བོད་ལ་ཐབས་རྩལ་དགོས།

ཝང་ལིས་ཞུང་གིས་བརྩམས། ནགས་ཤོད་སད་མིས་བསྒྱུར།

གཅིག

མིག་སྔའི་བོད་ནི།  ཕལ་ཆེར་  ༢༠༠༨  ལ་བསྐྱར་ལོག་བྱེད་ཀྱིན་ཡོད་པ་འདྲ།  བསྐྱར་ལོག་བྱེད་པར་དོན་སྙིང་ཡོད་པ་མ་རེད་ཤོད་མི་རུང་།   དཔེར་ན་བསྐྱར་ལོག་གི་ངོ་རྒོལ་ཧ་ཅང་གལ་ཆེན་རེད།  གནད་དོན་ཞིག་ཡོད་ས་ནི་ངོ་རྒོལ་བ་ཚོའི་ཕྱོགས་ལ་མ་རེད།   དེ་ནི་ངོ་རྒོལ་ཕོག་སའི་ཕྱོགས་དང་།   ངོ་རྒོལ་བ་ཚོའི་སྐུ་ཚབ་ཕྱོགས་ལ་རེད།   ལོ་བཞིའི་དུས་ཚོད་ནི་ཐུང་ཐུང་མིན་ལ།   འདིའི་རིང་ཕྱོགས་གཉིས་ཀའི་བྱ་ལུགས་བྱེད་ལུགས་སྔར་ལྟར་རྒྱུན་མཐུད་ཀྱིན་ཡོད་པ་ལས་མདུན་སྐྱོད་དམ་མཆོངས་བརྒལ་གྱི་རྣམ་པ་སྤུ་ཙམ་མངོན་རྒྱུ་མེད།   

ངོ་རྒོལ་ཕོག་སའི་ཕྱོགས་འདིས་རང་འདོད་ངང་ངོ་རྒོལ་བ་ཚོར་སྔ་མ་ལྟར་གདོང་ལེན་བྱེད།  མི་འདྲ་ས་གཅིག་ནི།  དྲག་གནོན་བྱེད་ཤུགས་སྔར་ལས་ཆེ་བ་དེ་རེད།  ངོ་རྒོལ་བ་ཚོའི་སྐུ་ཚབ་མཚོན་པའི་ཕྱོགས་དེས།   དེ་སྔ་ལྟར་ངོ་རྒོལ་བ་ཚོའི་རྗེས་སྙེག་གིན་ཡོད།   ངོ་རྒོལ་བ་ཚོ་ཁ་གྲམ་པའི་རྣམ་འགྱུར་སྒོ་ནས་མུ་མཐུད་ངོ་རྒོལ་སྒེར་ལངས་བྱེད་ལ།   སྐུ་སྲོག་ཕུལ་ཡང་སྔར་བཞིན་གྲུབ་འབྲས་ཐོན་མེད་ནའང་།   བྱ་ཐབས་སྔར་ལས་ཐ་ཆད་པའི་རྣམ་པ་བསྟན།  གལ་ཏེ།  ༢༠༠༨  ལོའི་རྗེས་ནས།    ཕྱོགས་གཉིས་གང་རུང་ནས་གུ་ཡངས་ཀྱི་རྣམ་པ་ཅུང་ཕྱིར་མངོན་བྱས་ཚེ།  ད་ཆ་འདི་ལྟར་ངོ་རྒོལ་བསྐྱར་ལོག་བྱ་དགོས་ཐུག་གི་མ་རེད། 

