ཁ་སང་སུད་སིའི་ཛཱོ་རིག་གྲོང་ཁྱེར་དུ་བོད་མི་བཞི་བརྒྱ་ལྷག་གིས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཀྱི་ལས་འགུལ་སྤེལ་ཏེ། བོད་ནང་སྐུ་ལུས་མེར་བསྲེགས་གཏོང་མཁན་དག་ནི་ཆབ་སྲིད་ཀྱི་ཐད་ནས་བླ་ན་མེད་པའི་རྒྱལ་གཅེས་དཔའ་བོ་དཔའ་མོ་དང༌། ཆོས་ལུགས་ཀྱི་ཐད་ནས་རང་སྲོག་གཞན་དོན་ཕུལ་བའི་རྒྱལ་སྲས་བྱང་ཆུབ་སེམས་དཔར་ངོས་འཛིན་ཞུ་རྒྱུ་ཡིན་ཟེར།
ཁ་སང་བོད་ལྕགས་འབྲུག་ལོའི་ལོ་གསར་ཚེས་གཅིག་ཉིན་ཡུ་རོབ་སུད་སིར་བརྟན་གཞི་བྱས་པའི་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག གྲོང་འཁྱེར་ཛཱོ་རིག་ནང་དུ་ལོ་སྔ་ཕྱིར་རྒྱ་གཞུང་གིས་བོད་མིའི་ཐོག་དྲག་གནོན་བྱེད་ཀྱིན་པར་ངོ་རྒོལ་དང༌། བོད་མི་ཚོས་བདེན་དོན་གྱི་ཆེད་དུ་གཅིག་རྗེས་གཉིས་བསྟུད་དུ་རང་ལུས་མེར་བསྲེགས་གཏོང་གི་ཡོད་པར་གདུང་སེམས་མཉམ་སྐྱེད་ཀྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད་འདུག ངོ་རྒོལ་སྐད་འབོད་ཀྱི་ལས་འགུལ་དེའི་སྟེང༌། རི་ཀོང་དགོན་པའི་མཁན་རིན་པོ་ཆེ་མཆོག་དང་སུད་སི་བོད་རིགས་ཚོགས་པའི་ཚོགས་གཞོན་གཞིས་རྩེ་ཚང་བློ་བཟང་ལགས། ཡུ་རོབ་གཞོན་ནུ་ཚོགས་པའི་ཚོགས་གཙོ་སོགས་ཀྱིས་གཙོས་བའི་བོད་མི་དང་བོད་དོན་རྒྱབ་སྐྱོར་པ་བཅས་མི་གྲངས་ ༤༠༠ ལྷག་མཉམ་ཞུགས་གནང་ཡོད་འདུག
ལས་འགུལ་ཐོག་བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་མཆོག་གིས་ལས་འགུལ་ངོ་སྤྲོད་དང་འབྲེལ་ཏེ། དེ་རིང་ནི་བོད་པའི་ལོ་སར་ཡིན། སྤྱིར་ཡིན་ན་ལོ་སར་ཚེས་པ་གཅིག་ཉིན་ནི་བོད་པ་ཚང་མས་དགའ་དགའ་སྤྲོ་སྤྲོ་བྱས་ཏེ། ཁྱིོམ་མི་ལྷན་འཛོམས་བྱེད་པའི་དུས་ཚོད་ཅིག་ཡིན་མོད། བོད་ཀྱི་ད་ལྟའི་གནས་སྟངས་ལ་བལྟས་ན་ཕལ་ཆེར་འདས་པའི་མི་ལོ་གཅིག་ཙམ་གྱི་རིང་ལ། བོད་བསྟན་པ་ཆབ་སྲིད་ཀྱི་དོན་དུ་ལུས་སྲོག་ལོངས་སྤྱོད་བློས་གཏོང་གིས་སྐུ་ལུས་མཆོད་མེར་ཕུལ་མཁན་ ༢༣ ཙམ་བྱུང་ཡོད་པ་དང༌། རྒྱ་དམར་གྱི་དམ་དྲག་གི་སྲིད་བྱུས་འོག་བོད་མི་མང་པོ་དམར་གསོད་དང་བཙོན་འཇུག་ཁྲིམས་ཆད་སོགས་མི་སྤྱོད་ལས་འདས་པའི་བྱ་སྤྱོད་ལག་བསྟར་བྱེད་ཀྱིན་པའི་སྐབས་འདིར། བོད་མི་སུ་ཡིན་ཡང་དགའ་སྤྲོའི་ཉིན་མོ་སྐྱེལ་ཐབས་མེད་པའི་གནས་སུ་གྱུར་ཡོད་ཅེས་བསྟན་འདུག
