འདས་པའི་ཉིན་བཞིའི་རིང་ས་ར་མཐོ་སློབ་ཏུ་བཙན་བྱོལ་བོད་མིའི་སློབ་གྲྭ་ཁག་ཅིག་གི་སློབ་སྦྱི་དང་དགེ་ཆེ་ཚོར་བཙན་བྱོལ་བོད་མིའི་ཤེས་ཡོན་སྲིད་བྱུས་དང་འབྲེལ་བའི་ཟབ་སྦྱོང་ཞིག་སྤྲད་ཡོད་ལ། སྐབས་དེར་སློབ་སྤྱི་ཁག་ཅིག་ལ་བཅར་འདྲི་ཞུས་པར། སློབ་གྲྭ་མང་ཆེ་བའི་ཐུན་མོང་གི་དཀའ་ངལ་ཞིག་ནི་དགེ་རྒན་ཚད་ལྡན་མི་རག་པ་དེ་རེད།
ཟླ་འདིའི་ཕྱི་ཚེས་ ༦ ནས་ཚེས་ ༡༠ བར་དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་དང་ཨ་རིའི་ (PRM) རོགས་ཚོགས་ཀྱི་མཐུན་འགྱུར་འོག བཞུགས་སྒར་ཉེ་འགྲམ་ས་རཱ་མཐོ་སློབ་དུ་བཙན་བྱོལ་བོད་མིའི་སློབ་གྲྭ་ཁག་གི་སློབ་སྤྱི་དང་དགེ་ཆེ་རྣམ་པར་ཟབ་སྦྱོང་ཞིག་གོ་སྒྲིག་ཞུས་ཡོད་ཅིང་། ཟབ་སྦྱོང་དེར་སམ་བྷོ་ཊའི་ཁྱབ་ཁོངས་སློབ་གྲྭ་ཁག་དང་ངྷ་ས་བོད་ཁྱིམ་གྱི་སློབ་གྲྭ་ཁག མཱ་སུ་རི་བོད་ཁྱིམ་སློབ་གྲྭ་གཉིས། བལ་ཡུལ་རྣམ་རྒྱལ་མཐོ་སློབ་དང་སྲོང་བཙན་མཐོ་སློབ། རྣམ་རྒྱལ་འབྲིང་རིམ་སློབ་གྲྭ་བཅས་ཀྱི་སློབ་སྤྱི་ ༥ དང་དགེ་ཆེ་ ༡༧ བཅས་ཁྱོན་མི་ ༢༢ ཙམ་མཉམ་ཞུགས་གནང་འདུག
ཟབ་སྦྱོང་གི་ཉིན་དང་པོ་དང་གཉིས་པར་ལོ་ ༡༧ རིང་དགེ་རྒན་དང་ལོ་ ༡༣ ཙམ་ལ་སློབ་སྤྱི་གནང་མྱོང་མཁན་ཨོ་སི་ཊོ་ལི་ཡའི་སྐུ་ཞབས་ཨེན་ཐོ་ནེ་ཧར་ཝེ་ལོན་ཌོན་ ( Mr.Anthony Harvey London) ལགས་ཀྱིས། སློབ་གྲྭའི་འགན་འཛིན་ཞིག་གི་ངོས་ནས་སློབ་གྲྭའི་འཛིན་སྐྱོང་ཚགས་ཚུད་ཡོང་ཐབས་ལ་ཕྱག་ལས་གང་འདྲ་གནང་དགོས་མིན་དང་། དགེ་རྒན་ལ་རྟོགས་ཞིབ་དང་སློབ་མར་སློབ་སྦྱོང་སྤྲོད་སྟངས་ཀྱི་ཐབས་ལམ། སློབ་གྲྭའི་སློབ་ཚན་གོ་སྒྲིག་གནང་ཕྱོགས་སོགས་ཀྱི་ཐད་ཟབ་སྦྱོང་སྤྲད་ཡོད་འདུག་ལ། ཟབ་སྦྱོང་གི་ཉིན་གསུམ་པའི་སྔ་དྲོར་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། བཙན་བྱོལ་བོད་མིའི་ཤེས་ཡོན་སྲིད་བྱུས་ཀྱི་དགོས་དམིགས་དང་དགེ་རྒན་གྱི་ཤེས་ཡོན་གནས་ཚད་ཡར་རྒྱས་གཏོང་སྟངས། སློབ་མར་སློབ་ཁྲིད་བྱེད་ཐབས་སོགས་ཀྱི་ཐད་ནས་ཟབ་འཁྲིད་དང་། ཟབ་སྦྱོང་བ་རྣམས་པས་ཤེས་ཡོན་སྲིད་བྱུས་དང་འབྲེལ་བའི་དོགས་འདྲི་ཁག་ལ་ལེན་འདེབས་དང་། ཕྱི་དྲོར་ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་རྒྱལ་མཚན་ལགས་ཀྱིས། སློབ་གྲྭ་ཁག་གི་དགེ་རྒན་རྣམ་པས་དྲ་རྒྱ་དང་གློག་འཕྲིན་སོགས་ཀྱི་བརྒྱུད་ལམ་ཐོག་ནས་དགེ་རྒན་ནང་ཁུལ་གྱི་ཉམས་མྱོང་དང་ཤེས་ཡོན་བརྗེ་རེས་བྱ་ཐབས་སྐོར་ངོ་སྤྲོད་གནང་སོང་།
ཉིན་མཐའ་མར་སྐུ་ཞབས་ཨེན་ཐོ་ནེ་ཧར་ཝེ་ལོན་ཌོན་ལགས་ཀྱིས་འཛིན་སྐྱོང་གི་འགྱུར་བ་དང་ལས་གཞིའི་ཐད་ཀྱི་ཟབ་སྦྱོང་དང་། ཤེས་རིག་ལས་ཁུངས་ཀྱི་དམིགས་བསལ་ཤེས་ཡོན་འགན་འཛིན་བསྟན་འཛིན་དཔལ་སྒྲོན་ལགས་ཀྱིས། དབང་བོ་སྐྱོན་ཅན་དང་རིག་པ་རྟུལ་བོའི་རིགས་སློབ་མ་བྱིངས་ཀྱི་ནང་མཉམ་བསྲེས་བྱེད་སྟངས་ཀྱི་ཐབས་ལམ་དང་དེའི་དགེ་སྐྱོན་སོགས་ཀྱི་སྐོར་ལ་ཟབ་སྦྱོང་དང་དྲི་བ་དྲིས་ལན་བཅས་གནང་རྒྱུ་ཡིན་འདུག
ཟབ་སྦྱོང་དེའི་ཉིན་གསུམ་པར་འདི་གའི་གསར་འགོད་པས་ཟབ་སྦྱོང་ལ་ཕེབས་མཁན་སློབ་གྲྭ་ཁག་ཅིག་གི་འགན་འཛིན་ལ་བཅར་འདྲི་ཞུས་པར། བལ་ཡུལ་རྣམ་རྒྱལ་འབྲིང་རིམ་སློབ་གྲྭའི་སློབ་སྤྱི་བློ་བཟང་ཐབས་མཁས་ལགས་ཀྱིས། “ ཐེངས་འདིིིར་སྐུ་ཞབས་ཐོ་ནེ་ཧར་ཝེ་ལོན་ཌོན་ཀྱིས། སློབ་སྤྱི་དང་དགེ་ཆོས་རྣམ་པས་འཛིན་སྐྱོང་གི་ལས་ཀ་བྱེད་ཕྱོགས་དང་རྒྱལ་སྤྱི་དང་བཙན་བྱོལ་སྤྱི་ཚོགས་ཀྱི་སློབ་གསོའི་གནས་སྟངས་ངོ་སྤྲོད་དང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། ཤེས་ཡོན་སྲིད་བྱུས་གསར་པའི་གལ་ཆེའི་རང་བཞིན་དང་རྒྱབ་ལྗོངས་སོགས་ང་སྤྲོད་གནང་བར་ཕན་ཐོགས་ཆེན་པོ་བྱུང་སོང་། ཡིན་ནའང་གཙོ་ཆེ་ཤོས། ང་ཚོ་ཟབ་སྦྱོང་ལ་ཞུགས་པ་ཙམ་མིན་པར་ལག་བསྟར་བྱ་རྒྱུ་གལ་ཆེན་པོ་རེད། བོད་པའི་འཐབ་རྩོད་དེ་ཡང་མཐར་གཏུག་ན་ཤེས་ཡོན་གྱིས་འདང་མིན་ལ་ཐུག་ཡོད་སྟབས། སློབ་སྤྱི་དང་དགེ་ཆེ་རྣམ་པ་ཕྱིར་ལོག་སྐབས་ཟབ་སྦྱོང་གང་སྤྲད་པ་ཆ་ཚང་ལག་ལེན་བསྟར་དཀའ་ཡང་། དེའི་ཁྲོད་ཀྱི་དོན་ཚན་རེ་གཉིས་ལག་ལེན་བསྟར་རྒྱུར་འབད་བརྩོན་བྱས་ན། རིམ་པས་སློབ་གསོའི་ལས་དོན་ཡར་རྒྱས་སུ་འགྲོ་བ་རེད།” ཅེས་བརྗོད་བྱུང་།