ལོ་དེར་རྒྱ་ནག་གི་མགོ་པས་གཙོ་ཁྲིད་བྱས་པ་དང་གཡོན་དུ་ཕྱོགས་ཏེ་རིག་གསར་ལས་འགུལ་སྤེལ་ནས་ཆོས་ལུགས་རྩ་གཏོར་བྱས་པ་རེད།  ཡང་ཧུའུ་ཡོ་པང་གིས་གཡས་སུ་ཕྱོགས་ཏེ་རྒྱ་མི་བོད་ནས་ཁ་བྲལ་དགོས་གླེང་བ་རེད་པས།   བོད་ཀྱི་སྲིད་ཇུས་འགྱུར་ཚད་འདིར་མིག་ཅེར་ནས་ལྟ་དགོས་པའི་ཚད་རེད།  དེ་རིང་གི་རྒྱ་ནག་ནི་དཔོན་ངན་ཚོགས་ཁག་གི་འཕྲུལ་ཆས་རེད།  འཕྲུལ་ཆས་ལ་ལྡབ་ལས་ཀྱི་གོ་རིམ་ཞིག་ལས་ཅི་ཡང་མེད་པ་བཞིན།   བོད་ལ་བཏོན་པའི་དྲག་གནོན་སྲིད་ཇུས་དང་དཔལ་འབྱོར་བསླུ་བྲིད་གཉིས་ཀ་དཔོན་ངན་ཚོའི་ཐོན་རྫས་རེད།  འདི་ཚོར་རྩ་བ་ནས་མདུན་སྐྱོད་ཡོད་མི་སྲིད།  

བོད་ནང་གི་བོད་མི་ཚོ་བཙན་གནོན་འོག་ཡོད་དུས།   རང་དབང་བའི་བརྒྱུད་ལམ་དང་འཁོེར་ཡུག་མེད་པས་སྒྲིག་བཀོད་བྱེད་ཐབས་མེད།   བྱེད་ཐུབ་པ་གཅིག་རང་ཡོད་པ་ནི།    མི་རྐྱང་རྟ་རྐྱང་ངམ་ཡང་ན།   གནས་སྐབས་མཉམ་འདུས་ཀྱིས་ངོ་རྒོལ་བྱེད་རྒྱུ་ལས་མེད།   རང་བསྲེགས་ནི་དེ་འདྲའི་ངོ་རྒོལ་གྱི་རྩེ་མོར་སོན་པ་དེ་རེད།   འདི་ལས་འདའ་འགོངས་བྱ་ཐུབ་པའི་གཞི་གཅིག་རང་ཡོད་པ་དེ།  ཕྱི་སྡོད་བོད་མི་ཚོ་རེད།   དེ་ན་སྒྲིག་འཛུགས་ཡོད་པ་རེད་ལ།   རྟེན་གཞི་ཡོད་པ་རེད།  དཔལ་འབྱོར་ཡོད་པ་རེད་ལ།   ཤེས་ཡོན་ཡོད་པ་རེད།   བསམ་བློའི་དབུ་ཁྲིད་ཡོད་པ་རེད་ལ།   སྐྱེས་ཆེན་བླ་མའང་ཡོད།  དེས་མ་ཚད།   སྤྱི་ཚོགས་ཚོགས་སྡེ་དང་གསར་འགྱུར་བརྒྱུད་ལམ།   དེ་བཞིན་རྒྱལ་སྤྱིའི་རོགས་རམ་བཅས་ཡོད་པ་རེད།   ཅི་སྟེ།   བོད་ནང་གི་བོད་མི་ཚོའི་སོང་ཤུལ་རྐྱང་རྐྱང་དེད་ནས་གསལ་བསྒྲགས་འདྲ་སྤེལ་བའམ།   ཡང་ན་ངོ་རྒོལ་བར་རྒྱབ་སྐྱོར་བྱེད་པ།   བསྔོ་སྨོན་གསོལ་འདེབས་བྱེད་པ་སོགས་ནི།   སྤྱིར་བཏང་འགྲིག་པ་རེད།  དེ་ཡང་དགོས་ཀྱི་ཡོད་པ་རེད།   རེད་དེ།  དེ་ནི་ཚད་བརྒལ་གྱི་ཐབས་ལམ་ཞིག་ཏུ་གཏན་ནས་བགྲང་ཐུབ་ཀྱི་མེད།  དེས་ན།  བོད་ནང་གི་བོད་མི་ཚོར་དགོས་པ་ནི་ཁ་གསལ་གཏིང་གསལ་གྱི་ཁ་ཕྱོགས་ཤིག་དང་།    དམིགས་འབེན་མངོན་འགྱུར་གྱི་ཐབས་རྩལ་ཞིག་རེད། 