ཁོང་གིས་མུ་མཐུད་དུ། “ དེ་རིང་རྒྱལ་གཅེས་དཔའ་བོ་དཔའ་མོ་ཁོང་ཅག་གི་བློས་གཏོང་སྙིང་སྟོབས་ལ་གདུང་སེམས་མཉམ་སྐྱེད་དང༌། ད་ལྟའི་བོད་ནང་གི་ཛ་དྲག་གནས་སྟངས་རྒྱལ་སྤྱིར་བསྒྲགས་ཐབས་སུ་ལས་འགུལ་འདི་གོ་སྒྲིག་ཞུས་པ་ཡིན། ངེད་བོད་ཀྱི་མི་རབས་གསར་བའི་མཐུན་ཚོགས་ཀྱི་ངོས་ནས། བོད་བསྟན་སྲིད་ཀྱི་དོན་དུ་རང་ལུས་མཆོད་འབུལ་གནང་ཟིན་པ་ཁོང་ཅག་ནི། ཆབ་སྲིད་ཀྱི་ཐོག་ནས་བླ་ན་མེད་པའི་རྒྱལ་གཅེས་དཔའ་བོ་དཔའ་མོ་དང༌། ཆོས་ལུགས་ཀྱི་ཐོག་ནས་རང་ཉིད་ཀྱི་གཅེས་སྲོག་གཞན་དོན་དང་མ་འོངས་པའི་བདེ་རྩའི་ཆེད་དུ་འབུལ་མཁན་གྱི་རྒྱལ་སྲས་བྱང་ཆུབ་སེམས་དཔར་ངོས་འཛིན་ཞུ་རྒྱུ་ཡིན་ལ། ཁོང་རྣམ་པའི་ཞལ་ཆེམས་དང་བོད་ནང་རྒྱ་གཞུང་གི་གདུག་རྩུབ་མནར་གཅོད་མྱོང་བཞིན་པའི་ཡོད་མི་ཡོད་དོ་ཅོག་གི་དམིགས་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་བྱ་ཆེད། བོད་ནས་མེ་འབར་ཐུབ་ན་བཙན་བྱོལ་ནས་དུ་བ་འཕྱུར་ཐུབ་དགོས་པའི་འབོད་སྒྲ་འདི་བསྒྲགས་པ་ཡིན” ཞེས་བརྗོད་བྱུང༌།
ཐེངས་འདིའི་ལས་འགུལ་ཐོག་བསྒྲགས་གཏམ་ཞིག་དང་འབྲེལ་ཏེ་དགོས་འདུན་དོན་ཚན་ ༤ བཏོན་ཏེ། མཉམ་འབྲེལ་རྒྱལ་ཚོགས་དང་སུད་སིའི་རྒྱ་ནག་གཞུང་ཚབ། དེ་བཞིན་རྒྱལ་སྤྱི་གསར་འགོད་པ་སོགས་ལ་སྤྲད་ཡོད་འདུག དང་པོ། རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་རྒྱ་གཞུང་རང་ཉིད་ཀྱི་རྩ་ཁྲིོམས་སོགས་སྣང་མེད་དུ་བསྐྱུར་ཏེ་ཉེས་མེད་བོད་མི་དམར་གསོད། བྲག་མགོ་དང་མགོ་ལོག གསེར་རྟ། རྔ་བ། བླ་བྲང་ཨ་མཆོག་སོགས་སུ་བོད་རིགས་མི་མང་ཁྲོད་གང་བྱུང་མེ་མདའ་བརྒྱབ་སྟེ་དམར་གསོད་བཏང་བ་དང༌། ལྷ་ས་དང་རྫ་ཆུའི་ཁ། ཁྲི་འདུ། ཡུལ་ཤུལ། བླ་བྲང༌། རེབ་གོང་སོགས་སུ་དྲག་གནོན་བྱེད་བཞིན་པ་འཕྲལ་དུ་མཚམས་འཇོག་བྱ་དགོས།
