དྲག་གནོན་ལ་འདོད་པ་མ་ཁེངས་པ་རེད།

ཉེ་ལམ་ཨ་རིའི་གྲོང་ཁྱེར་ནེའུ་ཡོག་ཏུ་ཕྱི་སྡོད་རྒྱ་རིགས་ཤེས་ཡོན་ཅན་སྐོར་ཞིག་གིས་ད་ལྟའི་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་ཞིག་བསྐངས་འདུག

ཨ་རིར་གནས་སྡོད་རྒྱ་རིགས་ཤེས་ཡོན་ཅན་ཁག་ཅིག་གི་གོ་སྒྲིག་འོག ཟླ་འདིའི་ཕྱི་ཚེས་ ༢༩ ཉིན་གྲོང་ཁྱེར་ནེའུ་ཡོག་ཏུ། ཉེ་ལམ་རྒྱ་གཞུང་གིས་ཁམས་བྲག་མགོ་དང་གསེར་རྟ། རྔ་པ་རྫོང་དང་འཛམ་ཐང་རྫོང་བཅས་སུ་བོད་མི་དམར་གསོད་བཏང་བའི་གནད་དོན་ཐོག་བགྲོ་གླེང་ཚོགས་འདུ་ཞིག་བསྐངས་ཡོད་འདུག་ལ། ཚོགས་འདུའི་སྟེང་ནེའུ་ཡོག་གཙུག་ལག་སློབ་ཆེན་གྱི་མཁས་དབང་ཞཱ་མིན་ལགས་དང་། རྒྱ་ནག་སྤྱི་ཚོགས་ཚན་རིག་ཁང་གི་མཁས་དབང་ཀྲང་སྦོ་ཧྲུའུ། ཆབ་སྲིད་དཔྱད་གཏམ་པ་ཧུའུ་ཕིང་། རྩོམ་པ་པོ་ཁྲིན་ཕོ་ཁུང་སོགས་རྒྱ་རིགས་ཤེས་ཡོན་པ་ཁག་ཅིག་དང་། ཨ་རིའི་ཀོ་ལིམ་སྦི་ཡ་གཙུག་ལག་སློབ་ཆེན་གྱི་བོད་གནས་ཉམས་ཞིབ་པ་རཱོ་བྷིར་ཊི་བྷིར་ནེ་ཊི་ (Robert Bernett) ལགས། ཨ་རིའི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་བཅས་ཕེབས་ཏེ། བོད་ནང་གི་ཛ་དྲག་གནས་སྟངས་ཐོག་གཏམ་བཤད་སྤེལ་ཡོད་འདུག་ལ། ཚོགས་འདུ་དེར་བོད་ཀྱི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་ཀྱང་མཉམ་ཞུགས་བྱས་འདུག 

ཐོག་མར་ཚོགས་འདུ་གཙོ་སྐྱོང་བ་ཞཱ་མིན་ལགས་ཀྱིས་ཚོགས་ཞུགས་པ་ཚོར་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་རྗེས། ཨ་རིའི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་ལགས་ཀྱིས། འདས་པའི་ལོ་གཅིག་རིང་བོད་ནང་བོད་མི་ ༡༧ ཙམ་གྱིས་རང་ལུས་མེར་བསྲེགས་བཏང་བའི་རྒྱུ་མཚན་གསལ་བཤད་དང་། བོད་ནང་གི་བོད་མི་ཚོས་ངོ་རྒོལ་ལས་འགུལ་བསྟུད་མར་སྤེལ་བཞིན་པ་དེ། ༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་ཀྱིས་སྐུལ་སློང་བྱས་པ་མིན་ཚུལ། གལ་སྲིད་དངོས་ཡོད་གནས་ཚུལ་ཞིབ་འཇུག་བྱ་འདོད་ཡོད་ན་དབུས་བོད་མིའི་སྒྲིག་འཛུགས་ཀྱིས་མཐུན་འགྱུར་གནང་རྒྱུ་ཡིན་སྐོར་སོགས་བརྗོད་འདུག  