གཉིས།

རྨ་ཆུའི་འགྲམ་གྱི་རྒད་པོས་བཤད་དོན།   སྔ་དུས་རྨ་སྟོད་ན་ལམ་བུ་མེད་པས།   ཤིང་གཅོད་པ་ཚོ་གཙང་ཆུར་བརྟེན་ནས་ཤིང་ཆ་དབོར་འདྲེན་བྱ་རྒྱུ་ཁོ་ན་ལས་མེད།   ཧ་ཅང་གུ་དོག་པའི་རྨ་ཆུའི་གྲོག་རོང་འགའ་ན་ཆུ་འོག་ནས་བྲག་རྡོ་རྩི་ཤིང་ལྟར་འགྲེངས་པས།  སྐབས་རེར་ཤིང་ཆའང་འཐོགས་ནས་རྗེས་ཞུགས་ཤིང་འདྲུད་པ་ཚོའི་ཤིང་དག་ཀྱང་དེ་ན་འཁགས་ཡོང་།   དེ་ལྟར་ཇེ་བསགས་ཇེ་མང་དུ་སོང་ནས་མཐར་ཆུ་ལམ་རྦད་དེ་འགོག་པའི་ཤིང་རྩེག་ཅིག་ཏུ་འགྱུར་འགྲོ  དེའི་ཚེ་ན་ཐབས་རྩལ་ལེགས་ཤོས་ཤིག་འདོན་རྒྱུ་ནི།   ཕན་ཚུན་བསྣོལ་བའི་ཤིང་རྩེག་དེའི་ཁྲོད་ནས་གནད་འགག་ཅན་གྱི་ཤིང་ཐུར་གཅིག་ངོས་གཟུང་རྒྱུ་དེ་རེད།    དེ་ནི་ཤིང་རྩེག་དེའི་སྲོག་ཤིང་ཡིན་པས་རེད།  གལ་ཏེ་དེ་འདྲ་བའི་སྲོག་ཤིང་དེ་བྲེགས་བཏང་ན།   ཤིང་རྩེག་དེ་མ་ཉིད་དུ་ཧུར་ཆིལ་ལེར་ཉིལ་ནས་འགྲོ་ལ། གནད་འགག་བཀྲོལ་ན་དཀའ་ལས་ཡོད་རྒུ་སེལ་ཐུབ་གྱི་ཡོད་པས་རེད།   དེ་ལྟར།   བོད་ཀྱི་དཀའ་རྙོག་སེལ་བ་ལ་ཡང་།   འདི་ལྟ་བུའི་གསང་གནད་ཅིག་འཚོལ་ཐུབ་མིན་ལ་རག་ལས་ཡོད། 

