འདས་པོ་ཁོང་གི་མཚན་ཨོ་རྒྱན་རེད།

ཁ་སང་རྔ་པ་ཁུལ་འཛམ་ཐང་བར་མ་ཞང་དུ་རྒྱ་དམག་གིས་དམར་གསོད་བཏང་ཟིན་པ་ཁོང་གི་མིང་ལ་ཨོ་རྒྱན་ཟེར་ཞིང་རང་ལོ་ ༢༠ ཡིན་འདུག

ཟླ་འདིའི་ཕྱི་ཚེས་ ༢༦ ཉིན་རྔ་པ་རང་སྐྱོང་ཁུལ་འཛམ་ཐང་རྫོང་ནས་རྒྱ་གཞུང་གིས་མེ་མདས་དམར་གསོད་བྱས་པའི་བོད་མི་དེ་ནི། འཛམ་ཐང་རྫོང་བར་མ་ཞང་ཤོས་མདའ་སྡེ་བའི་སྤོས་ཐར་ཚང་གི་ཕ་སྤོས་ཐར་གྱི་བུ་རང་ལོ་ ༢༠ ཡིན་པ་ཨོ་རྒྱན་ཞུ་བ་ཁོང་ཡིན་འདུག་ལ། ཉིན་དེར་ཡི་གེ་སྦྱར་འགྲེམས་ཀྱིས་འཛིན་བཟུང་བྱས་ཟིན་པའི་རི་སྤུངས་ནོར་མོའི་བུ་ཐར་པ་དང་ཨོ་རྒྱན་གཉིས་རྒྱ་ནག་གི་སློབ་གྲྭ་ཞིག་ཏུ་མཉམ་དུ་སློབ་གཉེར་བྱེད་བཞིན་ཡོད་ཀྱང་། སློབ་གྲྭ་དེའི་མིང་དང་ས་གནས་ཤེས་རྟོགས་མ་བྱུང་།

ཤོས་མདའ་སྡེ་བ་ནི་བར་མ་ཤང་ནས་སྤྱི་ལེ་གསུམ་ཙམ་གྱི་སར་ཡོད་པའི་ས་མ་འབྲོག་གི་སྡེ་བ་ཞིག་ཡིན་ཞིང་། དེ་རིང་སྟེ་ཕྱི་ཚེས་ ༢༧ ཉིན་བར་མ་ཞང་དང་ཉེ་འཁོར་གྱི་སྡེ་བ་ཚང་མར་ཉེན་རྟོག་པ་དང་དམག་མི་འབོར་ཆེན་ཆེད་གཏོང་གིས་བོད་མི་རྣམས་སྒོའི་ཕྱིར་འཐོན་དབང་ཙམ་ཡང་མེད་པར་དམ་དྲག་བྱེད་བཞིན་སྟབས། རྒྱ་དམག་གིས་དམར་གསོད་བཏང་བའི་ཨོ་རྒྱན་གྱི་ཕུང་པོ་ནང་མི་ལ་རག་ཡོད་མེད་ཤེས་རྟོགས་མ་ཐུབ། དེ་མིན། བར་མ་ཞང་ནས་སྤྱི་ལེ་གསུམ་ཙམ་གྱི་སར་ཡོད་པའི་ལྷ་དབང་དགོན་པའི་གྲྭ་པ་ ༤ འཛིན་བཟུང་བྱས་ཡོད་ཀྱང་མིང་སོགས་ཤེས་རྟོགས་མ་ཐུབ།  

 ༼ ཟུར་གྱི་དཔར་འདི་ནི་ཉིན་དེར་རྒྱ་གཞུང་ལ་ངོ་རྒོལ་སྦྱར་ཡིག་བཀྲམས་ཏེ་ཉེན་རྟོག་པས་འཛིན་བཟུང་བྱས་ཟིན་པ་མཁན་ཐར་པ་ལགས་རེད ༽

གནས་ཚུལ་མཁོ་གཏོང་བ། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།