ཉེ་ལམ་ངྷ་སྟེང་བོད་ཁྱིམ་སློབ་གྲྭར་རྒྱ་ཡིག་གི་ཡིག་ཚད་ཅིག་བཏང་སྟེ་བཙན་བྱོལ་ནང་གི་རྒྱ་ཡིག་ཤེས་མཁན་སྐོར་ཞིག་བསྡུས་ཡོད་ཅིང་། དེ་ནི་མ་འོངས་པར་༧ཏཱ་ལའི་བླ་མཐོ་རིམ་སློབ་གཉེར་ཁང་དང་། བོད་ཁྱིམ་སློབ་གྲྭ་ཁག་ནང་རྒྱ་ཡིག་རྒྱ་སྐད་ཁྲིད་སྤེལ་གྱི་དགེ་རྒན་དུ་བསྐོ་བཞག་གནང་རྒྱུ་ཡིན་འདུག
ངྷ་སྟེང་བོད་ཁྱིམ་སློབ་གྲྭའི་སྤྱི་ཁྱབ་ཡིག་ཚང་གི་གཙོ་འགན་འོག ༧ཏཱ་ལའི་བླ་མ་མཐོ་རིམ་སློབ་གཉེར་ཁང་དང་། བོད་ཕྲུག་ཁྲིམ་སྡེའི་ཁྱབ་ཁོངས་འོག་གི་སློབ་གྲྭ་ཁག་ནང་རྒྱ་ཡིག་ཁྲིད་སྤེལ་གྱི་ལས་གཞི་ཞིག་མགོ་འཛུགས་གནང་ཡོད་ཅིང་། ཟླ་སྔོན་མའི་ཕྱི་ཚེས་ ༢༦ ཉིན་ངྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ། གསལ་བསྒྲགས་སྔོན་སོང་ལྟར་བཙོན་བྱོལ་སྤྱི་ཚོགས་ཁྲོད་ཀྱི་རྒྱ་ཡིག་རྒྱ་སྐད་ཐོག་འཛིན་རིམ་ ༡༢ ཀྱི་ལག་འཁྱེར་ཡོད་པ་དང་། ཡང་ན་དེ་དང་མཉམ་པའི་ཤེས་ཚད་ཡོད་པ་སྐོར་ཞིག་ལ་འབྲི་རྒྱུགས་དང་ངག་རྒྱུགས་ཀྱི་ཡིག་ཚད་ཅིག་བཏང་སྟེ། རྩེ་ཏོག་གིས་སློབ་མ་༤ བྷིང་ལོར་༧ཏཱ་ལའི་བླ་མ་མཐོ་རིམ་སློབ་གཉེར་ཁང་གི་དགེ་རྒན་དུ་བསྐོ་བཞག་གནང་རྒྱུ་དང་། གཞན་མི་ ༦ སུ་ཇཱ་བོད་ཁྱིམ་སློབ་གྲྭ་དང་གྷོལ་པཱ་པུར། ངྷ་སྟེང་བོད་ཁྱིམ་བཅས་ཀྱི་དགེ་རྒན་དུ་བསྐོ་བཞག་གནང་གཏན་འཁེལ་ཡོད་འདུག
ཐེངས་འདིའི་ཡིག་རྒྱུགས་ནང་ཚུད་པའི་སློབ་ཕྲུག་དེ་དག་ལ་དུས་ཡུན་ཟླ་བ་ ༦ རིང་ངྷ་སྟེང་བོད་ཁྱིམ་སློབ་གྲྭའི་ནང་། ཐའེ་ཝན་རྒྱ་རིགས་བུད་མེད་དགེ་རྒན་གཉིས་ཀྱིས་དགེ་རྒན་འོས་སྦྱོང་ངམ། རྒྱ་ཡིག་སློབ་ཁྲིད་བྱེད་ཐབས་ཀྱི་ཟབ་སྦྱོང་ཞིག་སྤྲོད་རྒྱུ་ཡིན་པ་དང་། འབྱུང་འགྱུར་ཕྱི་ཟླ་ ༦ པའི་ནང་༧ཏཱ་ལའི་བླ་མ་མཐོ་སློབ་ཁང་གིས་ཡིག་རྒྱུགས་ཀྱི་ལམ་ནས་རྒྱ་ཡིག་གི་སློབ་མ་བསྡུ་རྒྱུ་ཡིན་འདུག