ངས་ནི་དེ་ཐབས་རྩལ་ཞིག་རང་ཡིན་པར་ངོས་བཟུང་ཡོད།  ཕར་ཕྱོགས་ཀྱི་རིང་ལུགས་པས་ཅི་ལྟར་ལྟ་གིན་ཡོད་ན།   ཚུར་ཕྱོགས་ནས་དེ་ལན་ཐབས་རྩལ་འཆུག་མེད་ཅིག་འདོན་དགོས།   མདོ་བསྒྲིལ་ནས་བཤད་ན།      སྤྱི་ཚོགས་ཀྱི་རྣམ་པ་འདྲ་མིན་ནང་དུ་ཐབས་ལམ་ཡང་སྣ་ཚོགས་ཡོད་པ་སྟེ།  བཀས་བཀོད་དང་།   སྤྱི་མཐུན།  དབང་གསུམ་དབྱེ་འཛུགས།  གྲོས་ཚོགས་ལམ་ལུགས་སོགས་ནི་ཐབས་ལམ་མ་ཡིན་པ་ཅི་ཡང་མེད།   གལ་ཏེ་སུ་ཞིག་ལ་ཐབས་ལམ་མེད་ན་རིང་ལུགས་ཤིག་བཟུང་ཡོད་ཀྱང་སྟོང་པ་རེད།  སྤྱི་ཚོགས་ཀྱི་ཐབས་ལམ་བཅོས་སྒྱུར་བྱེད་པར་རིང་ལུགས་ངེས་པར་དེ་ཉིད་དུ་ཡོད།  འཛམ་གླིང་ལ་ཐབས་ལམ་དགོས།  བོད་ཀྱི་དཀའ་རྙོག་སེལ་བར་ཐོག་མར་ཐབས་རྩལ་རྙེད་དགོས་སོ།།

གསུམ།

ཏཱ་ལའི་བླ་མས་བཏོན་པའི་མི་རིགས་ས་ཁོངས་རང་སྐྱོང་གི་བསམ་འཆར་དེ་གྲོང་གསེབ་ནས་མགོ་འཛུགས་དགོས་པ་ངས་བཤད་ཡོད།    ངས་སྔོན་ནས་བསམ་པ་ལྟར་དོགས་པ་ཞིག་ཡོད་པ་ནི།  རྒྱ་མིས་བྱེད་ཆོག་པ་དེ་བོད་མིས་བྱེད་ཆོག་གི་མེད།    དེ་ཡང་ཁ་བྲལ་བ་སྙད་བཏགས་ནས་དྲག་གནོན་བྱེད་སྲིད་པ་རེད།  གནད་འགག་ཐུག་ས་ནི།   ཁྱོད་ཀྱིས་གྲོང་གསེབ་ནས་བརྩམས་ཏེ་རང་སྐྱོང་གི་ལས་འགུལ་མ་སྤེལ་བ་དེ་འདིར་བསམས་ནས་མ་འགུལ་བ་ཨེ་ཡིན།  མ་གཞི་

གཞུང་ལམ་དུ་ཐོན་ནས་ངོ་རྒོལ་སྐད་འབོད་བྱེད་པ་ལ་ཡང་དྲག་གནོན་བྱེད་ཀྱི་ཡོད་པ་མ་རེད་དམ།  ཁྱོད་ཀྱིས་ཅི་ཡང་མ་བྱས་ན་མ་གཏོགས་དྲག་གནོན་ཡོད་ཡོད་པ་རེད།    གང་ལྟར་ཡང་། ང་ལ་སྐད་ཆ་རྙིང་པ་འདི་ལས་མེད་པ་སྟེ།    ཁྱོད་ཀྱིས་རང་བསྲེགས་ཀྱི་བྱ་བར་ཡང་ཞེད་ཀྱི་མེད་དུས།   ད་དུང་དྲག་གནོན་ལ་སྐྲག་གི་ཡོད་པ་རེད་དམ། 