གཉིས་པ། རང་དབང་དམངས་གཙོ་དང་༧གོང་ས་མཆོག་བོད་དུ་ཕྱིར་ཕེབས་གནང་ཐུབ་རྒྱུའི་སྐུ་ལུས་མཆོད་རྒྱལ་གཅེས་དཔའ་བོ་དཔའ་མོ་རྣམ་པའི་འབོད་ཚིག་ལ་རྒྱ་ནག་གཞུང་གིས་དྲང་ཐད་ཀྱིས་ཉམས་ཞིབ་འཐིལ་ཕྱིན་བྱས་ཏེ། བོད་ཀྱི་དཀའ་ངལ་དངོས་དང་གནས་བབ་དངོས་ལ་འཚམས་པའི་ཐག་གཅོད་ཁ་གསལ་འཕྲལ་མྱུར་དགོས་རྒྱུ།
གསུམ་པ། རྒྱ་གཞུང་གིས་ཁ་ནས་མི་རིགས་འདྲ་མཉམ་ཟེར་ཡང༌། དོན་དུ་མི་རིགས་དབྱེ་འབྱེད་ཀྱི་སྲིད་བྱུས་སྤེལ་གྱིན་ཡོད་པ། སྔར་ལོ་རྒྱ་ནག་ཝོའི་ཁུན་ས་གནས་མི་མང་གི་ངོ་རྒོལ་ལ་ཡ་ལན་སྤྲོད་སྟངས་དང༌། ད་ལྟ་བོད་ནང་གི་ཞི་རྒོལ་ཐོག་དྲག་གནོན་བྱེད་སྟངས་གཉིས་ལས་གསལ་བོར་བསྟན་ཡོད་སྟབས། ང་ཚོས་རྒྱ་གཞུང་གི་མི་རིགས་དབྱེ་འབྱེད་ཀྱི་སྲིད་བྱུས་འདི་ལ་ངོ་རྒོལ་མཐའ་གཅིག་ཏུ་བྱ་རྒྱུ་ཡིན་ཞེས། བོད་ཀྱི་ད་ལྟ་དང་མ་འོངས་པའི་མི་རབས་གསར་བ་ཡོངས་ཀྱིས་ཚབ་བྱས་ནས་སྐད་གསེང་མཐོན་པོས་བསྒྲགས་པ་ཡིན།
བཞི་བ། རྒྱ་གཞུང་གི་དྲག་པོའི་སྲིད་བྱུས་ཀྱི་གདུག་རྩུབ་རྒྱལ་སྤྱིའི་ཁྲིམས་གཞི་ཁག་ལ་རྒྱབ་འགལ་གྱིས་བོད་མི་མང་པོ་དམར་གསོད་དང་གཉའ་མནོན་བྱེད་བཞིན་པར་འཛམ་གླིང་མཉམ་འབྲེལ་རྒྱལ་ཚོགས་སོགས་ཀྱིས་ཡ་ལན་དོན་ཕན་ལྡན་པའི་ཡ་ལན་ཞིག་སྤྲད་མེད་པར་བློ་ཕམ་དང༌། བོད་ནང་གི་དངོས་ཡོད་གནས་ཚུལ་རྟོག་ཞིབ་རུ་ཁག་ཅིག་གང་མགྱོགས་བོད་ནང་གཏོང་ཐབས་བྱ་དགོས་པ་དང༌། རྒྱ་གཞུང་གིས་བོད་རིགས་ཞི་རྒོལ་མི་མང་རྣམས་དམར་གསོད་གཏོང་བཞིན་པར་ཉེས་འདོན་ཁ་གསལ་དགོས་རྒྱུ་བཅས་རེད།
བོད་ཀྱི་མི་རབས་གསར་བའི་ལས་འགུལ་འདི་ནི་ཚོགས་པ་འདིའི་ལས་འགུལ་ཐོག་མ་ལྟ་བུར་སོང་ཡོད་པ་འདྲ། དེ་བས་ཡར་རྒྱས་གཞི་ནས་གཏོང་རྒྱུ་ལྷག་ཡོད་པ་མང་པོ་ཡོད་སྲིད། འོན་ཀྱང་སྤྱི་ཚོགས་ཀྱི་མདུན་དུ་ཐོན་ནས་གང་ནུས་ཀྱི་ལས་འགུལ་སྤེལ་པ་འདི་རིགས་ལ་ང་ཚོས་རྒྱབ་སྐྱོར་དང་རྗེས་སུ་ཡི་རང་བྱ་དགོས་པ་ཞིག་མ་ཡིན་ནམ།