བོད་ཁྱིམ་སྤྱི་ཁྱབ་ཡིག་ཚང་གི་ཤེས་ཡོན་འགན་འཛིན་བསྟན་འཛིན་བཟང་པོ་ལགས་ཀྱིས་བརྗོད་པ་ལྟར་ན། བོད་ཁྱིམ་སྤྱི་ཁྱབ་ཡིག་ཚང་གིས་དེ་སྔ་ནས་རྒྱ་ཡིག་ཁྲིད་སྤེལ་ཐོག་འབད་བརྩོན་ཞུས་ཡོད་ཀྱང་། གཏན་འཇགས་དགེ་རྒན་མ་རག་པ་དང་། རག་པ་རེ་ཟུང་ཡང་གཏན་འཇགས་མ་བསྡད་པ་བཅས་ལ་བརྟེན་ཏེ། ད་བར་རྒྱ་ཡིག་སློབ་ཁྲིད་ཚད་ལྡན་ཞིག་བྱུང་མེད་ཀྱང་། ད་ལོར་༧ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་རྒྱ་ཡིག་སྡེ་ཚན་ཞིག་ཆེད་འཛུགས་བྱ་རྒྱུ་དང་། སློབ་མའི་ཁྲིད་གཞིར་ཐའེ་ཝན་དང་ཧོང་ཀོང་མཐོ་སློབ་ཁག་ཅིག་གི་སློབ་དེབ་ལ་དཔེ་བལྟས་ཏེ། ལོ་བཞིའི་རིང་རྒྱ་ཡིག་གི་རམ་འབྱམས་པ་ (BA)ཐོན་ཏེ་ཕྱག་ཁྱེར་སྤྲོད་རྒྱུ་ཡིན་འདུག
ཁོས་མུ་མཐུད་དུ་ངོ་སྤྲོད་གནང་དོན་ལ། མ་འོངས་པར་༧ཏཱ་ལའི་བླ་མ་མཐོ་སློབ་ནང་ལོ་ ༤ རིང་རྒྱ་ཡིག་ཐོག་མཐོ་རིམ་སློབ་སྦྱོང་གནང་རྒྱུ་ཡོད་པ་ཞིག་དང་། བོད་ཁྱིམ་ཁག་ཏུ་རྒྱ་ཡིག་གི་སློབ་ཚན་དེ་སློབ་གྲྭའི་སློབ་ཚན་འཆར་འགོད་ནང་གཏན་འབེབས་བྱ་རྒྱུ་མ་ཡིན་པར། སློབ་ཕྲུག་དག་གི་རྒྱ་ཡིག་གི་ཤེས་ཚད་ལྟར་ཆ་བགོས་བྱས་ཏེ་ཟུར་སྦྱོང་གི་ཚུལ་དུ་རྒྱ་ཡིག་འཁྲིད་རྒྱུ་དང་། རྒྱ་ཡིག་གི་རྒྱུགས་གཞི་དེ་ཡང་སློབ་གྲྭ་སྤྱིའི་རྒྱུགས་གཞི་དང་འབྲེལ་བ་མེད་ཀྱང་། བོད་ཁྱིམ་འོག་རྒྱ་ཡིག་སྦྱོང་མཁན་ཚོ་འཛིན་རིམ་ ༡༠ དང་ ༡༢ ཐོན་སྐབས། ༧ཏཱ་ལའི་བླ་མ་མཐོ་སློབ་ཏུ་འཛུལ་ཏེ་མུ་མཐུད་རྒྱ་ཡིག་གཅིག་པུའི་ཐོག་མཐོ་རིམ་སློབ་གཉེར་གནང་ཐུབ་པ་དང་། སློབ་མཐར་ཕྱིན་སྐབས་ཀྱང་ཐའེ་ཝན་དང་ཧོང་ཀོང་སློབ་ཆེན་གང་རུང་དང་མཉམ་འབྲེལ་ཐོག་ཕྱག་འཁྱེར་སྤྲོད་འཆར་ཡོད་འདུག
བསྟན་འཛིན་བཟང་པོ་ལགས་ཀྱིས་བརྗོད་དོན། “ དེང་སང་རྒྱལ་སྤྱིའི་ཐོག་རྒྱ་ཡིག་གལ་ཆེན་པོ་ཆགས་བཞིན་ཡོད་ལ། རྒྱ་གར་ནང་ཁུལ་དུའང་རྒྱ་ཡིག་ཤེས་ན་ལས་ཀ་ཡག་པོ་རག་གི་ཡོད། བོད་ཁྱིམ་ནང་བོད་ནས་རྒྱ་ཡིག་འཛིན་རིམ་བཅུ་པ་དང་བཅུ་གཉིས་ཐོན་མཁན་མང་པོ་ཡོད་སྟབས། འཛིན་སྐྱོང་གི་ངོས་ནས་སློབ་ཕྲུག་ཚོས་རྒྱ་ཡིག་མི་བརྗེད་པ་དང་མུ་མཐུད་ཡར་རྒྱས་གཏོང་ཐབས་བཅས་ལ་དམིགས་ཏེ་ལས་གཞི་འདི་སྤེལ་བ་རེད ” ཅེས་བརྗོད་བྱུང་།
གསར་འགོད་པས་ལས་གཞིའི་དེའི་ཐད་ཕྱག་ལས་གནང་མཁན་སྐལ་བཟང་སྐྱིད་ལགས་སུ་བཅར་འདྲི་ཞུས་དོན་ལྟར་ན། ཟབ་སྦྱོང་དེ་ཟླ་འདིའི་ཕྱི་ཚེས་ ༧ ཉིན་ནས་མགོ་འཛུགས་གནང་རྒྱུ་དང་། ཟབ་སྦྱོང་སྤྲོད་མཁན་ཐའེ་ཝན་ཆིན་ཧྭ་གཙུག་ལག་སློབ་ཆེན་གྱི་ཉམས་ཞིབ་པ་ལྕམ་ལིན་རོའུ་ཡེའུ་ལགས་དང་། ཐའེ་ཝན་དགེ་འོས་སློབ་ཆེན་གྱི་དགེ་རྒན་ལྕམ་ལིས་ཧུའུ་ཅིན་རྣམ་གཉིས་ཡིན་འདུག ཟབ་སྦྱོང་སྐབས་སློབ་གསོ་རིག་པ་དང་སློབ་ཆེན་གྱི་སློབ་ཁྲིད་བྱེད་ཐབས། སློབ་ཁྲིད་ཀྱི་ནུས་པ། སེམས་ཁམས་རིག་པ་སོགས་ཟབ་ཁྲིད་གནང་རྒྱུ་ཡིན་འདུག
༧ཏཱ་ལའི་བླ་མ་མཐོ་སློབ་ཀྱི་རྒྱ་ཡིག་ཁྲིད་གཞི་གཙོ་བོ་རྒྱ་ནག་མི་རིགས་སློབ་ཆེན་ཁག་གི་བསླབ་གཞི་ལྟར། གནའ་རབས་རྒྱའི་སྐད་ཡིག་དང་དེང་རབས་སྐད་ཡིག བརྡ་སྤྲོད་རིག་པ། རྩོམ་འབྲིའི་ཤེས་བྱ་སོགས་ཡིན་འདུག་ལ། ཆབ་སྲིད་དང་ལོ་རྒྱུས་སྐོར་ཐའེ་ཝན་གྱི་སློབ་ཆེན་ཁག་གི་ཁྲིད་གཞི་དང་བསྟུན་རྒྱུ་ཡིན་འདུག་ལ། ད་ཆར་མཐོ་སློབ་ཀྱི་ཁྲིད་གཞིའི་དཔེ་དེབ་རིགས་ ༥༠ ཙམ་གྲ་སྒྲིག་གནང་ཡོད་འདུག