མི་རེ་འགས།   འུ་ཁན་བ་ཚོའི་བྱེད་སྟངས་དེ་ནི་གྲོང་ཚོ་གཅིག་གི་མཉམ་སྡེབ་བློ་སྟོབས་རེད།  རང་བསྲེགས་ནི་མི་སྒེར་པ་ག་གེ་མོའི་སྙིང་སྟོབས་ཙམ་ལས་དགོས་ཀྱི་མེད་དུས་མི་འདྲ་ཟེར་ན།  དེ་ལྟ་ན།   ངོ་རྒོལ་ལས་འགུལ་ལ་ཞུགས་མཁན་བོད་མི་ཁྲི་སྟོང་མང་པོ་ཡོད་པ་དེ་མཉམ་སྡེབ་ཀྱི་བློ་སྟོབས་མ་རེད་དམ།   དེས་དངོས་གནས་མེ་མདའི་ཁ་ཅོ་ལ་གདོང་གཏོད་ཀྱི་ཡོད་པ་རེད།   དེ་གྲོང་གསེབ་རང་སྐྱོང་གི་བློ་སྟོབས་ལས་ལྡབ་འགྱུར་གྱིས་ཆེ་བ་རེད།   གྲོང་གསེབ་རང་སྐྱོང་ནི་རྒྱ་ནག་གི་རྩ་ཁྲིམས་དང་མཐུན་ལ།   མིང་དོན་ལུགས་མཐུན་རེད།  དེས་མ་ཚད།   རང་བསྲེགས་དང་གཞུང་ལམ་གྱི་ངོ་རྒོལ་སོགས་ལས་ཉེན་ཁ་དཔེ་མེད་ཆུང་གི་རེད།   བློ་སྟོབས་ཆེན་པོ་དེས་ཉེན་ཁ་ཆུང་ཆུང་ཞིག་ལ་གདོང་གཏོད་རྒྱུར།   ཅིའི་ཕྱིར་དུ་ཡིད་སྤྲོ་བས་འཇུག་གི་མེད་པ་རེད། 

དེ་མིན་དོགས་པ་གཞན་ཞིག་ཡོད་པ་ནི།   དབང་འཛིན་པས་བོད་མིའི་གྲོང་གསེབ་རང་སྐྱོང་ཁས་ལེན་བྱེད་ཀྱི་མ་རེད་ཟེར་བ་དེ་རེད།  དེ་དངོས་འབྲེལ་རེད། ཡིན་ནའང་།    གསལ་པོ་ཤེས་དགོས་པ་ཞིག་ནི་གྲོང་གསེབ་རང་སྐྱོང་ཟེར་བ་མདོ་དོན་སུས་ཁས་ལེན་གྱི་རེད།  སུའི་གནད་དོན་རེད།   གྲོང་གསེབ་ཀྱི་དོན་དམ་དབང་ཆ།     གྲོང་མི་ཚོས་ཁས་ལེན་ཡོད་མེད་ལ་རག་ལས་ཡོད་པ་ལས་དབང་འཛིན་པས་ཁས་བླངས་མིན་མ་རེད།   གལ་ཏེ་གྲོང་མི་ཚོས་རང་ཉིད་ཀྱི་ངོས་ལེན་བྱེད་ཕྱོགས་འབའ་ཞིག་ལ་རྒྱུན་འཁྱོངས་བྱ་ཐུབ་ན།  མཐའ་མའི་ཕྱིར་འཐེན་རྒྱག་མཁན་དེ་དབང་འཛིན་པ་ཚོ་རང་རེད། ༼  དཔེར་ན། ཀོང་ཏུང་འུ་ཁན་གྲོང་ཚོ་ལྟ་བུ་རེད།༽ གྲོང་ཚོའི་རང་སྐྱོང་ཟེར་བ་འདིར་མི་རིགས་ཀྱི་གྲོས་དོན་ཆེན་པོ་གཏོགས་ཀྱི་མེད།   འདི་ནི་རྒྱ་ནག་རང་ཉིད་ཀྱི་རྩ་ཁྲིམས་དང་མཐུན་གྱི་ཡོད།  གྲོང་མིའི་རང་སྐྱོང་གིས་ཁྲོམ་ཐོག་ངོ་རྒོལ་དང་རང་བསྲེགས་ཀྱི་ཚབ་བྱས་ཏེ་སོང་ན།   དབང་འཛིན་མཁན་ལ་ཡང་ཁེ་ཕན་མེད་པ་མིན་དུས། ཨུ་ཚུགས་མཐར་སྐྱེལ་གྱིས་ཁས་ལེན་མི་བྱེད་པ་བྱ་མི་སྲིད།

