ལོ་སར་ཉིན་རྡོར་གླིང་དུ་ཟས་བཅད་ངོ་རྒོལ།

བོད་ཆུ་འབྲུག་ལོའི་ལོ་གསར་ཚེས་ ༡ ཉིན། རྒྱ་གར་བྱང་ཤར་རྡོར་གླིང་དང་ཀ་སྦུག་ཏུ་ཟས་བཅད་ངོ་རྒོལ་གྱི་ལས་འགུལ་སྤེལ་འདུག

ཁ་སང་བོད་ཆུ་འབྲུག་ལོའི་ལོ་གསར་ཚེས་ ༡ ཉིན། རྒྱ་གར་བྱང་ཤར་ཤུལ་གྱི་རྡོར་གླིང་ས་གནས་གཞོན་ནུ་དང་བུད་མེད་གཉིས་ཀྱི་མཉམ་འབྲེལ་གོ་སྒྲིག་འོག བོད་ནང་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་དང་། ད་ལྟའི་བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཆེད། རྡོར་གླིང་གངས་ཅན་རིའི་མདུན་ཐང་དུ་ཞོགས་པ་ཆུ་ཚོད་ ༩ ནས་དགོང་མོ་ཆུ་ཚོད་ ༥ བར་ཟས་བཅད་ངོ་རྒོལ་གནང་ཡོད་པ་དང་། ཟས་བཅད་ངོ་རྒོལ་ལས་འགུལ་དེའི་ནང་རྡོར་གླིང་གཞིས་མགོའི་ཁྱབ་ཁོངས་སྤོག་རི་སྦོང་ས་གནས་བོད་མི་དང་དགོན་ས་གནས་བོད་མི། རྡོར་གླིང་ཁུལ་གནས་སྡོད་བོད་མི་བཅས་མཉམ་ཞུགས་གནང་ཡོད་འདུག

གཞན་ཡང་། རྡོར་གླིང་ཁྱབ་ཁོངས་ཀྱི་ས་གནས་བསོད་ནམས་དར་དང་མཁར་བྱང་གཉིས་ཀྱི་བོད་མི་ཚོས་སོ་སོའི་ས་གནས་རང་ནས་ལས་འགུལ་སྤེལ་ཡོད་པ་དང་། ཀ་སྦུག་མི་དམངས་ཀྱིས་ཀྱང་ལོ་སར་ཉིན་གཞི་རྒྱ་ཆེ་བའི་ཟས་བཅད་ལས་འགུལ་ཞིག་སྤེལ་ཡོད་འདུག