སྔར་ལོའི་ཕྱི་ཟླ་ ༩ པའི་ཚེས་ ༢༦ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༡༠ པ་ཡས་མས་སུ། རྔ་པ་ཀིརྟི་དགོན་པའི་རང་ལོ་ ༡༨ ཡིན་པའི་གྲྭ་བློ་བཟང་སྐལ་བཟང་དང་རང་ལོ་ ༡༩ ཡིན་པའི་གྲྭ་བློ་བཟང་དཀོན་མཆོག་གཉིས་ཀྱིས། རྔ་པ་རྫོང་གི་ཁྲོམ་གཞུང་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱས་སྐབས། རྒྱ་ནག་ཉེན་རྟོག་པས་འཛིན་བཟུང་བཙན་འཁྲིད་བྱས་ཏེ་གར་ཡོད་ཅི་བྱུང་གི་གནས་ཚུལ་ཤེས་རྟོགས་བྱུང་མེད་པ་ལྟར། ཉེ་ལམ་གྲྭ་བློ་བཟང་དཀོན་མཆོག་ལགས་རྒྱ་ནག་གི་སྨན་ཁང་ཞིག་ཏུ་རྐང་ལག་གཏུབ་ཏེ་ཛ་དྲག་གི་གནས་སུ་གྱར་ཡོད་པའི་གནས་ཚུལ་འབྱོར་འདུག
འདིའི་ཐད་གསར་འགོད་པས་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་ལགས་སུ། གྲྭ་བློ་བཟང་དཀོན་མཆོག་དང་ཁོང་དང་མཉམ་དུ་ངོ་རྒོལ་སྐད་འབོད་བྱས་པའི་བློ་བཟང་སྐལ་བཟང་གཉིས་ཀྱི་གནས་སྟངས་སྐོར་དྲིས་པར་ཁོང་གིས། “ གྲྭ་བློ་བཟང་སྐལ་བཟང་གི་གནས་ཚུལ་ད་ལྟའི་ཆར་ཡང་ཤེས་རྟོགས་ཐུབ་ཀྱི་མི་འདུག ཡིན་ནའང་། བློ་བཟང་སྐལ་བཟང་སྔར་ལོའི་ཕྱི་ཟླ་ ༩ པའི་ཚེས་ ༢༦ ཉིན་ཁོང་གཉིས་ཀྱིས་རང་ལུས་མེར་བསྲེག་གིས་རྒྱ་གཞུང་ལ་ངོ་རྒོལ་བྱས་པའི་ཉིན་དེར་ཉེན་རྟོག་པས་འཛིན་བཟུང་བཙན་འཁྲིད་བྱས་རྗེས། བརྒྱུད་ལམ་ཁག་ཅིག་ཏུ་འབར་ཁམས་དང་ཁྲིན་ཏུའུ་གང་རུང་གི་སྨན་ཁང་ཞིག་ཏུ་ཡོད་པའི་གནས་ཚུལ་ཐོན་པ་ལས་ཞིབ་ཕྲའི་གནས་ཚུལ་ཤེས་རྟོགས་བྱུང་མེད་ཀྱང་། ཉེ་ལམ་ང་ཚོའི་གནས་ཚུལ་ཤེས་གསལ་ལ། རྒྱ་གཞུང་གིས་གྲྭ་བློ་བཟང་དཀོན་མཆོག་ལ་སྲོག་གི་ཉེན་ཁ་ཡོད་ཚུལ་བཤད་དེ་ཁོང་གི་རྐང་ལག་བཞི་གཏུབ་ཡོད་འདུག་ལ། ཟ་མ་གཅིག་ཀྱང་ཟ་ཐུབ་ཀྱི་མེད་པར་ཁོག་ལ་སྦུ་གུ་དྲངས་ཏེ། ལྡུག་དགོས་པའི་ཛ་དྲག་གི་གནས་སྟངས་འོག་ལྷག་འདུག་མོད། ད་དུང་ཁོང་ལ་རྒྱ་རིགས་ལྟ་རྟོག་བྱེད་མཁན་དང་སྨན་པ་ཚོས། “ རྒྱལ་ཁབ་ཀྱི་དགྲ་བོ་དང་མང་ཚོགས་ནང་དཀྲུགས་ཤིང་རྒྱག་མཁན ” ཡིན་ཚུལ་བཤད་དེ་ནམ་རྒྱུན་མཐོང་ཆུང་དང་ཁྱད་གསོད་བྱེད་ཀྱིན་པར་མ་ཟད། ད་ལྟའི་ཆར་ཡང་ཉེན་རྟོག་པས་ཁོང་ལ་ངན་སྐུལ་བྱེད་མཁན་རྒྱབ་རོགས་སུ་ཡོད་སོགས་འདྲི་གཅོད་སུན་གཙེར་བཟོ་བཞིན་ཡོད་འདུག ” ཅེས་བརྗོད་བྱུང་།
ཕྱི་ལོ་ ༢༠༠༩ ལོའི་ཕྱི་ཟླ་ ༢ པའི་ཚེས་ ༢༧ ཉིན་རྔ་པ་ཁུལ་དུ་གྲྭ་བཀྲ་བྷེས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱས་པ་ནས་ད་ལྟའི་བར། སྔ་ཕྱི་སྐྱ་སེར་མི་ ༡༦ གིས་བསྟུད་མར་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཡོད་ལ། དེའི་ཁྲོད་སྐྱ་སེར་ ༡༡ འདས་གྲོངས་སུ་ཕྱིན་ཡོད་པ་དང་། གཞན་ ༥ རྒྱ་གཞུང་གིས་བཙན་འཁྲིད་བྱས་རྗེས་གར་ཡོད་ཅི་བྱུང་གི་གནས་ཚུལ་ཅི་ཡང་གསལ་བཤད་མེད་པར་ལྷག་ཡོད།
གསར་འགོད་པ། དོན་གོ
![This satellite image shows Hurricane Melissa southeast of Jamaica at 12:10 GMT on October 27, 2025 [AFP]](https://tibettimes.net/wp-content/uploads/2025/10/Screenshot-2025-10-28-at-5.13.58-PM-360x180.png)
ད་དུང་རྒྱུན་རིང་བོའི་འཐབ་རྩོད་ཁྲོད་དུ་ཅི་ཞིག་འབྱུང་རྒྱུ་ཡིན་ནམ། རྒྱ་ནག་མི་མང་ཡང་ནང་པའི་ཆོས་མཉམ་ལེན་གནང་མཁན་རེད། སོང་ཙང་། ཁ་སྒོ་ཡི་ལས་བྱེད་ཚོས་རྣམ་སྨིན་ལ་བསམ་བློ་བཏང་ན་ལེགས། དེང་སྐབས་རྒྱབ་ལ་ཁྲ་ཁྲ་ཞིག་གོན་རྒྱུ་ཡོད་པ་དང་། ཉམ་ཆུང་ཚོར་མེ་མདའ་སྟོན་རྒྱུ་ལས་སླ་བོ་ཡིན་ནའང་། མི་ཚེ་གང་བོར་དེ་ལྟར་སྡོད་མི་ཐུབ་པར་ཐ་མ་རང་སྡིག་རང་གིས་འཁུར་དགོས་པ་རེད།
འདས་པོ་རླབས་ཆེན།
གསོན་པོ་གཟི་བརྗིད།
མི་རིགས་སམ་རྒྱལ་ཁབ་ཞིག་གི་འཐབ་རྩོད་ལ་ངེས་པར་དུ་བརྒྱུད་དགོས་པའི་གཏན་ཚིགས་འདི་འུ་ཚོ་བོད་པ་ཚང་ལ་ད་གཟོད་སྨིན་སོང་།