བོད་མིར་གདུང་སེམས་མཉམ་སྐྱེད།

འདིར་གནས་ཚུལ་བཏང་འབྱོར་ལྟར་ན། རེས་གཟའ་ལྷག་པའི་ཉིན་ཨ་རིའི་མངའ་སྡེ་རོཌ་ཨའི་ལེན་ཌི་གཙུག་ལག་སློ་གྲྭ་ཆེན་མོའི་དགེ་སློབ་ ༢༠ ལྷག་གིས་བོད་དང་འགྲོ་བ་མི་རིགས་ཡོངས་ལ་སྨྲ་བརྗོད་རང་དབང་དགོས་པའི་ཞི་བའི་ངོ་རྒོལ་ལས་འགུལ་ཞིག་སྤེལ་ཡོད་ཅིང་། ལས་འགུལ་དེ་ནི་རོཌ་ཨའི་ལེནཌི་གཙུག་ལག་སློ་གྲྭ་ཆེན་མོའི་འཚེ་མེད་ཞི་བའི་སློབ་གཉེར་ཁང་ (Center for Nonviolence & Peace Studies, University of Rhode Island) གིས་གོ་བསྒྲིགས་ཞུས་ཤིང༌། མི་རིགས་དང་རྒྱལ་ཁབ་འདྲ་མིན་ནས་ཕེབས་པའི་དྭངས་བླངས་ངོ་རྒོལ་བ་རྣམས་ཀྱིས་སྨྲ་བརྗོད་རང་དབང་བྲལ་བའི་འགྲོ་བ་མི་རིགས་སྤྱི་དང༌། ལྷག་པར་དེང་སྐབས་ཛ་དྲག་དཀའ་སྡུག་གིས་མནར་བཞིན་པའི་བོད་ནང་གི་བོད་མི་ཚོར་སྐྱིད་སྡུག་མཉམ་མྱོང་མཚོན་ཆེད་རང་གི་སྨྲ་སྒོ་བཏུམ་ནས་ངོ་རྒོལ་གནང་ཡོད་འདུག  

རོཌ་ཨའི་ལེན་ཌི་གཙུག་ལག་སློབ་གྲྭ་ཆེན་མོའི་འཚེ་མེད་ཞི་བའི་སློབ་གཉེར་ཁང་དེ་ནི་དེ་སྔ་ཨ་རིའི་མི་རིགས་དང་སྤྱི་ཚོགས་འདྲ་མཉམ་འཐབ་རྩོད་པ་མཁས་དབང་མར་ཌིན་ལུ་ཐར་ཁིན་(Dr. Martin Luther King, Jr.) མཆོག་གི་ལས་རོགས་མཁས་དབང་(Dr. Bernard Lafayette Jr.) མཆོག་ནས་འཛིན་སྐྱོང་གནང་བ་ཞིག་ཡིན་ཞིང་། ད་ལྟ་ (Dr. Paul Bueno de Mesquita) མཆོག་ནས་འཛིན་སྐྱོང་གནང་བཞིན་ཡོད་ལ། སློབ་གཉེར་ཁང་འདིས་རྒྱལ་ཁབ་འདྲ་མིན་གྱི་མི་རིགས་མང་པོར་འཚེ་མེད་ཞི་བའི་ལྟ་གྲུབ་སློབ་ཁྲིད་ཁྱབ་སྤེལ་གནང་གི་ཡོད་པར་མ་ཟད། ལོ་ལྟར་ཕྱི་ཟླ་དྲུག་པའི་ནང་འཛམ་གླིང་གང་ས་ནས་ཕེབས་པའི་སློབ་ཕྲུག་དང་དགེ་རྒན། ཆོས་དཔོན་དང་བདེ་སྲུང་མི་སྣ། ཁྲིམས་རྩོད་པ་དང་གཞུང་འཛིན་མི་སྣ་སོགས་ལ་བདུན་ཕྲག་གཉིས་རིང་སྤྱི་ཚོགས་འཆམ་མཐུན་དང་ཐོབ་ཐང་འདྲ་མཉམ། དྲང་བདེན་དང་རང་དབང་སོགས་ཀྱི་ཐད་ཟབ་སྦྱོང་སྤྲོད་བཞིན་ཡོད་འདུག