ཡང་མཱ་སུ་རི་བོད་ཁྱིམ་ཡན་ལག་རཱ་ཇུ་པུར་སློབ་གྲྭའི་སློབ་སྤྱི་བསྟན་འཛིན་ཕྱོགས་གླང་ལགས་ཀྱིས། “ ང་རང་ལ་མཚོན་ན་སློབ་གྲྭ་ནས་ཚུར་ཡོང་སྐབས་ནས་སྐུ་ཞབས་ཨེན་ཐོ་ནེ་ཧར་ཝེ་ལོན་ཌོན་དང་བཀའ་བློན་ཁྲི་ཟུར་ཟམ་གདོང་རིན་པོ་ཆེ་གཉིས་ཀྱི་ཟབ་སྦྱོང་ལ་རེ་བ་ཆེན་པོ་བརྒྱབ་ཡོང་བ་ཡིན། སློབ་ཐུན་ ༨ ཙམ་གྱི་ཟབ་སྦྱོང་དང་ནང་ཁུལ་བསམ་ཚུལ་བརྗེ་རེས་སོགས་ཀྱིས་སློབ་གསོ་མང་པོ་ཞིག་རག་སོང་ལ། མ་འོངས་པར་ཡང་ཟབ་སྦྱོང་འདི་འདྲའི་རིགས་ལ་ཞུགས་ཐུབ་ན་ཕན་ཐོགས་ཆེན་པོ་འདུག་བསམ་པ་ཞིག་བྱུང་སོང་། ང་རང་དེ་སྔ་དགེ་རྒན་དང་སློབ་སྦྱི་སོགས་ཀྱི་ལས་ཀ་རྒྱུན་རིང་བྱས་མྱོང་མཁན་ཞིག་ཡིན། ང་ཚོའི་སློབ་གྲྭར་མཚོན་ན་དཀའ་ངལ་ཆུང་ཚགས་མང་པོ་ཡོད་ཀྱང་། དཀའ་ངལ་ཆེ་ཤོས་ཤིག་དེ་སྔོན་མ་ནས་དགེ་རྒན་ཚད་ལྡན་མི་རག་པ་དང་། ཨང་རྩིས་དང་ཚན་རིག་གི་དགེ་རྒན་མི་རག་པ་དེ་རེད། དེའི་ཐད་ཤེས་རིག་ལ་ཡང་ཡང་ཞུས་ཏེ། ད་ལྟའི་ཆར་སློབ་གྲྭ་རང་ནས་སློབ་མཐར་ཕྱིན་པ་དང་། ཨང་རྩིས་དང་ཚན་རིག་ཐོག་གྲུབ་འབྲས་ལེགས་པའི་སློབ་མ་ཕྱིར་སློབ་གྲྭར་འགུག་ཐབས་བྱེད་ཀྱི་ཡོད། ” ཅེས་བརྗོད་བྱུང་།
ཅོང་ངྷི་ར་སམ་བྷོ་ཊའི་སློབ་སྤྱི་དོན་འགྲུབ་རྡོ་རྗེ་ལགས་ཀྱིས། “ ད་རེས་ཀྱི་ཟབ་སྦྱོང་འདིའི་ཐོག་ད་ལྟའི་བར་སམ་བྷོ་ཊའི་ཁྱབ་ཁོངས་ཀྱི་སློབ་གྲྭ་ཁག་ལས་གཞན་པའི་སློབ་གྲྭ་ཁག་ཤེས་ཡོན་སྲིད་བྱུས་ལག་བསྟར་བྱེད་ཐུབ་མེད་སྟབས། དེའི་ཐད་བཀའ་བློན་ཁྲི་ཟུར་མཆོག་གི་གསལ་བཤད་དང་ཟབ་སྦྱོང་བ་རྣམས་ཀྱི་དོགས་འདྲི། ཕན་ཚུན་བགྲོ་གླེང་སོགས་བྱས་ཏེ་མ་འོངས་པར་སློབ་གྲྭ་ཡོངས་སུ་ལག་བསྟར་བྱ་བར་རེ་བ་འདུག་བསམ་པ་དྲན་བྱུང་། སློབ་གྲྭའི་དཀའ་ངལ་གྱི་ཐད་ནས་སློབ་གྲྭ་ཚང་མར་དཀའ་ངལ་མི་འདྲ་བ་ཡོད་ཀྱང་། སྤྱི་ཡོངས་