུང་མེད་ཀྱང་། ཁ་སང་ལོ་སར་ ༢ ཉིན་གྱི་སྔ་དྲོའི་ཆུ་ཚོད་ ༡༠ པའི་ཐོག་གསེར་རྟ་རྫོང་ཐོག་ཏུ་བསྐྱར་དུ་བོད་མི་སེར་སྐྱ་ ༣༠༠ ཙམ་ཀྱིས་ “ ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་” ཞེས་ངོ་རྒོལ་སྐད་འབོད་གནང་སྐབས། ས་གནས་ཉེན་རྟོག་པ་དང་དམིག་མི་འབོར་ཆེན་བསླེབས་ཏེ་བོད་མི་ཚོར་གཅར་རྡུང་ཚོད་མེད་བྱས་པར་བོད་མི་ཚོས་འུ་ཐུག་གིས་རྒོལ་ལན་སློག་སྐབས། རྒྱ་དམག་མིས་མང་ཚོགས་ཁྲོད་མེ་མདས་གང་བྱུང་བརྒྱབ་སྟེ། གསེར་རྟ་གསེར་བ་སྡེ་བའི་རང་ལོ་ ༣༣ ཡིན་པའི་ཟླ་བ་གྲགས་པ་ལགས་དང་། འོན་ཟ་ཚོ་བ་ནས་ཡིན་པའི་བོད་མི་གཞན་ཞིག་དམར་གསོད་བཏང་ཡོད་འདུག་ལ། བོད་མི་བཅུ་གྲངས་ཤིག་ལ་རྨས་སྐྱོན་ཚབས་ཆེན་བཟོས་བ་དང་། གཞན་བོད་མི་ ༤༠ ཙམ་འཛིན་བཟུང་བཙོན་འཇུག་བྱས་འདུག ད་ཆར་རྒྱ་གཞུང་གིས་གསེར་རྟ་རྫོང་གི་ས་གནས་གང་སར་དམག་མི་འགྲེམས་འཇོག་ཏེ་ཚོང་ཁང་དང་ཟ་ཁང་ཁག་སྒོ་རྒྱག་ཏུ་བཅུག་ཡོད་འདུག
གཞན་ཡང་གསེར་རྟ་རྫོང་གི་དམར་གསོད་དོན་རྐྱེན་དེའི་ཐད་མདོ་སྨད་སྤྱི་འཐུས་རྨོག་རུ་བསྟན་པ་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཁ་སང་ཕྱི་ཚེས་ ༢༤ ཉིན་གྱི་གསེར་རྟ་རྫོང་གི་ངོ་རྒོལ་ལས་འགུལ་དེའི་ཁྲོད། རྒྱ་གཞུང་གིས་རང་ལོ་ ༣༥ ཡིན་པའི་བོད་མི་པོ་པོ་ཞུ་བ་ཞིག་དང་གསེར་བ་སྡེ་བའི་མི་སྐྱ་ཞིག་ལ་མེ་མདས་བརྒྱབ་སྟེ་དམར་གསོད་བཏང་བ་མ་ཟད། ཤོལ་ཐལ་སྡེ་བའི་སློབ་ཕྲུག་ཞིག་ལ་མེ་མདས་བཅུ་གྲངས་ཤིག་བརྒྱབ་སྟེ་སྲོག་ཉེན་ལ་ཐུག་ཡོད་ལ། སྐབས་དེར་བོད་རིགས་བུད་མེད་ཞིག་ལའང་མེ་མདས་མེ་མདས་བརྒྱབ་སྟེ་རྐང་པ་གཅོད་དགོས་པའི་གནས་སུ་ལྷུང་འདུག གསེར་རྟ་རྫོང་གི་ངོ་རྒོལ་ལས་འགུལ་དེ་ཐོག་མར་ད་ལོའི་ཕྱི་ཟླ་ ༡ ཚེས་ ༡༦ ཉིན་ནས་བྱུང་བ་ཞིག་ཡིན་པ་དང་། ཉིན་དེར་དང་ཐོག་གསེར་རྟ་རྫོང་ཞོ་རོགས་སྡེ་བའི་རང་ལོ་ ༡༦ ཡིན་པའི་གྲྭ་ཏེས་པཱ་དང་། རང་ལོ་ ༢༡ ཡིན་པའི་ཉི་སྣང་གཉིས་ཀྱིས་ཁྲོམ་གཞུང་དུ་ “རྒྱལ་བ་བསྟན་འཛིན་རྒྱ་མཚོ་ཁྲི་ལོར་བརྟན་པར་ཤོག བོད་རྒྱལ་ལོ་ ” ཞེས་སྐད་འབོད་བྱེད་བཞིན་བསྒྲགས་ཡིག་སྣ་ཚོགས་འགྲེམས་གཏོར་བྱས་འདུག ཕྱི་ཚེས་ ༡༨ ཉིན་གསེར་རྟ་རྫོང་ཕུ་འུ་ཡུལ་ཚོའི་གྱང་ངོས་ཞིག་ཏུ་བོད་ཀྱི་རྒྱལ་དར་ཆེན་པོ་ཞིག་སྒྲེང་འཛུགས་བྱས་ཤིང་། དེའི་མཐའ་སྐོར་དུ་རས་ཡོལ་སྟེང་ “༧རྒྱལ་དབང་བསྟན་འཛིན་རྒྱ་མཚོ་ཁྲི་ལོར་ཤོག རྒྱ་དགའ་མ་ལ་ངོ་ཚ་མེད། བོད་རྒྱལ་ལོ་ ” ཞེས་པའི་ཡིག་ཆེན་ཞིག་བྲིས་ཏེ་རྒྱ་གཞུང་ལ་ངོ་རྒོལ་གྱི་རྣམ་འགྱུར་བསྟན་འདུག ཕྱི་ཚེས་ ༢༢ ཉིན་གསེར་རྟ་རྫོང་གསེར་རྟའི་ཐང་ཆེན་དུ་ཤོལ་སྟོད་མའི་དོན་ཡོད་ཉི་མ་ལགས་དང་། ཤོལ་སྨད་མའི་དགེ་འདུན་གཉིས་ཀྱིས་བོད་རྒྱལ་ལོ་ཞེས་སྐད་འབོད་བྱས་སྐབས་ཉེན་རྟོག་པས་གཅར་རྡུང་དྲག་པོ་བྱས་ཏེ་དོན་ཡོད་ཉི་མའི་ལག་གཡས་པ་བཅག་ཡོད་འདུག ཕྱི་ཚེས་ ༢༣ ཉིན་ས་གནས་བོད་རིགས་མང་ཚོགས་བརྒྱ་སྐོར་ཞིག་གསེར་རྟའི་ཐང་ཆེན་དུ་འཛོམས་ཏེ། འབོད་ཚིག་སྣ་ཚོགས་ཀྱི་ཐོག་ནས་རྒྱ་གཞུང་གི་དྲག་པའི་སྲིད་བྱུས་ལ་ངོ་རྒོལ་བྱས་འདུག
གངས་ཅན་ལྗོངས་ཀྱི་ཆོས་སྲིད་བྱ་བའི་གདུགས།།
འདེགས་པའི་སྲི་ཞུར་གཏོགས་པའི་སྐྱེ་བོ་ཀུན།།
ལྷག་བསམ་རྣམ་དཔྱོད་དཔུང་པ་རབ་བརྟན་ཅིང་།།
སྐྱེ་ཀུན་ཕྱག་ན་པདྨོས་རྗེས་འཛིན་ཤོག།
ཨོཾ་མ་ཎི་པདྨེ་ཧུཾ།
གསེར་རྟ་སྟོད་སྨད་གཉིས་པོར་གང་གཏོགས་ཀྱང་།།
བོད་ཀྱི་ཤ་དང་ཁྲག་ལ་གྲུབ་ནས་ཡོད།།
ལ་རྒྱའི་མེ་ལྕེ་འཛམ་པོའི་གླིང་ལ་མཆེད།།
ཆོལ་གསུམ་གཅིག་ཏུ་འཛོམས་པའི་ཡིད་ཆེས་ཡོད།།