ཆབ་སྲིད་ཀྱིས་ཆེད་དུ་རང་སྲོག་བཅད་ན་དེ་བྱང་ཆུབ་སེམས་དཔའི་མཛད་སྤྱོད་ཞིག་ཡིན་པར་མདོ་རྒྱུད་གང་ནའང་གསུངས་མེད་ལ།
དེར་མ་ཟད་སེམས་ཞེ་ལྡང་ལ་སོགས་པས་སྒོ་ནས་རང་སྲོག་བཅད་ན་སེམས་ཅན་དམྱལ་བར་སྐྱེ་དགོས་གསུངས་ཡོད་ན། སྐབས་འདིར་ནང་ཆོས་ཀྱིས་གོ་དོན་གཞི་ནས་མི་ཤེས་པ་འགའ་རེའི་རྒྱལ་སྲས་བྱང་ཆུབ་སེམས་དཔར་ངོས་འཛིན་ཞུ་རྒྱུ་ཡིན། ཞེས་པ་འདི་ནི་དངོས་གནས་བསམ་དང་སྦྱོར་རྩུབ་ཀྱི་བསྐུལ་འདེད་ཞིག་རེད།
དེར་མ་ཟད་བྱང་ཆུབ་སེམས་དཔའི་མཛད་སྤྱོད་ཞེས་པ་དེ་ཅི་འདྲ་ཞིག་ཡིན་ཕྱོགས་ཙམ་ཡང་མ་གོ་བའི་རྟགས་ཞིག་ཀྱང་རེད།
ངོས་ལེན་མེད།
སུ་སའི་མི་མང་གིས་དུས་ཐོག་ཆར་བ་ལྟ་བུའི་ལས་འགུལ་སྤེལ་བར་ཡིད་རང་བསྔགས་བརྗོད་ཞུ འདི་ལྟར་ཕྱི་སྡོད་བོད་མི་ཡོད་ཚད་ཀྱིས་མིག་ལྟོས་བྱེད་རྒྱུ་གལ་ཆེན་རེད་ཡ
ཡག་པོ་རེད། མི་རབས་གསར་བ་ཡིན་ན་ལས་འགུལ་ཡང་གསར་བཏོད་ཀྱི་རྣམ་པ་ཅན་རེ་སྤེལ་རྒྱུར་འབད་བརྩོན་གང་དྲག་བྱ་གལ་ཆེ་བར་མཐོང་སོང་བས་དེ་དོན་ཡིད་འཇགས་འཚལ།
བོད་ཀྱི་མི་རབས་གསར་བའི་མཐུན་ཚོགས་ལ་ཐུགས་རྗེ་ཆེ། དམིགས་བསལ་ཚོགས་གཙོ་མཆོག་གིས་གཏན་བཤད་སྐབས་ངེས་འཛིན་དང་འབོད་སྒྲ་བསྒྲགས་པ་དོན་ལ་གནས་ཡོད་པས་ཐུགས་རྗེ་ཆེ་གྲངས་མེད་ཞུ། འོན་ཀྱང་། ངའི་ལོག་རྟོག་མིན་ན་དོན་ཚན་བཞི་ཅན་གྱི་དགོས་འདུན་ལ་ལྟོས་དང་། བོད་ཀྱི་ས་ཆ་གང་སར་དྲག་གནོན་བྱེད་ཀྱི་མེད་པའི་བཟོ་འདྲ་བོ་འདུག
བཀའ་དྲིན་ཆེ། རྒྱལ་ཁབ་རེ་ནས་འདི་ལྟར་གདུང་སེམས་མཉམ་བསྐྱེད་དང་བོད་དོན་དྲིལ་བསྒྲགས་བྱས་ན་རེ་བ་ཆེ། དམངས་ཚོགས་ཀྱི་ལག་ནས་དངུལ་བསྡུས་པས་མཐར་་རྒྱལ་དར་མེ་བསྲེགས་ཏེ་རྫིགས་ཉམས་འདོན་པ་ལས་རང་རང་གི་ས་ནས་འདི་ལྟར་རྒྱལ་སྤྱིའི་ལུགས་དང་མཐུན་པའི་ལས་འགུལ་སྤེལ་ན་ཧ་ཅང་གི་གཟི་བརྗིད་ཅིག་རེད།
མདོར་ན། བཀའ་ཁྲིས་ཉེ་སྔོན་གསལ་བརྡ་དང་འབོད་སྐུལ་ཞུས་པ་ལྟར། ཡུལ་ཁྲིམས་དང་མཐུན་པ། རྒྱལ་སྤྱིའི་མཐོང་དང་གཟི་བརྗིད་ཡོད་པ། རྩ་དོན་ལ་ཕན་པ་ལས་གནོད་མི་སྐྱེལ་བ་ཞིག་གསུངས་པ་ལྟར་རེད།