སྐལ་བཟང་སྐྱིད་ལགས་ཀྱིས་བརྗོད་ན། ད་ལོའི་ཕྱི་ཟླ་ ༦ པའི་ནང་ཏཱ་ལའི་བླ་མ་མཐོ་སློབ་ཏུ་རྒྱ་ཡིག་སློབ་མ་བསྡུ་རྒྱུའི་གསལ་བསྒྲགས་སྤེལ་རྒྱུ་དང་། ཕྱི་ཟླ་ ༧ པའི་ནང་དངོས་གཞིའི་སློབ་མ་བསྡུ་རྒྱུ། ཡིག་རྒྱུགས་ནང་ཞུགས་མཁན་ལ་འཛིན་རིམ་བཅུ་གཉིས་ཀྱི་ལག་འཁྱེར་ཡོད་པ། ལག་འཁྱེར་མེད་མཁན་ལ་འཛིན་རིམ་བཅུ་གཉིས་ཀྱི་ཤེས་ཚད་ཡོད་པ་བཅས་ཡིན་དགོས་ཤིང་། སློབ་མའི་གྲངས་འབོར་ཡིག་རྒྱུགས་ནང་ཞུགས་མཁན་གྱི་གནས་སྟངས་ལ་གཞིགས་ཏེ་ཐག་གཅོད་གནང་རྒྱུ་ཡིན་འདུག ཡིག་རྒྱུགས་ནང་ཚུད་རིགས་ལ་ལོ་ངོ་བཞིའི་རིང་སློབ་ཡོན་དང་ཟས་དོད། སྡོད་ཁང་། འཕྲོད་བསྟེན་སོགས་ཏཱ་ལའི་བླ་མ་མཐོ་སློབ་ཀྱིས་འགན་འཁུར་རྒྱུ་ཡིན་འདུག
ཏཱ་ལའི་བླ་མ་མཐོི་རིམ་སློབ་གཉེར་ཁང་ནི། ༢༠༠༩ ལོར་གསར་དུ་དབུ་བརྙེས་པ་ཞིག་ཡིན་ཞིང་། ད་ཆར་མཐོ་སློབ་འདིར་དགེ་ལས་སློབ་ཕྲུག་ ༣༠༠ ཙམ་ཡོད་འདུག་ལ། སློབ་གྲྭའི་ཁྲིད་གཞི་བོད་ཡིག་དང་ནང་ཆོས། དབྱིན་ཡིག གློག་ཀླད་སོགས་ཡིན་འདུག
གསར་འགོད་པ། དཔལ་ལྡན།
དྲ་གྲོགས་ཐིག་གིས་གསུངས་པ་བདེན་པ་རེད། ཁོ་བོས་ཀྱང་འོག་ཏུ་མཆན་བུ་བཀོད་པ་ལྟར། སྐབས་དང་དུས་ལ་དཔགས་ནས་ཐབས་རྒྱ་ཇུས་སྟོང་བྱེད་རྒྱུ་ནི་ང་ཚོའི་ཕྲག་ཏུ་བབ་པའི་ལས་འགན་ཞིག་རེད།།
དྲ་གྲོགས་འགའ་ཞིག་གིས་ཐུགས་བསམ་བཞེས་སྟངས་ལ་ངོ་མ་སྙིང་རྗེ་སྐྱེས་སོང་།