སྐབས་དེར་བོད་མིའི་སྒྲིག་འཛུགས་ཀྱིས་དགོས་འདུན་ཁག་ཅིག་བཏོན་ཡོད་པ་ནི། “ རྒྱ་གཞུང་གིས་བོད་མིའི་སྐུ་ཚབ་དང་ལྷན་དུ་དོན་དམ་གྱི་གྲོས་མོལ་བྱས་ཏེ་ཡུན་རིང་ལྷག་པའི་བོད་ཀྱི་དཀའ་རྙོག་སེལ་དགོས་རྒྱུ། བོད་རིགས་མང་ཚོགས་ལ་སྤུན་ཟླའི་འདུ་ཤེས་བཟུང་སྟེ་ལས་དོན་རྣམས་ལྷག་བསམ་རྣམ་དག་གིས་བསྒྲུབ་དགོས་རྒྱུ། བོད་ནང་གི་དངོས་ཡོད་གནས་ཚུལ་གསལ་པོ་བཟོ་ཆེད་རང་དབང་ལྡན་པའི་ཚོགས་སྡེ་ཁག་བོད་དུ་བཏང་སྟེ་ཞིབ་འཇུག་མཐིལ་ཕྱིན་བྱ་རྒྱུ། རྒྱ་ནག་སྲིད་འཛིན་གཞོན་པ་ཞིས་ཅིན་ཕིན་ཨ་རིར་འཚམས་གཟིགས་སུ་བསྐྱོད་སྐབས་ཨ་རིའི་གཞུང་གིས་རྒྱ་གཞུང་ལ་གནོན་ཤུགས་སྤྲོད་དགོས་རྒྱུ་ ” བཅས་ཡིན་འདུག

ཨ་རིའི་ཀོ་ལིམ་སྦི་ཡ་གཙུག་ལག་སློབ་ཆེན་གྱི་བོད་གནས་ཉམས་ཞིབ་པ་སྐུ་ཞབས་རཱོི་བྷིར་ཊི་བྷིར་ནེ་ཊི་ (Robert Bernett) ལགས་ཀྱིས་བརྗོད་ན། བོད་ནང་དུ་ཐབས་སྡུག་གི་གནས་ཚུལ་བསྟུད་མར་འབྱུང་བཞིན་པར་རྒྱ་གཞུང་གིས་འགྲེལ་བཤད་སྟབས་བདེ་རེ་རྒྱག་བཞིན་ཡོད་ནའང་། དོན་དངོས་ཐོག་གནས་ཚུལ་དེ་དག་ནི། རྒྱ་གཞུང་གི་དུས་ཡུན་རིང་པོར་བོད་མི་ཚོར་དྲག་གནོན་སྲིད་བྱུས་སྤེལ་བ་ལས་བྱུང་བ་ཞིག་ཡིན་སྐོར་དང་། རྒྱ་གཞུང་གིས་དྲག་གནོན་སྲིད་བྱུས་ཀྱིས་གནད་དོན་ཐག་མི་ཆོད་པ་ཤེས་པར་བྱས་ཏེ། འདས་པའི་བོད་མིའི་སྲིད་བྱུས་ལ་བསྐྱར་ཞིབ་བྱ་དགོས་པའི་ནན་སྐུལ་བྱས་འདུག

མཇུག་ཏུ་རྒྱ་རིགས་ལོ་རྒྱུས་ཉམས་ཞིབ་པ་ལི་ཅང་ལིན་ལགས་ཀྱིས་། ད་ལྟ་བོད་ནང་རྒྱ་གཞུང་ལ་ངོ་རྒོལ་བྱེད་མཁན་མཁན་དང་རང་ལུས་མེར་བསྲེགས་གཏོང་མཁན་མང་ཆེ་བ་བོད་རིགས་གཞོན་སྐྱེས་གཞོན་སྐྱེས་ཆགས་ཡོད་སྐོར་དང་། གཞོན་སྐྱེས་ཚོས་བོད་ཀྱི་སྤྱི་ཚོགས་རྙིང་པ་མཐོང་མྱོང་མེད་སྟབས། ངོ་རྒོལ་བྱེད་དོན་ནི་ཞིང་བྲན་ལམ་ལུགས་བསྐྱར་གསོའི་བྱ་ཆེད་མིན་པར། བོད་ཐོག་འཛིན་བཞིན་པའི་སྲིད་བྱུས་ལ་འདོད་པ་མ་ཁེངས་པ་སྟོན་གྱི་ཡོད་སྐོར་སོགས་བརྗོད་ཡོད་འདུག

གསར་འགོད་པ། དཔལ་ལྡན།