ཟླ་སྔོན་མའི་ཕྱི་ཚེས་ ༢༣ ཉིན་བོད་མདོ་ཁམས་བྲག་མགོ་རྫོང་ཐོག་ཏུ་བྲག་མགོའི་མི་མང་རྣམས་ཀྱིས་རྒྱ་གཞུང་ལ་ཞི་རྒོལ་བྱས་པར། རྒྱ་གཞུང་དྲག་ཆས་ཉེན་རྟོག་པས་བོད་མི་ཞི་རྒོལ་བ་རྣམས་ལ་མེ་མདས་དྲག་གནོན་བྱས་ཏེ། རང་ལོ་ ༤༩ ཡིན་པའི་ནོར་པ་ཡོན་ཏན་དང་། ལི་ཁོག་མའི་འབྲོག་སྡེ་ཡིན་ཞིང་མིང་དང་ལོ་རྒྱུས་ད་སྔ་གསལ་བོ་མ་རག་པའི་སྐྱེས་པ་གཅིག་བཅས་དམར་གསོད་བཏང་ཡོད་ལ། གཞན་ཞི་རྒོལ་བ་ ༣༢ ཙམ་ལ་རྨས་སྐྱོན་ཚབས་ཆེན་བཟོས་ཡོད་འདུག
གནས་ཚུལ་བཏང་འབྱོར་བྱུང་བ་ལྟར་ན། ཞི་རྒོལ་བྱུང་བའི་ཕྱི་ཉིན་ནས་བཟུང་ཁ་པར་དང་དྲ་ལམ། འགྲིམ་འགྲུལ་སྐྱེལ་འདྲེན་སོགས་ཀྱང་མཚམས་འཇོག་གིས་གཞུང་ལམ་ཡོངས་བཀག་སྡོམ་བྱས་ཡོད་པ་མ་ཟད། ཉིན་རེ་བཞིན་དྲག་ཆས་དམག་དཔུང་ཁ་སྣོན་དང་འབྲེལ་རྫོང་ཐོག་གི་སྲང་ལམ་ཀུན་ལ་དམག་མི་འགྲེམས་འཇོག་བྱས་ཤིང་། ཞི་རྒོལ་བ་རྣམས་གཅིག་རྗེས་གཉིས་མཐུད་དུ་འཛིན་བཟུང་བཙན་འཁྲིད་བྱེད་བཞིན་ཡོད་འདུག
དེ་རིང་གོ་བའི་གནས་ཚུལ་ལྟར་ན། བོད་མི་སུ་ཞིག་རྫོང་ཐོག་ཏུ་སོང་ཚེ་དེ་མ་ཐག་འཛིན་བཟུང་བྱས་ཏེ་གཅར་རྡུང་ཚད་མེད་གཏོང་བཞིན་ཡོད་པ་མ་ཟད། ལྷག་པར་དུ། བོད་མི་རླངས་འཁོར་ཁ་ལོ་བ་ཁྱོ་ཤུག་གཉིས་ཀ་འཛིན་བཟུང་གིས་ད་ཆར་གར་སོང་ཆ་མེད་ཆགས་ཡོད་སྟབས། ཁྱིམ་དུ་ལུས་པའི་ནར་མ་སོན་པའི་ཕྲུ་གུ་རྣམས་ཨ་ཆད་འུ་ཐུག་གི་གནས་སུ་ལྷུང་ཡོད་ལུགས་གོ་ཐོས་བྱུང་ཡང་། ད་ལྟ་ས་གནས་དེ་ཁུལ་གྱི་ཁ་པར་དང་དྲ་རྒྱ་སོགས་ཀྱི་བརྒྱུད་ལམ་ཡོངས་བཀག་སྡོམ་བྱས་ཡོད་པས། བཟང་ཚང་དེ་གཉིས་ཀྱི་མིང་དང་ལོ་སོགས་ཤེས་རྟོགས་མ་ཐུབ་ལ། གཞན། ད་བར་བོད་མི་ཇི་ཙམ་འཛིན་བཟུང་བྱས་ཡོད་མེད་ཀྱི་ཞིབ་ཕྲའི་གནས་ཚུལ་ཡང་ཤེས་རྟོགས་དཀའ་བའི་གནས་སུ་གྱར་ཡོད་འདུག ཅེས་བཀོད་འདུག
གནས་ཚུལ་གཏོང་མཁན། རྒྱ་གར་ལྷོ་ཕྱོགས་འབྲས་སྤུངས་བློ་གསལ་གླིང་ཏྲེ་ཧོར་བྲག་མགོ་མི་ཚན་གྱི་སྤྱི་གཉེར་པ་ཐུན་མོང་།
དཔའ་འཛངས་སྙིང་སྟོབས་ལྡན་པའི་བུ་རྒོད་འཚོ་འདི་ལྟར་རྒྱ་ནག་དམར་གཞུང་གིས་དྲག་རྒོལ་བྱེད་པ་ནི་སྙིང་རྗེ་མ་པས་བྱ་སྤྱོད་ཞིག་མ་ཡིན་ནམ། ཞི་བདེ་དང་དྲང་བདེན་གྱི་ལམ་དུ་སྐྱོད་མཁན་བོད་མི་རིགས་ཀྱི་ཡབ་མེས་ཚོས་སྐབས་ལྟ་བུ་ལ་མཚོན་ན་ཁྱེད་དམར་གཞུང་ལ་རྒོལ་བ་བྱེད་མི་ཐུབ་མཁན་ཞིག་མ་རེད། འོན་ཀྱང་༧གོང་ས་སྐྱབས་མགོན་ཆེན་པོའི་དུས་རྟག་ཏུ་ཞི་བའི་ལམ་ནས་བདེན་དོན་གླེང་དགོས་གསུང་བས་བཀའ་བརྩི་བཞིན་ཡོད་དུས་ལག་ཁུ་ཚུར་ལས་མེད་མཁན་མི་རིགས་ཤིག་ལ་འདི་ལྟར་དྲག་གནོན་བྱེད་པ་ངོ་ཚ་དང་སྙིང་རྗེ་མི་སྐྱེའམ་དམར་གཞུང་གི་མགོ་གཙོ་ཧུའི་ལགས་ཁྱེད་ཀྱི་མི་རིགས་ལྔ་ཅུ་ང་གཉིས་ཀྱི་བདེན་དོན་འདི་ལྟར་ཐག་གཅོད་བྱེད་རྒྱུ་ཡིན་ནམ། དམར་ཕྱོགས་ཚང་ཁྱེད་ཚོ་ངོ་ཚ་དང་ཡ་ང་རྒྱུ་ཞིག་མེད་ནས།