དྲ་གྲོགས་ཚོ། འདི་ལྟར་བཤད་ན་ཅུང་ཨེ་རན་ནམ། རྒྱ་ཡིག་སྦྱངས་པ་ཙམ་གྱིས་རྒྱ་ལ་དགའ་པ་དང་མ་སྦྱངས་པ་ཙམ་གྱིས་རྒྱ་ལ་རྒོལ་བ་ཞིག་ག་ལ་ཡིན། ང་ཚོའི་ཁ་གཏད་རྒྱ་ཡིན་པ་དང་། ཁ་གཏད་འདི་དང་འཐབ་རྩོད་ཀྱི་ཁྲོད། གལ་སྲིད་འདིའི་སྐད་ཡིག་རང་སྐྱ་འཕེར་པ་ཞིག་མ་ཤེས་ན། ང་ཚོས་ག་དུས་བར་ཏུ་སྐད་བསྒྱུར་གླས་ནས་སྡོད་དགོས་སམ། ང་ཚོ་བཙན་བྱོལ་བོད་མིའི་ནང་རྒྱ་ཡིག་མཁས་མདོག་གི་མི་དེ་ཚོས་ཀྱང་ཐེངས་འདིའི་དུས་འཁོར་དབང་ཆེན་སྐབས་༧གོང་ས་མཆོག་གི་རྒྱ་སྐད་གསུང་སྒྱུས་བྱས་སྟངས་ལྟོས་དང་། ཇི་འདྲ་བའི་ངོ་གནོངས་དགོས་པ་ཞིག་རེད། དྲ་གྲོགས་ཚོ། ཁྱེད་ཚོ་ལ་ཞུ་རྒྱུ། སོ་སོས་མ་འཇོན་པ་དང་ཡི་རངས་བྱེད་མ་ཐུབ་ནའང་ལྟ་བ་མཁྲེགས་བཟུང་དང་དོན་བཟང་ངན་འགོག་མ་བཟོ་རོགས་གནང་ཞུ། ཐུགས་རྗེ་གཟིགས།
འདས་པའི་མི་ལོ་༢༠ དང་ ༣༠ རིང་ལ་རྒྱ་སྐད་བཤད་དགོས་རྒྱ་ཡིག་སྦྱངས་དགོས་ཞེས་རྒྱ་ནག་སྲིད་གཞུང་གིས་སློབ་གསོ་བྱས་ཀྱང་། བོད་ནང་གི་བོད་མི་རྣམས་བོད་ཀྱི་སྐད་ཡིད་སྲུང་སྐྱོབ་དང་། རིག་གནས་བསྐྱར་གསོ་བྱེད་ཆེད་དུ་རང་གི་ཚེ་སྲོག་ཀྱང་བློས་བཏང་བཞིན་པ་མངོན་གསལ་རེད།
ཅི་འདྲའི་ངོ་མཚར་བ་ལ་༢༠༡༢ ལོ་འདིར་བོད་ཀྱི་ཆོས་དང་རིག་གནས་ཀྱིས་ཆེད་དུ། མདོ་ཁམས་གཉིས་ཀྱིས་རང་ལུས་མེ་བསྲེག་གྱིས་སྒོ་ནས་རྒྱ་གཞུང་ལ་ངོ་རྒོལ་ཅི་ཐུབ་བྱེད་བཞིན་པ་རེད། འོན་ཀྱང་རྡ་སར་རྒྱ་ནག་གི་སྐད་ཡིག་དང་སྲོལ་རྒྱུན་དང་སྤེལ་བྱེད་རྒྱུའི་འཛིན་གྲྭ་ཞིག་གསར་འཛུགས་བྱེད་རྒྱུ་འདི། གཞི་ལུས་བོད་མི་རྣམས་ལ་ངོ་རྒོལ་དང་བློ་ཕམ་འབྱུང་བྱེད་ཀྱི་རྒྱུ་ཞིག་མ་ཡིན་ནམ།