ཏན་ཏན་རེད།  རང་སྐྱོང་གི་ལས་འགུལ་ནི་སྤྱིར་བཏང་བ་རེད།   ཁྲོམ་ཐོག་ནས་ངོ་རྒོལ་བྱེད་པ་ལྟ་བུའི་མི་སེམས་འགུལ་བྱེད་མེད་ལ།  མེ་མདས་བསད་སོང་ཟེར་བ་ལྟ་བུའི་མི་མང་གིས་ཐོས་རྒྱུའང་མེད།  གནད་འགག་ནི་ལས་དོན་གང་ཞིག་སྐུལ་སྤེལ་བྱས་རུང་གོམ་པ་ཕྱི་མ་གང་དུ་འདོར་དགོས་མིན་བལྟ་རྒྱུ་དེ་གལ་ཆེན་རེད།  དཔེར་ན།  ལས་དོན་འདི་མུ་མཐུད་མདུན་སྐྱོད་བྱ་ཐུབ་ས་རེད་དམ་མ་རེད།  མ་ཟད།    གོམ་པ་ཕྱི་མ་རེ་རེ་དང་།   དེའི་ཕྱི་མ་སོགས་ཀྱིས་དམིགས་འབེན་དང་ཉེ་བར་བཅར་ཐུབ་ཀྱི་འདུག་གམ་མི་འདུག་བཅས་རེད།  ཁྲོམ་ཐོག་ངོ་རྒོལ་སྐད་འབོད་ཀྱི་གོམ་པ་ཕྱི་མ་ག་རེ་རེད།  དྲག་འགུལ་རེད་དམ།   འོས་ལངས་རེད་དམ།  གསར་བརྗེ་རེད་དམ།  སྲིད་གཞུང་བརྗེ་བསྒྱུར་རེད་དམ།   དེ་ཚོ་སྲིད་ལེ་ཨེ་རེད།    རང་བསྲེགས་ཀྱི་གོམ་པ་ཕྱི་མ་ག་རེ་རེད།  འཛམ་གླིང་གི་གཙོ་རྒྱུག་གླེང་བྱ་ཞིག་ཏུ་འགྱུར་དགོས་པ་རེད་དམ།   དེ་ནས་རྒྱལ་སྤྱིས་རྒྱ་ནག་ལ་གནོན་ཤུགས་སྤྲོད་དགོས་པ་རེད་དམ།  བོད་ཀྱི་གནད་དོན་འདི་ལྟར་བྱས་ནས་སེལ་ཐུབ་བམ། སེལ་ཐུབ་ཀྱི་ཨེ་རེད། 