ཀྱི་དཀའ་ངལ་ཆེ་ཤོས་ཤིག་དགེ་རྒན་ཚད་ལྡན་རག་གི་མེད་པ་དང་། བོད་པ་རང་གི་ནང་དུ་འཛིན་གྲྭ་མཐོ་བའི་ཨང་རྩིས་དང་ཚན་རིག་དགེ་རྒན་མེད་པ་དེ་རེད། ང་རང་གི་བསམ་པར་དཀའ་ངལ་འདི་སེལ་དགོས་ན། དགེ་རྒན་ལ་ལས་བྱེད་གཞན་ལས་ལྷག་པའི་མཐུན་རྐྱེན་བསྐྲུན་རྒྱུ་དང་། གཞུང་དང་སྤྱི་ཚོགས་ཀྱི་ངོས་ནས་དགེ་རྒན་ལ་མཐོང་སྤྲོད་རྒྱུ་གལ་ཆེན་རེད། ” ཅེས་བརྗོད་བྱུང་།
གསར་འགོད་པ། དོན་གོ
གཅིག་ནས་ཤེས་ཡོན་སྲིད་ཇུས་ལག་བསྟར་བྱེད་དགོས་པ་དང་། གཉིས་ནས་ཨང་རྩིས་དང་ཚན་རིག་དགེ་རྒན་ཚད་ལྡན་རག་གི་མེད། ཤེས་ཡོན་སྲིད་ཇུས་ནང་ཨང་རྩིས་དང་ཚན་རིག་ཀྱང་བོད་སྒྱུར་བྱས་ནས་ཁྲིད་རྒྱུ་ཡིན་པས། བོད་ཡིག་སྟེང་ནས་ཁྲིད་ཐུབ་མཁན་ད་དུང་སྐྱེད་བསྲིང་བྱ་རྒྱུར་ལྷག་ཡོད་པས། མ་མཐར་ཡང་ད་དུང་ལོ་མང་པོ་ཞིག་ལ་ཨང་རྩིས་དང་ལྷག་པར་དུ་ཚན་རིག་དགེ་རྒན་ཚད་ལྡན་ཞིག་ཡོང་དཀའ་ངེས་རེད། བསླབ་གཞི་གསར་པ་བཟོས་ཚར་བའི་དབང་དུ་བཏང་ཡང་བསླབ་གཞི་དེ་བསླབ་ནས་མཐར་སོན་པ་སུ་གཅིག་ཀྱང་མེད་པ་རེད། དེ་མེད་ས་ནས་དེ་དག་གི་དགེ་རྒན་ཚད་ལྡན་ཞིག་གང་ནས་ཡོང་། ཅི་ལྟར་འོང་། འདི་ཤེས་རིག་ལས་ཁུངས་ཀྱིས་བསམ་གཞིགས་ནན་མོ་བྱེད་དགོས་པའི་གནད་དོན་ཞིག་རེད།
དེ་སྔོན་སློབ་སྦྱོང་སྤྲོད་ཐབས་ཀྱི་ཐབས་སྦྱོར་གང་ལེགས་ཐོག་ཟབ་སྦྱོང་གང་མང་ཞིག་བྱས་ཡོད་ཀྱང་། ཐབས་ལམ་འདི་འདྲ་ཞིག་གིས་མི་འགྲིགས་པའི་གནད་དོན་རེ་གླེང་བ་ཙམ་ལས། ངོ་མའི་ལས་དངོས་བསྒྱུར་བཅོས་ཚད་ལྡན་སྣེ་གཅིག་བྱས་ཡོད་པའི་གནས་ཚུལ་གསལ་བཤད་བྱ་རྒྱུ་ཡོད་མཁན་སུའང་མ་མཆིས་པ་འདིས། ཅི་འདྲའི་སློབ་སྤྱི་རྣམ་པའི་ཕྲག་ཏུ་འབབས་པའི་འོས་འགན་དེ་བླངས་ཡོད་ན་སྙོམ་པའི་སེམས་ཚབས་འདིས་བོད་མི་རུས་རྐང་ཡོད་པ་ཞིག་གིས་མི་བཟོད་པའི་སྡུག་བསྔལ་ཤིག་རེད་་་་