ཁྱེད་རང་ཚོའི་འཛིན་གྲྭ་དེ་ལ་རྒྱ་ནག་པེ་ཅིན་གཞུང་གི་རོགས་རམ་ཐད་གར་བྱེད་ངེས་རེད།
ཧ་ཅང་ཡག་པོ་འདུག ལས་གཞི་འདི་ལ་མུ་མཐུད་ནས་རྒྱུན་ཡོད་པར་ཞུ།
བོད་དགོས་སམ་རྒྱ་ནག་དགོས? རྒྱ་དགོས་ན་ཚུར་ཕེབས་་་་བོད་དགོས་ན་ཕར་རྒྱུག
ཁྱེད་ཀྱི་བོད་ཡིག་སྦྱང་ན་འདིར་ཕེབས་ཤོག་ཟེར་མཁན་ཞིག་མེད་པ་ཅི་ཡིན་ནམ
སྒོར་མོ་རེད་ཨེ།
༸གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་གིས་མཐུན་འགྱུར་རོགས་རམ་འོག་རྒྱ་ཡིག་གི་སློབ་ཚན་གཏན་འབེབས་གནང་གཏན་འཁེལ་བ་ནི་ཁ་ཚ་དགོས་གཏུགས་ཀྱིས་གལ་གནད་ཆེན་པོ་ཞིག་རེད་ལ་རླབས་ཆེན་ཞིག་ཀྱང་རེད། རྒྱ་བོད་གཉིས་ཀྱི་དཀའ་ངལ་དེ་འབྱུང་འགྱུར་གཙོ་བོ་གྲོས་མོལ་གྱི་ལམ་ནས་སེལ་དགོས་སྟབས། བོད་པ་རང་ངོས་ནས་རྒྱ་སྐད་དང་རྒྱ་ཡིག་ལ་རང་རྐྱ་འཕེར་བ་བྱེད་རྒྱུ་དེ་བས་གལ་འགངས་ཆེ།
ད་ལོ་ནས་བཟུང་རྒྱ་ཡིག་ཤེས་མཁན་ངག་གི་རེ་བ་དང་ཕུགས་བསམ་མངོན་དུ་འགྱུར་ཐུབ་པར་སྨོན།
ཡ་ཡ་རྒྱ་ཡིག་སྤྱང་འདོད་ཡོད། དབྱིན་ཡིག་ཡང་སྦྱང་འདོད་ཡོད། གོ་ལ་འདིས་ཐོག་ཆེས་སྐད་གྲགས་ཆེ་བའི་རྒྱལ་ཁབ་གཉིས་རེད། བོད་ནང་གི་སློབ་གྲྭ་ཁག་གི་ནང་བོད་ཡིག་སློབ་ཚན་མེད་པས་དཀའ་ངལ་འདུག་པས། བཙན་བྱོལ་ཁྲོད་ནས་སྦྱང་དགོས་པ་མཆིས།
སྦྱང་ཐུབ་ན་བོད་ཀྱི་རིགས་གཞུང་ཆ་ཚང་བ་ཞིག་སྦྱང་རོགས་གནང་། དེ་རྗེས་གཞན་རིགས་སྦྱང་ན་་་་་རིག་གནས་རེད།
ཅེས་ཕྱིར་ཁྱེད་ལ་དོན་སྣང་མི་བྱེད་པ་རེད། བོད་ཀྱི་སྐད་ཡིག་ནི་རླུང་ནང་ཀི་མར་མེ་བཞིན་ནུབ་ལ་དང་གཟིམ་ལ་ཉེ། འོ་རེད། སྐད་ཡིག་ལགས་ཁྱེད་ལ་ཨ་སྒོར་དང་euro་་་younམེད་པའི་རེད། རིགས་གཞུང་ལགས་ཁྱེད་ལ་མཐོང་ཆུང་གཏད་ནས་བྱེད་མི་ཉན། ཨེ་མ་ཧོ། བོད་པ་ཚང་རང་ཚུགས་མ་ཤོར།