འོན་ཏེ།  གྲོང་ཚོ་རང་སྐྱོང་གི་གོམ་པ་ཕྱི་མ་ཧ་ཅང་གསལ་པོ་རེད།   དེ་ནི་རང་སྐྱོང་རྒྱུན་གནས་བྱེད་རྒྱུ་དེ་རེད།   རང་སྐྱོང་ནི་དམིགས་ཡུལ་རེད།  དེར་གྲོང་མི་རང་སོ་སོས་སྟངས་འཛིན་བྱེད་པ་ལས་མི་གཞན་སུས་གསོལ་རས་གནང་བའི་གྲུབ་འབྲས་ཤིག་མིན།   གལ་ཏེ་གྲོང་ཚོ་ཞིག་རང་སྐྱོང་རྙེད་སོང་ན།   དེ་ནས་གྲོང་ཚོ་རང་ཉིད་ནང་ཁོངས་ཀྱི་རིག་གནས་དང་།   ཆོས་ལུགས།   སྐྱེ་ཁམས་སོགས་གཅེས་སྲུང་བྱེད་ཐུབ་ཀྱི་རེད།  འདི་ལྟ་བུའི་གྲོང་ཚོ་གང་མང་འཕེལ་ཚེ།   སྲུང་སྐྱོབ་ཁྱབ་ཁོངས་ཀྱང་རྒྱ་སྐྱེད་བྱ་ཆོག   གྲོང་ཚོ་རང་སྐྱོང་ནས་ས་གནས་རང་སྐྱོང་བར་གཞི་ཁྱོན་ཙམ་ལས་མི་གཅིག་པ་མེད།  ཞང་དང་གྲོང་བརྡལ་གང་རུང་ཞིག་གི་གྲོང་ཚོ་ཕལ་ཆེ་བ་རང་སྐྱོང་མངོན་འགྱུར་ཐུབ་ན།   དེ་ནས་བདམས་ཐོན་བྱུང་བའི་གྲོང་དཔོན་ཚོ་ཞང་གྲོང་རྒྱུན་ལས་ཨུ་ཡོན་ནང་གཟུད་ཆོག་གི་རེད།   རིམ་བཞིན་ཞང་གྲོང་རང་སྐྱོང་སྤེལ་དགོས།   དེ་བཞིན་དུ་རྫོང་གང་རུང་ཞིག་གི་ཞང་གྲོང་ཕལ་ཆེ་བ་རང་སྐྱོང་མངོན་འགྱུར་ཐུབ་པ་ཡིན་ན།   སྔར་བཞིན་བདམས་ཐོན་ཞང་གྲོང་མགོ་དཔོན་ཚོ་རྫོང་རྒྱུན་ཨུད་ནང་གཟུད་ཆོག   དེ་ལྟར་རྫོང་རང་སྐྱོང་ནས་མི་རིགས་ས་ཁོངས་རང་སྐྱོང་མངོན་འགྱུར་མ་ཐུབ་བར་རྒྱ་བསྐྱེད་དགོས།

གལ་ཏེ།   ངྷ་རམ་ས་ལས་ཅིས་ཀྱང་འབོད་སྐུལ་འདྲ་བྱེད་ཀྱི་ཡོད་ན།   བོད་ནང་གི་བོད་མི་ཚོས་སྔ་མོ་སྔ་མོ་ནས་བརྩམས་ཟིན་པའི་ལོ་གསར་མི་གཏོང་བ་ཟེར་བ་སོགས་ཡིན་མི་འོས་ལ།   བསྐྱར་བཤད་ཡང་བཤད་བྱས་ནས་གོས་གང་གྱོན་དགོས་པ་དང་།   གང་ཞིག་དཀྲི་དགོས་པ་བཅས་ནི་རྣམ་པ་ཙམ་རེད།   འདི་རིགས་ནི་དེ་སྔོན་ཐེངས་མང་བྱས་ཚར་བ་རེད།   འདིས་ཕན་རྒྱུ་ལས་ལྡོག་སྟེ་རྒྱ་ནག་སྲིད་གཞུང་གིས་དགྲར་བལྟས་ནས།    ཕྱི་ཕྱོགས་ནས་ནང་ཁུལ་ལ་སྒྲིག་བཀོད་བྱས་པ་རེད་ཟེར་ནས་སྐྱོན་འདོགས་བྱ་བྱེད་ལས་མེད།  

