ལམ་ལ་ཆས་གྲབས་ཡོད་པའི་སྐབས།

ང་ལ་བོད་མི་ས་ཡ་གཅིག་ལྷག་གི་རྣམ་ཤེས་ཀྱིས་དྲན་བསྐུལ་གཏོང་བཞིན་ཡོད་ལ། ཤེས་རབ་དང་སྙིང་རྗེ། གཞན་ཕན་དང་དྲང་བདེན། རང་དབང་གི་མེ་ལྕེ་ཁྲོད་དུ་ལྷབ་ལྷུབ་དུ་འབར་བཞིན་པའི་བོད་མི་རིགས་ཀྱི་དུས་རབས་གསར་བའི་དབའ་རྒོད་དེ་དག་གིས་གཅིག་རྗེས་གཉིས་མཐུད་དུ་ང་རང་ལ་དྲན་སྐུལ་གཏོང་གི་འདུག ཁྱོད་རང་བོད་མི་རེད། བོད་མི་རིགས་ཀྱི་འགན་ཡོད། བོད་མི་རིགས་ཀྱི་འདུ་ཤེས་ཡོད། བོད་མི་རིགས་ཀྱི་སེམས་པ་ཡོད། དེ་དག་ནི་ཁ་ནས་བཤད་དེ་འོང་བ་ཞིག་གཏན་ནས་མིན། ལག་ལེན་དངོས་སུ་ཞུགས་དགོས་པ་རེད། ད་གཟོད་གྲུབ་འབྲས་ཀྱི་ཁ་གྲགས་ངེས་རེད་ཟེར་གྱི་འདུག ངས་ཁོང་ཚོ་ལ་གུས་འདུད་ཞུ་བཞིན། ངས་ཁོང་ཚོས་བློས་གཏོང་བའི་ཚེ་སྲོག་གི་བདེན་པ་དེ་དག་འཁུར་ནས་ལམ་དུ་ཆས་བཞིན་ཡོད།

ང་རང་ལམ་ལ་ཆས་སྟངས་འདིས། ངས་རང་གི་ཤ་ལས་མཆེད་པའི་བུ་དང་བུ་མོ་གཉིས་སྡུག་ལ་སྤྱར་ཡོད། རང་གི་མཛའ་མོ་སེམས་ཁྲལ་གྱི་ནང་དུ་བཞག་ཡོད། སྙིང་གི་གྲོགས་མོ་ཞིག་སེམས་ངལ་ལ་གཏད་ཡོད། འདི་ལྟར་ངས་རང་གི་ཁོར་ཡུག་གྱི་སྙིང་ཉེ་བའི་མི་མང་བོ་ཞིག་སྡུག་ལ་གཏད་ཡོད་ཀྱང་། སྡུག་བསྔལ་དེ་ཡི་ཕར་རྒྱབ་དུ་བདེན་པ་ཞིག་དང་རང་དབང་ཞིག ཞི་བདེ་ཞིག་གི་ཆེད་དུ་ང་རང་ལམ་ལ་ཆས་བཞིན་ཡོད་དུས། ཁོང་ཚོ་སྐྱོ་བ་དེ་ནི་ང་རང་གིས་རྒྱབ་རོགས་ཡིན་ལ། ང་རང་གི་སྤོབས་པར་འགྱུར་དགོས། དེ་མིན་ན་ང་རང་འདི་ལྟར་རིགས་ཀྱི་སྙིང་སྟོབས་དང། རིགས་ཀྱི་ཤི་གསོན་ཆེད་དུ་བླངས་མི་ཐུབ་པ་ཡིན། གང་ལྟར། ངས་བློས་གཏོང་བྱེད་དགོས། ཁྱིམ་དང་མཛའ་བོ། བུ་དང་བུ་མོ་གཉིས། དེ་རིང་ངས་རང་ཉིད་ཆུང་དུས་སུ་འཁྲབ་མྱོང་བའི་རྒྱལ་བོ་དྲི་མེད་ཀུན་ལྡན་གྱི་རྣམ་ཐར་དེ་དྲན་གྱི་འདུག

ད་དུང་ངས་མང་བོ་མང་བོ་ཞིག་ལ་བསམ་བློ་གཏོང་མྱོང་ཡོད། གཏོང་མྱོང་བ་དང་མྱོང་ཚར་བའི་གཏམ་རྒྱུད་ཆེས་མང་བོ་ཞིག་གི་ཁྲོད་ནས་ང་རང་ཡིན་གཅིག་མིན་གཅིག་ལམ་དུ་ཆས་དགོས་པར་བཤད་ཀྱི་འདུག བཤད་ལ་དགའ་བ་ནས། ཤེས་པར་དགའ་བ་དང་། ཤེས་པར་དགའ་བ་ནས་སྒྲུབ་པར་དགའ་བ། སྒྲུབ་པར་དགའ་བ་ནས་སྤོབས་པ་ཡོད་དགོས། སྤོབས་པ་ཡོད་པ་ནས་བློས་གཏོང་དགོས་པ་སོགས་ཀྱིས་གནས་ལུགས་མཐར་ཐུག་གིས་ང་ལ་སྐུལ་འདེད་བྱེད་ཀྱི་ཡོད། སྐུལ་འདེད་དེ་དག་ནི་ཕྱོགས་རུས་ཤིག་རེད་མི་འདུག་ལ། དེ་ནི་བདེན་པ་ཞིག་རེད། དྲང་བདེན་ཞིག་རེད། རང་དབང་ཞིག་རེད། ཞི་བདེ་ཞིག་རེད། འདི་དག་གི་ཆེད་དུ། ང་ལ་སྣང་འགྱོད་མེད་པའི་བློས་གཏོང་གི་བསམ་བློ་དེ་རྙེད་ཡོད།