སེམས་སྐྱོ་གཞི་ཞིག་ལ་དགེ་རྒན་སྐོར་ཞིག་ལ་སློབ་སྦྱོང་གི་གནས་ཚད་མཐོན་པོ་ཡོད་ཀྱང་། ལག་ཁྱེར་མེད་སྟབས་གླ་ཕོགས་དམའ། ཡང་དགེ་རྒན་སྐོར་ཞིག་ལ་ལག་ཁྱེར་མཐོ་བོ་ཡོད་ཀྱང་སློབ་སྦྱོང་གི་གནས་ཚད་ཞན། དེ་རྐྱེན་ཀྱིས་དགེ་རྒན་ཤེས་ཡོན་ཅན་མང་པོ་ཞིག་སེམས་ཤུགས་ཆགས་པའམ་ཡང་ན་རྩ་དགོངས་ཞུ་མཁན་ཡང་གང་འཚམས་བྱུང་ཡོད། གནད་དོན་འདིའི་སྒང་ལ་ཤེས་རིག་སོགས་ནས་ཉམས་ཞིབ་དང་ཐག་གཅོད་འོས་འཚམས་ཞིག་གནང་དགོས་པར་མཐོང་།
ད་ཅི་ཕན་ལེ་མ་རེད།
སློབ་ཕྲུག་བརྒྱ་ཆ་གོ་གཅིག་བོད་རིགས་མིན་པ་རེད།
དེ་ཚོར་བོད་ཡིག་སླིབ་པ་ལས་དབྱིན་ཡིག་ཐོག་སློབ་ཐུབ་ན་དགེ་མཚན་ཆེ།
་་་་་། བོད་པ་རང་གི་ནང་དུ་འཛིན་གྲྭ་མཐོ་བའི་ཨང་རྩིས་དང་ཚན་རིག་དགེ་རྒན་མེད་པ་དེ་རེད། ང་རང་གི་བསམ་པར་དཀའ་ངལ་འདི་སེལ་དགོས་ན། དགེ་རྒན་ལ་ལས་བྱེད་གཞན་ལས་ལྷག་པའི་མཐུན་རྐྱེན་བསྐྲུན་རྒྱུ་དང་། གཞུང་དང་སྤྱི་ཚོགས་ཀྱི་ངོས་ནས་དགེ་རྒན་ལ་མཐོང་སྤྲོད་རྒྱུ་གལ་ཆེན་རེད།
གསུངས་པ་ འདི་ བདེན་པ་ རེད། རྒྱབ་སྐྱོར་ ཡོད། འོནད་ཀྱང་། བོད་ཡིག་དང་ བོད་སྐད་ སློབ་སྦྱོང་ལ་ འཐུས་ཤོར་ མ་མཐོང་བ་ དེ་ལ་ བློ་འཚབ་ཅིག་ ངང་གིས་ སྐྱེས ་ཡོང་བགྱིད་ འདུག འདི་ཡང་ ང་རང་གི་ རི་བོང་ གནམ་རྡིབ་ཀྱི་ སྡུག་བསྔལ་ཅིག་ ཡིན་པར་ ཤོག ཁྱེད་ དགེ་ལས་ རྣམ་པའི་ མཛད་འཕྲིན་དང་ མཛད་རྗེས་ལ་ བཀྲ་དྲིན་ཆེ་ ལགས།
གཅིག་ན་དཔལ་འབྱོར་གྱི་དུས་རབས་རེད། གཉིས་ན་ལྷག་བསམ་དང་སེམས་ཤུགས་ཅན་ཉུང་ཉུང་རེད། གསུམ་ན་དགེ་རྒན་ཚོར་སློབ་ཕྲུག་ཚོས་ཆ་འཇོག་ཡོད་པ་མ་རེད། བཞི་ན་ཕ་མ་ཚོར་རྒྱུ་དངོས་མ་གཏོགས་མི་དགོས་པཱ ད་དགོངས་པ་མང་པོ་བཞེས་ཡཱ།
ཁ་ནས་བཤད་པ་ཙམ་མིན་པར་གཏན་ཁེལ་བྱེད་རྒྱུ་གལ་ཆེན་མཐོང་།
དགེ་རྒན་དེ་ལས་བྱེད་གཞན་ལས་གལ་ཆེན་བྱེད་དགོས་པ་དངོས་ཡོད་རེད། དགེ་རྒན་གྱི་ལེགས་བཤད་བཤད་རྒྱུ་ལས་ལོག་བཤད་མི་གནང་པའི་རེ་བ་ཡོད། མ་ཟད་དགེ་རྒན་གྱི་ཀུན་སྤྱོད་དང་སློབ་མའི་བསམ་བློ་ཡར་རྒྱས་གཏོང་ཐུབ་ལ་རང་ནུས་གང་ཡོད་ཀྱི་འབད་རོགས་ཞུ། གཙོ་བོ་སློབ་མའི་བློ་ཁ་དང་འཚམས་པའི་སློབ་དེབ་དང་སློབ་ཚན་སྒྲིག་རྒྱུ་གལ་ཆེན་རེད། ཐུགས་རྗེ་ཆེ།