ངས་བལྟས་དུས།   ངྷ་རམ་ས་ལས་འབོད་སྐུལ་འདི་འདྲ་བྱེད་འོས་པ་སྟེ།   བོད་ནང་གི་གྲོང་ཚོ་སོ་སོར་རང་སྐྱོང་མངོན་འགྱུར་ཡོང་བ་བྱས་ན།   མིག་སྔའི་དཀའ་རྙོག་སྣ་ཚོགས་སེལ་ཐུབ་ཀྱི་རེད་བརྗོད་དགོས།   ངྷ་རམ་ས་ལས་འདི་དོན་འཆར་གཞི་ཞིབ་འཇུག་བྱེད་འོས་ལ།    ཚོད་ལྟ་བྱེད་པ་དང་མི་སྣ་གསོ་སྦྱོང་བྱེད་པ། བོད་ནང་ཁུལ་དུ་སྐུལ་འདེད་བྱེད་དགོས།   འདིར་རྣམ་པ་ཅི་ལྟ་བུའི་སྒོ་ནས་བྱས་པ་ཡིན་ནའང་།   རྒྱ་ནག་རང་གི་རྩ་ཁྲིམས་དོན་འཁྱོལ་ཡོང་ཆེད་རོགས་ཕན་སྒྲུབ་ཀྱི་ཡོད་པ་རེད།   དེ་ནི་རྒྱ་ནག་རང་ཉིད་དང་མཉམ་ལས་བྱེད་ཀྱི་ཡོད་པ་ལས་འགལ་ཟླ་སྒྲུབ་ཀྱི་ཡོད་པ་མ་རེད།    པེ་ཅིང་དང་བོད་ཁུལ་གྱི་དབང་འཛིན་པ་ཚོར་གཞོགས་འདེགས་བྱེད་ཀྱི་ཡོད་པ་ལས་ངོ་རྒོལ་བྱེད་ཀྱི་ཡོད་པ་མ་རེད།   འདི་ལྟར་བྱས་པས།    དེ་ནས་བཟུང་སྟེ་ཅི་བྱེད་འདི་བྱེད་མེད་པར་གཞན་ལ་འཁྲིལ་དགོས་པའི་དཀའ་སྡུག་གཟེད་དགོས་ཀྱི་མ་རེད་ལ།   ཏཱ་ལའི་བླ་མས་བཏོན་པའི་དབུ་མའི་ལམ་གྱི་གོམ་ཁའང་འདི་ནས་མགོ་བརྩམས་ཏེ་དོན་འགྱུར་ཐུབ་ཀྱི་རེད།

རྒྱ་ནག་སྲིད་གཞུང་གིས་འདིར་ཐུགས་རྗེ་ལེགས་འབུལ་བྱེད་པར་རེ་བ་རྒྱག་མཁན་མི་སུ་ཡང་མེད་པ་ཨ་ཅང་བརྗོད་མེད་རེད།   ཡིན་ནའང་རྒྱ་ནག་མི་དམངས་ཀྱིས་འདིར་ཏན་ཏན་གདུང་སེམས་མཉམ་སྐྱེད་དང་རྒྱབ་སྐྱོར་བྱེད་ཀྱི་རེད།   གང་ཞེ་ན།  ཁོང་ཚོས་ཀྱང་རང་སྐྱོང་རྩོད་ལེན་བྱེད་ཀྱིན་ཡོད་པ་གཅིག་མཚུངས་ཡིན་པའི་ཕྱིར།   དེས་ན།    མ་འོངས་པའི་རྒྱ་ནག་ནི།    རྒྱ་ནག་མི་དམངས་ལ་དབང་ངེས་ཡིན། གལ་ཏེ་  ༢༠༠༨  ལོའི་རྗེས་ནས་བོད་མིས་གོང་ལྟར་བགྱིེས་ཡོད་ཚེ།   དེ་རིང་སླར་ཡང་བསྐྱར་ལོག་གི་རྣམ་པ་འདི་ཡོང་དགོས་ཀྱི་མ་རེད།  ཡིན་ནའང་།  ཁྱོད་ཀྱིས་དེ་རིང་ཡང་བསྐྱར་སྔ་མ་ལྟར་མགོ་རྩོམ་གྱི་མེད་ཚེ།   རྗེས་མ་ད་དུང་ཡང་མུ་མཐུད་བསྐྱར་ལོག་ཡོང་རྒྱུ་ལས་ལྟ་ཅི། །

༢༠༡༢ །  ༢ ། ༨  ལ།

 མ་ཡིག་འོད་ཟེར་པོད་ཁུག་www.woeser.middle-way.net འདི་ལ་གཟིགས་རོགས།