རེད་ཡ། དེ་བཙན་གཤོལ་བོད་པའི་འགྲོ་ལུགས་རེད། བོད་རང་གི་སྐད་དང་རིག་གནས་ལ་བརྙས་བཅོས་བྱེད། དཔལ་འབྱོར་ནུབ་ཕྱོགས་ལ་ཡོད་པར་ཀོ་ན། དབྱིག་སྐད་སྦྱངས་ནས་ནུབ་ཕྱོགས་འབའ་ཞིག་འགྲོ་ཨེ་ཐུབ་བྱེད།
དཔལ་འབྱོར་རྒྱ་ནག་ལ་ཡོད་པ་ཐོས་ནས་མྱུར་བར་རྒྱའི་སྐད་ཡིག་འཛིན་གྲྭ་བཙུགས། མི་རིང་བར་རྒྱ་མའི་གཙང་སྤྱོད་ཁྲུ་ཐུབ་ངེས་རེད།
རྒྱ་ཡིག་གི་སློབ་ཚན་འདིའི་དམིགས་ཡུལ་གཙོ་བོ་ཅི་ཡིན་ནམ། གལ་ཏེ་ལོ་ཙཱ་བ་སྐོར་ཅིག་དང་ཞིབ་འཇུག་པ་ཁག་ཅིག་གསོ་སྐྱོང་གནང་ཐུབ་ན་དགོས་མཁོ་ཧ་ཅང་ཆེ་མོད་་་་་
ཏཱ་ལའི་བླ་མ་མཐོ་རིམ་སློབ་གཉེར་ཁང་ལ་རེ་བ་ཆེན་པོ་བྱས་ཀྱང་། ད་ལྟ་རེ་བ་བརླག་འགོ་བཙུགས་སོང་། དང་ཐོག་ཝ་ཎ་མཐོ་སློབ་ཀྱི་ཡན་ལག་ལྟ་བུར་བཙུགས་ན་རྒྱ་གར་གཞུང་གིས་ངོས་ལེན་ཡོད་པ་དང་། རྒྱལ་སྤྱིའི་མཐོ་སློབ་ཀྱི་སློབ་ཚན་ཡོད་པ་མ་ཟད། བོད་ཀྱི་རིག་གནས་སྦྱང་ས་ཡོད་པ་ཞིག་ཆགས་རྒྱུ་ཡིན་ན། ནང་ཁུལ་ལ་ང་ཆེ་ང་བཙན་རྩོད་རེས་བྱས་ཏེ། ཨ་མ་རྗེ་བཙུན་པདྨས་ཁས་མ་བླངས་པ་རེད། ད་ལྟ་རྒྱ་གར་གཞུང་གིས་ངོས་ལེན་མེད་པས། ས་རཱ་མཐོ་སློབ་དང་ཁྱད་པར་མེད་པ་ཞིག་ཆགས་འདུག
ད་དུང་རྒྱ་ཡིག་འདྲ་བསླབ། མཚན་ཉིད་འདྲ་བསླབ། དགོས་པའི་བོད་ཀྱི་རིག་གཞུང་ཚད་ལྡན་སྦྱང་མ་ཐུབ། དེང་དུས་ཀྱི་རིག་གནས་སྦྱང་མ་ཐུབ། བོད་ཕྲུག་ཚོ་ཕན་མེད་ཆགས་ཉེན་འདུག གཟབ་དགོས་ས་རེད།
སྤྱིར་བཏང་བོད་པ་འདི་རྒྱ་ཟེར་དུས་ གལ་ཆེན་པོར་བརྩི་འདུག གང་ཤེས། ང་ནི་མགོ་མཐོམ་སོང་།